2

Faaaoga Tatau Le Taimi

“Aua faauta, o le olaga lenei o le taimi lea mo tagata e saunia ai e feiloai ma le Atua; ioe, faauta o le aso o le olaga lenei o le aso lea mo tagata e fai ai a latou galuega.”

Alema 34:32

Mafaufau loloto:Aisea ua avea ai le taimi ma se tasi o meaalofa silisili a le Atua?

Maimoa:“The Gift of Time [O Le Meaalofa o le Taimi]” (A e a pe a le maua le vitio? Faitau le itulau e sosoo ai.)

Talanoa: O le a se mea na e aoaoina mai ia Tuafafine Benkosi?

Faataitai:O laasaga nei e lima e mafai ona e faia i aso taitasi e faaaoga lelei ai lou taimi. Ia faitau laasaga taitasi. Mata na fai e Tuafafine Benkosi nei laasaga taitasi?

❶

Lisi ia Galuega

I taeao taitasi, ia fai se lisi o galuega e fai. Faaopoopo igoa o tagata e auauna atu i ai.

❷

Tatalo

Tatalo mo le taitaiga. Faalogo. Tautino atu e te faia le mea silisili.

❸

Seti Mea e Faamuamua

Faanumera au mea maualuluga e faamuamua. Tuu le “1” i talaane o le galuega e sili ona taua, tuu le “2” i talaane o le isi, ma faapena ma isi.

❹

Seti ia Sini, Galue

Faalogo i le Agaga. Seti ia sini. Galue malosi. Amata i le galuega e sili ona taua ma faasolosolo i lalo o le lisi.

❺

Lipoti

I po taitasi, ia lipoti atu i le Tama Faalelagi i le tatalo. Fai ni fesili. Faalogo. Lagona Lona alofa. Salamo.

Ia amata nei. Tusi i totonu o lenei tusi po o i luga o se isi fasi pepa. Fai le laasaga 1: Lisi au galuega mo taeao. O ni galuega taua mo lau galuega, mo au suesuega, pe mo auaunaga i le ekalesia po o le aiga—e le na o feau i aso taitasi.

Fai le laasaga 2 ma le 3.

O taeao, ia fai laasaga 4 ma le 5.

Tautino:Tautino atu e fai faatinoga nei i le aluga o le vaiaso. Tuu se togi i pusa pe a e faamaeaina galuega taitasi:

• Ia fai laasaga nei i aso uma ia sili atu ona faaaoga lelei ai lou taimi.

• Aoao atu lenei mataupu faavae i lou aiga.

• Faaauau pea ona faataitai mataupu faavae o faavae ua tuanai.

“O le taimi o mea uma o loo i le fogaeleele. … Afai e faaaoga ma le faautauta, o le a aumai ai mea e faaopoopo i lo outou ola filemu, talafeagai, ma le maliega. E ao ona tatou mafaufau i lenei, aua le toe nofonofo ma piilima, faamaimau taiimi.”

Polika Iaga, i le Discourses of Brigham Young, sel. John A. Widtsoe (1954), 214

Motugaafa e Faagaoioia ai

Pe a i ai i tagata o le vaega ni fesili, fesoasoani ia i latou e saili tali mo i latou lava.

O Le Meaalofa o le Taimi

Afai e le mafai ona e matamata i le vitio, atofa atu matafaioi mai le tala ma faitau lenei tusiga faatasi.

KOFI: Talofa, Tuafafine Benkosi. O a mai oe?

TUAFAFINE BENKOSI: O lelei mea uma, Kofi?

KOFI: Oi, Tuafafine Benkosi. Ua ou pisi lava. E tatau ona ou galue ma auauna atu ma fesoasoani i lou aiga … sosoo ai foi ma lau toleniga o le lakapi faaamerika. E leai sa’u taimi!

TUAFAFINE E.: Kofi, o loo ia te oe le taimi atoa o loo i ai.

KOFI: Ea?

TUAFAFINE E.: Si au tama, ua tuuina mai e le Atua ia i tatou se meaalofa silisili—lo tatou taimi. E tatau ona faaaoga lo tatou taimi e faia ai mea e sili ona taua.

KOFI: Ae faafefea, Tuafafine Benkosi? E te faia pea le tele o mea. Ua faamanuiaina oe i lou aiga, ma lau pisinisi. Ua e auauna atu ma faamanuia le toatele o tagata, e pei o au. Ou te le iloa pe faapefea ona faia.

TUAFAFINE E.: E te manao moni lava e iloa? Afai e te nofo filemu ma faalogo, o le a ou tau atu ia te oe lau mealilo.

O taeao taitasi ou te ala ai e lei oso ae le la. E fai au lavalava ma fufulu ou mata ma lima.

Ou te faitau i tusitusiga paia. Ona ou faia lea o se lisi o mea e tatau ona faia i lena aso.

Ou te mafaufau i se tasi ou te auauna i ai. Ou te tatalo ia iloa le finagalo o le Atua. Ma ou te faalogo.

O nisi taimi o igoa ma foliga o tagata e oo mai i lou mafaufau. Ou te faaopoopoina i latou i lau lisi.

KOFI: O le mea la lena e te iloa ai le tagata e manaomia lau auaunaga?

TUAFAFINE E.: Ioe, Kofi. Ma ou te tatalo mo le malosi ma le poto. Ou te tatalo o le a “faapaiaina [lau] galuega.” E tau mai lena mea i le 2 Nifae.

Ou te faafetai ia te Ia. Ou te folafola atu e faia le mea silisili. Ou te ole atu e Na te faia mea e le mafai ona ou faia.

Ona ou tilotilo lea i lau lisi. Ou te tuu se “1” i talaane o le mea e aupito taua, sosoo ai ma se “2.”

KOFI: E faapefea ona e iloa mea e faamuamua?

TUAFAFINE E.: Ou te faalogo ma ou te tatalo! Ona ou alu lea ou te galue. Ou te tilotilo i le numera 1 ma taumafai e fai muamua, ona fai lea o le numera 2.

O nisi taimi e suia ai ni mea. E tau mai e le Agaga Paia ia te au e fai se isi mea. E lelei lena.

Ou te galue malosi, ae ou te maua le filemu. Ou te iloa o le a fesoasoani le Atua ia te au.

O lea la, faatasi ai ma lau lisi ma le Agaga, ou te faia le mea e taua, Kofi.

KOFI: E foliga mai e faigofie ma faigata lena mea i le taimi e tasi.

TUAFAFINE E.: E sao oe! Pe a iu ina ou sauni e moe, ou te tatalo. Ou te lipoti atu i le Tama Faalelagi. Ou te tau atu ia te Ia lou aso. Ou te faia ni fesili. Ou te fesili atu po o a mea e mafai ona sili atu ona ou faia. Ou te faalogo. E masani ona ou lagonaina Lona alofa. Ou te iloa e Na te faaleleia mea ou te taumafai e fai. Ona ou maua lea o le filemu, Kofi, ma ou moe ai.

KOFI: Manaia lena mea, Mama Benkosi. Ou te manao i lenei filemu. Ou te manao e faaaoga lou taimi. Ou te manao ia sili atu ona ou galue ma auauna atu.

TUAFAFINE E.: O le a e tuu ese mea e le taua, Kofi. O le a e faaaoga lou taimi e fai ai mea e taua. Ma o le a faatasi le Atua ma oe pe a lelei lou loto.

KOFI: Faafetai.

TUAFAFINE E.: Ia alu loa, atalii pele. E tele se mea e tatau ona e faia!