Uiga FaaKeriso— O Le Mana Lea e Siitiaina i Tatou i Luga
O le ola e tusa ai ma mataupu faavae o le talalelei o le a aumaia ai le mana, malosi, ma le faalagolago o le tagata lava ia i lona ola faaleagaga, i olaga o le Au Paia o Aso e Gata Ai.
O’u uso e ma tuafafine pele, ma a’u uo pele: I le gasologa o lo’u olaga faigaluega i le avea ai ma se pailate o vaalele, e asiasi atu ai i nisi taimi ni pasese i lo’u pa’usisi e ave ai le vaalele Boeing 747. Latou te fesili mai ai i le tele o ki, o masini, o faiga, ma aiaiga ma le auala e fesoasoani ai nei masini uma i se vaalele tele ma le manaia faapea ina ia lele.
E pei lava o isi pailate uma, ou te fiafia tele ona o lo latou maofa i le lavelave o le vaaiga ua latou vaai i ai i lenei vaalele ma sa latou manatunatu ai i le atamai ma le ofoofogia o le tagata na te faafoeina! A fai atu la’u faamatalaga i le taimi lea, o le a faasalavei mai lo’u toalua ma la’u fanau ma faa’ivi’ivi mai o latou mata,“O pailate e fananau mai ma se fuataga tele o le lotomaulalo!”
I tagata e asiasi atu i lo’u potu, ou te faamalamalamaina i ai faapea e matuai moomia lava se mamanu lelei e gafatia ona faapepepepe i le ea, o faiga ma polokalama eseese e tele, faatasi ai ma afi malolosi ina ia mafai ai ona lele lenei vaalele ma maua ai le mafanafana ma le saogalemu e i latou e faimalaga ai.
Ina ia faafaigofie la’u faamalamalamaga e ala i le taulai atu i faiga faavae, ou te faaopoopo atu i ai e na o le pau lava le mea e manaomia o se matuai alu saoasaoa lea agai i luma, o se masii malosi i luga, ma le sa’o o le taatia o le vaalele, ona faaaoga lea o tulafono o le natura e aveina atu ma le saogalemu le 747 ma ana pasese i luga o konetineta ma vasa, i luga o mauga maualuluga ma faititili matautia seia oo atu i lona taunuuga.
I tausaga e lei leva atu, sa masani ona ou mafaufau ai faapea, o le avea ma se tagata O Le Ekalesia a Iesu Keriso o le Au Paia o Aso e Gata Ai ua valaaulia ai foi i tatou ina ia faia ni fesili faapea. O a faavae, po o mataupu faavae o lo tatou auai i le malo o le Atua i le lalolagi? A maea ona faia mea uma, o le a tonu lava le mea o le a tauaveina i tatou i taimi e matuai manaomia ai lo tatou taunuuga faamoemoeina e faavavau?
O le Ekalesia, faatasi ai ma ona faalapotopotoga ma polokalama ua faatulagaina, o loo ofoina mai ai le tele o gaoioiga taua mo ona tagata, o loo faaautu i le fesoasoani i aiga ma tagata taitoatasi ina ia auauna atu i le Atua ma isi. Peitai, o nisi taimi, e mafai ona foliga mai o nei polokalama ma gaoioiga ua latalata tele i le totonugalemu o o tatou loto ma agaga nai lo mataupu autu ma mataupu faavae tonu o le talalelei. O faiga, o polokalama, o tulafono, ma faatulagaga o faalapotopotoga e fesoasoani tele mo lo tatou alualu i luma faaleagaga iinei i le lalolagi, ae aua nei galo ia i tatou o na mea e mafai ona suia.
I le faatusatusa atu i ai, o le ute o le talalelei—o aoaoga faavae ma mataupu faavae—o le a le suia lava. O le ola e tusa ai ma mataupu faavae o le talalelei o le a aumaia ai le mana, malosi, ma le faalagolago o le tagata lava ia i lona ola faaleagaga, i olaga o le Au Paia o Aso e Gata Ai.
O le faatuatua o se mataupu faavae lena o le Mana. Tatou te manaomia lenei puna o lenei mana i o tatou olaga. E galue le Atua e ala i le mana, ae o lenei mana e masani ona faaaogaina e tusa ai ma lo tatou faatuatua. “O le faatuatua e leai ni galuega, ua mate lava ia” (Iakopo 2:20). E galue le Atua e tusa ai ma le faatuatua o Lana fanau.
Na faamalamalama mai e le Perofeta o Iosefa Samita, “Ou te aoaoina i latou i mataupu faavae sa’o, ona latou pulea lea o i latou lava” (sii mai e John Taylor, i le “The Organization of the Church,” Millennial Star, Nov. 15, 1851, 339). Ia te au, o lenei aoaoga ua matuai manaia lava le tuu sa’o mai. A o tatou tauivi ina ia malamalama, faatatau, ma ola i mataupu faavae sa’o o le talalelei, o le a matuai faateleina atu lo tatou ola faalagolago ia i tatou lava i le faaleagaga. O le mataupu faavae o le ola faalagolago o le tagata ia te ia lava i le faaleagaga e tupu mai i se aoaoga faavae o le Ekalesia e faapea ua tuuina mai ia i tatou e le Atua—le saolotoga. Ou te talitonu o le saolotoga e filifili ai o se tasi lea o meaalofa silisili lea a le Atua i Lana fanau, e sosoo atu i le ola lava ia.
Ina ua ou suesue ma mafaufau loloto i le saolotoga e filifili ai ma ona taunuuga faavavau, na ou iloaina ai o i tatou moni lava o fanau agaga a le Atua, ma o lea e tatau ai ona tatou amio e tusa ai. O lenei malamalamaaga o loo faamanatu mai ai foi ia te au e faapea i le avea ai ma tagata O Le Ekalesia a Iesu Keriso o le Au Paia o Aso e Gata Ai, o i tatou foi o se vaega o se aiga tele i le lalolagi atoa o le Au Paia.
O le faatulagaga o faalapotopotoga a le Ekalesia ua mafai ai ona fetuutuunai e tusa ai ma le tetele, o le tuputupu a’e, ma manaoga o a tatou faapotopotoga. O loo i ai le polokalama a iunite faavae lea o loo i ai se faatulagaga faigofie ma nai sauniga laiti. O loo i ai foi a tatou uarota tetele faatasi ai ma punaoa tetele mo faalapotopotoga ina ia feauaunaai ai. Ua faavaeina uma i totonu o polokalama musuia a le Ekalesia ina ia fesoasoani ai i tagata ia “o mai ia Keriso, ma ia faaatoatoaina ia te ia” (Moronae 10:32).
O nei vaega eseese uma e filifili mai ai e tutusa uma le taua faalelagi aua o le mataupu o le talalelei toefuataiina a Iesu Keriso i iunite taitasi. Ou te molimau atu i le avea ai ma se Aposetolo a le Alii o Iesu Keriso, o loo soifua o Ia, e moni le talalelei, ma o loo ofoina mai ai ia tali i luitau o tagata taitoatasi ma le lautele o fanau a le Atua o loo i ai i le lalolagi i aso nei.
O le taumafanafana lenei na ma asiasi atu ai ma lo’u toalua i tagata o le Ekalesia i le tele o atunuu i Europa atoa. I nisi vaega o Europa, ua loa tausaga o i ai le Ekalesia, talu mai lava le 1837. O loo i ai se talatuu maoae o tagata faamaoni o le Ekalesia i Europa. O le taimi nei, ua silia ma le 400,000 tagata o le Ekalesia i Europa. A tatou vaavaai atu i augatupulaga uma o e na faimalaga mai Europa i Amerika i le seneturi lona sefuluiva ma le luasefulu, o lena aofaiga e faigofie lava ona faatoateleina i sina taimi.
Aisea na tuua ai e le toatele o tagata faamaoni o latou atunuu i le popofou o le Ekalesia? E tele mafuaaga e mafai ona ta’ua: ina ia sosolaese mai sauaga, ina ia fesoasoani e fausia le ekalesia i Amerika, ina ia faaleleia o latou tulaga o le tamaoaiga, o le mananao ina ia latalata i se malumalu, ma le tele lava o isi mafuaaga.
O loo lagonaina pea e Europa le aafiaga o lenei malaga. Ae o le malosi na maua mai ai mai le tele o augatupulaga faamaoni o tagata o le Ekalesia ua matuai manino mai nei lava. Ua tatou vaaia le toatele o alii talavou ma tamaitai talavou faapea ulugalii matutua ua auauna atu i ni misiona mo le Alii; ua tatou vaaia le tele o faaipoipoga i le malumalu; ua tatou vaaia le lototetele ma le totoa o tagata e faasoa atu le talalelei toefuataiina. E le o maua ia aoaoga moni a Keriso i tagata o Europa faapea ma le tele o isi vaega o le lalolagi. O lenei le mauaina e tatau, ma e mafai, ma o le a faatumulia i le savali o le talalelei toefuataiina a o ola ma folafola atu e o tatou tagata lelei ma le lotototoa lenei talalelei, ma le lototetele naua ma le faatuatua.
I le faalauteleina o le Ekalesia i Europa, o loo i ai nei ni atunuu e lei atoa se 15 tausaga talu ona i ai le Ekalesia. Sa ma talanoa ma se peresitene o se misiona o loo galue i lona atunuu o Rusia, e faatoa fitu tausaga talu ona auai i le Ekalesia. Na ia ta’u mai ia te au, “O le masina lava na ou papatiso ai, o le masina foi lena na valaauina ai au e avea ma peresitene o le paranesi.” Pe na ia lagonaina le lofituina i nisi o taimi? E mautinoa lava! Pe sa ia taumafai e faataunuu ia polokalama uma o le Ekalesia? E leai! Na faapefea ona ia tuputupu ae malosi i totonu o se faapotopotoga toaitiiti faapea, i se taimi puupuu faapea? Na ia faamatalaina, “Na ou iloa ma lo’u agaga atoa e moni le Ekalesia. O le aoaoga o le talalelei na faatumulia ai lo’u mafaufau ma lo’u loto. A o matou auai i le Ekalesia, na matou lagona le avea o i matou ma se itutino o le aiga. Na matou lagonaina le mafanafana, faatuatuaina, ma le alofagia. Sa toaitiiti i matou, ae sa matou taumafai uma e mulimuli i le Faaola.”
Sa latou felagolagomai, sa latou faia le mea sili sa latou mafai, ma sa latou iloa lava e moni le Ekalesia. E le o le faalapotopotoga na tosina ai o ia, ae o le malamalama o le talalelei, ma o lenei malamalama na faamalolosia ai na tagata lelei.
I le tele o atunuu o loo i ai le Ekalesia i ona tulaga tau amata, ma o tulaga o le faatulagaina e lei taitai ona atoatoa. Ae peitai, o le a mafai e tagata ona maua se molimau atoatoa i le moni i totonu o o latou loto. A o nonofo ai nei tagata i o latou atunuu ma atiina ae le Ekalesia, e ui i luitau ma faigata e faatatau i le tamaoaiga, o le a faafetaia lava pea e augatupulaga i le lumanai ia na paionia lototetele o ona po nei. Ua latou usiusitai i le valaaulia alofa a le Au Peresitene Sili na tuuina mai i le 1999:
“Ua silafia e le Alii ua alagatatau ona sauniuni mo lo tatou vaitaimi, o faamanuiaga, e aofia ai le faateleina o malumalu, i le tele o atunuu o le lalolagi. O le mea lea, matou te toe fia fai atu ai ma saga fai atu ai i le fautuaga ua loa ona i ai i tagata o le Ekalesia, ina ia nonofo ai pea i o latou atunuu ae le o le malaga mai e nonofo mau i le Iunaite Setete… .
“Afai e afifio ma papaaao tagata o le ekalesia i le lalolagi atoa i o latou lava atunuu, e galulue e atina’e le Ekalesia i o latou lava atunuu, o le a oo atu ai faamanuiaga silisili i le tagata lava ia faapea foi i le Ekalesia atoa” (Tusi a le Au Peresitene Sili, Tesema 1, 1999).
Pe mafai ona ou faaopoopoina atu se upu lapatai ia te outou na o loo nonofo i uarota ma siteki tetele. E ao ona tatou faaeteete ina ia aua nei faaautu la tatou molimau i tulaga o fegalegaleaiga i le siosiomaga o le Ekalesia, po o gaoioiga mananaia, polokalama, ma faalapotopotoga i a tatou uarota ma siteki. O nei mea uma e taua ma e aoga ona i ai—ae le lava lena. E oo lava foi i faauoga e le lava.
Ua tatou iloaina o loo tatou ola i se taimi o faigata, mala, ma taua. Ua taufai malolosi o tatou lagona faapea le toatele o isi i le matuai moomia lava lea o se “olo, ma se sulufaiga mai le afa, ma le ita pe a liligi ifo e le faafefiloia i le lalolagi atoa” (MFF 115:6). E faapefea ona tatou maua se nofoaga faapea o le saogalemu? Na aoao mai e le Perofeta a le Atua o Peresitene Hinckley: “O lo tatou saogalemu e maua mai le mama o o tatou olaga. O lo tatou malosi e maua mai i lo tatou amiotonu” (“Seia Tatou Toe Feiloai,” Liahona, Ian. 2002, 104).
Tatou toe manatuaina faatasi le auala na aoaoina ai e Keriso Ana Aposetolo, i le manino ma le tuusao, i le amataga o Lana galuega faaletino, “[Ina] mulimuli mai ia ia te au, ou te faia oulua ma fai faiva i tagata” (Mataio 4:19). O le amataga foi lea o le galuega a Aposetolo e Toasefululua, ma e ou te masalo sa i ai so latou lagona le atoatoa, e pei foi o au, o le ua valaauina i lenei galuega paia. Ou te fia fautua atu faapea, o i na aoao mai ai e le Faaola lava Ia se lesona e uiga i mataupu autu ma mea e faamuamua i le olaga. Tatou te moomia taitoatasi ona muamua lava “mulimuli ia te Ia,” afai tatou te faia lenei mea, o le a faamanuiaina i tatou e le Faaola e sili atu nai lo mea tatou te mafaia ina ia avea ai ma tagata ua Ia finagalo tatou te oo i ai.
O le mulimuli ia Keriso o le avea atili lea faapei o Ia. O le aoao mai lea i Lona tagata. I le avea ai ma fanau agaga a lo tatou Tama Faalelagi, ua ia te i tatou le malosi e tuuina ai i totonu o o tatou olaga ma tagata ia uiga faaKeriso. Ua valaaulia i tatou e le Faaola ina ia aoao i Lana talalelei e ala lea i le ola ai i Ana aoaoga. O le mulimuli ia te Ia, o le faaaogaina lea o mataupu faavae sa’o ona tatou molimauina lea mo i tatou lava ia faamanuiaga e mulimuli mai ai. O lenei faiga e faigata ma e faigofie foi i le taimi lava e tasi. Na faaupuina e perofeta anamua ma ona po nei i ni upu se tolu “Tausi ia poloaiga”—e leai se mea e sili atu, pe itiiti ifo.
O le atiina ae o uiga faaKeriso i o tatou olaga e le o se galuega e faigofie, aemaise lava pe a tatou o ese mai mea faalauaitele ma manatunatuga ae amata ona feagai ma le olaga moni. O le tofotofoga lava e oo mai lea i le faatinoina o mea tatou te folafola atu. E mafai ona tatou siakiina lo tatou alualu i luma i lea tulaga pe afai e moomia ona atagia atu ia uiga faaKeriso i o tatou olaga—i le avea ai ma se tane po o se ava, i le avea ai ma se tama po o se tina, o se atalii po o se afafine, i a tatou faauoga, i a tatou galuega, i a tatou pisinisi, ma mea tatou te fiafia ai. E mafai ona tatou iloaina lo tatou alualu i luma e faapena foi ia i latou o loo siomia i tatou a o tuputupu a’e pea lo tatou malosi i le “faia o mea uma i le paia atoatoa i [Ona] luma” (MFF 43:9).
O loo faamatalaina e tusitusiga paia le tele o uiga faaKeriso e moomia ona tatou atiina ae i le taimi o o tatou olaga. E aofia ai le malamalama ma le lotomaulalo, alofa mama ma le agalelei, usiusitai ma le maelega, faatuatua ma le faamoemoe. O nei uiga faaletagata e tutoatasi lava i tulaga o faalapotopotoga a o tatou iunite o le Ekalesia, o o tatou tulaga faaletamaoaiga, o tatou tulaga faaleaiga, aganuu, lanu, po o gagana. O uiga faaKeriso o ni meaalofa mai le Atua. E le mafai ona atiina ae e aunoa ma Lana fesoasoani. O le fesoasoani e tasi lea tatou te manaomia uma lea ua tuuina fua mai ia i tatou e ala i le Togiola a Iesu Keriso. O le i ai o le faatuatua ia Iesu Keriso ma Lana Togiola o lona uiga o le faalagolago atoa atu lea ia te Ia—faalagolago i Lona mana faavavau, atamai, ma le alofa. O uiga faaKeriso e oo mai i o tatou olaga a o tatou faaaogaina ma le amiotonu o tatou saolotoga. O le faatuatua ia Iesu Keriso e tau atu ai i galuega. Afai tatou te faatuatua ia Keriso, ua lava lo tatou faatuatua i le Alii e mulimuli ai i Ana poloaiga—e tusa lava pe le atoatoa lo tatou malamalama i o latou mafuaaga. I le saili atu ina ia avea atili e faapei o le Faaola e moomia ai ona tatou toe iloiloina o tatou olaga e le aunoa ma faalagolago i le ala o le salamo moni, ma faalagolago i le atoatoa ona lelei o Iesu Keriso ma faamanuiaga o Lana Togiola.
E mafai ona avea le atiina ae o uiga faaKeriso ma se faagasologa e tiga. E moomia ona tatou saunia e taliaina le taitaiga ma le faasaoga mai le Alii ma Ana auauna. O lenei konafesi a le lalolagi atoa faatasi ai ma ona musika ma afioga tulei, o loo ofoina atu ai le mana faaleagaga, taitaiga, ma faamanuiaga “mai luga” (MFF 43:16). O se taimi o le a aumaia ai e le siufofoga o musumusuga patino ma faaaliga, le filemu i o tatou agaga ma o le a aoaoina ai i tatou i le auala e avea atili ai faapei o Keriso. O lenei siufofoga o le a malu e pei o le leo o se uo pele ma o le a faatumulia ai o tatou agaga pe afai ua matuai lava le momomo o o tatou loto.
O le avea atili e faapei o le Faaola, o le a faatupulaia ai lo tatou mafaia ona “tele lo tatou faamoemoe, ona o le mana o le Agaga Paia” (Roma 15:13). O le a tatou “tuuese mea a lenei lalolagi, a ia saili i mea a se lalolagi sili atu” (MFF 25:10).
Ou te toe ta’u atu ai i tua i la’u tala faatatau i se fuafuaga maoae sologa lelei mai le amataga. Sa ou talanoa i le taulai atu i faavae. O uiga faaKeriso o faavae ia. O mataupu faavae ia o le a gaosia “le mana e siitiaina i tatou i luga.” A o tatou atiina ae uiga faaKeriso i o tatou lava olaga, o lea laasaga ma lea laasaga, o le a latou “lagolagoina i [tatou] e pei o i luga o apaau o aeto” (MFF 124:18). O lo tatou faatuatua ia Iesu Keriso o le a maua mai ai le mana ma se saoasaoa malosi agai i luma; o lo tatou faamoemoe tumau ma le malosi o le a maua ai se masii malosi i luga. O le faatuatua ma le faamoemoe o le a aveina atu ai i tatou i luga o vasa o faaosoosoga, i luga o mauga o faigata, ma toe aumaia ai i tatou ma le saogalemu i lo tatou taunuuga ma le aiga e faavavau.
Ou te molimau atu ai i nei mea i le suafa o Iesu Keriso, amene.