10

Faaali le Amio Sa’o

Mafaufau Loloto:Aisea e te lagona ai e alofa le Alii ia i latou o i ai le “faamaoni o [lona] loto”? (Tagai Mataupu Faavae ma Feagaiga 124:15.)

Maimoa:“What Shall a Man Give in Exchange for His Soul?” (A e a pe a le maua le vitio? Faitau le itulau e sosoo ai.)

Talanoa: O le a le uiga o le mauaina o le amio sao? O a nisi o auala laiti e tuuese ai e tagata o latou agaga ina ia maua ai mea o lenei olaga?

Faitau:Mataupu Faavae o le Faatuatua 1:13; Mosaea 4:28; Iopu 27:5 (i le taumatau)

“Matou te talitonu ia faamaoni.”

Mataupu Faavae o le Faatuatua 1:13

“Ma ou te manao ia outou manatua, soo se tasi o outou na te nonō se mea mai lē la te tuaoi e tatau ia te ia ona toe faafoi atu le mea na nonō mai e ia, e tusa ma lana ioega, a lē o lea ua e faia le agasala; ma atonu o le a e faia ai ia fai ai foi e lē lua te tuaoi le agasala.”

Mosaea 4:28

“Seia oo lava i lou oti, ou te le faateaina lava la’u amio sa’o.”

Iopu 27:5

Faataitai:Na o oe lava, ia faatulaga oe lava i vaega nei.

Tuu se numera i luma o aitema taitasi e faaali mai ai le faatele e te amioai ai i lenei auala. 1 = e le taitai lava, 2 = o nisi taimi, 3 = e masani lava, 4 = toetoe lava o taimi uma, 5 = o taimi uma lava

1. Ou te tausia uma au folafolaga, tautinoga, ma feagaiga.

2. E matuai ou faamaoni lava i mea ou te tautala ai ma i faamaumauga ou te tausia.

3. Ou te le faia ia faateleina le faaali mai o mea ia sili atu nai loo tulaga o loo i ai.

4. Ou te toe faafoi atu mea uma ou te nonoina mai ma e le avea ni mea e le a a’u ia.

5. Ou te faamaoni atoatoa i lou toalua i upu ma amioga.

6. Ou te le faimamago lava, e tusa pe ou te iloa e le maua lava au.

7. A ou maua se mea e le o au e anaina, ou te toe faafoi lena mea i le tagata e onaina.

8. Ou te totogi lava tupe ou te nonoina mai, e aofia ai nonogatupe o le TFA mai le Ekalesia.

Tautino:Tautino atu e fai faatinoga nei i le aluga o le vaiaso. Tuu se togi i pusa pe a e faamaeaina galuega taitasi:

• Faataitai le faaali atu o le amio sao i aso uma.

• Aoao atu lenei mataupu faavae i lou aiga.

• Faaauau pea ona faataitai mataupu faavae o faavae ua tuanai.

“O le amiosa’o o lona uiga o le faia o le mea sa’o ma lelei e tusa lava po o a taunuuga. O lona uiga o le amiotonu mai le taele o lou agaga, e le na o tatou amioga ae, sili ona taua, i o tatou mafaufauga ma i o tatou loto. … O sina pepelo laitiiti, o se sina faimamago, po o le faia o sina mea e le lelei e le taliaina e le Alii. … O le taui silisili o le amio sao o le mafutaga faifai pea o le Agaga Paia, … [o le o le a] taitai i tatou i mea uma tatou te fai.”

Joseph B. Wirthlin, “Personal Integrity,” Ensign, May 1990, 30–33

Motugaafa e Faagaoioia ai

Fesoasoani i tagata uma e taulai i se faatino—e le na o le talanoa.

Se a Foi Se Mea E AVATU E le Tagata e Togiola A’i Lona Ola?

Afai e le mafai ona e matamata i le vitio, faitau le tusiga lenei.

Elder Robert C. Gay

ELDER ROBERT C. GAY: Na fesili le Faaola i Ona soo i le fesili lenei: “Se a foi se mea e avatu e le tagata e togiola a’i lona ola?”

O se fesili lenei na aoao mai e lo’u tama ou te mafaufau i ai ma le faaeteete i tausaga ua mavae. A o ou tuputupu a’e, sa tofi mai e o’u matua a’u feau e fai i le fale ma totogi mai se alauni ia te au mo lena galuega. Sa masani ona ou faaaogaina lena tupe, e sili laitiiti atu i le 50 sene i le vaiaso, ou te alu ai i le tifaga. O aso na o le tau o se pepa mo le tifaga sa na o le 25 sene mo se tamaitiiti e 11 tausaga. Ona totoe ai lea o le 25 sene e faaalu i lole laau, lea sa 5 sene i le lole. O se tifaga ma ni lole laau se lima! E leai se mea na sili atu nai lo lena mea.

Sa lelei mea uma sei oo ina atoa lo’u 12. O le tutu ai i le laina i se tasi aoauli, sa ou iloa ane o le tau o le pepa tifaga mo se tagata e 12 tausaga ua 35 sene, o lona uiga la, o le a leai isi lole laau e lua. O le le saunia lelei e fai lena ositaulaga, sa ou faapea ifo ai ia te au lava, “E tutusa lava ou foliga e pei o le vaiaso na te’a nei.” Na ou laalaa atu ma fai atu mo se pepa tifaga e 25 sene. Sa le’i emo le tali tupe ma sa ou faatauina au lole laau masani e lima ae le tolu.

O lo’u fiafia ai i lena mea na ausia, sa ou telea’i atu ai i le fale e faamatala i lo’u tama lo’u laki tele. A o o’u talatala atu i ai faamatalaga, sa leai sana tala na fai mai. Ina ua uma la’u faamatalaga, sa na ona tilotilo mai lava ia te a’u ma fai mai, “Atalii, e te faatauina atu lou agaga mo se limasene?” O ana upu sa tuia ai lo’u fatu e sefululua tausaga le matua. O se lesona sa le mafai ona galo ia te a’u.

Robert C. Gay, “Se a Foi Se Mea e Avatu e le Tagata e Togiola A’i Lona Ola? Ensign po o le Liahona, Nov. 2012, 34.