Sauniuniga mo le Toefuataiga ma le Afio Mai Faalua: “E i Ou Luga Ai Pea Lo’u Lima”
Na i ai le aao [o le Alii] i luga o le galuega o le Toefuataiga a o le’i faavaeina lenei lalolagi, ma o le a faaauau pea seia oo i Lona Afio Mai Faalua.
O le tausaga lenei o loo tatou faamanatuina ai le lona 200 o tausaga o le soifua mai o le Perofeta o Iosefa Samita. Tatou te molimau atu i le lalolagi, o ia o se perofeta a le Atua, na muai faauuina e faataunuuina le Toefuataiga o le talalelei a Iesu Keriso. O lenei mea na ia faia i lalo o le taitaiga a lo tatou Faaola, o Le na fetalai atu i se perofeta na muamua atu, “O lo’u igoa o Ieova, ma ua ou iloa le i’uga mai le amataga; o le mea lea e i ou luga ai pea lo’u lima.”1
Ou te iloa [na i ai] le aao o le Alii i le Toefuataiga o le talalelei. E ala mai i osigataulaga musuia a le fanau a le Atua mai lava i le talafaasolopito o le lalolagi, na faapena ona faataatiaina ai le faavae o le Toefuataiga, ma o loo sauniuni foi le lalolagi mo le Afio Mai Faalua o lo tatou Alii ma le Faaola o Iesu Keriso.
O lana talalelei sa muai faatulagaina i le fogaeleele e amata ia Atamu, ma sa aoaoina i tisipenisione uma lava e ala i na perofeta e pei o Enoka, Noa, Aperaamo, Mose ma isi. O nei perofeta taitoatasi sa latou muai faailoa mai le afio mai o Iesu Keriso e togiola mo agasala a le lalolagi. O na valoaga ua faataunuuina. Sa faatuina e le Faaola Lana Ekalesia. Na ia tofia Ana Aposetolo ma faatulagaina Lana perisitua. O le mea aupito sili ona taua, sa Ia tuuina atu Lona lava soifua ma toe faatuina a’e, ina ia toetutu ai tagata uma, o lea ua faataunuuina ai le taulaga togiola. Peitai, e le o le mutaaga lena.
Ina ua mavae le Toetu o le Faaola, sa Ia tuuina atu i Ana Aposetolo e taitaiina le Ekalesia ma faia sauniga o le talalelei. O lo latou faamaoni i lenei matafaioi, sa sauaina ai i latou, ma o nisi na iu lava ina maliu fasia ai. O le taunuuga, sa le’i toe i ai le pule o le perisitua a le Alii i luga o le fogaeleele, ma na pau atu ai le lalolagi i le pouliuli faaleagaga. O seneturi na sosoo ai, sa i ai i le fanau a le Atua le Malamalama o Keriso, sa mafai ona tatalo, ma lagona ia aafiaga a le Agaga Paia. Peitai, sa aveesea le atoatoaga o le talalelei. Sa leai se tasi na totoe i le lalolagi na i ai le mana ma le pule e taitai ai le Ekalesia pe faataunuu ai sauniga paia e pei o le papatisoga, tuuina atu o le meaalofa o le Agaga Paia, faapea ai ma sauniga faaola o le malumalu. Na toetoe o tagata uma na le maua ni tusitusiga paia, ma o le toatele lava o tagata sa le iloa faitau pe tusitusi.
O le mauaina o tusitusiga paia ma le fesoasoani i fanau a le Atua ia iloa faitau i ai, o le laasaga muamua lea i le Toefuataiga o le talalelei. O le Tusi Paia sa muai tusia i le faa-Eperu ma le faa-Eleni, o gagana e le iloa e tagata i Europa atoa. Ma, pe a ma le 400 tausaga talu ona mavae le maliu o le Faaola, na faaliliuina ai le Tusi Paia e Ierome i le faa-Latina. Ae sa le maua uma lava e tagata ia tusitusiga paia. Sa masani ona tusilimaina e faifeau faamonaseri ia kopi, ma e tele tausaga na faaalu e faamaeaina ai ia [tusitusiga] taitasi.
Ma, e ala mai i aafiaga a le Agaga Paia, na amata ai ona tupu ae i loto o tagata se fiafia e suesue. O lenei Amataga Fou po o le “toefanauina” na salalau atu i Europa atoa. I le faaiuga o le vaitaimi o le 1300, na amataina ai e se faifeau e igoa ia Ioane Uikilifi se faaliliuga o le Tusi Paia mai le faaLatina i le faa-Peretania. Talu ai ona o le faa-Peretania i lena taimi o se gagana fou ma sa tau le iloa, o lea na manatu ai taitai o ekalesia e le tatau ona faailoa atu le afioga a le Atua. Sa silafia lelei e nisi taitai, a mafai ona faitau e tagata ma faauiga le Tusi Paia mo i latou lava, o le a le tonu ona aoaoga faavae; sa popole nisi i tagata na i ai a latou lava tusitusiga paia, ne’i o latou le manaomia le ekalesia ma tuu ai lo latou lagolagoina [o le ekalesia] i tulaga tautupe. O lea, na molia ai Uikilifi o se tagata e le talitonu ma faia e pei ona tatau i ai. Ina ua maliu o ia ma tanumia, sa toe laga ae ona ponaivi ma susunuina. Peitai, e le’i mafai ai ona taofia le galuega a le Atua.
A o musuia nisi e faaliliu le Tusi Paia, sa musuia foi nisi e sauniuni ia auala e lolomi ai. E oo atu i le 1455 ua faia e Johannes Gutenberg masini lomitusi o se ituaiga feaveai, ma o le Tusi Paia o se tasi lea o tusi muamua na ia lolomiina. O le taimi muamua lea na mafai ai ona lolomi ni kopi se tele o le tusitusiga paia i se tau na gafatia e le toatele.
O le taimi foi lea, na oo atu ai musumusuga a le Atua i le au suesue. O le 1492 na tuua ai e Christopher Columbus ia Sepania e saili se auala fou e agai atu i Sasae Mamao. Sa taitaiina e le aao o le Atua ia Columbus i lana malaga. Sa ia faapea mai, “Na tuuina mai e le Atua ia te au le faatuatua, ma na sosoo ai ma le lototele.”2
O nei sailiga na saunia ai le ala mo isi fesoasoaniga faaopoopo. O le popofou o le vaitau e 1500, na lesitala ai le taulealea o William Tyndale i le Iunivesite o Oxford. O iina sa ia aoao ai i le galuega a le tagata atamai i le Tusi Paia o Erasmus, o le na talitonu o tusitusiga paia o “taumafa ia o le agaga [o le tagata]; ma … e tatau ona faatumulia ai le taele o [lona] loto ma le mafaufau.”3 O ana suesuega, na atiina ae ai e Tyndale se fiafia i le afioga a le Atua, ma se naunau ina ia mafai ona fafagaina ai le fanau a le Atua mo i latou lava.
O le taimi lava foi lenei, na faailoa mai ai e se alii Siamani, o se faifeau ma o se polofesa foi, e igoa ia Matini Luteru, ni vaega e 95 na sese ai le ekalesia i lona vaitaimi, lea sa ia auina atu ma le lototele i se tusi i ona ta’ita’i. I Suitiselani, na lolomi ai e Huldrych Zwingli ni tusitusiga se 67 o ni suiga. Sa fesoasoani John Calvin i Suitiselani, John Knox i Sikotilani, ma le toatele o isi tagata, i lenei taumafaiga. Na amataina ai se suiga.
O le taimi lea, ua avea William Tyndale ma se faifeau aoaoina ma sa lelei lana tautala i ni gagana se valu. Sa talitonu o ia, o se faaliliuga tuusao mai le faa-Eleni ma le faa-Eperu i le faa-Peretania, o le a sili atu ona sa’o ma faitaugofie nai lo le faaliliuga a Uikilifi mai le faa-Latina. O lea na faamalamalamaina ai e le Agaga o le Atua ia Tyndale, ma faaliliuina ai le Feagaiga Fou ma se vaega o le Feagaiga Tuai. Sa lapataiina o ia e ana uo, o le a faapea ona fasiotia o ia ona o le faia o lea mea, peitai, sa le mata’u ai o ia. Na i ai se taimi, a o la finau ma se tagata atamai, sa ia faapea atu, “Afai e faasaoina e le Atua lou ola mo ni tausaga se tele, o le a ou faia ia sili atu le malamalama o se tamaitiiti faifaatoaga i tusitusiga paia nai lo oe.”4
Mulimuli ane, na fasiotia Tyndale, e pei foi o le toatele o isi tagata, ona o ana taumafaiga—na sisi o ia ma susunuina i luga o se pou e latalata i Brussels. Ae peitai, e le’i aveesea ai le talitonuga na faapea ona faaumatia ai lona ola. E faitau miliona [tagata] ua iloa mo i latou lava mea na aoaoina e Tyndale i lona olaga atoa: “O le natura o le afioga a le Atua, po o ai lava e faitau i ai, o le a amata i le taimi lava lena, ona avea o ia ma se tagata e sili atu ona lelei, seia oo ina avea o ia ma se tagata atoatoa.”5
O vaitaimi o le lē mautonu i tulaga faaupufai na aumaia ai ni suiga. Talu ai ona o se feeseeseaiga i le ekalesia i Roma, sa folafola ai e le Tupu o Enele VIII, o ia o le ulu o le ekalesia i Egelani, ma e tatau ona i ai ni kopi o le Tusi Paia faa-Peretania i falesa uma o le ekalesia. Talu ai ona o le matelaina mo le talalelei, o lea na lolofi atu ai tagata i nei falesa, ma faitau atu e le tasi i le isi ia tusitusiga paia seia oo ina le lagona o latou leo. Sa faaaogaina foi le Tusi Paia o se tusi faavae e aoao ai le faitau tusi. E ui lava ina sa faaauau pea ona maliliu fasia [tagata] i Europa, ae na oo mai lava le iuga o taimi pogisa o le lē malamalama. E pei ona tautino mai e se tasi o aoao a o lei susunuina: “O le a matou tutuina se sulu i lenei aso i Egelani, e ala i le Alofa Tunoa o le Atua, ma ou te faamoemoe o le a lē mate lava.”6
Tatou te faailoa atu le agaga faafetai ia i latou uma o e na soifua i Egelani ma Europa atoa, o e na fesoasoani e tutuina lena sulu. E ala mai i le alofa tunoa o le Atua, ua mumu tele ai le sulu. I lona matauina o le fevaevaeai o totonu o lona lava atunuu, na faatagaina ai e le Tupu o Egelani o King James Muamua, se lomiga aloaia fou o le Tusi Paia. Na taua e faapea, e silia ma le 80 pasene o faaliliuga a William Tyndale o le Feagaiga Fou ma o se vaega tele o le Feagaiga Tuai, (le Pentateuch, po o le Kenese e oo atu i le Teuteronome, ma le Iosua e oo atu i le Nofoaiga Tupu) na tuu ai lava i le Lomiga a King James. 7 E i ai se taimi, e oo atu ai lena lomiga i se atunuu fou, ma faitauina ai e se tama faifaatoaga e 14 tausaga e igoa ia Iosefa Samita. Po o se mea ea e maofa ai, ona o le Lomiga a King James, o le Tusi Paia faa-Peretania faamaonia lea a le Ekalesia a Iesu Keriso o le Au Paia o Aso e Gata Ai i le aso?
Sa faaauauina sauaga faalelotu i Egelani i lalo o le taitaiga a le atalii o James o Charles, ma e toatele na musuia e saili atu le saolotoga i atunuu fou. Sa i ai foi ma i latou e saili i nuu paia [Pilgrims], o e na taunuu atu i Amerika i le 1620, o le vaega tonu lea o le lalolagi na iloa e Columbus i le silia i le 100 tausaga muamua atu. E le’i leva ae taunuu atu isi tagata malaga, o i latou na i ai na aofia ai Roger Williams, o le na faavaeina ma avea mulimuli ane ma kovana o le Motu o Rhode, o le sa faaauau pea ona saili mo le Ekalesia moni a Keriso. Fai mai Williams: “E le o i ai se ekalesia faavaeina lelei a Keriso i le fogaeleele, po o se tagata ua faatagaina e faataunuuina soo se sauniga o le ekalesia, pe mafai foi ona i ai, seiloga e auina mai ni Aposetolo fou, e le Faaao sili o le ekalesia lea na te sailia lona afio mai.”8
E silia ma se seneturi mulimuli ane, o na lava lagona faalelotu na taitaiina ai i latou na muai taunuu i se atunuu fou i le konetineta o Amerika. I lalo o le aao o le Atua, sa latou puipuia ai saolotoga faalelotu mo tagata uma, i se tautinoga musuia o le Pili o Aia Tatau. O le sefulufa o tausaga mulimuli ane, i le aso 23 o Tesema, 1805, na soifua mai ai le Perofeta o Iosefa Samita. Ua toeitiiti mae’a le sauniuniga mo le Toefuataiga.
A o avea ma se alii talavou, “sa matua mafaufau loloto lava [Iosefa] i aso o lea fefinauaiga tele”9 i le mataupu tau i lotu. Talu ai ona sa soifua mai o ia i se atunuu e saoloto i tulaga faalelotu, sa mafai ai ona ia fesiligia po o le fea o nei lotu uma ua moni. Ma talu ai ona ua faaliliuina le Tusi Paia i le faa-Peretania, na mafai ai ona ia sailia se tali mai le afioga a le Atua. Sa faitau o ia i le Tusi o Iakopo, “A e afai ua leai se poto i so outou, ina ole atu ia i le Atua,”10 ma faia e pei ona tauina mai. O le tali i lana tatalo, na faaali mai ai le Atua le Tama ma Lona Alo o Iesu Keriso ia te ia.11 O lenei tamaitiiti faifaatoga faatauvaa, o le perofeta na filifilia e le Atua e toefuatai mai le Ekalesia [na i ai] anamua a Iesu Keriso ma Lana perisitua i nei aso e gata ai. O lenei Toefuataiga, o le tisipenisione mulimuli o le atoaga o taimi, ua toefuatai uma mai ai faamanuiaga o le perisitua lea e mafai e le tagata ona umia i le fogaeleele. Faatasi ai ma lenei matafaioi paia, o lana galuega e le o le suia pe tetee i mea ua uma ona i ai i le lalolagi. Ae o le toefuataiina o mea sa i ai i le lalolagi a ua leiloloa.
O le Toefuataiga na amata i le Uluai Faaaliga i le 1820, ma faaauau ai i le oo mai o le Tusi a Mamona: O Se Tasi Molimau ia Iesu Keriso. O le aso 21 o Setema, 1823, na asiasi mai ai le agelu o Moronae ia Iosefa Samita, ma aoaoina o ia e uiga i se tusitusiga o anamua o loo i ai “le atoatoaga o le talalelei e faavavau … e saunia ai i le afio mai faalua o le Mesia.”12 Na tusia i papatusi auro, o le Tusi a Mamona o loo i ai se tala i galuega a Keriso i le Itulagi i sisifo, e pei foi ona faamaumauina i le Tusi Paia ia Lona soifuaga ma [Ana] galuega i le Nuu Paia. Na tauaaoina e Iosefa ia papatusi auro i le fa tausaga mulimuli ane ia Tesema 1827, ma amata ai ona faaliliuina le Tusi a Mamona.13
A o faaliliuina, sa faitau ai Iosefa Samita ma lana failautusi o Oliva Kaotui e uiga i le papatisoga. O lo la naunau ina ia maua lenei faamanuiaga mo i laua lava, na oo mai ai le toefuataiga o le Perisitua Arona i le aso 15 o Me, 1829, i lalo o aao o Ioane le Papatiso.14
Na sosoo mai ai ma le toefuataiga o le Perisitua Mekisateko, lea na tuuina atu i luga o Iosefa ma Oliva e Aposetolo o Peteru, Iakopo, ma Ioane, o e na umia ki. I le tuanai ai o seneturi o le pogisa faaleagaga, na toefuatai mai ai i le fogaeleele le mana ma le pule e galulue ai i le suafa o le Atua, i le faataunuuina o sauniga paia, ma ia taitaiina ai Lana Ekalesia.
O uluai kopi o le Tusi a Mamona na lolomiina i le aso 26 o Mati, 1830. I ni nai vaiaso mulimuli ane, i le aso 6 o Aperila, na toe faatulagaina ai le Ekalesia moni a Keriso i nei aso e gata ai, i le fale o Pita Uitimera, le Matua, i Fayette, Niu Ioka. I le faamatalaina o aafiaga o nei mea na tutupu i le lalolagi, na tusi ai e Elder Parley P. Pratt:
Ua tafa ata, mavae le po,
Le fu’a [a] Siona ua tu mai!
Ua oo mai se aso fou,
Le lalolagi mamalu ai.15
Ua iu lava ina mavae le pogisa umi, ae oo mai faaaliga, ma na faapea ona oo mai ai se tusitusiga paia faaopoopo. Na taliaina e le Ekalesia le Mataupu Faavae ma Feagaiga i le aso 17 o Aokuso, 1835. Na amata ai foi i lena tausaga le faaliliuga o le Penina Tau Tele, le tusi a Aperaamo.
E le’i umi ae sosoo mai ma le pule faaopoopo e galulue ai i le suafa o le Alii. Na faapaiaina le Malumalu o Katelani i le aso 27 o Mati, 1836.16 I totonu o lena malumalu, na faaali mai ai le Faaola ia Iosefa Samita ma Oliva Kaotui, na sosoo ai ma le faaali mai o Mose, Elaia, ma Elia o e na tuuina mai ki faaopoopo o le perisitua i le Perofeta.17
O lenei malamalama o le talalelei o le a le mafai lava ona toe aveesea mai le lalolagi. O le 1844 na tuuina atu ai e Iosefa Samita nei ki uma o le perisitua i luga o Polika Iaga, Ioane Teila, Uilifoti Uitilafi, ma o latou uso a Aposetolo. Na saunoa le Perofeta, “Sa ou ola ina ia ou vaai i lenei faigata, lea na tuu mai i luga o o’u tauau, ma faasolo atu i luga o tauau o isi tamalii; … ua totoina ki o le malo i luga o le fogaeleele, ina ia le toe aveeseina lava e oo i le faavavau… . E tusa lava pe o le a le mea ou te oo i ai.”18 O le mea e faaanoanoa ai, e tolu masina mulimuli ane, i le aso 27 o Iuni, na maliu fasia ai Iosefa Samita ma lona uso o Ailama i Karefasi, Ilinoi.
O Elder Ioane Teila, o le na i ai faatasi ma le Perofeta ina ua maliu fasia o ia, na molimau mai e uiga ia te ia: “O Iosefa Samita, le Perofeta ma le Tagatavaai o le Alii, e sili atu ana mea ua faia, vagana o Iesu lava, mo le faaolataga o tagata i lenei lalolagi, i lo soo se isi lava tagata ola na ola ai.”19
Ou te molimau atu o le galuega a le Perofeta o Iosefa Samita o le galuega a le Faaola. I le galuega a le Alii, e le o taimi uma e faigofie ai le ala. E masani ona manaomia ai osigataulaga, ma tatou te ono oo foi i nisi o faigata. Ae peitai, o le auauna atu ia te Ia, tatou te iloa ai o loo i ai moni Lona aao i o tatou luga. Sa faapena foi mo Uikilifi, Tyndale, ma le afe ma afe o isi, o e na saunia le ala mo le Toefuataiga. Na faapena foi i le Perofeta o Iosefa Samita ma i latou uma o e na fesoasoani e folasia mai le talalelei toefuataiina. Ua faapea lava, ma o le a faapena foi mo i tatou.
E finagalo le Alii ina ia pei lo tatou faamaoni, lo tatou naunau, lo tatou lototetele, o i latou o e na muamua atu ia i tatou. Na valaauina i latou e tuuina atu o latou ola mo le talalelei. Ua valaauina i tatou ina ia ola i o tatou olaga mo le faamoemoe lava lea e tasi. I nei aso e gata ai, ua faapitoa se mafuaaga tatou te faia ai faapea.
A o le’i oo i lena po paia i Peteleema, o mea na tutupu i le talafaasolopito ma afioga a perofeta o tisipenisione uma, na saunia ai le ala mo le afio mai muamua o le Alii ma Lana Togiola. E faapena foi, o le talafaasolopito ma valoaga na faataatia ai le faavae mo le Toefuataiga o le talalelei e ala mai i le Perofeta o Iosefa Samita. Pe o i ai ni o tatou mata e iloa ai, o mea na tutupu ma valoaga mo o tatou taimi, o loo sauniuni ai i tatou mo le Afio Mai Faalua o le Faaola?
Ou te tuuina atu la’u molimau faapitoa o loo soifua lo tatou Faaola o Iesu Keriso. Ou te tautino atu na i ai Lona aao i luga o le galuega o le Toefuataiga a o le’i faavaeina lenei lalolagi, ma o le a faaauau pea seia oo i Lona Afio Mai Faalua.
Ou te tatalo ma le agaga maualalo ina ia saunia i tatou lava e feiloai atu ia te Ia. I le suafa paia, o Iesu Keriso, amene.