O Feagaiga o le Talalelei e Aumaia ai Faamanuiaga Folafolaina
E mafai ona foia tofotofoga laiti uma o le olaga, e ala i le tausia o feagaiga o le talalelei.
O le asō, ou te fia faailoa atu ai o’u lagona loloto o le ava ma le migao ma le alofa mo lo tatou Tama oi le Lagi; mo Lona Alo, o le Alii o Iesu Keriso; ma le Agaga Paia. E fia tuuina atu foi la’u molimau i le valaauga paia o Peresitene Gordon B. Hinckley, i le avea ai ma perofeta, tagatavaai, ma tali faaaliga a le Alii. Ou te lagolagoina o ia ma lo’u loto ma le malosi atoa.
Ou te faafetai tele mo le feagaiga o le faaipoipoga i totonu o le malumalu i se soa tamalii e faavavau, o le ou te alofa ma faapelepele i ai. O loo faaauau pea ona ia faia se faataitaiga o auaunaga alofa ia i latou o e o loo manaomia le fesoasoani. Ua faamanuiaina la ma’ua faaipoipoga i ni fanau faamaoni ma malolosi, ma ni fanau a fanau, ua tele ni mea ua ma aoaoina mai ai, ma o loo faaauau pea ona faia faapea.
E faapitoa lo’u lagona faamanuiaina, ona sa matou fananau mai ma o’u uso ma tuafafine i ni matua amiotonu, o e na tumau faamaoni i a la’ua feagaiga o le malumalu, ma na ositaulagaina ma le lotomalie mea uma, ina ia matou tutumau i le fuafuaga o le fiafia a lo tatou Tama Faalelagi. I lo’u tina agelu, tau ina ou faapea atu, faafetai mo le faatumauina o sootaga o le alofa ma sauniga o le talalelei ia malolosi i o matou olaga.
Ua ou taua nei sootaga paia ona o le fiafia ou te lagonaina i le iloaina o loo i ai se feagaiga e fusia faatasi ai, ma i latou taitoatasi ua faamauina i le malumalu paia. Ou te matuai faafetai lava i le iloa, e ui lava i ni lu’itau o loo faatalitali mai mo i tatou, ae o loo i ai le faamoemoe ma le to’a i le iloa, e mafai ona foia tofotofoga laiti uma o le olaga, e ala i le tausia o feagaiga o le talalelei. Ua aoaoina i tatou e tusitusiga paia, o le a iu ina lelei mea uma pe a tatou faamaoni i a tatou feagaiga. Na aoao mai le Tupu o Peniamina:
“Ona o le feagaiga ua outou faia, e ta’ua outou o le fanau a Keriso… .
“O le mea lea, ua ou manao ai ina ia outou ave i luga ia te outou le suafa o Keriso, o outou uma ua osia le feagaiga ma le Atua, ina ia outou gauai i ai e oo i le iuga o outou olaga.
“E oo mai foi, o le na te faia nei mea, e maua o ia i le itu taumatau o le Atua” (Mosaea 5:7–9).
O le ua’i atu ma le toto’a i le osiga o feagaiga, e taua i lo tatou faaolataga e faavavau. O feagaiga o maliliega ia ua tatou faia ma lo tatou Tama Faalelagi, lea e tautino atu ai o tatou loto, mafaufau, ma amioga i le tausia o poloaiga ua faataatitia mai e le Alii. A tatou faamaoni i le tausiga o la tatou maliliega, ua Ia folafola mai pe ua tautino mai, i le iuga, e faamanuia i tatou i mea uma ua ia te Ia.
I le Feagaiga Tuai, ua aoaoina i tatou i le mamanu a le Alii e uiga i feagaiga i le mea na oo i ai Noa ma se lalolagi amioleaga, ma le fuafuaga a le Alii mo le faamamaina o le lalolagi. Talu ai ona o le tautinoga faamaoni, tumau a Noa, na fetalai atu ai le Alii ia te ia:
“A e ou te faatumauina lau feagaiga ma oe; e te ulu atu foi i le vaa, o oe, ma ou atalii ma lau ava, atoa ma ava a ou atalii faatasi ma oe… .
“Na faia e Noa … mea uma na poloai atu ai Ieova ia te ia” (Kenese 6:18; 7:5).
Ina ua maui le lolo, ona ulufafo lea o i latou mai le vaa.
“Ona faia lea e Noa o le fata faitaulaga ia Ieova… .
“Ua fetalai atu foi le Atua ia Noa, ma ona atalii [na] faatasi ma ia, o loo faapea atu,
“Faauta foi, o au ou te faatumauina la’u feagaiga ma outou ma a outou fanau pe a mavae outou” (Kenese 8:20; 9:8–9).
O i tatou foi ua uma ona tatou ulu atu i feagaiga paia ma le Alii, ina ia mafai ona faasaoina i tatou mai le fili. E pei foi ona i ai i le taimi o Noa, o loo tatou ola i se aso o folafolaga faaperofeta ma faataunuuga. O le valu tausaga ua mavae, ua 71 malumalu fou sa faapaiaina—o se tulaga maoa’e tele na ausia, i lalo o le taitaiga a le perofeta a le Alii, lea atonu i se isi itu, ua pei ai o le fauina o le vaa i aso o Noa.
Ua valaaulia i tatou e lo tatou perofeta soifua o Peresitene Gordon B. Hinckley, ina ia tatou ulu atu i le faitotoa o le malumalu, lea e mafai ai ona tatou osifeagaiga ma le Alii.
E pei foi o aso o Noa, atonu e masani ona oo mai faatasi ma se fuataga o le ositaulaga, ina ia ola i nei feagaiga i le fuafaatatau o le ositaulaga. O lenei ositaulaga, e tusa lava pe o le a le tele po o le laitiiti, e masani ona iloa ai a tatou tautinoga i le mafaufau ma le loto, tatou te usitai atu i le finagalo o lo tatou Tama Faalelagi. O le mamanu o le ositaulaga, e masani ona aofia ai se vaitaimi o tauiviga, lea e tatau ai ona tatou iloilo ma fefulisai ma le toto’a ia taunuuga o a tatou filifiliga. E le faapea o taimi uma e manino pe faigofie ai ia filifiliga, o lea tatou te tauivi ai lava. A tatou filifili loa e lafoai a tatou tauiviga, ae ia ositaulaga o tatou loto mo le finagalo o le Alii, ua siitia i tatou i se vaaiga fou o le malamalama. O lenei faagasologa e masani ona iloga i o tatou olaga pe a tatou aafia i se faafitauli po o se luitau aoga.
O ni nai vaiaso ua mavae atu, a o i ai se alii talavou i se tolauapiga a le Sikauti i mauga i sasae o le Aai o Sate Leki, sa taia ai o ia i le [emo o] uila ma maliu ai. Na matuai faanoanoa ma lofituina ona matua i le maliu faafuasei o le atalii, sa tauivi le leoa, ma tuufesili pe aisea na tupu ai lenei mea. Talu ai ona sa gauai atu o la’ua loto ma malosi lo laua faatuatua, o lea na oo mai ai se alofa tele mai le Alii. I le totonugalemu o o la’ua faanoanoaga na oo mai ai se naunautaiga filemu, ma le malu ina ia talia e aunoa ma le ita le taunuuga o lenei aafiaga. Faatasi ai ma lo la taliaina [o le taunuuga] na oo mai ai se vaaiga e sili atu o le faamoemoega o le olaga ma le manatuaina o feagaiga sa laua faia. E ui lava ina o loo la lagonaina pea le lototiga mai le maliu faafuasei, ae ua la latalata atili atu ai i le Alii, ma tautino atu e matua’i taofimau i a la’ua feagaiga, ma ia ola ai ina ia mautinoa e toe faatasia ma le fiafia ma lo la’ua atalii.
I lenei tisipenisione, o le osia o feagaiga ua faaaoga ai se vaaiga fou e ese mai i le vaitaimi o Noa. E le gata ina tatou nafa ma le faia o feagaiga mo i tatou lava, ae ua tuuina mai foi ia i tatou le matafaioi e saili o tatou augatuaa ua maliliu, ma ia tatalaina le faitotoa mo i latou uma o e mananao e osi feagaiga, ma ia maua ma le agavaa ia sauniga o le talalelei.
O le galuega ia i latou o e sa soifua muamua ua agai malosi i luma, faatasi ma au a le lagi ua poloaiina e le Alii. I le faaaliga a Peresitene Iosefa F. Samita e uiga i e ua maliliu, sa ia tusia:
“Peitai, faauta, sa faatulagaina e ia ana au ma tofia ana avefeau mai e amiotonu, o e ua faaofuina i le mana ma le pule, ma tofia i latou e o atu… .
“Sa ou vaai atu, o toeaina faamaoni o lenei augatupulaga, pe a mavae atu ma lenei olaga faaletino, e faaauau a latou galuega i le talaiina o le talalelei o le salamo ma le togiolaina” (MFF 138:30, 57).
Ua faaauau ona aoao mai i tatou e tusitusiga paia, o avefeau e aofia ai “o perofeta o e na molimau [i le Faaola] a o i ai i la le tino” (MFF 138:36). Atonu o nisi o na avefeau e aofia ai Peteru, Paulo, Alema, Ioane, Iosefa, ma Nifae.
I le faitauina o lenei faaaliga a Peresitene Samita, ma le iloaina o faifeautalai ua tofia e faia lenei galuega, atonu e manatu ane se tasi, o le a avea lea ma se uunaiga malosi mo i tatou taitoatasi ina ia tausia a tatou feagaiga, o le sailia lea o suafa o tagata o o tatou aiga ua maliliu, ma faaaoga itula avanoa uma i totonu o malumalu uma lava. E mafai ona ou lipoti atu ma le lototele, o loo i ai lava taimi avanoa i le tele o malumalu, ina ia faataunuuina ai le fautuaga a le Au Peresitene Sili, ina ia faataatia ese nisi o o tatou taimi tafafao, ae ia tuuina atu se taimi tele mo le faataunuuina o sauniga o le malumalu. Ou te tatalo ina ia mafai ona tatou tali atu i lenei valaaulia e o mai i le faitotoa o le malumalu.
Ou te lagona le loto maualalo i le avanoa e auauna ai i lenei valaauga ua tuuina mai, ma ou te tatalo ina ia mafai ona ou tausia a’u feagaiga ma le Alii ma ia [ou] gauai atu i le taitaiga a le Agaga. Ou te tautino atu la’u molimau faamaoni i le Alii o Iesu Keriso ma le Toefuataiga o Lana talalelei e ala mai i le Perofeta o Iosefa Samita. E faailoa atu lo’u alofa i feagaiga ma sauniga o le malumalu ma tautino atu ina ia toe faaluaina a’u taumafaiga e auai i nei maota paia o le Atua. Ou te iloa, a tatou faia ma tausia feagaiga paia, o le a aumaia i tatou e le Alii i Lona afioaga paia. Ou te molimau atu ai i le suafa o Iesu Keriso, amene.