E Fiafia Lo’u Agaga i Tusi Paia
E matuai leai se isi mea e sili atu ona taua e mafai ona tatou faia mo o tatou aiga, nai lo le faamalolosia o i latou i tusitusiga paia.
Na poloaiina i tatou lata mai nei e lo tatou perofeta pele, ina ia faitau le Tusi a Mamona a o le’i oo i le faaiuga o le tausaga. Ina ua ou taliaina lenei valaaulia, sa ou iloa ai lo’u toe tau atu i ni mea fou ma le mananaia i lenei tusi, e ui ina tele ni taimi sa ou faitau muamua ai. Mo se faataitaiga, na ou toe tau ai i le 2 Nifae 4:15, e faitauina faapea, “Aua e fiafia lo’u agaga i tusi paia, ua mafaufau foi i ai lo’u loto ma ua ou tusi ai mo le aoaoina ma le aoga i au fanau.”
Ua aoao mai e lenei mau le ala tatou te faitauina ai le Tusi a Mamona. O loo taua mai ai ni manatu taua se tolu.
Muamua, “E fiafia lo’u agaga.” E ese lo’u fiafia i le fuaitau lenei! Sa ou mafaufau i le matelaina ma le galala i le fia maua o le malamalama a o ou faitauina ia tusitusiga paia, peitai, o le fiafia i ai, o se isi itu lea. Na ou iloaina, o mea ou te maua mai tusitusiga paia, e iloa lava i a’u sauniuniga e fai. O taimi uma lava ou te faitauina ai, i so’u lava lagona, ou te aumaia ai se tagata fou ma se vaaiga fou i lo’u iloa. O le tulaga ua i ai lo’u olaga, o le poto masani ua ou maua, ma o’u uiga faaalia, e aafia uma ai mea ou te aoaoina mai. Ou te fiafia i tusitusiga paia. Ou te teufatuina ia upumoni ou te maua i la’u faitauga. E tumu lo’u loto i le olioli pe a ou maua faamalosiauga, taitaiga, faamafanafanaga, malosiaga, ma tali i o’u manaoga. E lelei le olaga, ma e matala mai avanoa i o’u luma. E faamautinoa mai ai ia te au le alofa ma le popole o lo’u Tama Faalelagi mo a’u i taimi uma lava ou te faitau ai. E moni lava, o se mea fiafia lea ia te au. E pei ona faaupuina e se tasi tamaitiiti o le vasega Aveolela, “Ou te lagonaina lava le fiafia i tusitusiga paia!”
Lua, “E mafaufau foi i ai lo’u loto.” Ou te fiafia tele e feaveai tusitusiga paia i totonu o lo’u loto! O le agaga o mea sa ou faitauina, e nofo ai iina e aumaia ia te au le toafilemu ma le mafanafana. Ua ou maua ai le malamalama, taiala, ma faatonutonu ai a’u. Ua ou mautinoa ai, o le taunuuga lena o le usiusitai.
O nisi taimi ou te maua ai le tamaoaiga o le faatofuina o a’u i tusitusiga paia. O nisi taimi ou te faitauina ai ni nai vaega laiti. Ae peitai, e le afaina po o fea ae po o afea foi ou te faitauina ai tusitusiga paia; e mafai lava ona ou feavea’ia i lo’u loto. Ua ou iloaina, a ou faitauina i le taeao, e mafai ona ou feavea’ia le faatosinaga a le Agaga i le aso atoa. A ou faitauina i le ogatotonu o le aso, e mafua ona o se tulaga sa ou manaomia ia mafai ai ona ou maua ni tali ma filifiliga e aafia ai au faaiuga ma amioga. A ou faitauina i le po, e tumau lava na savali matagofie ma le mafanafana mai le Alii i lo’u mafaufau a o ou moe. E tele taimi ou te ala ai i le po, faatasi ma ni manatu po o ni mafaufauga e afua mai i ni upu na ou faitauina ae ou te le’i faagalegale moe. Atonu e tele mea ou te mafaufau i ai i le aso, ae e matuai fusi mau lava e lo’u loto upu a le Alii o loo maua i tusitusiga paia ma “mafaufau loloto i ai.”
O lenei mea, ua ou iloaina ai “e pei ona manatu [le tagata] i lona loto, ua faapea lava o ia” (Faataoto 23:7). A ou mafaufau loloto i tusitusiga paia, e i ai se mea e tupu ia te au. Ou te matuai naunau lava e ola latalata atu i lo’u Tama Faalelagi. Ou te fia auauna lava mo Ia. Ou te manao ia ou ola i mataupu faavae na ou aoaoina i tusitusiga paia, ma a o ou faia, ua tusi ai [e lo’u loto] mo le aoaoina ma le aoga i au fanau.”
E moni, ou te le tusia ni tusitusiga paia e pei ona faia e Nifae, ae a ou faitau i ai ma ola i mataupu faavae ua ou aoaoina, e tusia na tusitusiga paia i lo’u olaga. E faafoe ai a’u amioga ma e tusi ai iina ia vaai i ai la’u fanau ma mulimuli ai. E mafai ona ou fausia se talatuu, o se tu ma aga o le ola amiotonu, e faavae i mataupu faavae ou te aoaoina i tusitusiga paia.
Ua aoao mai le Mataupu Faavae ma Feagaiga 93:39–40: “A e oo mai le amioleaga ma aveesea le malamalama ma le upu moni, mai le fanau a tagata, i le le usiusitai, ma uputuu a o latou tama.
“A ua ou poloaiina outou e taitaiina a outou fanau i le malamalama ma le upu moni.”
O le faitauina o tusitusiga paia, e mafai ona faamautinoaina ai a’u, o le a ou iloa le “malamalama ma le upumoni” o le a faamanuiaina ai a’u ma lo’u aiga. O lo’u iloa o le mea e tatau ona fai, e mafai ai ona ou faaogatasia a’u amioga—o a’u “tu ma aga”—ma mea ua ou iloa. Ma o le a le taitai seseina la’u fanau i a’u faataitaiga, ae o le a taitai atu ai i latou i tusitusiga paia ma le upumoni o loo maua ai iina.
Ou te fiafia i le pese a le Peraimeri o loo aoao mai ai:
Ua ou iloaina, afai ou te tatalo e le gata ina ia ou maua se molimau i le moni o tusitusiga paia, ae ia faatasi mai foi le Agaga ia te au a o ou faitau, o le a faateleina lo’u mataalia, ma o le a matuai manino la’u vaai. O le a mafai ona ou iloa le tulaga o loo ou i ai i le olaga, ma le tulaga e finagalo lo’u Tama Faalelagi ia ou i ai. E mafai ona ou malamalama i mataupu faavae o le upumoni, ma e mafai ona ou iloa auala e mafai ona ou faia ai suiga moomia o lo’u olaga. E mafai ona ou lagonaina le mautinoa, o le a fesoasoani mai le Alii ma faamalosia au ina ia ou faataunuuina le galuega. O le mea lea e tusia ai tusitusiga paia i lo’u olaga.
A tatou faitau i tusitusiga paia, tatou te faalogoina le siufofoga o le Faaola. E le o aluese mai o ia mai o tatou olaga. O loo tino mai o ia i fuaiupu o nei tusi paia. Ua talosaga mai lo tatou perofeta ina ia tatou faalatalata atu i le Faaola e ala i le faitauina o le Tusi a Mamona.
Ae faapefea a tatou fanau? Amuia se tamaitiiti e faavae ia olaga o ona matua i aoaoga o loo i tusitusiga paia! E matuai leai se isi mea e sili atu ona taua e mafai ona tatou faia mo o tatou aiga, nai lo le faamalolosia o i latou i tusitusiga paia. Matua, ia faapotopoto mai lou aiga e faitau ia tusitusiga paia, ma galulue ina ia mafai ona ofi i polokalama pisi a lou aiga. Fanau, ia tali vave atu ma le fiafia pe a valaau mai tou te o atu e suesue i tusitusiga paia.
Na tuuina mai e Peresitene Gordon B. Hinckley ia i tatou se valaaulia, ae na ia tuuina mai ai foi ia i tatou ni folafolaga pe afai tatou te filifili e talia. Ua ia folafolaina mai “se fuataga faaopoopo o le Agaga o le Alii, o se faaiuga mausali e savavali ma le usiusitai i Ana poloaiga, ma se molimau malosi atu e uiga i le soifua moni o le Alo o le Atua.”2
Fai mai se tasi o a’u tama teine ia te au, o le o loo i ai i se tulaga matagofie o lona olaga, ma o loo avea ona lu’itau sili ma ona faamanuiaga silisili (e toatolu lana fanau laiti): “Tina, o lea ou te faia. O loo ou faitauina le Tusi a Mamona. Ma o loo ou taofimau pea i na folafolaga matagofie. O mea tonu lava ia ou te moomia i lo’u olaga i le taimi nei.”
Po o faamanuiaga ea nei o loo outou manaomia i o outou olaga? E mo lo tatou faaaogaina. I le avea ai ma ni tagata taitoatasi, ia tatou tautino atu e mulimuli i le perofeta. I le avea ai ma ni aiga, ia tatou maua mai o tatou faamanuiaga. Peresitene Hinckley, matou te alolofa ia te oe, ma ua matou faalogo atu i lou siufofoga, ma o le a matou mulimuli ai.
Ou te fia tuuina atu la’u molimau, ou te iloa o loo soifua le Tama Faalelagi ma e alofa ia i tatou. Ou te iloa o Iesu Keriso o lo tatou Faaola. Ou te iloa ua moni tusitusiga paia. O afioga ia a le Atua. Ou te iloa o Gordon B. Hinckley o lo tatou perofeta i aso nei. Ou te iloa, afai tatou te mulimuli ia te ia, tatou te maua faamanuiaga sili mai lo tatou Tama o i le Lagi. Ou te matuai faafetai tele mo lenei molimau. I le suafa o Iesu Keriso, amene.