O Le Malamalama i O Latou Mata

Peresitene James E. Faust

Fesoasoani Lua i le Au Peresitene Sili

E oo mai le malamalama paia i o tatou mata ma foliga pe a tatou maua se sootaga patino ma lo tatou Tama Faalelagi alofa ma Lona Alo.

O’u uso pele, tuafafine, ma uo i le lalolagi atoa, ou te saili ma le faamaualalo i lo outou malamalama ma le fesoasoani o le Agaga o lo tatou Tama a o o’u talanoa atu ia te outou i lenei taeao.

Ou te matuai talisapaia le savali puupuu faaperofeta a Peresitene Hinckley i le amataga o lenei konafesi. Ou te molimau atu o Peresitene Hinckley o lo tatou perofeta, o le e olioli tele i le taitaiga a le Faaao o lenei Ekalesia, o lo tatou Alii ma le Faaola o Iesu Keriso.

Na ou toe manatuaina talu ai nei se fonotaga logologoa i Ierusalema pe a ma le 17 tausaga talu ai. Sa faatatau lea i le lisiina o le fanua lea sa fausia mulimuli ane ai le Nofoaga Autu i Ierusalema a le Iunivesite o Polika Iaga mo Suesuega i Sasae Lata Mai. A o le’i mafai ona sainia lenei lisi, sa taufai malilie faatasi uma taitai o le faigamalo a Isaraelu ma Peresitene Ezra Taft Benson ma Elder Jeffrey R. Holland, a o avea lena ma peresitene o le Iunivesite o Polika Iaga, e fai ai ma sui o le Ekalesia ma le iunivesite e aua ne’i faia ni talaiga i totonu o Isaraelu. Atonu o le a outou faapea pe aisea na matou au faatasi ai e le faia ni talaiga. Sa manaomia ona matou faia lena mea ina ia mafai ona maua mai le pemita e fauina ai lena fale matagofie, ua faapea ona tu ai i le aai lauiloa o Ierusalema. I lo matou iloa i ai sa tausia lava ma le tonu e le Ekalesia ma le BYU lena tautinoga e aua ne’i faia ni talaiga. Ina ua uma ona sainia le lisi, sa faapea mai ma le poto se tasi o a matou uo, “Oi, ua matou iloa o le a outou le talai atu, ae o le a le mea o le a outou faia i le malamalama o loo i o latou mata?” Sa faatatau o ia i a tatou tamaiti aoga sa aooga i Isaraelu.

O le a lena malamalama sa i o latou mata lea sa matuai manino lava i la tatou uo? O le Alii lava Ia na tuuina mai le tali: “O le malamalama foi lea o loo susulu atu, e avatua ai ia te outou le malamalama, e mai le faamalamalamaina o outou mata, o le malamalama lava lea e tasi o loo faapupulaina e outou malamalamaaga.”¹ O fea na sau ai lena malamalama? O le Alii na toe tuuina mai foi le tali: “O au foi o le malamalama moni e faamalamalamaina ai tagata uma e o mai i le lalolagi.”² O le Alii o le malamalama moni lava lea, “ma o le Agaga e faamalamalamaina tagata taitoatasi o e faalogo ma usitai i le leo o le Agaga.”³ O lenei malamalama e faaalia lea i o tatou foliga e faapea i o tatou mata.

O Paul Harvey, o se tagata faasalalau lauiloa, na asiasi atu i se tasi o a tatou lotoa o aoga a le Ekalesia i nai tausaga ua mavae atu. Na ia matauina mulimuli ane: “O … foliga talavou uma taitoatasi o se faata lea o se … faamautinoaga faalelagi. O nei aso ua toatele talavou ua pei ua matutua ona o le tetee i manatu tonu o le tagata ia. Ae [o nei tagata talavou] o loo i ai lena faamanuiaga e mana’ona’o i ai, lea e maua mai le amio pulea, maelega, ma le faapaiaina.”⁴

O i latou o e salamo faamaoni e mauaina le Agaga o Keriso ma ua papatisoina i lenei Ekalesia i le faamagaloina o a latou agasala. E faaee atu lima i luga o o latou ulu ma latou mauaina le Agaga Paia e ala i le perisitua a le Atua.⁵ O le “meafoaifuaina lea a le Atua ia i latou uma o e sailiili ia te ia ma le filiga.”⁶ E pei ona faamatalaina e Elder Parley P. Pratt, o le meaalofa o le Agaga Paia, “e pei o se, … olioliga i le loto, [ma le] malamalama i mata.”⁷ O le Agaga Paia o le Fesoasoani lena na folafola mai e le Faaola a o lei faasatauroina o Ia.⁸ E tuuina atu e le Agaga Paia i le Au Paia agavaa le taitaiga faaleagaga faapea ma le puipuiga. E faatupuina ai lo tatou atamai ma lo tatou malamalama i “mea uma.”⁹ E matuai taua lava lea i se taimi ua faatupulaia ai le tauaso faaleagaga.

Ua faateleina le faasalalauina i le lalolagi i aso nei o le faasalemausau. O loo faauigaina le faasalemausau o le “le manatu i ai po o le teenaina po o le taofia o lotu ma manatu faalelotu.”¹⁰ E le taliaina e le faasalemausau le tele o mea e avea o ni mataupu autu. O ona faamoemoega autu o le faamalieina ma le manatu faapito. E masani lava o i latou o e taliaina le faasalemausau e ese la latou vaai ia i latou. E pei ona fai mai Isaia, “O le amio a o latou mata ua molia ai i latou.”¹¹

Ae ui i le faasalemausau uma o loo i ai i le lalolagi, e toatele tagata o loo fia aai ma saili mo mea a le Agaga ma faalogo i le afioga a le Atua. E pei ona valoia e Amosa: “O loo faapea mai le Alii o Ieova, faauta, e oo mai aso ou te tuuina atu ai le oge i le nuu; e le se oge i mea e ‘ai, po o se galala i le fia inu vai, a o le oge i le faalogologo i afioga a Ieova:

“Latou te feoai e pau mai i le tasi vasa e oo atu i le isi vasa, e pau mai i le itu i matu e oo atu i le itu i sasae, latou te feoai ai e sailiili atu ai le afioga a Ieova, a e le maua.”¹²

O fea e mafai ona tatou faalogo ai i afioga a le Alii? E mafai ona tatou faalogo i ai mai lo tatou perofeta, o Peresitene Gordon B. Hinckley, o le Au Peresitene Sili, o le Korama a Aposetolo e Toasefululua, ma isi Pulega Aoao. E mafai foi ona tatou faalogo i ai mai o tatou peresitene o siteki ma epikopo. E mafai e faifeautalai ona faalogo i ai mai o latou peresitene o misiona. E mafai ona tatou faitau i ai i tusitusiga paia. E mafai foi ona tatou faalogo i le leo filemu ma le itiiti lea e maua mai le Agaga Paia. O le faalogo i afioga a le Alii e aveeseina ai i tatou mai le tauaso faaleagaga ae avatu i tatou “i lona malamalama e matua ofo ai.”¹³

O le a le mea o loo tatou faia ina ia susulu ai pea le malamalama i o tatou mata ma foliga? O le tele o lena malamalama e sau lea mai lo tatou amio pulea, maelega, ma le faapaiaina¹⁴ i nisi o upumoni taua naua. O le vaega e sili ona taua o nei upumoni e faapea o loo i ai le Atua o le Tama lea o o tatou agaga o le tatou te tali atu i ai mo a tatou mea e fai. Lona lua, o Iesu o le Keriso, o lo tatou Faaola ma le Togiola. Lona tolu, o le fuafuaga tele o le fiafia e moomia ai le usiusitai i poloaiga a le Atua. Lona fa, o le meaalofa sili a le Atua o le olaga faavavau.¹⁵

O isi faamanuiaga e faaopoopo ai le malamalama i o tatou mata. O meaalofa a le Agaga lea e sau mai le Faaola.¹⁶ O le olioli, fiafia, faamalieina, ma le filemu o meaalofa ia a le Agaga e tafe mai le mana o le Agaga Paia.

E tusa ai ma le fiafia iinei ma le faavavau, o le tele o o tatou talitonuga o ni tulaga sili ia ona faamanuiaina. E matuai taua lava, ma o nisi talitonuga ua tupito lea i lo tatou faatuatuaga. O nei talitonuga taua o loo faavae lea i lo tatou faamaoni ma e aofia ai vaega nei, e le o faasoloina atu i lo latou taua:

O le Atua ma Lona Alo o ni peresona faamamaluina. O le Atua le Tama o lo tatou Foafoa soifua, ma Lona Alo, o Iesu Keriso, o lo tatou Faaola ma le Togiola. Ua foafoaina i tatou i le faatusa o le Atua.¹⁷ Ua tatou iloa lenei mea aua na vaai Iosefa Samita ia i Laua, na La talanoa atu ia te ia, ma sa ia talanoa atu ia i Laua.¹⁸
O faamanuiaga o le malumalu e faamauina ai faatasi le tane ma le ava, e le mo na o le olaga lenei ae mo le faavavau. E mafai ona tuufaatasia ia fanau ma a latou fanau e ala i lenei faamauga.
O tane agavaa uma o le Ekalesia e mafai ona umia ma faaaogaina le perisitua a le Atua. E mafai ona ia faaaogaina lenei pule faalelagi i totonu o lona aiga ma le Ekalesia e ala i le valaauina e se tasi o loo i ai le pule.
O tusitusiga paia faaopoopo e aofia ai: le Tusi a Mamona, Mataupu Faavae ma Feagaiga, ma le Penina Tau Tele.
O aposetolo ma perofeta soifua e fofogaina mai le afioga a le Atua i o tatou aso, i lalo o le taitaiga a Peresitene Gordon B. Hinckley o le perofeta, tagatavaai, ma le tali faaaliga, o le puna lea o faaaliga faifai pea i o tatou aso.
O le meaalofa o le Agaga Paia e avanoa mo tagata uma. Ina ua fesiligia le Perofeta o Iosefa Samita “o le [Ekalesia a le AAG] e ese lava … mai isi lotu o na aso,” sa tali o ia, ona loo i ai le “meafoaifua a le Agaga Paia e ala i le faaee atu o lima, … [ma] o isi manatunatuga uma o loo aofia ai i le meafoaifua a le Agaga Paia.“¹⁹
O le faamamaluina o le tulaga faatamaitai. O loo i ai i tamaitai le tulaga tutusa atoatoa faatasi ma alii i luma o le Alii. O matafaioi o tamaitai e ese mai alii. O lenei malamalama na oo mai ia i tatou ma le Toefuataiga o le talalelei i le atoatoaga o taimi, faatasi ai ma se malamalama o tamaitai ua faaeeina i ai ia tiutetauave maoae o le avea ma tina ma le faafaileleina. Ua tele avanoa ua maua e tamaitai talu mai le 1842 ina ua tatalaina e le Perofeta o Iosefa Samita, i le suafa o le Atua, le auala mo i latou nai lo le amataga o le i ai o tagata i le lalolagi.²⁰

I nai tausaga ua mavae, sa tofi atu ai ia Constance, o se tamaitai aoga faatausimai, e taumafai ma fesoasoani i se tamaitai sa manua lona vae i se faalavelave. Sa tetee e le tamaitai se fesoasoaniga faafomai ona sa i ai se taimi sa oo ai i se aafiaga le lelei i le falemai. Sa fefe o ia ma oo ai lava i se tulaga ua tuua na o ia. O le taimi muamua na afe atu ai ia Constance, na faatonuina o ia e le tamaitai o loo manu’a e alu i fafo. I le taumafaiga lona lua, sa ia faatagaina ia Constance i totonu. O le taimi lea ua matuai lilofia le vae o le tamaitai i putaputa, ma ua i ai nisi vaega o le aano ua pala. Ae sa le manao lava e togafitia o ia.

Sa avea lea ma se tatalo ia Constance, ma pe tusa ma se aso pe lua ae oo mai le tali. Sa ia aveina se vai manu’a i le isi ana asiasiga. Talu ai ona e le tiga tele, sa faataga ai e le tamaitai matua lenei, e faaaoga i lona vae. Ona la talatalanoa lea i nisi togafitiga e sili atu i le falemai. Sa faamautinoa atu i ai e Constance o le a avea lona nofo i le falemai ma se mea sili ona manaia. Pe tusa ma le tasi pe lua aso ae maua e le tamaitai le lototele e alu atu ai i le falemai. Ina ua asiasi atu i ai ia Constance ia te ia, sa ataata le tamaitai ma faapea atu, “Ua e faatalitonuina au.” Sa lei mafaufauina lona fesili atu ia Constance, “O le a le lotu e te auai i ai?” Sa tau atu e Constance ia te ia o ia o se tagata O Le Ekalesia a Iesu Keriso o le Au Paia o Aso e Gata Ai. Sa faapea atu le tamaitai: “Na ou iloaina lava. Na ou iloaina na auina mai oe ia te au i le aso muamua lava na ou vaai ai ia te oe. Sa i ai se malamalama i ou foliga lea sa ou matauina foi i isi o la outou ekalesia. Sa ou talitonuina oe.”

Sa matuai pe lelei lena vae na papala ina ua mavae le tolu masina. Na toe faaleleia le fale o le tamaitai matua lenei e tagata o le uarota lea sa nofo ai ma toe teuteu lona fanua. Sa feiloai o ia ma faifeautalai, ma e lei umi ae papatisoina o ia.²¹ Na mafua uma nei mea ona sa ia iloaina le malamalama i foliga o lena tamaitai faatausimai.

Na fesiligia Peresitene Polika Iaga i se tasi taimi pe aisea e tuua ai na o i tatou i nisi taimi ma le faanoanoa, o lana tali e faapea e ao i le tagata ona aoao ina ia “galue o se tagata e tutoatasi … sei vaai po o le a le mea o le a ia fai … ma tofotofoina lona tutoatasi—ina ia amiotonu e aunoa ma se malamalama atoatoa.”²² Na faasolo ina faigofie ona fai lena mea ina ua tatou vaaia le “malamalama o le talalelei … ua atagia mai … tagata ua faamalamalamaina.”²³

O le auaunaga i lenei Ekalesia o se faamanuiaga ofoofogia lea ma le avanoa e aumaia ai le malamalama i o tatou mata ma o tatou foliga. E pei ona fautua mai le Faaola, “Ia faapea ona pupula atu ai lo outou malamalama i luma o lenei nuu, ina ia latou iloa a outou galuega lelei, ma vivii atu ai i lo outou Tama o i le lagi.”²⁴ E le mafai e upu ona faamatalaina ia faamanuiaga ia e oo mai ia i tatou ona o le auauna atu i lenei Ekalesia. Ua folafola mai e le Alii e faapea afai tatou te faalauteleina o tatou valaauga o le a tatou maua le fiafia ma le olioli.

Na fesili Alema pe ua tatou maua ea Ona foliga i o tatou mata.²⁵ E oo mai le malamalama paia i o tatou mata ma foliga pe a tatou maua se sootaga patino ma lo tatou Tama Faalelagi alofa ma Lona Alo, lo tatou Faaola ma le Togiola. Faatasi ai ma lenei sootaga i o tatou foliga o le a atagia atu ai se “faamautinoaga faalelagi ”²⁶ o loo soifua o Ia.

E tuuina atu la’u lava molimau i le mamalu o lenei galuega paia o loo tatou i ai. O molimau e oo mai e ala i faaaliga.²⁷ O lenei molimau e tautino atu ai na oo mai i lo’u loto a o o’u laitiiti. Ou te le manatuaina soo se mea patino na tupu na uunaia ai le faaaliga e faamautuina ai le upumoni. E foliga mai ua avea pea lava ma se vaega o lo’u malamalama. Ou te faafetai mo lenei malamalama ua faamautuina ai lea ua mafai ai ona taulimaina ia tulaga faigata o le olaga lea e oo uma mai lava ia i tatou.

Sa ootia ma o le a ootia i tatou e ala i savali tautino a Uso ma tuafafine i lenei konafesi. Ou te talitonu o le aafiaga e faamautu ai e tatau ona faatatau ia te outou. Atonu sa outou mauaina foi se faamautinoaga e moni mea na tautalagia. Na aoao mai Polika Iaga, “E le gata i le Au Paia o e o loo i ai, … ae o i latou i atunuu uma, konetineta, ma atumotu o e ola ai i le talitonuga faalelotu na aoaoina atu e lo tatou Faaola ma Ana Aposetolo, faapea foi ia Iosefa Samita; … o loo tauaveina ai le molimau lava e tasi, o o latou mata ua faateleliseina e le Agaga o le Atua, ma ua tutusa o latou mata, o o latou loto ua faatelevaveina, ma ua tutusa o latou lagona ma malamalama.”²⁸

Ua ou iloa ma lo’u loto ma lo’u agaga atoa o loo soifua le Atua. Ou te talitonu o le a Ia faamalamalamaina o tatou olaga i Lona alofa mo i tatou taitoatasi pe afai tatou te tauivi ina ia agavaa mo lena alofa, i le suafa paia o Iesu Keriso, amene.