Faamagaloga
I se isi itu, o le loto faamagalo, faatasi ma le alofa ma le faapalepale, e tula’i mai ai vavega e le mafai ona tupu i se isi lava auala.
O’u uso e ma tuafafine pele, ou te faafetai i lo’u Tama i le Lagi ina ua Ia faafualoa lo’u ola, ia avea ai ma se vaega o nei taimi faigata. Ou te faafetai ia te Ia mo le avanoa ou te auauna atu ai. E leai se isi mea ou te manao i ai, ae ia faia mea uma ou te mafaia e uuna’i ai le galuega a le Alii, i le tautuaina o Lona nuu faamaoni, ma lo’u ola filemu ai faatasi ma o’u tuaoi.
Sa ou malaga taamilo talu ai nei i le lalolagi, i le silia ma le 25,000 maila, ma ou asiasi atu ai i Alaska, Rusia, Korea, Taiwan, Hong Kong, Initia, Kenya, ma Nigeria lea na matou faapaiaina ai le malumalu i le nuu mulimuli. Ona matou faapaiaina ai lea o le Malumalu o Newport Beach i Kalefonia. Faatoa ou foi mai foi i Samoa i se tasi faapaiaga o le malumalu, i se isi 10,000 maila. Ou te le fiafia e fealua’i, peitai ou te moomoo ia ou alu atu i o tatou tagata, e ta’u atu i ai la’u faafetai ma se faamalosiauga, ma tuuina atu la’u molimau i le paia o le galuega a le Alii.
E masani ona ou mafaufau i se tauloto sa ou faitauina i aso lava la ua leva: E faapenei:
“Tuu mai a’u ou te nofo i se fale i tafatafa o le alatele
I le mea e fetaufetulia’i solo ai tamaloloa e toatele—
O tamaloloa lelei ma tamaloloa leaga,
E lelei ma leaga pei foi o a’u lava.
Ou te le nofo i le nofoa o lē tauemu
Pe fonō atu foi le fetuu a le le talitonu—
Tuu mai a’u ou te nofo i se fale i tafatafa o le alatele
E avea ai ma se uo i tagata.
(Sam Walter Foss, “The House by the Side of the Road,” in James Dalton Morrison, ed., Masterpieces of Religious Verse [1948], 422)
O o’u lagona na.
E fai e tausaga o le matua se mea i le tagata. E foliga na te faia ia atili ai ona iloa e le tagata le manaomia o le alofa ma le agalelei ma le faapalepale. E moomoo o ia ma tatalo ina ia ola tagata i le filemu e aunoa ma ni taua ma le fefinaua’i, tauaimisa, ma le feteena’i. E faateleina lona iloa o le uiga o le Togiola sili a le Faaola, o le loloto o Lana taulaga, ma le loto faafetai i le Alo o le Atua na tuuina atu Lona soifua ina ia tatou ola ai.
Ou te fia tautala atu i le aso e uiga i le faamagaloga. Ou te manatu atonu o le amioatua aupito sili lea i le fogaeleele, ma e moni lava e aupito sili ona manaomia. Ua matua tele naua le limavale ma le faasaua, o le le onosa’i ma le lotomatau’a. Ua matua manaomia lava le salamo ma le faamagaloga. O le mataupu faavae sili o loo faamamafaina i tusitusiga paia uma, o aso anamua ma ona po nei.
I a tatou tusitusiga paia uma lava, e leai se tala e sili ona matagofie nai lo le tala i le atalii faamaumau oa o loo maua i le mataupu e 15 o le Luka. E tatau ona faitau i ai tagata uma ma mafaufau i ai mai lea taimi ma lea taimi.
“Ma ina ua uma atu mea [a le atalii faamaumau oa], ona oge tele ai lea o lea nuu; ona faatoa mativa ai lea o ia.
“Ua alu ia ua nofo i le tasi tagata o lea nuu, ua ia auina foi o ia i ona fanua e fafaga ai puaa.
“Ua tupu lona manao i atigi mea e ‘aina e puaa ia ma’ona ai o ia; e leai lava se tasi ua avane sina mea ia te ia.
“Ona atamai ai lea o ia, ua faapea ane, E le toatele ea o auauna a lo’u tama ua faulai a latou areto ua totoe; a o au, ou te matelaina!
“O le a a’u tulai ma alu i lo’u tama, ou te fai atu ia te ia, Lo’u tama e, ua ou agasala i Le o i le lagi, atoa ma ou luma,
“Ua ou le toe aoga ona ta’ua o lou atalii; ia e avea a’u ia pei o se tasi o au auauna.
“Ona tulai lea o ia, ua alu i lona tama. Ua iloa mamao atu foi o ia e lona tama, ona mutimutivale lea o lona alofa, ua momo’e atu ia, ua fusi ia te ia, ma sogi atu ia te ia.
“A ua fai mai le atalii ia te ia, Lo’u tama e, ua ou agasala i Le o i le lagi, atoa ma ou luma, ua ou le toe aoga ona ta’ua o lou atalii” (Luka 15:14–21).
Ona faatonu ai lea e le tama ia faia se taumafataga tele, ma ina ua muimui le isi ona atalii, sa ia fai atu ia te ia: “Ua tatau foi ona tatou fiafia ma olioli, aua o lou uso lena na oti, a ua toe ola mai; na le iloa foi, a ua maua” (f. 32).
Afai sa i ai se mea sese na fai, ma oo mai ai le salamo, ma sosoo atu ai ma le faamagaloga, o lona uiga moni lava, o le tagata na solia le tulafono sa leiloa a ua maua, ma o ia foi lea sa oti a ua toe ola mai.
E maeu le matagofie o faamanuiaga o le alofa mutimutivale ma le faamagaloga.
O le Fuafuaga a le Iunaite Setete mo le toe fausiaina o Europa ina ua mavae le Taua Lona Lua a le Lalolagi, faatasi ai ma le meaalofa o le fia miliona tala, na fesoasoani e toe faatula’i mai ai Europa.
I Iapani ina ua mavae le taua lava lea e tasi, sa ou vaaia ai fale tetele e gaosi ai u’amea, ma sa ta’u mai ia te au o tupe na aumai i Amerika, lea sa avea muamua ma fili o Iapani. O le a matua sili atu ona lelei le lalolagi ona o le loto faamagalo o se atunuu limafoa’i mo i latou sa fai o ia ma ona fili.
I le Lauga i luga o le Mauga sa aoao mai ai e le Alii:
“Ua outou faalogo na fai mai, E suia le mata i le mata, e suia foi le nifo i le nifo:
“A ou te fai atu a’u ia te outou, aua ne’i outou tetee atu i le leaga; ai se na te po mai i lou alafau taumatau, ia e liliu atu ia te ia le isi.
“O le fia fai se faamasinoga ma oe e ave lou ofu tino, ia e tuu atu foi i ai ma lou ofu tele.
“Ai se na te tauanau mai lua te o ma ia i le maila e tasi, ina o ia oulua ma ia i maila e lua.
“Ia e avatu i le ua ole mai ia te oe; aua foi e te liliu ese i le ua fia nono tupe ia te oe.
“Ua outou faalogo, na fai mai, Ia e alofa atu i le lua te tuaoi, a ia inoino i le ua ita mai ia te oe.
“A ou te fai atu a’u ia te outou, ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuua’i fua mai ma faasaua mai ia te outou” (Mataio 5:38–44).
O ni upu malolosi tele na upu.
Pe tou te manatu ea e mafai ona outou mulimuli i lena poloaiga? O upu a le Alii lava Ia, ma ou te manatu e faatatau ia i tatou uma taitoatasi.
Sa aumaia e tusiupu ma Faresaio ia Iesu se fafine faapea ua mulilua, ina ia latou tofotofo ai ia te Ia.
“A ua punou Iesu ma tusi i lona tamatamai lima i le eleele, e faapei na te le i lagonaina i latou.
“A ua latou fesili atu pea lava ia te ia ona toe nofo lea o ia i luga, ma faapea atu ia te i latou, O so outou e leai sana agasala, ia lua’i togi se maa ia te ia.
“Ona toe punou lea o ia, ma tusi i le eleele.
“Ua latou faalogo i ai, ua iloa a latou agasala ai o latou loto fuatia ifo; ona taitoatasi lea o i latou ma alu i fafo, e afua mai i toeaina, ua oo atu i e aupito iti. Ua tuua na o Iesu lava, ma le—fafine o loo tu i totonu.
“Ua toe nofo i luga Iesu, ua silafia ua leai se tagata, ua na o le fafine lava, ona fetalai atu lea o ia ia te ia, Funa e, o ifea ea i latou e na molia oe? Ua le faasala mai ea se tasi ia te oe?
“Ua fai mai o ia, Le Alii e, e leai lava se tasi. Ona fetalai atu lea o Iesu ia te ia, Ou te le faasala foi ia te oe; alu ia oe, aua e te toe agasala” (Ioane 8:6–11).
Sa aoao mai le Faaola i le tuua o le ivasefulu ma le iva ae saili le mamoe na leiloa, ina ia oo mai le faamagaloga ma le faaleleiga.
Sa tautino mai e Isaia:
“Ina fafano ia outou, ma faamama ia outou; faate’a ese ia a outou galuega leaga i o’u luma, soia tou te fai mea leaga;
“Ia outou faamasani i le amio lelei, sailiili ia i le faamasinoga; ia outou faasaoina le ua sauaina, ia outou faamasino i le ua matuaoti, ia outou finau mo le fafine ua oti lana tane.
“O loo faapea mai Ieova, O mai ia, ina tatou filifili ia, e ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe” (Isaia 1:16–18).
O le alofa aupito silisili o le Faaola sa faaalia i le taimi tupito o Ona mafatiaga sa ia alaga ai, “Le Tama e, ia e faamagaloina atu ia te i latou; aua ua latou le iloa le mea ua latou faia” (Luka 23:34).
Sa fetalai mai le Alii i o tatou nei taimi i se faaaliga:
“O le mea lea, ou te fai atu ai ia te outou, e tatau ona outou faamagalo atu le tasi i le tasi; aua o le le faamagalo atu i lona uso i ana solitulafono ua ta’usalaina i luma o le Alii; aua e i ai pea ia te ia le agasala e sili ona mamafa.
“O a’u le Alii, e faamagalo atu i e ou te loto ia faamagaloina, a o outou e ao ina outou faamagaloina atu i tagata uma” (MFF 64:9–10).
Ua ofoina mai foi e le Alii se folafolaga ofoofogia. Fai mai a Ia: “O le ua salamo i ana agasala, e faamagaloina o ia ma o a’u le Alii, ou te le toe manatua lava” (MFF 58:42).
Ua matua toatele naua i latou i o tatou taimi, e le mananao e faamagalo ma faagalo. E fetagisi fanau ae tagilotulotu fafine ona o le faaauau pea e tama ma tane ona faamanatu atu nai masei laiti e le taua. Ma ua toatele naua foi fafine latou te faatupuina mauga mai nai iota laiti o upu faatausuai po o amioga.
I se taimi e le’i mamao atu, sa ou otiina mai ai se tala i le Deseret Morning News, sa tusia e Jay Evensen. Ua i ai lana faatagaga ou te sii mai ai se vaega o lena tala. Na ia tusia:
“Mata o le a sou lagona i se talavou na te togiina atu se pipi aisa e 20 pauna mai se taavale saoasaoa, i luma tonu o le tioata o le taavale o loo e aveina? Mata o le a sou lagona ina ua mae’a le ono itula sa e onosa’ia ai lou taotoga sa faaaoga ai u’amea ma isi meafaigaluega e tau fonofono ai ou foliga, ma ina ua e iloa o le a tele ni tausaga e fai ai ou togafitiga a o le’i toe foi i le mea e masani ai—ma e ao ona e lagona ua e laki e te le’i oti pe mafatia foi i se manu’a tumau o lou fai’ai?
“Mata o le a foi sou lagona ina ua e iloa na mafua ona i ai i le tagata na e manu’a ai ma ana uo le pipi, ona sa latou gaoia se pepa faatau faaaitalafu, ma sa latou o ai ma soona fai le mafaufau ni faatauga, ua na o se mea malie? …
“O ituaiga solitulafono mataga nei ua uuna’ia ai e le au fai upufai ia taitai i folafolaga o le a matua faamamafa faasalaga o solitulafono. O se ituaiga o mea e uuna’ia ai le au faitulafono e tauva i se taumafaiga ia taulamua i le faiga o se tulafono fou, e faaopoopo faasalaga mo le faaaogaina o moa tuu’aisa e faataunuu ai se solitulafono.
“Sa ta’ua e le New York Times le faamasino faaitumalo o faapea, o se ituaiga o solitulafono lenei e lagona ai e tagata ua aafia fua, e leai se faasalaga e lava sona mamafa. ‘O le oti foi ia e le faamalieina ai lava i latou,’ o lana tala lea.
“O le mea lea na matua tulaga ese ai lava le mea moni na tupu. O le tagata na aafia fua, o Victoria Ruvolo, e 44 tausaga, ma sa avea muamua ma pule o se ofisa e aoina aitalafu, ma sa sili atu ona naunau i le faasaoina o le ola o le na faamanu’aliaina o ia, e 19 tausaga le matua, o Ryan Cushing, nai lo le taumafai ia taui ma sui. Sa faasoesa o ia ia i latou sa faafoeina le faamasinoga mo ni faamatalaga e uiga ia Ryan, o lona olaga, pe na faapefea ona fofoa lona olaga, ma mea faapena. Ona faatauanau atu lea o [Victoria] e faia se talosaga mo [Ryan]. E mafai ona faafalepuipui [Ryan] Cushing mo le ono masina i le falepuipui faaitumalo, ma faanofo vaavaaia ai mo le 5 tausaga pe afai e faamaonia lona faaoolima e le’i faamoemoeina.
“Pe a na faapea e ta’usalaina i le faaoolima faamoemoeina—o le faasalaga e pito i fetaui ma le solitulafono—semanu o le 25 tausaga i le falepuipui, ma mulimuli ane toe sau i tua i le nuu ua matua, ma leai ni ona tomai po o ni faamoemoega.
“Peitai na o le afa lena o le tala. O le vaega o totoe, o le mea na tupu i le aso na faia ai le faamasinoga, o le vaega matagofie moni lena.
“E tusa ai ma se faamatalaga a le New York Post, sa savali atu Cushing ma le faaeteete i le mea sa nofo ai Ruvolo i le potu faamasino, ma musumusu atu ma le maligi o loimata se faatoesega. ‘Ou te faatoese atu ona o le mea sa ou faia ia te oe.’
“Ona tula’i lea o Ruvolo, o le na aafia fua ma feopoa’i ma le na faaoolima ia te ia, ma fetagisi. Sa milimili [e Ruvolo] le ulu [o Cushing] ma popo lona tua a o tagi masusu, ma sa lagona atu e molimau, e aofia ai ma le au failipoti a le Times, o faapea atu Ruvolo, ‘E le afaina. E na ona ou manao lava ia sili atu ona lelei lou olaga.’ E tusa ai ma faamatalaga, sa taufai maligi uma loimata o le au faamasino, e oo lava i le au fai lipoti” (“Forgiveness Has Power to Change Future,” Deseret Morning News, Aug. 21, 2005, p. AA3).
Oka se maoa’e o lena tala, e maoa’e ma o le mea moni lava na tupu, ma sa tupu foi i le nuu faigata o Niu Ioka. E leai se isi mea e mafai ona lagona e se tagata, vagana ai le faamemelo i lenei tamaitai, o le sa faamagalo atu i le taule’ale’a semanu e uma ai lona ola?
Ou te iloa o se mea ma’ale’ale lea ua ou talanoa atu ai. E i ai le au solitulafono loto maaa atonu e tatau lava ona faafalepuipui. E i ai solitulafono e le matalanoaina, e pei o le fasioti tagata faamoemoeina ma le tosoteine, ia e matua tatau ai lava ni faasalaga mamafa. Peitai, e i ai foi nisi e mafai ona laveaiina mai ni tausaga se tele o le a maumau i le falepuipui ona o amioga faavalevalea, e le i mafaufauina. I se isi itu, o le loto faamagalo, faatasi ma le alofa ma le faapalepale, e tula’i mai ai vavega e le mafai ona tupu i se isi lava auala.
O le Togiola sili o le faatinoga maoae lea o le faamagaloga. O le silisiliese o lena Togiola, e le gafataulimaina e lo tatou tomai ona malamalama atoatoa i ai. Ua na ona ou iloa sa tupu, ma sa faia mo oe ma a’u. Sa matua tele naua le puapuaga, sa ogaoga le mafatiaga, ma e leai se tasi o i tatou e mafai ona malamalama i ai ina ua ofoina atu e le Faaola Ia lava e fai ma togiola mo agasala a tagata uma lava.
O Ia lea tatou te maua ai le faamagaloga. O Ia lea tatou te maua mai ai le folafolaga patino, o le a tuuina mai i tagata uma ia faamanuiaga o le faaolataga, i le toetu mai le oti. O Ia ma Lana taulaga taua tele ua tatou maua ai le avanoa e ala i le usiusitai, o le faaolataga ma le ola e faavavau.
Ia fesoasoani mai le Atua ina ia tatou agalelei atili atu, ma faaalia lo tatou faapalepale e sili atu, ia atili maua le loto faamagalo, ia naunau atili e savavali i maila e lua, ia aapa ifo i lalo ma sii a’e i latou atonu sa agasala ma ua faaalia fua o le salamo, ia faagalo mea e le o fiafia ai ma ia le toe fafagaina lava. Ou te tatalo atu ai ma le lotomaulalo, i le suafa paia o lo tatou Togiola, le Alii o Iesu Keriso, amene.