O Le Mea e Sili Ona Taua E Sili Atu Foi Ona Umi

Elder M. Russell Ballard

O Le Korama a Aposetolo e Toasefululua

I le avea ai ma o outou taitai, matou te valaau atu ai i tagata o le Ekalesia i soo se mea ina ia tuu le faamuamua i le aiga ma ia iloa ni auala faapitoa e faamalolosia ai o latou aiga taitoatasi.

Na matou asiasi atu talu ai nei ma nisi o le usoga i nai nofoaga autu o sulufaiga i Louisiana, Misisipi, ma Texas lea o loo nonofo ai i latou na afaina ma pagatia i le Afa o Katrina a o latou tau amata ona toe faatulaga faatasi o latou olaga. O a latou tala ma tulaga na oo i ai e matautia ma faamomoiloto i le tele o auala, ae mai mea uma na ou faalogo i ai, o le mea sa sili ona ou ootia ai o le tagi atu lea mo aiga: “O fea lo’u tina?” “Ua ou le mauaina lo’u atalii.” “Ua leiloa lo’u tuafafine.” O ni tagata fia aai nei, ma le fefefe o e ua leiloloa mea uma ma o loo moomia ni meaai, ni togafitiga faafomai, ma fesoasoaniga o soo se ituaiga, ae o le mea sa sili ona latou manaomia ma moomia o o latou aiga.

O mala po o fesuiaiga o soo se ituaiga e faamanatu mai ai ia i tatou le mea e sili atu ona taua. I le gasologa o le olaga, e masani ai ona tatou manatu mama—i o tatou aiga—o o tatou matua ma fanau ma [o tatou] tei. Ae i taimi o mafatiaga ma manaoga ma fesuiaiga e le tau fesiligia ai lava le mea e sili ona tatou manatu popole i ai o o tatou aiga ia! O le a sili atu pe a tatou tuua lenei olaga ma ulu atu i le lalolagi o agaga. E mautinoa lava o tagata muamua lava o le a tatou sailia iina o tama, tina, toalua, fanau, ma [o tatou] tei.

Ou te talitonu o le faamoemoega o le olaga faitino o le “fausia lea o se aiga faavavau.” O iinei i lenei lalolagi tatou te taumafai uma lava ia avea ma se vaega o ni aiga lautele faatasi ai ma le mafaia ona fausia ni o tatou lava vaega o na aiga. O se tasi lena o mafuaaga na auina mai ai i tatou e lo tatou Tama Faalelagi iinei. E le o tagata uma o le a mauaina se soa ma fai sona aiga i le olaga faaletino, ae o tagata uma lava, tusa po o a o latou tulaga patino e i ai, o se sui faapelepele o le aiga o le Atua.

Uso e ma tuafafine, o le tausaga lenei e atoa i ai le 10 o tausaga talu ona tuuina mai le folafolaga i le lalolagi i le aiga, e le Au Peresitene Sili ma le Korama a Aposetolo e Toasefululua i le 1995 (tagai “O Le Aiga: O Se Folafolaga i le Lalolagi,” Liahona, Oke. 2004, 49; Ensign, Nov. 1995, 102). Sa avea ma o loo avea nei ma se valaau manino ina ia puipuia ma faamalolosia aiga ma o se lapataiga malosi i se lalolagi ua faamata’uina ai e le faiifo o tulaga faatauaina ma le sese o mea e faamuamua ina ia faaumatiaina ia malo e ala lea i le osofaia o lona iunite faavae.

O le folafolaga o se faamatalaga faaperofetaga, e le gata na tuuina mai e perofeta, ae na muamua mai nai lo le taimi o loo tutupu ai. O loo lapataia ai le tetee atu i le tele o mea ua faa- mata’uina ma osofaia ai ia aiga i le gasologa o le sefulu tausaga ua mavae ma valaau mai ai mo le faamuamua ma le faamamafa o loo moomia e aiga pe afai e faasaoina i se siosiomaga lea e foliga mai ua faaleagaina i faaipoipoga faaleaganuu ma le va o matua ma fanau.

O le gagana manino ma le faigofie o le folafolaga o loo tu matilatila e faatusatusa i manatu fenumiai ma le faigata o se lalolagi lea e le mafai ona malilie i se faauigaga o le aiga, ae le taulia ai le lagolago ma le fesoasoani o loo moomia e matua ma aiga. Ua outou masani ma upu faapena mai le folafolaga e pei o nei:

“O le faaipoipoga i le va o le alii ma le tamaitai ua faauuina e le Atua.”
“O le tulaga tane po o le fafine (o le tagata) o se vaega taua lea o le mua’i olaga, olaga faitino, ma lona faamoemoe e faavavau.”
“O le tane ma le ava ua i ai le tiutetauave paia e alofa ma tausi e le tasi le isi ma a la fanau.”
“E tatau ona fanauina fanau i totonu o feagaiga o le faaipoipoga, ma ia tausia e se tama ma se tina o e ua faamamaluina ma le faatuatua atoatoa feagaiga faaleulugalii.”
“O le faamalepeina o le aiga o le a aumai ai i tagata taitoatasi, alalafaga, ma malo, faafanoga ia na uluai ta’u mai e perofeta anamua ma aso nei.”

Ma o upu mulimuli o le folafolaga o loo faailoa mai ai le upumoni faigofie e faapea o le aiga “o le iunite faavae o malo.”

O le aso nei ou te valaau atu ai i tagata o le Ekalesia ma matua faamaoni, matua o matua, ma tagata o aiga lautele i soo se mea ina ia ola ai i lenei folafolaga maoae, ia avea e pei o se tagavai e pei o le “tagavai o le saolotoga” a le Taitaiau o Moronae, ma ia tautino atu o tatou tagata ina ia ola ai i ona mataupu. Talu ai ona o tatou uma o se vaega o se aiga, ua faatatau ai le folafolaga i tagata uma.

Ua faailoa mai i suesuega i manatu lautele e faapea e soo se tagata lava i le lalolagi e manatu o le aiga o le faamuamua pito i maualuga lea; ae i tausaga e lei leva atu nei o le tele o aganuu ua foliga mai ua le amanaiaina po o le faauigaseseina le aiga. Mafaufau i nisi o suiga i tausaga ua mavae atu:

O le tele o faalapotopotoga i totonu o le atunuu po o le faavaomalo sa masani ona lagolagoina ma faamalosia ia aiga ua taumafai nei e suitulaga po o le faaleaga foi ia aiga lava nei sa latou faamoemoe latou te tautuaina.
Ona o le upu “faapalepale,” ua faalauteleina atu ai le faauigaina o le aiga ua sili atu ai ma le tulaga e iloa ai lea ua mafai ai ona avea ma se “aiga” ia ni tagata o soo se itupa o e nonofo faatasi i le i ai o se tautinoga po o le leai foi po o ni fanau po o le gauai atu foi i taunuuga.
O le faasalalauina o mea e faaaogaina ma le manatu faapito ua faaseseina ai le toatele e manatu faapea o aiga, aemaise lava i fanau, o se avega ma se maa olo o mea tau tupe lea o le a taofiofia ai i latou nai lo se avanoa paia lea o le a latou aoaoina ai i latou ina ia avea atili faapei o le Atua.

Ae peitai o le toatele lava o matua i le lalolagi atoa o loo faaauau pea ona iloa le taua ma o le olioli lea o loo maua e aiga. O nisi o a’u uo faatoa taliu mai i mea sa lauga atu ai i aiga ma matua i le tele o konetineta na lipotia mai ia te au faapea o faamoemoega ma atugaluga o matua e matuai maofa ai lava, ona e tali tutusa i le lalolagi atoa.

Na faapea mai se tina Initu atuatuvale i Initia, “Na pau le mea ou te manao i ai o le avea lea ma se aafiaga tele i lau fanau nai lo faasalalauga ma ana tupulaga.”

Ae faapea mai se tina lotu Puta i Meleisia, “Ou te manao i la’u fanau tama e galulue i le lalolagi, ae ou te le manao ia pei o le lalolagi.” O matua mai aganuu ma faatuatuaga eseese uma o loo latou faamatala mai ma lagonaina le mea lava e tasi e pei foi o i tatou o matua i le Ekalesia.

O loo moomia ona iloa e le lalolagi le mea o loo aoao mai e le folafolaga, aua o le aiga o le iunite faavae lea o malo, o le tamaoaiga, o la tatou aganuu, ma la tatou faigamalo. Ma e pei ona iloa ai e le Au Paia o Aso e Gata Ai, o le a avea foi le aiga ma iunite faavae o le malo selesitila.

I totonu o le Ekalesia, o lo tatou talitonuga i le silisiliese o le taua o aiga o loo mauaa i le aoaoga faavae na toefuataiina. Ua tatou iloa le paia o aiga i itu uma o lo tatou olaga e faavavau. Ua tatou iloa a o le’i faavaeina lenei lalolagi sa tatou mau faatasi ai ma lo tatou Tama Faalelagi o se vaega o Lona aiga, ma ua tatou iloa o sootaga faaleaiga e mafai ona tumau i talaatu o le oti.

Afai tatou te ola ma galulue e tusa ai ma lenei malamalamaaga, o le a tatou tosina mai le lalolagi ia i tatou. O matua e tuu le faamuamua pito i maualuga i o latou aiga o le a agai mai i le Ekalesia aua o loo ofoina atu ai le faatulagaga faaleaiga, tulaga faatauaina, aoaoga faavae, ma le vaaiga e faavavau o loo latou sailia ma e le mafai lava ona latou maua i se isi mea.

O la tatou vaaiga e faaautu i le aiga e tatau ai ona tauivi le Au Paia o Aso e Gata Ai ina ia avea ma matua sili ona lelei i le lalolagi. E tatau ona maua ai e i tatou se faaaloalo sili atu mo a tatou fanau, o e moni lava o o tatou tei faaleagaga, ma e tatau ona faaoso ai i tatou e tuuina atu soo se taimi e moomia ina ia faamalosia ai o tatou aiga. O le mea moni lava, e leai se mea e sili atu ona taua le sosooina i le fiafia—e le gata mo tatou ae faapea i a tatou fanau—nai lo le lelei ona tatou alolofa ma felagolagomai i totonu o le aiga.

Na saunoa Peresitene Harold B. Lee e faatatau i le Ekalesia i le avea ai ma se “fata” taua lea e fesoasoani ia i tatou i le fausiaina o tagata taitoatasi ma le aiga. (tagai i le Conference Report Oke. 1967, 107). O le Ekalesia o le malo lea o le Atua i le lalolagi, ae i le malo o le lagi, o aiga o le a avea ma pogai o lo tatou alualu i luma faavavau ma le olioli ma le faatulagaga a lo tatou Tama Faalelagi. E pei ona faamanatu soo mai ia i tatou, o le a i ai se aso o le a faamaloloina ai i tatou mai o tatou valaauga i le Ekalesia; ae afai tatou te agavaa, o le a le faamaloloina lava i tatou mai o tatou sootaga faaleaiga.

Na saunoa Iosefa F. Samita: “E leai se fiafia moni e tuueseese mai i le aiga, ma o taumafaiga uma ua faia e faapaia ma faasao ai lona aafiaga ua maualuga mo i latou ua galulue ma ositaulaga mo lona faatuina. O alii ma tamaitai ua masani ona saili e suia le olaga i le aiga i se isi olaga; ua latou talitonu o le aiga o lona uiga o le tautaofiofi; o le saolotoga maualuga o le avanoa atoa e fai ai le mea e loto i ai. E leai se fiafia e aunoa ma le galuega auauna atu, ma e leai se galuega auauna atu e sili atu nai lo lea e faaliliu ai le aiga i se faalapotopotoga paia, e faaleleia ma puipuia ai le soifuaga o le aiga” (Aoaoga a Peresitene o le Ekalesia: Iosefa F. Samita [1998], 382).

E mafai ona fesili se tasi, E faapefea ona tatou puipuia ma faasaosaoina ma faamalolosia aiga ma auaiga i se lalolagi ua matuai malosi le fetosoaiina solo i soo se itu? Ou te fia tuuina atu ni nai fautuaga faigofie nei e tolu:

Ia tausisi i le faia o tatalo faaleaiga i aso taitasi ma afiafi faaleaiga i vaiaso taitasi. O nei gaoioiga uma e valaaulia ai le Agaga o le Alii lea e maua ai le fesoasoani ma le mana tatou te manaomia i le avea ai ma matua ma taitai o aiga. O lesona aoaoina ma mekasini a le Ekalesia o loo i ai le tele o manatu lelei mo afiafi faaleaiga. Ia mafaufau foi i le faia o se sauniga molimau a le aiga lea e mafai ai e matua ma fanau ona faailoa atu o latou talitonuga ma lagona i isi i se tulaga patino ma faaletagata.
Aoao atu le talalelei ma tulaga faatauaina i totonu o lou fale. Ia faavaeina se lagona fiafia i le faitauina faatasi o tusitusiga paia. Ua tele naua o tatou matua ua lafo atu lenei tiutetauave i le Ekalesia. E ui i le taua o le seminare, ausilali, ma korama a le perisitua i le avea ai ma lagolago i aoaoga faamatua o le talalelei, ae o le tiutetauave autu lava o loo i totonu o le aiga. Atonu e te manao e filifili se mataupu se tasi o le talalelei po o se tulaga faatauaina faaleaiga ona vaavaai lea mo ni avanoa e aoao atu ai. Ia faautauta lelei, ma aua nei faa-aafiaina le fanau po o outou i ni gaoioiga se tele i fafo atu o le aiga lea o le a outou pisi tele ai ma o le a le mafai ai ona iloaina pe lagonaina foi le Agaga o le Alii mo le tuuina atu o le taitaiga na folafola atu mo oe lava ia ma lou aiga.
Ia faia ni sootaga faaleaiga aoga lea e tuu atu ai i lau fanau se faasinomaga malosi atu nai lo mea e mafai ona latou mauaina i a latou tupulaga po o le aoga po o soo se isi lava nofoaga. E mafai ona faia lea e ala i tu faaleaiga mo aso fanau, mo aso malolo, mo taumafataga i le afiafi, faapea ma Aso Sa. E mafai foi ona faia e ala i ni tulafono faaleaiga ma ni aiaiga ua malamalama o latou taunuuga. Ia faia se faiga faigofie o mea tau tupe a le aiga lea e faia ai ni tiute po o ni feau faapitoa a le fanau ma maua ai se faamalo po o isi taui e fua i le lelei o le auala na latou faia ai. Aoao atu le taua o le aloese mai le aitalafu ma le mauaina, sefeina, ma le faaaogaina tatau o tupe. Fesoasoani ia i latou ia aoaoina le tiutetauave mo lo latou lava ola faalagolago lava ia i latou i le faaletino ma le faaleagaga.

I le lalolagi i aso nei, lea ua matuai malosi ai lava osofa’iga a Satani i le aiga, e tatau i matua ona faia mea uma latou te mafaia ina ia faamalolosia ma puipuia ai o latou aiga. Ae o a latou taumafaiga atonu o le a le lava. O la tatou faalapotopotoga faavae muamua lava o le aiga ma e moomia le fesoasoani ma le lagolago mai le aiga lautele ma isi faalapotopotoga lautele o loo siomia i tatou. O uso ma tuafafine, o uso ma tuagane o tina ma tama, matua o matua ma tausoga e mafai ona faia se suiga malosi i olaga o fanau. Ia manatua o le faailoga o le alofa ma le faamalosiau mai se aiga lautele e masani ona maua ai se aafiaga lelei ma le fesoasoani i se tamaitiiti i se taimi taua.

O le Ekalesia lava ia o le a faaauau pea ona avea ma faalapotopotoga muamua ma le sili—o le “fatamanu,” e pei ona i ai—ina ia fesoasoani e fausia ni aiga malolosi. E mafai ona ou faamautinoa atu faapea o i latou o loo taita’ia le Ekalesia o loo matuai popole lava i le soifua manuia o o outou aiga, ma o lea o le a outou vaaia ai le faateleina o taumafaiga ina ia faatauaina ma ia taulai atu i manaoga o le aiga. Ae i le avea ai ma o outou taitai, matou te valaau atu ai i tagata o le Ekalesia i soo se mea ina ia tuu le faamuamua i le aiga ma ia iloa ni auala faapitoa e faamalolosia ai o latou aiga taitoatasi.

Ma le isi, matou te valaau atu ai i faalapotoptoga lautele ina ia iloiloina i latou lava ma ia faaitiitia mea e fai lea e ono faaleagaina ai ia aiga ae faateleina mea o le a fesoasoani ai ia i latou.

Matou te valaau atu i le au faasalalau ina ia ofoina atu ni mea se tele e faalauiloa ai tulaga tausaafia masani faaleaiga, ma faagaeetia loto ma lagolagoina ai aiga ae tuuitiitia mea o loo faalauiloaina ai amioga le mama ma oa o le lalolagi.

Matou te valaau atu i faigamalo ma taitai faaupufai ina ia faamuamua manaoga o fanau ma matua ma ia mafaufau i aafiaga o aiga i le faiga o tulafono ma aiaiga uma.

Matou te valaau atu ia i latou o e o loo faia ia Initoneti ma Uepi saite ina ia matuai magafagafa e tusa ai ma lo latou aafiaga ma ia manatu i le tulaga o le puipuia o fanau mai mea matautia, o ponokalafi, mea mataga, ma le tufanua.

Matou te valaau atu i vaega uma faaleaoaoga ina ia aoao atu tulaga faatauaina ma le aiga ma tomai faamatua, lagolagoina matua i o latou tiutetauave ina ia tausia fanau ina ia avea ma taitai o aiga i tupulaga o le a fai mai.

Matou te valaau atu i o tatou lava tagata o le Ekalesia ina ia aapa atu i le alofa i tuaoi ma uo o isi faatuatuaga ma ia aofia ai i latou i le faaaogaina o le tele o punaoa a le Ekalesia o loo i ai ina ia fesoasoani ai i aiga. O o tatou nuu ma aai o le a saogalemu ma malolosi a o taumafai tagata o faatuatuaga uma e galulue faatasi ina ia faamalolosia aiga.

E taua le manatuaina lea o iunite tetele o malo e faalagolago i le iunite sili ona laitiiti ma taua, o le aiga lea. E le afaina po o ai i tatou, ae tatou te fesoasoani ia i tatou lava e ala i le fesoasoani i aiga.

Uso e ma tuafafine, a o tatou siiina i luga e pei o se tagavai le folafolaga i le lalolagi i le aiga ma a o tatou ola ma aoao atu le talalelei a Iesu Keriso, o le a tatou faataunuu le fuafuaga faamoemoeina o lo tatou foafoaga iinei i le lalolagi. O le a tatou maua le filemu ma le fiafia iinei ma le olaga a sau. E le tatau ona tatou manaomia se afa po o se isi mala e faamanatu mai ai ia i tatou le mea e silisili ona taua. O le talalelei ma le fuafuaga o le fiafia ma le faaolataga a le Alii, e tatau ona faamanatuina mai ia i tatou. O le mea e sili ona taua e sili atu foi ona umi, ma o o tatou aiga e mo le faavavau. Ou te molimau atu ai i nei mea, i le suafa o Iesu Keriso, amene.