O Le Fiafia Moni: O Se Faaiuga Malamalama
O le fiafia o se tulaga o le agaga. O lenei tulaga olioli e oo mai ona o se taunuuga o se olaga amiotonu.
O le olaga e lelei, pe afai tatou te ola i se auala ina ia lelei ai.” O se vaega lenei o se savali musuia sa ou faitau i ai i le tele o tausaga ua mavae. O le mea o loo ta’ua e le savali “o se olaga lelei” e oo mai o se taunuuga o le auala tatou te faia ai ni mea, o upu tatou te tautatala ai, e oo lava i ituaiga mafaufauga tatou te filifili ia i ai.
E leai se tasi e moomia ona lagonaina le tuua na o ia i luga o le ala o le olaga, aua ua valaaulia i tatou uma ina ia o mai ia Keriso ma ia faaatoatoaina ia te Ia. O le fiafia o le faamoemoega lea o le talalelei ma o le faamoemoega lea o le Togiola laveai mo tagata uma.
O le faamatalaga o i le tusi a Helamana o loo ta’u mai ai i se ala manino e faapea: “Ua faapea ona tatou iloa ua finagalo alofa le Atua ia i latou uma o e valaau atu i lona suafa paia ma le faamaoni o o latou loto.
“Ioe, ua faapea ona tatou iloa ua avanoa le faitotoa o le lagi ia i latou uma, o e faatuatua i le suafa o Iesu Keriso, o le Alo o le Atua lea.
“Ioe, ua tatou iloa ai ai se tago i le afioga a le Atua, ua telelise ai ma ua mamana, e … taitai atu le tagata o Keriso i le ala sa’o ma le vaapiapi …
“E faataunuuina atu ai o latou agaga, ioe, o latou agaga e le oti, i le itu taumatau o le Atua i le malo o le lagi.”1
O’u uso e ma tuafafine pele, e moomia ona tatou iloa o le “manao i ai”o le mafuaaga lea e taitai atu ai i tatou ina ia pipiimau i le afioga a le Atua ma ia fiafia. O le tumau mausali i le faia o faaiuga sao o le mea lena e taitai atu ai i tatou i le fiafia.
O le fiafia e oo mai o se taunuuga o lo tatou usiusitai ma lo tatou lototele i le faia pea o le finagalo o le Atua, e ui i tulaga sili ona faigata. Ina ua lapataiina e le perofeta o Liae ia tagata o Ierusalema, sa latou faatauemu ia te ia, ma, e pei foi o isi perofeta anamua, sa latou saili e fasioti ia te ia. Ou te aumaia upu a le perofeta o Nifae: “O le a ou faailoa atu ia te outou le alofa mutimutivale o le Atua e ia i latou uma o e ua ia filifilia, ona o lo latou faatuatua, e faamalolosi a’i i latou e oo lava i le mana o le faaolaina.”2
A o ou auauna atu faamisiona i Mekisiko i matu, na ou maua se telefoni mai ia Uso Valdez i ni nai aso talu ona mavae ia sauniga o le papatisoga o le aiga o Valdez, ma sa fai mai ma te o i lona fale. Sa i ai sana fesili taua mo i ma’ua. O lea ua ia iloa nei le finagalo o le Alii e faatatau i le Upu o le Poto, ma e ui lava o le a faigata ona sailia se galuega fou, ae manatu o ia pe le tatau pea ona ia faaauau ona faigaluega i le kamupani sikaleti, lea sa ia galue ai mo le tele o tausaga. Na o ni nai aso mulimuli ane na talosaga mai ai foi Uso Valdez ia i ma’ua e fia sau e asiasi mai. Ua tonu ia te ia e faamuta lana galuega ona e le o manao e feteenai ma ona talitonuga. Sa ataata o ia, ma le lagona ootia i lona leo, sa ia ta’u mai o le aso lava na faamutaina ai lana galuega tuai, na telefoni atu ai se isi kamupani ma ofoina atu ia te ia se isi tofiga e sili atu.
Ioe, tatou te maua le fiafia e ui lava ina tofotofoina lo tatou faatuatua. E faaali mai le Alii o Ia lava ia i tatou e ala i Lona alofa mutimutivale, lea tatou te mauaina i le ala o le fiafia. Ua tatou vaaia ma le manino Lona aao i o tatou olaga.
O le fiafia o se tulaga o le agaga. O lenei tulaga olioli e oo mai ona o se taunuuga o se olaga amiotonu.3
I tausaga ua mavae a o ou auauna atu o se peresitene o le misiona, na molimauina ai e lo’u toalua o Evelia, se vaaiga faamomoiloto o le fiafia ina ua vaaia se aiga faamaoni ua ulufale atu i le falesa. O lenei tina ma lana fanau laiti e toalua sa savavali mai lo latou fale faatauvaa i le vevela o le la e agai atu i le lotu i lena aso. Latou te lei mafaufauina lava o le a latou mauaina ia Elder Cruz, le faifeautalai maelega, o le na faasoaina atu le savali o le talalelei toefuataiina ia i latou i le tausaga ua mavae. O lenei feiloaiga e lei mafaufauina, o le ki lea i lo latou iloaina o le fiafia sili na aumaia e le talalelei i o latou olaga. Na taufetuli atu tamaiti e fusi ia te ia, ma, a o maligi ifo loimata o Elder Cruz i ona alafau, na uumau e le tina ona lima, ma faafetai atu ma le loto ia te ia mo mea uma na ia faia ina ia manuia ai lo latou aiga. E mautinoa lava na latou maua lena fiafia lea sa saunia ma faapolopoloina mo le Au Paia.4
Na saunoa le Perofeta o Iosefa: “O le fiafia o le autu lea ma le fuafuaga o lo tatou i ai iinei; ma o le taunuuga foi lea, pe afai tatou te sailia le ala e tau atu i ai; ma o lea ala o le mama, amiotonu, faamaoni, faapaiaina, ma le tausia o poloaiga uma a le Atua.”5
Ina ua mavae tauiviga ma le malaga umi e oo atu i le nuu o le folafolaga, ma ina ua mavae le 30 tausaga o taumafaiga faamaoni e tausia poloaiga a le Atua,6 na otootoina ai e le perofeta le solomuli o Nifae i le Tusi a Mamona le talafaasolopito o ona tagata ina ua ia faapea mai, “Ua oo foi ina nonofo i matou ma le fiafia.”7
O le fiafia o loo faauigaina i le Tusi a Mamona e le perofeta ma le tupu o Peniamina o le: “manuia ma le fiafia o i latou [e] tausi i poloaiga a le Atua. Aua, faauta, ua manuia i latou i mea uma, i le faaletino ma le faaleagaga”8
Ioe, o’u uso e ma tuafafine peleina, o le olaga e lelei pe afai tatou te ola i se auala faapea ina ia lelei ai. O le talitonu, manao, fuafua, ma le filifili sao o nai aga faigofie na lea e faauigaina ai se faateleina o le fiafia ma se faateleina o le mautinoa i totonu, e sili atu i lenei olaga.
Ia tatou manatua o le Alii lava Ia o loo valaau mai pea ia i tatou: “Ia outou o mai ia te au, o outou uma o e tigaina ma mafatia i avega, o au foi e malolo ai outou.”9 Ua ou iloa o loo soifua o Ia ma o loo faaauau pea ona Ia tu’itu’i mai i o tatou faitotoa. Na Ia toefuatai Lana Ekalesia ma le atoatoaga o le talalelei e auala mai i le Perofeta o Iosefa Samita faapea ma le oo mai o le Tusi a Mamona. E oo lava i aso nei, o loo taitai e Ia Lana Ekalesia ma le malo e ala i lo tatou perofeta pele o Peresitene Gordon B. Hinckley.
Ou te tuua outou ma o’u alofaaga ma la’u molimau faamaualalo i le suafa o le Alii o Iesu Keriso, amene.