E le mafai e faifeautalai ona faasoa atu le talalelei seiiloga latou te maua se tasi e aoao. O le sailia o tagata e manaomia ai le faaaoga o le faatuatua—le faatuatua e talanoa atu ai i tagata e uiga i le talalelei a Iesu Keriso, faatuatua e vaavaai ai mo avanoa e aoao atu ai, ma le faatuatua o le a taitai i latou e le Atua i tagata o e ua saunia e faalogo. O le auala sili ona lelei e maua ai tagata e aoao e ala mai lea i tagata o le Ekalesia. O tagata uma o le Ekalesia, e aofia ai ma faifeautalai faaolioli, ua i ai se tiutetauave patino e fesoasoani e su’e mai tagata o e ua sauni e talia le talalelei toefuataiina. E mafai ona saunia tagata talavou mo auaunaga faamisiona e ala i le faasoa atu o le talalelei i le taimi nei, e ala i le fesootai sa’o ma le tagata ma e ala i punaoa i le initoneti.
Tofi mamao se tamaitiiti aoga se toatasi pe toalua e faaali atu se mea lenei e tasi po o mea uma e lua i le taimi o le vasega: (1) auala e faaoga ai le LDS.org po o le mormon.org e faasoa atu ai vitio po o isi mea e faaaoga ai agafesootai o ala o faasalalauga ma le (2) auala e fatu ai se talaaga patino i le mormon.org.
Fautuaga mo le Aoaoina Atu
Atiina Ae o le Faatuatua e Su’e ai Tagata e Aoao
Faamatala atu, sa auauna atu Peresitene Wilford Woodruff o se faifeautalai i Egelani a’o le’i leva ona faauuina o ia o se Aposetolo. Faaali atu ma fai atu i tamaiti aoga e auauai e faitau leotele le tala lenei e faailoa atu ai le taua o le sailia o le fesoasoani a le Alii i le sailiga o tagata e aoao. Fai atu i le vasega e vaavaai mo le mea na faia e Elder Woodruff e maua ai tagata e aoao:
Ata
Peresitene Wilford Woodruff
Sa saili atu e Elder Woodruff le Alii i le tatalo … , ma fesili ai po o fea e tatau ona alu i ai. Sa ia faamatalaina: ’I lo’u talitonu ai o lo’u avanoa ma lo’u tiute lo’u iloa o le finagalo o le Alii i lea mataupu, o lea la, sa ou fesili ai i le Tama Faalelagi i le suafa o Iesu Keriso e aoao mai ia te a’u lona finagalo i lenei mea, ma a o ou fesili atu, sa tuuina mai e le Alii, ma faaali mai ia te a’u o lona finagalo ia ou alu i le taimi lava lea i le itu i saute o Egelani. Sa ou talanoa i le uso ia William Benbow i lenei mataupu, o le sa nofo i Herefordshire ma sa i ai ni ana uo o loo nonofo ai iina, ma sa ia matua moomoo ia ou asiasi atu i lena itu o le atunuu, ma sa ia ofo alofa mai ma te o faatasi i le fale o lona uso matua ma totogiina lo’u pasese, lea sa ou taliaina ma le faafetai.’
“I le aso 4 o Mati, 1840, sa taunuu ai Elder Woodruff ma William Benbow i le fale o le uso o William o John. ‘I le tasi le itula talu ona ou taunuu i lona fale,’ na manatua ai e Peresitene Woodruff, ‘sa ou iloa ai le mafuaaga na auina atu ai a’u e le Alii iina. … sa ou tau atu i le faapotopotoga o alii ma tamaitai, pe ono selau, o e auau faatasi i lo latou igoa o le United Brethren, ma sa latou galulue mo le faataunuuina o le faatulagaga sa i ai anamua. Sa latou mananao i le Talalelei e pei ona sa aoaoina e perofeta ma aposetolo, e pei ona sa ou manao i ai a’o ou talavou.’
“E ala i le maelega i le suesueina o le Tusi Paia, sa sauniaina ai John Benbow ma lona aiga ma uo i latou lava e talia le talalelei toefuataiina.
“Sa vave ona taliaina e le aiga o Benbow le savali o le Toefuataiga, ma sa toe foi atu William i Staffordshire ’ina ua maea le avanoa fiafia sa ia vaai ai i lona uso o John Benbow, ma lona aiga atoa, … ua papatisoina i le feagaiga fou faavavau.’ Sa nofo Elder Woodruff i le nofoaga lea mo le tusa e valu masina. Sa ia faamatalaina mulimuli ane: ‘I le tolusefulu aso muamua talu ona ou taunuu atu i Herefordshire sa ou papatisoina ai ni faifeau se toa fasefululima ma nai selau o tagata. … Sa matou galulue ai tusa po o le valu masina ma aumaia i le [talalelei] le lua afe o [tagata].’
“Sa tusia e Peresitene Woodruff e uiga i lenei aafiaga: “O le talafaasolopito atoa o lenei misiona i Herefordshire ua faaalia mai ai le taua o le faalogo i le leo itiiti ma le filemu o le Atua ma faaaliga a le Agaga Paia. Sa i ai se nuu o le Alii iina ua saunia mo le Talalelei. Sa latou tatalo mo le malamalama ma le upumoni, ma sa auina atu a’u e le Alii ia i latou’” (Aoaoga a Peresitene o le Ekalesia: Wilford Woodruff [2004], 91–92).
Fesili atu i tagata aoao:
O le a le mea na fai e Elder Woodruff e iloa ai po o fea e maua ai tagata o e na sauni e talia le talalelei?
O a ni auala na lagolago ai e le Alii ia Elder Woodruff? (E mafai ona e faailoa atu i tamaiti aoga, sa le gata ina sa musuia e le Alii ia Elder Woodruff e alu i saute o Egelani, ae sa Ia tatalaina foi le ala mo Elder Woodruff e aoao ai le faatoaga a John Benbow, lea na faitau selau alii ma tamaitai sa saunia ai e talia le talalelei toefuataiina.)
O le a le mataupu faavae e uiga i le sueina o tagata e aoao sa faaalia i le tala a Elder Woodruff? (O tali a tamaiti aoga e mafai ona aoteleina i le tusia o le mataupu faavae lenei i le laupapa: E mafai ona fesoasoani le Alii ia i tatou e sue tagata o e ua sauniaina e talia le talalelei pe a tatou tatalo mo le fesoasoani, faalogo i le Agaga, ona faatino loa lea ma le faatuatua.)
Fai atu i le vasega e su’e i le itulau e 169 i le Tala’i La’u Talalelei, ma fai atu i se tamaitiiti e faitau leotele le parakalafa muamua i lalo o le ulutala “Atiina ae o le Faatuatua e Saili.” Ona fesili atu lea:
E mafai faapefea e le iloa “o loo saunia e le Alii ia tagata e talia oe ma le talalelei toefuataiina” ona fesoasoani e faaosofia oe e saunia e auauna atu i se misiona?
Fai atu i tamaiti aoga e faitau le parakalafa e sosoo ai i le itulau e 169 o le Tala’i La’u Talalelei, i lalo o le soaulutala “O Le Aiga o le Atua.” Ona fesili atu lea:
E mafai faapefea e le aoaoga faavae, o alii ma tamaitai uma o se vaega o le aiga o le Atua, ona faaosofia ou lagona e uiga i le sailia o tagata e aoao?
I le upusii mai le Alema 31:34–35, o le a le mea sa tatalo ai Alema a’o sauniuni o ia e talai atu i sa Sorama?
O le a se mea e mafai ona tatou aoao mai i le tatalo a Alema?
Faaali atu le vitio “Developing the Faith to Find” (2:55), ma fai atu i tamaiti aoga e vaavaai mo ni malamalamaaga sa’o ma loloto e uiga i le sailiga o tagata e aoao. E mafai ona e fautuaina tamaiti aoga e tusi ni faamatalaga o mea ua latou aoaoina.
Fesili atu:
O a ni malamalamaaga sa’o ma loloto e uiga i le sailia o tagata e aoao, na tuuina mai e faifeautalai i le vitio lenei? (Atonu e tau mai e tamaiti aoga ni tali e pei o nei: E tatau i faifeautalai ona tatalo mo ni avanoa, alolofa i isi ma vaai atu ia i latou e pei ona silasila mai le Atua ia i latou, ma ia manatua o loo saunia e le Alii Ana fanau ia talia le talalelei ma taitai atu Ana faifeautalai ia maua i latou. Ona e alofa le Atua i Ana fanau, ua Ia finagalo ai ia maua e tagata uma le avanoa e faalogo ma tali ai le talalelei.
Aisea e taua ai le faatino o lagona ia aapa atu i isi ma valaaulia i latou e aoao e uiga i le talalelei?
Fai atu i tamaiti aoga e faitau parakalafa e tolu i le soavaega ua faaautuina “Saili I Latou e Talia Outou” i le itulau e 170 i le Tala’i La’u Talalelei. Ona fesili atu lea:
O a nisi o luitau tatou te ono feagai pe a taumafai e su’e tagata e aoao? (E masani ona tatou le iloa po o ai ua sauni mo le talalelei. Atonu o le a le vave iloa e tagata o i tatou o ni auauna a le Atua. Atonu latou te le iloa o loo latou sailia le talalelei toefuataiina.)
E faapefea ona fesoasoani le Alii ia i tatou i le sailia o tagata e aoao? (Na te auina mai le Agaga Paia e taiala i tatou.)
O le a lou manatu i le mea e finagalo le Alii e fai e faifeautalai pe a latou le vaaia ni taunuuga vave o a latou taumafaiga ia maua ni tagata e aoao?
Afai e i ai ni tamaiti aoga i le vasega e liliu mai i le Ekalesia, mafaufau e valaaulia se toatasi pe sili atu o i latou e faasoa mai, pe na faapefea ona latou maua le Ekalesia ma pe na faapefea ona latou iloa sa aoaoina i latou e faifeautalai i le upumoni. Afai e leai ni tagata liliu mai i le vasega, valaaulia tamaiti aoga e mafaufau i se tagata liliu mai latou te iloa lelei i o latou aiga po o totonu o o latou uarota. Mafaufau e valaaulia i latou e faasoa mai pe na faapefea ona talia e lena tagata le talalelei.
O Le Taua o le Galuega a Faifeau Faamisiona o le Au Paia
Faaali atu le saunoaga lenei a Peresitene Thomas S. Monson, ma valaaulia se tamaitiiti aoga na te faitaua leotele:
Ata
Peresitene Thomas S. Monson
“O le taimi lenei mo tagata uma ma faifeautalai e o mai faatasi ai, ia galulue faatasi, e galulue i le tovine a le Alii ina ia aumai agaga ia te Ia. Ua Ia saunia auala mo i tatou e faasoa atu ai le talalelei i le tele o auala, ma o le a Ia fesoasoani i a tatou galuega pe afai o le a tatou galulue i le faatuatua e faataunuu Lana galuega” (“Faatuatua i le Galuega o le Faaolataga” [saunoaga na tuuina atu i le faasalalauga faaletaitai mo le Galuega o le Faaolataga i le lalolagi atoa i le aso 23 Iuni, 2013]).
E mafai ona e fai atu fesili e pei o nei:
Aisea e taua ai le manatua, ua talosagaina i tatou e se perofeta a le Atua ina ia auai i le galuega a faifeau faamisiona o le au paia? (Atonu e te mafaufau e faatatau atu i le Mataupu Faavae ma Feagaiga 88:81, lea o loo faamamafa mai ai faamoemoega o le Alii mo i latou o e ua mauaina le talalelei.)
Aisea e te manatu na saunoa mai ai Peresitene Monson e faapea, “o le taimi lenei” mo tagata uma ma faifeautalai e galulue faatasi ai?
Ona valaaulia lea o tamaiti aoga e su’e i le itulau e 174-75 i le Tala’i La’u Talalelei, ma fai atu i ni tamaiti aoga se toatolu e auauai i le faitauina leotele o parakalafa muamua e tolu o loo i lalo o le ulutala “O Le Taua o Tagata o le Ekalesia.” Ona fesili atu lea:
O le a se mea e mafai ona avea ma se taunuuga pe a galulue faatasi le tagata o le ekalesia ma faifeautalai e talai atu le talalelei? (O tali a tamaiti aoga e mafai ona aofia ai le mataupu faavae lenei: A valaaulia e tagata o le ekalesia isi ina ia aoaoina ma i ai ma i latou i le aoaoga, e toatele atu tagata e papatisoina ma tumau le malolosi i le Ekalesia.)
Faaali atu le vitio “The Lord of the Harvest: The Adams Family” (4:41), ma fai atu i tamaiti aoga e taulai atu i mea na fai e tagata o le Ekalesia e fesoasoani ai i le aiga o Adams ia maua faamanuiaga o le talalelei.
Fesili atu:
O a nisi o taumafaiga na taitai atu ai i le mauaina e le aiga o Adams o faamanuiaga o le talalelei?
O le a sou manatu i le mea na faaosofia ai tagata o le ekalesia o loo i le vitio e faasoa atu le talalelei ma le aiga o Adams?
Fai atu i tamaiti aoga e faitau leotele parakalafa e lua i le vaega ua faaautuina “E Leai Ni Taumafaiga E Maimau” i le Tala’i La’u Talalelei, i le itulau e 185. Ona mafaufau lea e fai atu fesili e pei o nei:
E tusa lava pe le talia e tagata le valaaulia e sailiili i le talalelei toefuataiina, aisea e le maimau ai se taumafaiga e auauna atu ma aoao atu?
E mafai faapefea e se faifeautalai ona faatumau se uiga faaalia lelei pe a filifili tagata e le sailiili i le talalelei?
Valaaulia tamaiti aoga e faasoa mai se mea na latou faia i aso ua mavae e auai ai i le galuega faamisiona a tagata o le ekalesia. Fai atu ia i latou e faamatala o latou lagona a’o latou taumafai e faasoa atu le talalelei i isi.
Auai i le Galuega Faamisiona a Tagata o le Ekalesia
Lisi mau nei i luga o le laupapa, ona fai atu lea i tamaiti aoga taitoatasi e faitau filemu se tasi o fuaitau ma vaavaai mo faamanuiaga ua folafolaina ia i latou o e filifili e auai i le galuega faafaifeautalai.
A uma ona tuu atu i tamaiti aoga sina taimi e toe faamanatu ai fuaitau na latou filifilia, fai atu i tamaiti aoga e faamatala ia fuaiupu na latou faitauina ma faasoa mai po a ni auala e mafai ai e faamanuiaga folafolaina ona faaosofia i latou e su’e tagata ina ia maua le savali o le talalelei. Faamalosiau i tagata o le vasega e auai i lenei talanoaga. Atonu e te lisiina tali a tamaiti aoga i le laupapa i talaane o le mau e fetaui i ai.
Mafaufau e tusi le mataupu faavae lenei i luga o le laupapa. I le avea ai ma tagata faamisiona o le ekalesia, e mafai ona tatou amata nei e su’e tagata e aoao e faifeautalai.
Ina ia fesoasoani i tamaiti aoga ia malamalama lelei i le ala e mafai ona latou auai i le galuega o tagata faamisiona o le ekalesia, fai atu i se tamaitiiti aoga e faitau leotele le upusii lenei mai ia Elder M. Russell Ballard o le Korama a Aposetolo e Toasefululua: Fai atu i le vasega e faalogologo mo se fautuaga pe faapefea ona maua le mautinoa ma le lototele i le aapa atu i isi:
Ata
Elder M. Russell Ballard
“Uso e ma tuafafine, o le fefe o le a suia i le faatuatua ma le mautinoa pe a tootutuli le au paia ma faifeautalai faamisiona i le tatalo ma ole atu i le Alii e faamanuia i latou i ni avanoa faafaifeautalai. Ona, tatau lea ia i tatou ona faaali atu lo tatou faatuatua ma vaavaai mo ni avanoa e faailoa atu ai le talalelei a Iesu Keriso i fanau a lo tatou Tama Faalelagi, ma e mautinoa lava o le a oo mai na avanoa. O nei avanoa o le a le manaomia ai lava se tali e fai faamalosi po o se tali e le loto i ai. O le a oo mai o se taunuuga masani o lo tatou alolofa mo o tatou uso ma tuafafine. Tau lava o le talitonu o le a lelei mea uma, ma o le a lagona e i latou e te talanoa i ai lou alofa. O le a le galo lava ia i latou lena lagona e ui atonu e le o le taimi tonu lea latou te taliaina ai le talalelei. O lena foi mea e ono suia i le lumanai pe a suia o latou malamalamaaga.
“E faigata mo i tatou ona toilalo pe a tatou faia le mea sili tatou te mafaia pe a tatou i ai i le feau a le Alii. E ui o le iuga o se taunuuga lea o le faaaogaina o le faitalia o le tagata, ae o le faasoaina atu o le talalelei o la tatou tiutetauave lea.
“Ia faalagolago i le Alii. O Ia o le Leoleo Mamoe Lelei. Na te silafia Ana mamoe, ma e iloa e Ana Mamoe Lona siufofoga; ma o le asō, o le siufofoga o le Leoleo Mamoe Lelei o lou leo ma lo’u leo lea. Ma afai tatou te le auai, o le toatele o e o le a faalogo i le savali o le Toefuataiga o le a misia. I se faaupuga faigofie, o se mataupu o le faatuatua ma faatinoga i la tatou vaega. E faigofie lava ia mataupu faavae—tatalo, faaletagata lava ia ma i lou aiga, mo ni avanoa faafaifeautalai. …
“E le faapea e tatau ona avea oe ma se tagata e fiafia i fegalegaleaiga po o se faiaoga gutu poto ma faatauanau. Afai o i ai sou alofa e le femoumoua’i ma le faamoemoe i totonu ia te oe, ua folafola mai e le Alii, afai e ’sii a’e o oulua leo i lenei nuu [ma] tautala atu mafaufauga o le a [Ia] tuu i o oulua loto, … o le a le faafememeaiina oulua i luma o tagata.
O le a le mea na fautua mai e Elder Ballard e mafai ona fai e le au paia e atiina ae ai le mautinoa faateleina e faailoa atu ai le talalelei i isi?
O a ni auala e avea ai le sueina o tagata e aoao o se faatinoga o le faatuatua?
Fai atu i tamaiti aoga e faaalu sina taimi e sue ai i le lisi o “Manatu mo le Fesoasoani Atu i Tagata o le Ekalesia” o loo i le itulau e 177 i le Tala’i La’u Talalelei ma vaavaai mo auala faapitoa e mafai ai e tagata o le ekalesia ona auai i le galuega faafaifeautalai. Fai atu i tamaiti aoga e filifili se manatu se tasi pe lua e ono mafai ona latou faaaogaina i le taimi nei e auai ai i le galuega faamisiona a tagata o le ekalesia. Ona fesili atu lea:
O fea o nei manatu e mafai ona e faia i le taimi nei e valaaulia ai isi e faalogo i le savali o le talalelei?
Aisea e te manatu, e mumusu ai nisi o tagata o le Ekalesia e aapa atu i isi i auala o loo maua i lenei lisi?
Uunai tamaiti aoga e faaalu ni nai minute e tusi ai i lalo ni nai mea o le a latou faia e su’e ai tagata mo faifeautalai e aoao. Fautua atu i tamaiti aoga, atonu e sili atu le aoga o a latou fuafuaga pe afai latou te tusia i lalo igoa maoti o uo ma tagata o aiga e le auai i le ekalesia, ia latou te ono faasoa atu i ai le savali o le talalelei. Atonu e te fautua atu i tamaiti aoga ia faaaofia ai faatinoga e pei o le tatalo e le aunoa mo avanoa faafaifeautalai, aapa atu e talanoa i isi e uiga i autu o le talalelei, valaaulia o isi e tapuai i sauniga po o isi gaoioiga a le Ekalesia, valaaulia o isi e faalogologo i lesona mai faifeautalai, valaaulia o isi e faitau le Tusi a Mamona, ma isi lava mea. Pe a musuia ai e le Agaga, atonu e te valaau atu i ni nai tamaiti aoga e faasoa mai a latou fuafuaga i le vasega.
Faaaoga Meafaigaluega Uma ua Sauniaina e le Atua
Fai atu i se tamaitiiti aoga e faitau leotele le saunoaga lenei a Elder L. Tom Perry (1922-2015) o le Korama a Aposetolo e Toasefululua, ma fai atu i le vasega e faalogo po o a auala ua suia ai le faagasologa o le sailiga o tagata e aoao.
Ata
Elder L. Tom Perry
“A’o avea a’u ma se faifeautalai talavou, sa mafai ona matou talanoa i tagata faafesootai i luga o le alatele ma tu’itu’i i faitotoa e faasoa atu ai le talalelei. Ua suia le lalolagi talu mai lena vaitaimi. I aso nei, ua toatele tagata ua aafia i le pisi o o latou olaga. Latou te nanati atu iinei ma iina, ma e masani lava ona tau le mananao e faataga ni tagata e matuai le masani ai e ulu atu i o latou fale, ae le’i valaauliaina, e faasoa atu se savali o le talalelei toefuataiina. O auala autu latou te fesootai ai ma isi, e oo lava i [a latou] uo lelei, o le tele lava o taimi e ala i le Initoneti. O le mea lea, o le natura tonu lava o le galuega faafaifeautalai, e ao foi ona suia pe afai e tatau ona faataunuu e le Alii Lana galuega o le faapotopotoga o Isaraelu ’mai i tulimanu e fa o le lalolagi’ [2 Nifae 21:12]. Ua faatagaina nei faifeautalai e faaaoga le Initoneti ia latou galuega talai. …
A o ulufale atu faifeautalai i lenei vaitau fou lea o le a latou faaaogaina ai komepiuta i le galuega a le Alii, matou te valaaulia e talavou ma e matutua, tagata matutua, talavou matutua, le autalavou ma fanau i soo se mea ia auai faatasi ma i matou e … fefaasoaai le savali o le talalelei i luga o le initoneti. …
“E pei ona tatau i faifeautalai ona fetuutuunai i se lalolagi fesuisuia’i, e ao foi i tagata o le ekalesia ona suia le ala latou te mafaufau ai e uiga i le galuega faafaifeautalai. O le ta’ua o lenei mea, ou te fia faamanino atu ai e faapea, o mea ua talosagaina i tatou, o tagata o ekalesia, e fai e le’o suia; ae o le ala tatou te faataunuu ai o tatou tiutetauave i le faasoaina atu o le talalelei e ao ona fetuutuunai i se lalolagi fesuisuiai” (“Missionary Work in the Digital Age” [saunoaga na tuuina atu i le faasalalauga faaleautaitai i le lalolagi atoa o le Galuega o le Faaolataga, 23 Iuni, 2013]).
Fesili atu:
E tusa ai ma le saunoaga a Elder Perry, aisea e ao ai i tagata o le ekalesia ma faifeautalai ona amata faaaoga punaoa i le initoneti a’o latou faasoa atu le talalelei? O a ni itu lelei o le faaaogaina o nei punaoa?
O a nisi o meafaigaluega po o punaoa i le initoneti e mafai ona e faaaogaina e faasoa atu ai lau molimau o le talalelei ma valaaulia ai isi e aoao atili [i le talalelei]?
O a nisi o auala maoti e mafai ona e faaaoga ai nei meafaigaluega e faasoa atu ai le savali o le talalelei? (O lenei talanoaga o le a fesoasoani i tamaiti aoga e iloa ai le mataupu faavae e faapea, e mafai e soo o Iesu Keriso ona faaaoga le tekinolosi i ona po nei e faasoa atu ai a latou molimau o le talalelei i tagata i le lalolagi atoa.)
Faaali atu taiala nei mai le LDS.org, ma valaaulia se tamaitiiti aoga e faitau leotele le parakalafa muamua. Ona tofi lea o isi tamaiti aoga e faitau leotele le lisi o taiala mo le faaaogaina o ala o faasalalauga faaagafesootai. Fai atu i le vasega e faalogologo mo auala e mafai ona fesoasoani ai lenei faamatalaga ia i latou ia lelei atili ai i le faasoaina atu o le talalelei i luga o le initoneti.
“O ala o faasalalauga faaagafesootai e mafai ona i ai se aafiaga malosi i olaga o i latou e faaaogaina? E mafai ona tuuina mai ai auala e faailoa atu ai lo tatou faatuatua ia Iesu Keriso ma faamalolosia ai mafutaga. Ua uunaia e le Ekalesia le faaaogaina o ala o faasalalauga faaagafesootai pe afai lena e lagolago ai le misiona a le Ekalesia, faaleleia atili ai mafutaga, ma faafaigofie ai faaaliga i fanau a lo tatou Tama Faalelagi. Ua uunaiaina tagata o le au paia ina ia avea ma faataitaiga o lo latou faatuatua i taimi uma ma nofoaga uma, e aofia ai taimi e auai ai i talanoaga faalauaitele o loo maua e ala mai i ala o faasalalauga faaagafesootai. …
“O fautuaga nei mo le faaaogaina o le ala o faasalalauga faaagafesootai i o tatou olaga patino: …
“Ia faatamalii ma faaaloalo i au fegalegaleaiga ma isi i le initoneti. O aoaoga a le Au Paia o Aso e Gata Ai, e tatau ai i tagata o le ekalesia ona faia isi tagata ma le faaaloalo, e tusa lava po o le a le tulaga [e i ai].
“Faailoa atu lau molimau patino o le talalelei toefuataiina, e pei ona taialaina ai e le Agaga. O na savali e tatau ona patino lava; aua le tuua i tagata se lagona e faapea o loo e talanoa atu mo le Ekalesia, ma aua ne’i faia ni vaega e momoli atu ai se manatu e faapea, o i latou o ni sui aloaia [o le Ekalesia] pe ua lagolagoina e le Ekalesia.
“Ia fai i taimi uma ma se faataitaiga o se soo o Keriso i au fegalegaleaiga ma isi i ala o faasalalauga faaagafesootai. O lau faataitaiga lelei e mafai ona faatosina ai i latou o loo outou fegalegalea’i. O se mea atamai le taofi o fegalegaleaiga ma i latou o e saili i taimi uma e toso i lalo isi ae maise lava i latou o e tuuina i luga ni faamatalaga le talafeagai. …
“Faaaoga le faamasinoga lelei pe a tuu i luga ni faamatalaga i le saite i le ala o faasalalauga faaagafesootai. E leai se faamau ‘tape’ i luga o le Initoneti. O ata ma faamatalaga e mafai ona tumau ai mo le tele o tausaga ma e mafai ona avea ma mea leaga pe a o e sailia se galuega po o se avanoa i le kolisi, faapea foi ma isi tulaga ia e ono toe iloiloina ai au faamaumauga faalauaitele i le Initoneti. Ia mautinoa e ogatasi au fesootaiga ma lau tautinoga e tauave i ou luga le suafa o le Faaola” (“Social Media Helps for Members,” LDS.org).
Fai atu i tamaiti aoga e faasoa atu i le vasega o latou manatu e uiga i le mafuaaga o le a taua ai ona latou manatua fautuaga o loo i lenei lisi ao latou faasoa atu le talalelei i luga o le initoneti.
Afai e lava se taimi o avanoa, mafaufau e tuu atu i se tamaitiiti aoga e faaali atu i le vasega le auala e faasoa atu ai vitio po o isi mea o loo i luga o le LDS.org po o le mormon.org e faaaoga ai ala o faasalalauga faaagafesootai. E mafai ona e tuu atu i se isi tamaitiiti aoga e faaali atu le ala e fatu ai se talaaga patino i luga o le mormon.org.
Mafaufau e faaali atu le vitio “Sharing Your Beliefs” (2:02) e fesoasoani ai i tamaiti aoga ia lagona le mautinoa i o latou gafatia e faaaoga le tekinolosi e faasoa atu ai o latou lagona ma molimau e uiga i le talalelei. A’o le’i faaalia le vitio, uunai tamaiti aoga e vaavaai mo le aafiaga faaolioli e mafai ona faia e se tagata e ala i le faaaogaina o le tekinolosi e faasoa atu ai ona lagona e uiga i le talalelei.
A uma le vitio, fesili atu:
E mafai faapefea e le tekinolosi ona faaleleia taumafaiga a tagata o le ekalesia o e mananao e faasoa atu le savali o le talalelei?
Valaaulia tamaiti aoga e faamatala mai pe faapefea ona latou faaaogaina le tekinolosi e faasoa atu ai a latou molimau i isi. Faaiu i le faasoa atu o lau molimau e uiga i aoaoga faavae ma mataupu faavae na aoaoina i le lesona.
Valaaulia e Faatino
Fesoasoani i tamaiti aoga e amata i le taimi nei ona saili tagata o e ua sauni e faalogo i le savali o le talalelei e ala i le faamaeaina o se tasi pe sili atu o gaoioiga fautuaina nei:
Faamae’a aitema na e lisiina i le taimi o le galuega tusitusi o le lesona lenei ina ia mafai ai ona maua tagata mo faifeautalai e aoao.
Toe iloilo le lisi o tagata faafesootai o loo i lau telefoni feaveai ma su’e ai se tagata e le toaga o le ekalesia po o se tagata e le auai i le ekalesia. Valaau pe tesi i lena tagata ma valaaulia o ia e auai atu faatasi ma oe i le lotu i le Aso Sa nei.
Sailiili i le uepisaite mormon.org ma sailiili i punaoa o le saite, e pei o vitio, tusiga, ma talaaga patino na tuuina i luga e tagata o le Ekalesia. Faasoa atu se vitio, tusiga, po o isi itulau i isi e faaaoga ai ala o faasalalauga faaagafesootai.
Fatu lau oe lava talaaga patino i luga o le mormon.org. Faasoa atu lau talaaga patino i isi e faaaoga ai ala o faasalalauga faaagafesootai.
Faasoa atu se vitio Savali Faa Mamona ma ou lagona e uiga i le faaaogina o le ala o faasalalauga faaagafesootai.