Faamanuiaga
O loo soifua le Atua lo tatou Tama Faavavau. E alofa o Ia ia te i tatou. Na te leoleoina i tatou. O Iesu o le Keriso, le Togiola o tagata. Ua uma ona La toefuataiina mai la La’ua galuega i lenei tisipenisione faai’u, e ala mai i le tufugaaao o le Perofeta o Iosefa.
Ia, o’u uso e ma tuafafine pele, e ese le matagofie o la tatou konafesi. O se taumafataga musuia moni lava i le la’o’ai a le Alii. Sa matagofie, musika, tatalo, ma lauga. Ua uma ona logoina i tatou ma ua siitia ai; ua faamalolosia ai foi lo tatou faatuatua.
Ua faamaonia le ola o le Ekalesia i le mea moni lenei, ua faaliliuina a tatou upu i gagana e 80 ma o loo faasalalauina atu a tatou savali e ala i le satelite i vaega eseese o le lalolagi, ma ua faafofogaina e tagata i le anoanoa’i o atunuu. O le faataunuuina matagofie lava ia o upu sa tautala i ai Moronae, le perofeta taulealea, i le po o le aso 21 o Setema, 1823.
O ia o se alii talavou i lena taimi, se tamaitiiti mativa faifaatoaga, e matua’i laitiiti lava se aoaoga na ia maua. O le mea moni e noa lava se mea na ia te ia. E leai ni mea a ona matua. Sa nofo o ia i se nuu maotua, e tau le iloa i tua atu o ona tuaoi. Ae o lea na fai atu i ai le agelu “o ia o se avefeau ua auina mai e le Atua … ; o loo i ai se galuega o loo finagalo le Atua [ia Iosefa] na te faia; ma o le a tauleleia ma tauleagaina foi [lona] igoa i nuu uma, ma ituaiga uma, ma gagana eseese, po o tagata uma lava” (Talafaasolopito—Iosefa Samita 2:33).
E mafai faapefea ona tupu se mea faapea? Atonu ai pe sa tau mafaufau Iosefa. Atonu foi ai sa matua meia lava o ia.
Ae o lea na taunuu lava. Ma o le a i ai foi valoaga e sili atu, o le a faataunuuina lava.
I le aso 23 o Tesema i le tausaga nei, 2005, ua tatou faamoemoe e faamamaluina ai lona aso soifua i se sauniga faamanatu tele e saafi atu ai mo ia.
Ou te faamoemoe, afai e mafai, ou te alu i le nofoaga sa soifua mai ai o ia, e toe faia le mea sa faia foi e Iosefa F. Samita, le Peresitene lona ono o le Ekalesia, i le aso 23 o Tesema, 1905, ma ua atoa nei le selau tausaga talu ai. I lena taimi, sa ia faapaiaina ai le maa faamanatu o loo faailoga ai le nofoaga na soifua mai ai le Perofeta, ma sa fauina ai foi si tama’i fale e avea ma faamanatu mo ia.
A ou alu i Veremona, o le a i ai Peresitene Monson ma Peresitene Faust, faatasi ai ma isi Pulega Aoao, iinei i le Nofoaga Autu mo Konafesi. O le a faatumulia lenei faleapitaga tele, ma o le a faasalalauina le polokalama i le tele o nofoaga i le satelite. O le a i ai musika e faatatau i ai, ma upu o saafiafiga o le a faia i South Royalton ma le Aai o Sate Leki, e uiga i le perofeta maoae o lenei tisipenisione.
O le pese na lagiina e le Aufaipese i lenei taeao e sa’afi atu ai i le Perofeta, o se faata’ita’igā la’ei lea mo le sauniga ia Tesema. Tatou faatalitali atu ma le naunautai i lena aso, ma e faamoemoe foi o le a tatou mafuta uma ai.
Matou te tuuina atu la matou molimau i le paia o lenei galuega. Se galuega ina a matagofie. O le matua gaogao lava o o tatou olaga pe a aunoa ma lenei galuega. O loo soifua le Atua lo tatou Tama Faavavau. E alofa o Ia ia te i tatou. Na te leoleo ia te i tatou. O Iesu o le Keriso, le Togiola o tagata. Ua uma ona La toefuataiina mai la La’ua galuega i lenei toe tisipenisione faai’u, e ala mai i le tufugaaao o le Perofeta o Iosefa. Ou te molimau atu ai i le paia atoatoa, ma tuuina atu o’u alofaaga ma la’u faamanuiaga mo outou, o’u uso e ma tuafafine pele o lenei Ekalesia. Ia faamanuia atu le Atua ia te outou uma taitoatasi.
I le faaiuga, ou te fia faafetai atu ia i latou uma sa matua anoanoa’i mea sa latou faia ina ia manuia lenei konafesi, o le toatele o e sa galulue i tua atu, ina ia mafai ona faataunuuina. Sa latou galulue i ao ma po ina ia tula’i mai ai se taunuuga maoae—o le au faasino, o enisinia, o le au leoleo, o tagata mo fesoasoani muamua, o leoleo o alatetele, o le au faaliliu, o failautusi o e sa galulue i a matou lauga ma taina ta’i faafia. Ia faamanuia mai le Atua ia te i tatou uma, ou te tatalo atu ai ma le lotomaulalo.
Ia tatou taumafai e savavali i le amiotonu i Ona luma. Ou te ole atu ai ma le lotomaulalo, ma tuuina atu a’u faamanuiaga mo outou, i le suafa paia ma le mamalu o lo tatou Togiola, le Alii o Iesu Keriso, amene.