Iesu Keriso—o le Fomai o Fomai

Elder Russell M. Nelson

O Le Korama a Aposetolo e Toasefululua

O le faatuatua, salamo, papatisoga, ma se molimau ma le tumau o le liuaina e tau atu ai i le mana faamalolo o le Alii.

O’u uso e ma tuafafine pele, ou te momoli atu o’u alofaaga ma moomooga alofa ia te outou taitoatasi. I le avea ai ma sui o le Usoga, ou te avatu ai le faafetai mo lo outou lelei, mo le tele o a outou galuega matamau o le agalelei, mo a outou talosaga ma aafiaga o le lagolago i o outou olaga. O o matou luitau e pei foi o outou. Tatou te oo uma lava i faanoanoaga ma mafatiaga, i faama’i ma le oti. I taimi e malu ai ma taimi e sousou ai, o loo faamoemoe mai le Alii ina ia taitasi i tatou ma tutumau seia oo i le iuga. A o tatou agai uma i luma i Lana galuega paia, ua iloa ai e le Usoga le taua o o outou manatu ma popolega mo i matou, lea e ofoina mai ma le alofa ma taliaina ma le agaga faafetai. Matou te alolofa ia te outou ma tatalo mo outou, a o outou tatalo foi mo i matou.

E momoli atu la’u faafetai faapitoa i le Alii o Iesu Keriso. Ou te faafetai mo Lona alofa- agalelei ma Lana valaaulia ina ia o mai ia te ia.¹ Ou te ofo i le tulaga ese o Lona mana e faamalolo ai. Ou te molimau atu o Iesu Keriso o le Fomai o Fomai. O se tasi lea o uiga e tele e iloa ai Lona soifua le mafaatusalia.

O Iesu o le Keriso, o le Mesia, o le Alo o le Atua, o le Foafoa, o le Ieova silisiliese, o le Emanuelu na folafolaina, o lo tatou Faaola ma le Togiola, o lo tatou Fautua i le Tama, o lo tatou Faataitaiga sili. Ma o le a i ai se aso o le a tatou tutu uma ai i Ona luma, o lo tatou faamasino tonu ma le alofa.²

Vavega o le Faamalologa

I le avea ai ma Fomai o Fomai, na poloaiina ai e Iesu Ana uo ina ia “o atu ia … ma faailoa atu … mea ua oulua vaai i ai, ma faalogo i ai; ua pupula tauaso, ua savavali pipili, ua faamamaina lepela, ua logo e tutuli, [ma] ua faatutuina e ua oti.”³

O tusi a Mataio,⁴ Mareko,⁵ Luka,⁶ ma Ioane⁷ o loo lipotia mai ai e le aunoa e faapea na maliu atu Iesu i le talaiga o le talalelei ma faamaloloina ia ituaiga o ma’i eseese.

Ina ua faaali atu le Faaola toetu i tagata o Amerika anamua, sa Ia valaaulia ma le alofa i latou o e “ua mama’i”⁸ ina ia o mai ia te Ia ma ia faamaloloina.

O le mea e ofoofogia ai, o Lana pule paia e faamalolo ai e mama’i na tuuina atu lea i luga o e na umia ma le agavaa le perisitua i tisipenisione na muamua atu⁹ ma ua toe tuuina mai foi i nei aso e gata ai, ina ua toefuataiina mai Lana talalelei i lona atoatoaga.¹⁰

Aafiaga o le Tatalo i le Faamalologa

E mafai foi ona tatou maua Lona mana faamalolo e ala i le tatalo. O le a le galo lava ia te au se aafiaga na ma maua ma Sister Nelson pe tusa ma le tolusefulu tausaga talu ai faatasi ma Peresitene Spencer W. Kimball ma lana pele o Camilla. Sa matou i ai i Hamilton, Niu Sila, mo se konafesi tele lava ma le Au Paia. E lei avea au ma se Pulega Aoao i le taimi lena. Sa valaaulia au ou te auai i lenei sauniga ma isi sauniga faapea i Atumotu o le Pasefika, a o avea lena o a’u ma se peresitene aoao o le Aoga Sa. Ma a o avea ai foi ma se fomai, sa matou faatasi ai ma Peresitene ma Sister Kimball mo le tele o tausaga. Sa ou iloaina lelei i la’ua—i o la uiga ma o la tagata.

Sa saunia se polokalama faaleaganuu i le afiafi o le Aso Toonai mo lenei konafesi, e le autalavou o le Ekalesia i le lotoifale. Ae paga lea, sa gasegase uma ia Peresitene ma Sister Kimball, sa matuai fiva lava i la’ua. Ina ua mavae ona tuuina atu i ai ni faamanuiaga faaleperisitua, sa malolo loa i la’ua i le fale o le peresitene o le Malumalu o Niu Sila sa latalata ane. Na talosaga atu ia Peresitene Kimball i lona fesoasoani, o Peresitene N. Eldon Tanner, e pulefaamalumalu i le polokalama faaleaganuu ma ia faanoi atu Peresitene ma Sister Kimball.

Sa malaga ia Sister Nelson faatasi ma Peresitene ma Sister Tanner ma isi taitai i le faatasiga, ae o ma’ua ma le failautusi a Peresitene Kimball, o Brother D. Arthur Haycock, sa nonofo e vaai a ma uo o loo gasegase.

A o tofa ia Peresitene Kimball, sa faitau lemu la’u tusi i totonu o lona potu. Sa faafuasei ona ala i luga ia Peresitene Kimball. Sa fesili mai, “Brother Nelson, o le a le taimi e amata ai le polokalama i le afiafi nei?”

“O le fitu, Peresitene Kimball.”

“Ua ta nei le fia?”

“Toeitiiti ta le fitu,” sa ou tali atu ai.

Sa vave ona fai mai Peresitene Kimball, “Fai ia Sister Kimball o le a ma o!”

Sa ou siakiina le fiva o Peresitene Kimball. Ua lelei! Sa ou fuaina le fiva o Sister Kimball. Ua lelei foi!

Sa faavave ona fai o la laei ma feosofi i se taavale. Sa aveina atu i matou i le malae o le Kolisi a le Ekalesia i Niu Sila. Ina ua latalata atu le taavale i le malae, sa pa a’e i lena lava taimi se alaga tele. E le masani ai! Ina ua matou nonofo i lalo, sa ou fesili atu ia Sister Nelson po o le a le la leo faapena. Sa ia fai mai, ina ua amataina e Peresitene Tanner le sauniga, sa ia tuuina atu le faanoi mo Peresitene ma Sister Kimball ona o loo gasegase. Ona tofi lea o se talavou Niu Sila e tatalo.

I le faatuatua tele, sa ia tuuina atu ai se tatalo, lea na faamatalaina e Sister Nelson o se tatalo sa umi ae sa mamana. Sa ia tatalo faapea: “O i matou o talavou e 3,000 o Niu Sila. Ua matou potopoto iinei, sa matou saunia mo le ono masina e pepese ma sisiva mo Lau perofeta. Sei e faamaloloina o ia ma aumai o ia iinei!” Na uma loa ona fai atu “amene,” ae ulufale mai loa le taavale sa aumai ai Peresitene ma Sister Kimball i le malae. Sa vave ona iloa atu i la’ua, ma o le taimi lava lena na alalaga ai tagata i le fiafia!¹¹

Sa ou molimauina le mana faamalolo o le Alii! Sa ou molimauina foi le mauaina o faaaliga ma le tali atu i ai a Lana perofeta soifua!

Ua ou iloaina, e i ai nisi taimi, e foliga mai ai e le tali maia nisi o a tatou tatalo faatauanau. Tatou te maofa, “Aisea?” Ou te iloaina lena lagona! Ua ou iloaina ia popolega ma loimata o taimi faapena. Ae, ua ou iloaina foi o a tatou tatalo e leai se taimi ua le amanaiaina ai. E le faapea ua le talisapaiaina lo tatou faatuatua. Ua ou iloaina e sili atu le lautele o le silafaga a se Tama Faalelagi atamai nai lo tatou. E ui ua tatou iloa o tatou faafitauli ma tiga faaletino, ae ua Ia silafia lo tatou alualu i luma e le iu ma lo tatou malosiaga. Afai tatou te tatalo ina ia iloa Lona finagalo ma gauai atu o tatou tagata i ai, i le onosai ma le lototele, e mafai e le faamalologa faalelagi ona oo mai i Lana lava ala ma le taimi.

Laasaga E Agai Atu i le Faamalologa

E mafai ona oo mai tiga mai mafuaaga faaleagaga pe faaletino foi. Na manatua e Alema le Itiiti o lana agasala ua matuai tiga lava, ma o lea na ia moomoo ai ina ia “fano [lona] agaga atoa ma le tino, ina ia le amia o [ia] e tu i luma o le … Atua ina ia faamasinoina o [ia] i [ana] galuega.”¹² I taimi faapea, e mafai faapefea ona Ia faamaloloina i tatou?

E mafai ona tatou salamo atoatoa! E mafai ona tatou matuai liua atoatoa! Ona mafai lea e le “Atalii o le Amiotonu”¹³ ona matuai faamanuiaina atoatoa i tatou e ala i Lona aao faamalolo.

I popofou o Lana misiona i la le tino, na folafola atu ai e Iesu faapea na auina mai o Ia e “faamalolo i e loto momomo.”¹⁴ Soo se mea Na te aoaoina ai i latou, e tumau pea Lana faatulagaga. A o o’u sii maia Ana afioga na fetalai i ai i taimi ma nofoaga eseese e fa, ia matau le faatulagaga.

I tagata o le Nuu Paia, na fetalai atu le Alii i Lona nuu e “tatau ona vaai i o latou mata, ma faalogo i o latou taliga, ma e tatau ona latou malamalama i o latou loto, ma liliuina i latou, ma ou faamaloloina i latou.”¹⁵
I tagata o Amerika anamua, na tuuina atu i ai e le Alii toetu lenei valaaulia: “Foi mai ia te au, … salamo i a outou agasala, ma ia faaliliuina, ina ia ou faamaloloina outou.”¹⁶
I taitai o Lana Ekalesia, na Ia aoao atu: “Ia galulue pea mo ē faapea; aua tou te le iloa, pe le liliu mai i latou ma salamo, ma o mai ia te au ma le loto atoa, ma ou faamaloloina i latou.”¹⁷
Mulimuli ane, i le taimi o le “toefuataiina o mea uma,”¹⁸ na aoao ai e le Alii le Perofeta o Iosefa Samita e uiga i paionia,“Pe a mavae atu o latou tofotofoga, ma puapuaga e tele, faauta, o au, le Alii, o le a manatua i latou, afai foi latou te le faamaaa o latou loto, ma le faamalo o latou ua ia te au, o le a faaliliuina i latou, ou te faamalolo foi ia i latou.”¹⁹

O le faasologa o Lana faatulagaga e taua. O le faatuatua, salamo, papatisoga, ma se molimau, ma le tumau o le liuaina e tau atu ai i le mana faamalolo o le Alii. O le papatisoga o se faatinoga o se feagaiga—o se faailoga o le tautinoga ma se folafolaga. E atiina ae le molimau pe a tuuina atu e le Agaga Paia le talitonuga i le tagata e saili faamaoni i le upumoni. O le molimau faamaoni e faalauteleina ai le faatuatua; e siitia ai le salamo ma le usiusitai i poloaiga a le Atua. O le molimau e faatupuina ai le maelega e auauna atu i le Atua ma uso a tagata.²⁰ O le liuaina o lona uiga “o le liliu mai.”²¹ O le liuaina o se liliu ese mai lea i ala o le lalolagi ma tumau ai i ala o le Alii. O le liuaina e aofia ai le salamo ma le usiusitai. O le liuaina e aumaia ai se liliu tele o le loto.²² O lea, o se tagata moni ua liuaina ua “toe fanauina,”²³ ua ola i se olaga toefuataiina.²⁴

I le avea ai ma tagata moni ua liuaina, ua uunaiina i tatou e faia le mea ua finagalo le Alii tatou te faia,²⁵ ma avea ma tagata ua Ia finagalo tatou te oo i ai.²⁶ O le faamagaloina o agasala, lea e oo mai ai le faamagaloga faalelagi, e faamaloloina ai le agaga.

E faapefea ona tatou iloa pe ua tatou liua moni? O loo maua i tusitusiga paia ni suega e su’e ai e le tagata ia lava. E fuafaatatau e se tasi le tulaga o le liuaina o se tulaga manaomia o le papatisoga.²⁷ O le isi e fuafaatatau i lo tatou naunau e auauna atu i isi. Na fetalai atu le Alii i Lona soo o Peteru, “A ua ou faatoga mo oe, ina ne’i mavae lou faatuatua: a o oe foi, pe a liua mai oe, ona e faamalosi ai lea i lou uso.”²⁸ O le naunau e auauna atu ma faamalosia isi o loo tu e avea ma se faailoga o le saunia o se tasi ina ia faamaloloina.

Lautele o Lana Faamalologa

Na folafola mai e Ioane le Soo Pele, “Faauta i le Tamai Mamoe a le Atua, o le na te aveese agasala a le lalolagi!”²⁹ E maeu lea mana! E na o le Fomai o Fomai lava e mafai ona ia aveeseina agasala a le lalolagi. Ua matuai tele la tatou aitalafu ia te Ia.

Ou te manatua se mea na ou oo i ai a o talanoa atu i se vaega o faifeautalai. Ina ua maea ona ou fai atu e aumai ni fesili, na tulai i luga se tasi alii faifeautalai. Sa maligi ona loimata ma fesili mai, “Aisea na matuai puapuagatia ai Iesu?” Na ou fai i le alii faifeautalai e susue lana tusi pese ma faitau mai upu o loo i le [pese] “Ua Sili Oe.” Na ia faitauina:

A ou manatu, i le Alo Pele,
I lona maliu, se mea e ofo ai,
Faalavaau tauave o’u leaga,
Ua Ia maliu e tafi o’u sese.30

Ona ou fai atu lea i le alii faifeautalai lenei e faitau mai le “Ia Migao ma Faamaulalo Nei.” O nei upu e maeu le ootia ona sa tusia e pei lava o loo tuuina atu e le Alii Lana lava tali i le fesili lea na fesiligia:

Mafaufau ia te au, le ua totogia;
Mafaufau i mea na ou faia.
O lo’u toto na maligi e pei o le ua,
Na afu ma oi i le tiga,
O lo’u tino na faalavaau
Ina ia togiolaina ai oe….

Ia e manatua mea na faia
Ina ia manumalo le tagata agasala.
I le satauro i Kalevaria
Na ou puapuaga ai mo oe.31

Na matuai puapuagatia Iesu ona o Lona alofa tele ia i tatou! E finagalo o Ia ina ia tatou salamo ma liuaina, ina ia mafai ai ona Ia faamaloloina atoatoa i tatou.

Afai e oo mai faigata³² ia i tatou, o le taimi lea e ao ai ona maua’a lo tatou faatuatua i le Atua, ia galulue malolosi, ma auauna atu i isi. O le a Ia faamaloloina o tatou loto momomo. O le a Ia tuuina mai ia i tatou le filemu moni³³ ma le faamafanafanaga.³⁴ O na meaalofa maoae o le a le faatafunaina lava, e tusa lava po o le oti.

Toetu—O Le Faatinoga Silisili o le Faamalologa

O le meaalofa o le toetu o le faatinoga silisili lea a le Alii o le faamalologa. Faafetai ia te Ia, o le a toefuataiina tino taitasi i lona uiga sa’o ma le atoatoa.³⁵ Faafetai ia te Ia, e leai se aiaiga e leai se faamoemoe. Faafetai ia te Ia, aua o loo i luma atu aso lelei, e le gata i le olaga nei ae o le olaga a sau. O le olioli moni o loo faatalitali mai mo i tatou taitoatasi—pe a mavae lenei olaga faanoanoa.

Ou te molimau atu o loo soifua le Atua, o Iesu o le Keriso—o le Fomai o Fomai—i le suafa paia o Iesu Keriso, amene.