Avea ma se Faifeautalai
O outou ma au, i le taimi nei ma aso uma lava, e ao ona molimau atu ia Iesu Keriso ma folafola atu le savali o le Toefuataiga… . O le galuega faafaifeautalai o se faaaliga lea o lo tatou tofi ma lo tatou faasinomaga faaleagaga.
O i tatou uma lava o e ua maua le perisitua paia o loo tauaveina se matafaioi paia ina ia faamanuiaina atunuu ma aiga o le lalolagi e ala i le folafolaina atu o le talalelei ma valaau atu i tagata uma ina ia latou maua e ala i le pule tatau o sauniga o le faaolataga. O le toatele o i tatou sa auauna atu o ni faifeautalai faamisiona, o nisi o i tatou o loo galulue nei o ni faifeautalai faamisiona, ae o i tatou uma lava o loo auauna atu nei ma o le a faaauau pea ona auauna atu i o tatou olaga atoa o ni faifeautalai. O i tatou o faifeautalai i aso uma i o tatou aiga, i a tatou aoga, i mea tatou te faigaluega ai, ma o tatou nuu. E tusa lava po o le a lo tatou matutua, aafiaga, po o tulaga i le olaga, o i tatou uma lava o faifeautalai.
O le folafolaina o le talalelei e le o se gaoioiga e faavaitaimi pe na o sina taimi tatou te aafia ai. Ma o a tatou galuega i le avea ai ma faifeautalai e mautinoa lava e le o faatulagaina mo na o se taimi puupuu e tuu atu i le auaunaga faamisiona i lo tatou talavou po o lo tatou matutua. Ae, o le matafaioi e folafola atu le talalelei toefuataiina a Iesu Keriso, na maua mai i le tautoga ma le feagaiga a le perisitua lea tatou te ulu atu i ai. O le galuega faafaifeautalai o le mea moni lava o se tiutetauave faaleperisitua, ma o i tatou uma o loo umia le perisitua o auauna faatagaina ia a le Alii i le lalolagi ma o faifeautalai foi i taimi uma ma nofoaga uma—ma o le a avea ai pea lava i tatou. O lo tatou lava faasinomaga i le avea ai ma e ua umia le perisitua ma o ni fanau a Aperaamo e matuai fuatiaina lava lea i le tiutetauave ina ia folafola atu le talalelei.
O la’u savali i lenei afiafi e faatatau lea ia i tatou uma lava i lo tatou tiute faaleperisitua ina ia folafola atu le talalelei. Ae peitai, o lo’u faamoemoega autu lava i lenei sauniga perisitua, o le talanoa manino atu lea i alii talavou o le Ekalesia o e o loo sauniuni atu mo le valaauga e auauna atu o ni faifeautalai. O mataupu faavae o le a ou talanoaina ma outou e faigofie ma e taua i le faaleagaga, ma e tatau ona faaosofia ai i tatou ia mafaufau loloto, ia toe iloilo, ma ia faaleleia. Ou te tatalo ina ia mafuta mai le Agaga Paia mo outou ma a’u, a o tatou iloiloina faatasi lenei mataupu taua.
O Se Fesili e Fesiligia Soo
I fonotaga ma le autalavou o le Ekalesia i le lalolagi, e masani ona ou valaaulia ai i latou e auai ina ia tuu mai ni fesili. O se tasi lenei o fesili e masani ona fesiligia ai au e alii talavou: “O le a le mea e mafai ona ou faia ina ia ou matuai saunia lelei ai e auauna atu o se faifeautalai faamisiona?” O se fesili faamaoni faapea e tatau i ai se tali mautinoa.
O’u uso talavou pele, o le mea sili ona taua e tasi e mafai ona e faia ina ia saunia ai mo se valaauga e auauna atu, o le avea lea ma se faifeautalai a o lei taitai ona e alu i se misiona. Faamolemole ia matau mai i la’u tali sa ou faamamafaina le avea nai lo le alu. Sei ou faamalamalamaina atu lona uiga.
I a tatou faaupuga ua masani ai i le Ekalesia, e masani ona tatou talanoa i le alu i le lotu, alu i le malumalu, ma le alu i se misiona. Ou te fia faamamafa atu faapea, o le masani ona tatou faamamafaina o le alu, e misi ai le vaega autu.
O le autu e le o le alu i le lotu; ae, o le autu o le tapuai atu ma le faafouina o feagaiga a o tatou auai atu i le lotu. E le o le autu o le alu i le malumalu po o le ulu atu i le malumalu; ae, o le autu o le i ai lea i o tatou loto o le agaga, o feagaiga, ma sauniga o le maota o le Alii. O le autu e le o le alu i le misiona; ae, o le autu o le avea ma se faifeautalai ma auauna atu i o tatou olaga atoa ma o tatou loto atoa, mafaufau atoa, manatu atoa, ma le malosi atoa. E mafai e se alii talavou ona alu i se misiona ae le avea ma se faifeautalai, ae le o le mea lea o loo moomia mai e le Alii po o le Ekalesia.
O lo’u faamoemoe moni mo outou alii talavou o le aua ne’i na ona outou o i se misiona—ae ia avea outou ma ni faifeautalai a o lei taitai ona auina atu a outou pepa o le misiona, a o lei taitai ona e maua se valaauga e auauna atu, a o lei taitai ona vaetofia oe e lau pereistene o le siteki, a o lei taitai ona e ulufale atu i le MTC.
O Le Mataupu Faavae o le Avea Ai
Na matuai lelei ona aoaoina i tatou e Elder Dallin H. Oaks e uiga i luitau ina ia avea ma se tasi, nai lo le na ona faia o mea ua faamoemoe e fai, po o le faatino foi o ni taga patino:
“Na aoao mai e le Aposetolo o Paulo e faapea na tuuina mai faiaoga ma aoaoga a le Alii ina ia mafai ai ona tatou maua ‘le fua o le ua matua e tatau ma le tumu o Keriso’ (Efe. 4:13). O lenei faiga e matuai sili mamao atu nai lo le na ona mauaina o le malamalama. “E le lava foi mo i tatou le na ona talitonu i le talalelei; e tatau ona tatou amio a’i ma mafaufau ai ina ia tatou liua ai. Pe a faatusatusa atu i a’oga a le lalolagi, ia o loo aoaoina ai i tatou ina ia iloa se mea, o le talalelei a Iesu Keriso o loo luitauina i tatou ina ia avea o se tasi… .
“… E le lava i soo se tasi le na o le faia o taga faaaliali. O poloaiga, o sauniga, ma feagaiga o le talalelei e le o se lisi o teugatupe moomia e faia i se teugatupe faalelagi. O le talalelei a Iesu Keriso o se fuafuaga ua ta’u mai ai ia te i tatou le ala e avea ai i tatou ma e ua finagalo ai lo tatou Tama Faalelagi“ (“O Le Luitau o le Avea ma se Tasi,” Liahona, Ian.2001, 40).
Uso e, o le luitau ina ia avea ma se tasi e faatatau tonu lava ma e fetaui lelei i sauniuniga faafaifeautalai. E matuai manino lava, o le faagasologa o le avea ma se faifeautalai e le manaomia ai le ofuina i le aoga e se alii talavou o se ofutino paepae ma le fusiua i aso uma, po o le mulimulitai i taiala a faifeautalai mo le taimi e moe ma ala ai, e ui lava o le toatele lava o matua e lagolagoina lena manatu. Ae e mafai ona faateleina lou manao e auauna atu i le Atua (tagai MFF 4:3), ma e te mafai ona amata ona mafaufau e pei o faifeautalai, ia faitau i mea e faitauina e faifeautalai, ia tatalo e pei o faifeautalai, ia lagona mea e pei ona lagonaina e faifeautalai. E mafai ona e aloese mai aafiaga faalelalolagi lea e mafua ai ona alu ese le Agaga Paia, ma e mafai ona tupu a’e lou lagona mautinoa i le iloaina lea ma le tali atu i uunaiga faaleagaga. O lea upu ma lea upu ma lea mataupu ma lea mataupu, o se mea itiiti iinei ma si mea itiiti iina, e mafai ai ona e faasolosolo atu ai lava ina avea ma faifeautalai o loo e faamoemoe i ai ma le faifeautalai o loo faamoemoe i ai le Faaola.
O le a le faafuase’ia pe faamaneta ona liuaina oe e avea ma se faifeautalai ua saunia ma usiusitai i le aso e te savali atu ai i le faitotoa i luma o le Nofoaga Autu e Aoao ai Faifeautalai. O le tagata na avea ai oe i aso ma masina ma tausaga a o lumanai lau auaunaga faafaifeautalai o le tagata lena o le a e oo i ai i le MTC. O le mea moni lava, o le tulaga e oo i ai le fesuiaiga lea o le a e pasiaina i le MTC o le a avea lea ma se faailoga malosi o lou alualu i luma i le avea ai ma se faifeautalai.
A o e ulufale atu i le MTC, o le a matuai mautinoa lava lou misia o lou aiga, ma o le tele o vaega o au fuafuaga i aso taitasi o le a fou ma faigata. Ae mo se alii talavou o loo sagai lelei atu i le avea ai ma se faifeautalai, o le fetuunaiga e masani ai i le mamafatu o le galuega faafaifeautalai ma le olaga, o le a le avea ma se mea e lofituina ai, po o se avega mamafa, pe taofiofia ai. O lea, o le ki autu i le siita’i i luga o tulaga e manaomia [mo se faifeautalai], e aofia ai le avea ma se faifeautalai a o lei alu atu i se misiona.
Tama, pe ua outou malamalama ea i la outou matafaioi o le fesoasoani atu lea i lou atalii ina ia avea ma se faifeautalai a o lei alu atu i se misiona? O oulua ma lou faletua o le autu lea i le faagasologa o le avea o ia ma se faifeautalai. Taitai o le perisitua ma ausilali, pe ua outou iloaina ea lo outou tiutetauave i le lagolago atu i matua ma fesoasoani i alii talavou uma taitoatasi ia avea ma se faifeautalai a o lei alu atu o ia i se misiona? Ua siitia foi le fua mo matua ma tagata uma o le ekalesia. O le mafaufau ma le agaga tatalo i le mataupu faavae o le avea ma se tasi o le a valaaulia ai musumusuga ua faatatau tonu lava i manaoga faapitoa o lou atalii po o alii talavou uma o loo e galue ai.
O le sauniuniga o loo o’u faamatalaina atu e le o matele atu i lau auaunaga faafaifeautalai o se alii talavou ua 19 po o le 20 po o le 21 tausaga. Uso e, o loo outou sauniuni atu mo se galuega faafaifeautalai o le olaga atoa. O lo tatou umiaina o le perisitua ua avea ai pea i tatou ma faifeautalai. Afai e faamaoni lou alualu i luma i le faagasologa o le avea ma se faifeautalai, e le gata i le taimi ae te lei alu i se misiona ae faapea foi le taimi o le misiona, afai e oo mai le aso mo lou faamaloloina faamamaluina mai le avea ai ma se faifeautalai faamisiona, o le a e malaga ese mai lau galuega ma toe foi atu i lou aiga—ae o le a e le taofia ai lava lau auaunaga faafaifeautalai. O se ua umia le perisitua o se faifeautalai lea i taimi uma ma nofoaga uma. O se faifeautalai, o i tatou lava ia i le avea ai ma e ua umia le perisitua ma fanau a Aperaamo.
O Fanau a Aperaamo
O suli o folafolaga uma ma feagaiga na faia e le Atua ia Aperaamo o loo faatatauina o fanau a Aperaamo (tagai Bible Dictionary, “Seed of Abraham,” 771). O nei faamanuiaga o loo maua i le na o le usiusitai lea i tulafono ma sauniga o le talalelei a Iesu Keriso. Uso e, o le faagasologa o le avea ma se faifeautalai e faatatau tonu lava lea i le malamalama, po o ai i tatou i le avea ai ma fanau a Aperaamo.
O Aperaamo o se perofeta maoae o le na manao i le amiotonu ma sa usiusitai i poloaiga uma na ia maua mai le Atua, e aofia ai le poloaiga ina ia tuuina atu lona atalii faapelepele o Isaako e osi ai se taulaga. Ae talu ai ona o lona maelega ma le usiusitai, o lea ua ta’ua ai Aperaamo o le tama o le au faatuatua, ma sa osia e le Tama Faalelagi se feagaiga ma folafola atu faamanuiaga silisili ia Aperaamo ma ana fanau:
“Ua e faia lava lenei mea, ua e le taofia lou atalii, o lou atalii e toatasi:
“O le mea lea ou te matua faamanuia ai ia te oe, ma ou matua faatoateleina lava lau fanau e pei o fetu o le lagi, e pei o le oneone foi o le matafaga; e maua foi e lau fanau faitotoa o e ita ia i latou;
“O lau fanau foi e manuia ai atunuu uma lava o le lalolagi; aua ua e usiusitai i la’u upu (Kenese 22:16–18).
O lea, sa folafola atu ai ia Aperaamo ni fanau se toatele ma o le a faamanuiaina atunuu o le lalolagi e ala i na fanau.
E faapefea ona faamanuiaina atunuu o le lalolagi e ala i fanau a Aperaamo? O le tali i lenei fesili taua o loo maua lea i le tusi a Aperaamo.
“Ma o le a ou faia ia avea oe [Aperaamo] ma nuu tele, ma o le a faasilisili foi ona ou faamanuiaina oe, ma faamamaluina lou igoa i atunuu uma, ma o le a avea oe ma faamanuiaga i au fanau o le a tutupu mai pe a e mavae atu, ma o o latou lima foi latou te tauaveina ai lenei galuega ma le Perisitua i atunuu uma.
“Ma o le a ou faamanuia atu ia i latou e ala atu i lou igoa; aua o i latou uma o e talia lenei Talalelei e faaigoaina i latou i lou igoa, ma avea i latou ma au fanau, ma o le a latou tutu mai foi ma viia oe, o so latou tama” (Aperaamo 2:9–10).
Ua tatou aoaoina i nei fuaiupu e faapea o suli faatuatua o Aperaamo o le a mauaina faamanuiaga o le talalelei a Iesu Keriso ma le pule o le perisitua. O lea la, o le faaupuga “tauaveina lenei galuega ma le Perisitua i atunuu uma” o loo faatatau lea i le tiutetauave o le folafola atu le talalelei a Iesu Keriso ma valaau atu i tagata uma ina ia taliaina e ala i le pule tonu o le perisitua, ia sauniga o le faaolataga. E moni lava, o loo i luga o fanau a Aperaamo i aso nei e gata ai se tiutetauave tele lava.
E faapefea ona faatatau nei folafolaga ma faamanuiaga ia i tatou i aso nei? A le o se suli ia po o se tamafai, o alii ma taulelea uma o loo faafofoga mai i lo’u leo i lenei afiafi o ni sulimoni o folafolaga na faia e le Atua ia Aperaamo. O i tatou o fanau a Aperaamo. O se tasi o mafuaaga tonu ua tatou mauaina ai se faamanuiaga faapeteriaka o le fesoasoani lea ia i tatou ina ia malamalama atoatoa ai po o ai i tatou i le avea ai ma fanau a Aperaamo ma ia iloa le tiutetauave ua i o tatou luga.
O’u uso pele e, o outou ma au, i le taimi nei ma aso uma lava, e ao ona faamanuiaina tagata uma i atunuu uma o le lalolagi. O outou ma au, i le taimi nei ma aso uma lava, e ao ona molimau atu ia Iesu Keriso ma folafola atu le savali o le Toefuataiga. O outou ma au, i le taimi nei ma aso uma lava, e ao ona valaau atu i tagata uma ina ia mauaina sauniga o le faaolataga. O le folafola atu o le talalelei e le o se matafaioi faaleperisitua mo na o se vaitaimi. E le na o se gaoioiga lea tatou te aafia ai mo se taimi faatapulaaina po o se tofiga e tatau ona tatou faamaeaina i le avea ai ma tagata O Le Ekalesia a Iesu Keriso o le Au Paia o Aso e Gata Ai. Ae, o le galuega faafaifeautalai o se faaaliga lea o lo tatou tofi ma lo tatou faasinomaga faaleagaga. Na muai faauuina i tatou i le muai olaga ma fananau mai i le olaga faaletino ina ia faataunuuina le feagaiga ma le folafolaga na faia e le Atua ia Aperaamo. Ua tatou i ai iinei i le lalolagi i lenei taimi e faalauteleina le perisitua ma talai atu le talalelei. O i tatou na, ma o le mafuaaga lena ua tatou i ai iinei—i le taimi nei ma aso uma lava.
E mafai ona outou fiafia i musika, afeleti, po o le matele atu foi i le faaenisinia, ma o le a i ai foi se aso atonu e te galue ai i se matata po o se galuega po o faatufugaga. Pe o le a le taua e mafai ona oo i ai ni gaoioiga ma galuega, e le mafai ona faamatalaina ai po o ai i tatou. O le vaega muamua lava ma le sili, o i tatou o tagata faaleagaga. O i tatou o atalii o le Atua ma fanau a Aperaamo:
“Aua ai se faamaoni i le maua o nei perisitua e lua ua ou tautala atu ai, ma le faalauteleina o lo latou valaaulia, ua faapaiaina e le Agaga i le faafouina o o latou tino.
“E avea i latou ma atalii o Mose ma Arona ma fanau a Aperaamo, ma le ekalesia atoa ma le malo, ma le au filifilia a le Atua” (MFF 84:33–34).
O’u uso pele, ua tele mea ua tuuina mai ia i tatou, ma e tele foi mea e sueina mai ia i tatou. Talosia ia malamalama atoatoa outou alii talavou po o ai outou i le avea ai ma fanau a Aperaamo ma avea ma ni faifeautalai a o lei taitai ona outou o atu i ni misiona. A mavae lo outou toe taliu mai i le fale ma aiga, tau ina ia avea outou faifeautalai ua maea ia misiona ma ni faifeautalai e le aunoa. Ma ia tatou tulai uma atu o ni tagata o le Atua ma faamanuia i atunuu o le lalolagi ma se molimau sili ma le mana faaleagaga ua sili atu nai lo le mea sa tatou i ai muamua.
Ou te ta’utino atu la’u molimau atu o Iesu o le Keriso, o lo tatou Faaola ma le Togiola. Ou te iloa o loo soifua o Ia! Ma ou te molimau atu o i tatou, o e o loo umia le perisitua, o Ona sui i le galuega mamalu o le folafolaina atu o Lana talalelei, i le taimi nei ma aso uma. I le suafa paia o Iesu Keriso, amene.