O Le Paia o le Tino
E finagalo le Alii ina ia sui i tatou—i Lona faatusa, ae le o le faatusa a le lalolagi, e ala i le mauaina o Ona foliga i o tatou mata.
Faatoa ou foi mai i se asiasiga sa ou faafeiloaia ai le oo mai i le lalolagi o le pepe meamea fou a le ma tama teine, o Elizabeth Claire Sandberg. E atoatoa o ia! Sa matuai ou maofa lava, e pei ona ou i ai nei, i soo se taimi lava e fanau mai ai se pepe, i ona tamatamailima, tamatamaivae, lauulu, o le tata o lona fatu, ma ona foliga e pei o lona aiga—isu, auvae, oomo o alafau. Na faapena foi le fiafia ma le maofa o ona tuagane ma uso matutua i lo latou tei laitiiti ma le atoatoa. Na foliga mai sa latou lagonaina se mamalu i totonu o lo latou aiga, ona o le auai ai o se agaga faaselesitila, faatoa tuufaatasia lava ma se tino faaletino mama.
I le lalolagi o le muai olaga, sa tatou aoao ai o le tino o se vaega o le fua-fuaga sili o le fiafia a le Atua mo i tatou. E pei ona ta’ua i le folafolaga i le aiga: “Sa iloa ma tapuai atalii ma afafine faaleagaga o le Atua o lo latou Tama e Faavavau, ma sa [latou] talia Lana fuafuaga e mafai ai e Lana fanau ona maua ni tino faaletino ma le tomai faalelalolagi latou te maua ai le atoatoaga ma iloa tino ai lona taunuuga paia o se suli o le ola e faavavau” (“O Le Aiga: O Se Folafolaga i le Lalolagi,” Liahona, Oke. 2004, 49). O le mea moni, sa tatou “alalaga fiafia” (Iopu 38:7) i le avea ai o se vaega o lenei fuafuaga.
Aisea na tatou matuai fiafia ai? Sa tatou malamalama i upumoni e faavavau e uiga i o tatou tino. Sa tatou iloa o o tatou tino o le faatusa o le Atua. Sa tatou iloa o o tatou tino o le a tuuina i ai o tatou agaga. Sa tatou malamalama foi, o le a oo o tatou tino i tiga, ma’i, le atoatoa, ma faaosoosoga. Ae sa tatou mananao lava, ma naunau, e talia nei luitau aua sa tatou iloaina, ua na o le agaga ma le elemene faafesootaia le mavavaeeseeseina, e mafai ai ona tatou alualu i luma e avea faapei o lo tatou Tama Faalelagi (tagai MFF 130:22) ma “maua le atoatoaga o le olioli” (MFF 93:33).
Faatasi ai ma le atoatoaga o le talalelei i le lalolagi, ua toe faamanuiaina foi i tatou i le iloa o nei upumoni e uiga i o tatou tino. Na aoao mai Iosefa Samita: “Na tatou o mai i lenei lalolagi ina ia maua se tino ma tuuina atu ma le mama i luma o le Atua i le Malo Selesitila. O le mataupu faavae sili o le fiafia, e aofia ai le i ai o se tino. O le Tiapolo e leai sona tino, ma o lona faasalaga lena” (The Words of Joseph Smith, ed. Andrew F. Ehat and Lyndon W. Cook [1980], 60).
Ua iloa foi e Satani nei lava upumoni e faavavau e uiga i le tino, ae peitai, o lona faasalaga o le lē maua lea o sona tino. O le mea lea e taumafai ai e faia mea uma e mafai ona ia faia, ina ia tatou faia faatautala pe faaaoga sese ai lenei meaalofa faapelepele. Ua ia faatumuina le lalolagi i pepelo ma mea taufaasese e uiga i le tino. Na te faaosoosoina le toatele ina ia faaleaga i lenei meaalofa maoae o le tino, e ala i le ola le mama, amioga e le tausaafia, faaloloto, ma mea e faananau i ai. Na te faatosinaina nisi e inoino i o latou tino; na te faaosoina isi ia atua i o latou tino. I soo se tulaga lava, na te faaosoosoina le lalolagi ina ia mafaufau i le tino ua na o se mea [e leai se aoga]. Talu ai ona ua tele mea sese faasatani e uiga i le tino, ou te fia talanoa atu ai i le aso e lagolagoina le paia o le tino. Ou te molimau atu o le tino o se meaalofa, e tatau ona tausia ma le agaga faafetai ma le faaaloalo.
Ua folafola mai i tusitusiga paia, o le tino o se malumalu. O Iesu lava na muamua faatusaina Lona tino i se malumalu (tagai Ioane 2:21). Mulimuli ane, na apoapoai atu Paulo i tagata o Korinito, o se aai amioleaga na tumu i ituaiga uma o amioleaga ma le mataua: “Tou te le iloa ea o le malumalu outou o le Atua, o loo nofo foi le Agaga o le Atua i totonu ia te outou? Afai e faaleaga e se tasi le malumalu o le Atua, e faaleagaina lena tagata e le Atua; aua e paia le malumalu o le Atua, o outou lava ia” (1 Korinito 3:16–17).
O le a le mea e tupu pe a tatou tausi lelei o tatou tino o ni malumalu? O le taunuuga o le a matuai iloga le faateleina o le ola mama, amioga tauagafau, usitaia o le Upu o le Poto, ma e faapena foi ona faaitiitia ia faafitauli o tusi ma ata mataga ma le faatautala, aua o le a tatou faia le tino, e pei o le malumalu, o se nofoaga paia mo le Agaga. E pei lava ona leai se mea eleelea e mafai ona ulu atu i le malumalu, o le a tatou faaeteete foi e taofia soo se ituaiga o mea e le mama mai le ulu atu i le malumalu, o o tatou tino ia.
E faapena foi, i le tatou tausia o le itu i fafo o tino o o tatou malumalu, ia mama ma matagofie, e atagia ai le natura paia ma le mamalu o tulaga o loo i totonu, e pei lava ona faia e le Ekalesia i ona malumalu. E tatau ona fai [faalelei] o tatou laei ma ia amio i amioga e atagia ai le paia o le agaga o loo i totonu o i tatou.
O se taimi e le’i mamao atu, a o ou asiasi atu i se tasi o taulaga o le lalolagi e sili ona tumu i turisi, sa ou lagona le faanoanoa tele ona o le toatele o tagata o le lalolagi ua faaleagaina i faiga taufaasese a Satani e faapea, o o tatou tino ua na o ni mea e faaalialia vale ai ma faaali atu i tagata uma. Vaai i le eseesega ma lo’u fiafia ina ua ou ulufale atu i se potuaoga o ni tamaitai talavou e tausaafia ma fai faalelei o latou laei, ma o latou foliga susulu i le amiolelei. Sa ou manatu ifo, “O ni tamaitai lalelei nei e toavalu, e iloa ona faaali le faaaloalo mo o latou tino, ma ua iloa le mafuaaga ua latou faia ai.” I le Mo le Malosi o le Autalavou, o loo faapea mai: “O lou tino o le foafoaga paia a le Atua. Ia faaaloalo i ai e pei o se meaalofa mai le Atua, ma aua lava nei faaleagaina i soo se itu. O ou ofu ma ou foliga vaaia, e mafai ai ona e faaali atu i le Alii e te iloa le taua tele o lou tino… . O le faiga o ou ofu o se ata lea o le ituaiga tagata e i ai oe” ([2001], 14–15).
O le tausaafia po o le tauagafau, e sili atu nai lo le tulaga o le aloese mai laei e faaaliali ai itutino. E le gata ina ta’u mai ai le fua o le uumi ma le maualalo o ua o ofu, ae faapea foi i uiga o o tatou loto. O le upu tauagafau o lona uiga o le “fuafaatatau.” E faatatau i le talafeagai. E faatatau i le “lelei, ma le faaaloalo … i mafaufauga, gagana, laei, ma amioga” (i lê Daniel H. Ludlow, ed., Encyclopedia of Mormonism, 5 vols. [1992], 2:932).
O le talafeagai ma le tatau e ao ona taitaia ai o tatou manaoga faaletino uma lava. Ua tuuina mai e se Tama Faalelagi alofa ia i tatou le lalelei ma le fiafia faaletino “ina ia fiafia ai mata ma faaolioli ai le loto” (MFF 59:18), ae ua i ai ma le lapataiga lenei: ua faia ia mea ”ia faaaogaina i le faautauta, ma le tatau ai, a e lē ave faamalosi” (MFF 59:20). Na faaaoga e lo’u toalua lenei mau e aoao ai la ma fanau e uiga i le tulafono o le legavia. Na faapea mai o ia o le “upu ave faamalosi … o lona uiga moni o le ‘liliu ese [po o le feteenai].’ O lo tatou faaaogaina … o le tino, e le tatau ona liliu ese [feteenai] ma faamoemoega paia faauuina na ala ai ona tuuina mai.” O le faamalieina faaletino e lelei i le taimi tonu ma le nofoaga sa’o, peitai, tusa lava foi i lena tulaga, e le tatau ona avea ma o tatou atua” (John S. Tanner, “The Body as a Blessing,” Ensign, Iulai 1993, 10).
O le faamalieina o le tino, e mafai ona avea ma se mea e fiafia i ai nisi, e faapena foi i le manatu tatou te tuuina i o tatou foliga i fafo. O nisi taimi e i ai le manao tele ia faamalositino, tuuitiitia le tausami, faaaogaina o vali ma isi auala e sui ai foliga, ma le faaaluina o tupe i sitali fou o lavalava (tagai Alema 1:27).
Ua faapopoleina a’u i le masani lea o le papanu o vali ma le sui o foliga. O le fiafia e oo mai i le taliaina o tino ua tuuina mai ia i tatou, o ni meaalofa paia ma le faaleleia atili o o tatou uiga faanatura, e lē mai le toe faia o o tatou tino i faatusa a le lalolagi. E finagalo le Alii ina ia sui i tatou—i Lona faatusa, ae le o faatusa a le lalolagi, e ala i le mauaina o Ona foliga i o tatou mata (tagai Alema 5:14, 19).
Ou te manatua lelei lava [o’u] lagona le mautonu a o ou talavou, ona o le fuafuā o o’u foliga. Sa ou taumafai e tausi lelei lo’u tino. Sa fesoasoani o’u matua ia ou maua ni togafitiga faafomai. Mo le tele o tausaga, sa ou le ’aia ai ni sukalati ma meaai ga’oa uma mai faleaiga, lea e masani ona fiafia i ai le tupulaga, peitai e le’i manuia lelei ai lava. Sa faigata ia te au i lena taimi ona talisapaia atoatoa lenei tino, lea na aumaia ia te au le faanoanoa tele. Ae peitai, na aoao mai e lo’u tina lelei ia te au se tulafono maualuga atu. Sa fai mai soo o ia ia te au, “E tatau ona e faia mea uma e te mafaia ina ia matagofie ai ou foliga i fafo, ae o le taimi lava e te ulufafo atu ai ma le faitotoa, ia faagalo oe lava ae mafaufau i isi tagata.”
Ia o lena. Sa ia aoao mai ia te au le mataupu faavae faaKeriso o le lē manatu faapito. O le alofa, po o le alofa mama o Keriso, “e le losilosi, e le faafefeteina, e le saili e ia ana lava mea” (Moronae 7:45). A avea i tatou ma tagata e manatunatu i isi, po o le lē manatu faapito, tatou te atiaeina se lalelei i totonu o le agaga, e faapea ona susulu mai i o tatou foliga i fafo. O le auala lenei tatou te faia ai i tatou lava i le faatusa o le Alii ae le o le lalolagi, ma maua ai Ona foliga i o tatou mata. Na saunoa Peresitene Hinckley e uiga i lenei lava ituaiga o lalelei, lea e oo mai a o tatou iloa ona faaaloalo i le tino, mafaufau ma le agaga. Na ia saunoa:
“Mai foafoaga uma a le Silisiliese, e leai se isi mea na sili atu ona matagofie, leai se isi mea e sili atu ona musuia, nai lo se afafine matagofie o le Atua o le e savali i uiga tonu, faatasi ma se malamalama i le ala e tatau ai ona faia faapea e ia, o le na te faamamaluina ma faaaloalo i lona tino o se mea e sa ma paia, o le na te faaleleia lona mafaufau ma faalauteleina e ia e le aunoa lona malamalama, o le na te fafagaina lona agaga i upumoni e faavavau” (“Malamalama i lo Tatou Natura Paia,” Liahona, Fep. 2002, 24; “Our Responsibility to Our Young Women,” Ensign, Set. 1988, 11).
O la’u tatalo faamaoni, ia saili e alii ma tamaitai uma le lalelei na viia e le perofeta—i le tino, mafaufau ma le agaga!
Ua aoao mai e le talalelei toefuataiina, e i ai se sootaga faanatura o le tino, mafaufau ma le agaga. Mo se faataitaiga, i le Upu o le Poto, ua fusia faatasi ai le faaleagaga ma le faaletino. A tatou mulimuli i le tulafono o le soifua maloloina a le Alii mo o tatou tino, ua faapea foi ona folafola mai le atamai i o tatou agaga ma le poto i o tatou mafaufau (tagai MFF 89:19–21). E moni lava e fusia faatasi le faaleagaga ma le faaletino.
Ou te manatua se mea na tupu i lo’u aiga a o ou tuputupu ae, lea na aafia ai le agaga mataalia o lo’u tina, ona o le taumafai tele e faamalie le manao faaletino. Sa ia faataita’ia se fua fou o le faiga o pani suamalie. Sa lapopoa suamalie ma mananaia—e matuai maona lelei ai lava. E oo foi i o’u tuagane talavou, ua le mafai ona sili atu i le tasi le pani a le tagata e ‘ai. O le afiafi lena i le tatalo faaleaiga, na fai atu ai lo’u tama ia Tina e fai le tatalo. Sa punou lona ulu ma e le’i tali mai. Sa ia eu malie atu o ia, “E i ai se mea ua tupu?” Mulimuli ane sa ia fai mai, “Ua ou tau le lagona se faaleagaga i lenei po. Faatoa uma lava ona ou aia na pani mananaia e tolu.” Ou te masalo e toatele i tatou sa faatiga faapena i nisi taimi i o tatou agaga, e ala i le fiafia i mea faaletino. O mea ua faapitoa ona faasaina i le Upu o le Poto, e i ai se taunuuga le lelei i o tatou tino faapea ai ma se aafiaga gase ai lo tatou mataalia faaleagaga. E leai se tasi o i tatou e mafai ona le amanaiaina lenei sootaga o o tatou agaga ma tino.
O nei tino paia, ua faapea ona tatou matuai faafetaia, e pagatia i tapulaa faanatura. O nisi tagata e fananau mai ma le lē atoatoa, ma o nisi e mafatia i tiga o faama’i i o latou olaga atoa. O i tatou uma lava pe a tatou matutua, tatou te iloa lava le faasolosolo malie atu o lo tatou malosi. A tupu mai lenei mea, tatou te moomoo mo le aso o le a faamaloloina ma faaatoatoaina ai o tatou tino. Tatou te tulimatai atu i le Toetutu lea na auala mai ia Iesu Keriso, pe a “toe tuuina atu le agaga i le tino, ma le tino i le agaga; ioe, e toe tuuina ivi ma gaugaivi uma, taitasi i lona lava tino; ioe, e leai lava se lauulu e tasi e le iloa; ae tuuina atu mea uma i lo latou tino e tatau ai ma le atoatoa” (Alema 40:23). Ou te iloa, e ala mai ia Keriso, ua mafai ai ona tatou iloa le atoatoaga o le olioli, lea e maua mai i le agaga ma le elemene fesoota’i e lē mavavaeeseeseina (tagai MFF 93:33).
O o tatou tino o o tatou malumalu ia. E le faaitiitia ae e sili atu ona tatou pei o le Tama Faalelagi ona ua i ai o tatou tino. Ou te molimau atu o i tatou o Ana fanau, na faia i Lona faatusa, ma le mana e avea ai faapei o Ia. Ia tatou tausia ma le matuai faaeteete lava lenei meaalofa paia o le tino. E i ai se aso, pe afai tatou te agavaa, tatou te maua ai se tino atoatoa, faamamaluina—mama e pei o le pepe meamea fou a la’u tama, ae vagana ai o le a fusia e lē mavavaeeseina i le agaga. Ma o le a tatou alalaga fiafia (tagai Iopu 38:7) i le toe mauaina o lenei meaalofa lea sa tatou mananao i ai (tagai MFF 138:50). Tau ina ia tatou faaaloalo i le paia o le tino i le olaga nei, ina ia mafai ona faapaiaina ma faaeaina e le Alii mo le faavavau. I le suafa o Iesu Keriso, amene.