Iloaina o le Finagalo o le Alii mo Oe
Ia faamanuia atu le Alii ia te outou taitoatasi i a outou taumafaiga patino ina ia iloa Lona finagalo mo outou, ma ia gaua’i atu o outou manao i Lona finagalo.
O le avea ma se tufugaaao o le Atua, o se avanoa sili ma o se tiutetauave paia. Pe o fea lava o tatou nonofo ai, pe o a lava o tatou tulaga, e le afaina pe ua tatou faaipoipo pe leai, pe o le a foi le matua, e manaomia e le Alii i tatou taitoatasi ia faataunuuina a tatou vaega taua i le fausiaina o Lona malo i lenei tisipenisione faaiu. O la’u molimau, e mafai ona tatou iloa le mea e finagalo le Alii tatou te faia—ma ia mauaina “manuia ua foaiina mai ia te i tatou, aua ua faia i tatou ma tufugaaao o le Atua e faataunuu a’i lenei galuega tele.”1 O lo’u manao i le po nei, ia faasoa atu se vaega o la’u lava malaga patino ua ou iloa ai pe faapefea ona avea i tatou ma tufugaaao.
O le a ou amata i le taunuuga o la’u malaga—i lenei upumoni maoa’e na aoao mai e Elder Neal A. Maxwell: “O le tuuina atu o le loto o le tagata, ona pau lea o le mea moni faapitoa faaletagata lava ia e mafai ona tatou tuu i luga o le fata faitaulaga a le Atua. O le tele o isi mea tatou te ‘avatu,’ … o ni mea na Ia tuuina mai pe faaune mai ia i tatou. Peitai, a oo ina tuuina atu e oe ma a’u i tatou lava, e ala i le faamatuu atu o o tatou mana’o i le finagalo o le Atua, o lona uiga ua tatou tuu atu moni se mea ia te Ia! Ua na o le pau lea o sa tatou meatotino moni e foai atu!”2
Ou te molimau atu, o’u uso pele, ina ia mafai ona avea moni i tatou ma tufugaaao o le Atua, ina ia mafai ona faaee atoatoa mai lena faamanuiaga ia i tatou i “aso o lenei olaga” lea e “faia ai [a tatou] galuega,”3 e ao ona tatou “tuuina atu i tatou lava”4 i le Alii, e pei ona saunoa i ai Elder Maxwell.
O le faagasologa o le faaleleia o lo’u olaga lea na maua ai la’u molimau i lenei mataupu faavae, na amata faafuase’i ina ua maua lo’u faamanuiaga faapeteriaka i le tolusefulu ma ona tupu o o’u tausaga. Sa ou anapogi ma tatalo a o sauniuni, ma manatunatu i lo’u loto, “Pe o le a le mea e finagalo le Alii ia te a’u e fai?” Sa ou matua naunauta’i a o matou malaga atu ma lo’u toalua ma la ma’ua fanau laiti e toafa, i le fale o le toeaina peteriaka. O le faamanuiaga sa ia tuu mai ia te a’u, na faamamafa—faafia mai ai le galuega faafaifeautalai.
Ou te musu e ta’u atu, ae sa ou faaletonu ma lē fiafia. O le taimi lena, faatoa uma lava ona ou faitauina atoa le Tusi a Mamona. E le fesiligia, ou te le’i sauni e fai se misiona. O lea sa ou teuina ai lo’u faamanuiaga faapeteriaka i le pusatoso. Ae sa amata sa’u fuafuaga sogasoga e suesue i tusitusiga paia, a o ou tulimata’i atu i le tausiga o lo’u aiga ua faasolo ina matutua.
Na mavae tausaga, ma sa ma galulue ma lo’u toalua e sauni la ma fanau e faamisiona. Ina ua auina atu la ma fanau tama i atunuu eseese, sa ou matua talitonu, ua faataunuuina lo’u tiute faafaifeautalai.
Ona tofia ai lea o lo’u toalua e avea ma peresitene o le misiona i se atunuu e le’i mautu lelei i le lalolagi tau atia’e, e 10,000 maila mai lo matou aiga, ma e matua ese lava mai aganuu ma gagana sa ou iloa. Peitai, ina ua ou maua lo’u valaauga o se faifeautalai faamisiona, sa ou maua sina lagona e pei o Alema ma atalii o Mosaea—ua tofia a’u e avea ma se “tufugaaao o le Atua e faataunuu a’i lenei galuega tele.”5 Sa ou lagonaina foi se isi mea ou te le iloa pe na latou oo i ai—o le lofituina lea i le atuatuvale!
I le gasolosolo mai o aso, sa ou aumaia ai lo’u faamanuiaga faapeteriaka ma faitau ma saga faitau, ma saili atu mo se malamalama loloto. E oo lava ina ua iloaina o le a ou faataunuuina se folafolaga sa ou maua mai i se peteriaka i le fiasefulu tausaga ua mavae, e le’i tuuitiitia ai o’u popolega. Mata e mafai ona ou tuua la’u fanau ua faaipoipo ma fanau foi e le’i faaipoipo ma o’u matua ua matutua? Pe o le a ou ou iloaina ea ia mea sa’o e fai ma tautala atu ai? O a mea ma te aai ai ma lo’u toalua? Pe o le a ou saogalemu ea i se atunuu mata’utia e le o mautu faiga faaupufai? Sa ou lagona ou te lē lavatia ia tulaga uma.
I la’u sailiga mo se filemu, sa faaopoopo ai a’u taumafaiga ou te alu i le malumalu. Sa ou mafaufau loloto i le uiga o a’u feagaiga, i se ala ou te le’i faia lava muamua. O a’u, i lenei taimi taua e fai ai a’u faaiuga i lo’u olaga, na avea a’u feagaiga o le malumalu ma se faavae ma se uuna’iga. Ioe, sa ou fefe, ae sa ou iloaina sa ou filifili e faia tautinoga patino, malolosi, ma le paia e tatau ona ou tausia. I le faaiuga, e le o se mea lenei e faia e se isi tagata. O la’u misiona, ma sa ou naunautai e auauna atu.
Na folafola atu e le tamā o Iosefa Samita le faamanuiaga lenei i luga o le ulu o lona atalii: “Ua valaauina oe e le Alii lou Atua i lou igoa, mai le lagi. Ua tofia oe … i le galuega tele a le Alii, e te faia se galuega i lenei augatupulaga lea e leai se isi … na te faia e pei o oe, i mea uma e tusa ma le finagalo o le Alii.”6 Sa valaauina le Perofeta o Iosefa i lana matafaioi tulaga ese o le “galuega tele a le Alii,” ma e ui ina ou lagona le lofituina ma le le’i saunia, ae faapena foi, sa valaauina a’u e fai foi la’u vaega o le galuega. Sa fesoasoani lea malamalama ia te au ma ou maua ai le lototele.
I a’u tatalo faifai pea, sa ou ole atu ai pea lava, “Le Tama e, e mafai faapefea ona ou faia le mea ua E tofia a’u e fai?” I se tasi taeao ae o le a ma tuua mo la ma’ua misiona, sa aumai ai e ni a ma uo se toalua se meaalofa—o se tama’i tusipese ou te alu ma a’u. I se taimi mulimuli ane i lena aso, sa ou maua ai i lena tusipese se tali o a’u talosaga sa faia i le tele o masina. A o ou sailia se faamafanafanaga i se nofoaga paganoa, sa saputu mai upu nei i lo’u mafaufau:
Ia aua le fefe, ou te i ai ia te oe.
O A’u lou Atua e fesoasoani pea.
Ou te faamalosi, faamanuia oe,
I lo’u aao amiotonu, lo’u aao amiotonu, mamana na’ua.7
O le iloaina i se tulaga sili ona patino o le a faatasi mai le Alii ia te a’u, ma fesoasoani ia te a’u, sa na o se amataga. E tele atu isi mea e tatau ona ou aoao e uiga i le avea ai ma se tufugaaao o le Atua.
I se atunuu ese ma mamao mai lo ma’ua aiga, sa amata ai ona ma galulue ma lo’u toalua, e pei o paionia, ma le faatuatua i laa taitasi. O le tele o taimi sa tuua lava na o i ma’ua—e saili lo ma ala i se aganuu ma te le’i malamalama ai—o se aganuu e faaalia i gagana eseese sa le mafai ona ma tautatala ai. O saafiafiga a Sara Cleveland, se tasi o uluai taitai o le Aualofa, na faamatalaina ai o ma’ua lagona, “Ua tatou ulufale atu i lenei galuega i le suafa o le Alii. Ina tatou o atu ia i luma ma le lototetele.”8
O la’u lesona muamua lava i le faagasologa o lo’u avea ai o se tufugaaao o le Atua, o le suesue i tusitusiga paia, anapogi, tatalo, alu i le malumalu, ma ola faamaoni i feagaiga sa ou osia i le Maota o le Alii. O la’u lesona lona lua ina ia mafai ona ou “alu atu ma le lototele,” sa manaomia ona ou faalagolago atoatoa i le Alii ma saili atu ma le faamaoni mo ni faaaliga patino. Ina ia mafai ona ou maua lena faaaliga, sa tatau ona ou ola agavaa ina ia maua pea la ma’ua mafutaga ma le Agaga Paia.
O la’u lesona mulimuli o le mea tonu lava lea na faamatala mai e Elder Maxwell. E oo lava i mea aupito iti i aso taitasi, sa ou gaua’i atu i le finagalo o le Alii, aua sa ou mana’omia Lana fesoasoani ma le taitaiga. Ina ua ou faia, sa i’u ina suia la ma’ua sootaga ma le Tama i le Lagi—i auala maoa’e—na tumau ai pea ona faamanuiaina a’u ma lo’u aiga.
E ese la’u faigamalaga i le olaga, ese foi outou. E tele ni mea e mafai foi e outou taitoatasi ona aoao ai a’u mai o outou aafiaga o le gaua’i atu o outou manao i le finagalo o le Alii, a’o outou saili atu ma le faamaoni ia iloa lona finagalo mo outou. E mafai ona tatou fiafia faatasi i le talalelei a Iesu Keriso, ma faailoa atu ma le agaga faafetai le faamanuiaga o le i ai o se molimau i le Faaola ma Lana Togiola mo i tatou taitoatasi. Ou te iloa le mea lenei … o a tatou taumafaiga taitasi e avea ma “tufugaaao o le Atua” e le faigofie ma e fesoasoani tatou te tuputupu a’e ai faaleagaga—e faamauoaina ai a tatou faigamalaga i le olaga nei i ni auala e sili ona patino, ma matagofie.
Uso pele, ia faamanuia atu le Alii ia te outou taitoatasi i a outou taumafaiga patino ina ia iloa Lona finagalo mo outou, ma ia gaua’i atu o outou manao i Lona finagalo. Ou te molimau atu “na o le pau lava sa tatou meatotino moni e foai atu,”9 o o tatou loto taitoatasi. I le suafa o Iesu Keriso, amene.