9

Tumau Mausali

Mafaufau Loloto:E faapefea ona tatou aoao e faaauau pea le galulue i se galuega seia oo ina maea?

Maimoa:“Only a Stonecutter” (A e a pe a le maua le vitio? Faitau le itulau e sosoo ai.)

Talanoa: E faapefea ona tatou faaauau pea e tusa pe faigata? E faapefea e le faatuatuaina o le Alii ona aafia ai lo tatou tomai e tumau ai?

Faitau:Saunoaga a Peresitene Faust; Eperu 12:1; Mataupu Faavae ma Feagaiga 58:4 (i le taumatau)

“O le tumau mausali e faaalia e i latou o e … e le fiu pe a faapea mai isi, ’E le mafai ona faia.’”

James E. Faust, “Tumau Mausali,” Ensign po o le Liahona, Me 2005, 51

“Ia tatou taufetuli ma le onosai i le ala tanu o i o tatou luma.”

Eperu 12:1

“Aua a mavae puapuaga e tele ona oo mai lea o faamanuiaga.”

Mataupu Faavae ma Feagaiga 58:4

Faataitai:Galulue faatasi e aoao lenei mamanu ina ia tutumau mausali ma faatoilalo faigata:

• Faatasi ai o se vaega, faitau laasaga taitasi i le mamanu o loo i lalo.

• Liliu atu i se tasi o i le vaega. Fesili atu i le tasi ma le isi poo i ai ni tiute po o se galuega e tatau ona latou faataunuuina e matuai faigata lava.

• Fesoasoani i le tasi ma le isi e faia laasaga e fa o loo i lalo, talanoa e uiga i tiute faigata po o se galuega.

• Tautino i le tasi ma le isi o le a e tumau mausali—o le a e faia pea seia maea lelei le tiute po o le galuega.

➊

Ia Tausia se Uiga Lelei

Lisi au faamanuiaga.

➋

Manatua ia Galulue Faatasi

Fesili atu i uo, tupulaga, tagata o le vaega, ma isi mo le fesoasoani.

➌

Suia le Fefe i le Faatuatua

Aloese mai le masalosalo. Ia manatua o loo i le Alii le mana uma. Valaau ia te Ia ma talia Lona finagalo.

➍

Agai i Luma ma le Onosai ma le Lototele

Aua, aua, aua le fiu; tumau ma le faatuatua.

“Aua nei gauai atu i tofotofoga e tasi lea na gauai i ai Lamana ma Lemuelu. Ina ua latou mauaina le tofia faagaeetia e toe aumai papatusi a Lapana, ua taua e faamaumauga sa laua muimui, faapea o se mea faigata ua poloaiina ai latou e faia. Ma sa leiloa ai lo laua avanoa ma lo laua taui mo le auauna atu i le Atua. Nai lo lena, ia pei lou amio o lo la uso, o Nifae: ‘O le a ou alu ma fai mea ua poloaiina e le Alii’ (tagai1 Nifae 3:5–7).”

Thomas S. Monson, Teachings of Thomas S. Monson (2011), 54

Faataitai:Piki se luitau o loo feagai ma lou aiga. Faaaoga le mamanu o loo i luga ma faailoa mai ni auala se lua pe tolu e mafai ona e agai ai i luma i le faatuatua, ma faatuatuaina o le a saunia e le Atua:

Tautino:Tautino atu e fai faatinoga nei i le aluga o le vaiaso. Tuu se togi i pusa pe a e faamaeaina galuega taitasi:

• Faataitai le tumau mausali i auala ua e faailoa mai i luga.

• Aoao atu lenei mataupu faavae i lou aiga.

• Faaauau pea ona faataitai mataupu faavae o faavae ua tuanai.

“O la tatou tiutetauave o le faaleleia o le tautaua i le tomai silisili, mai le toilalo popo i le ausiaina. O la tatou galuega o le avea ma tagata silisili. O se tasi o meaalofa silisili a le Atua ia i tatou o le olioli i le taumafai pea, aua e leai se toilalo popo e manaomia ona avea ma taunuuga.

Thomas S. Monson, “The Will Within,” Ensign, May 1987, 68

Ua Na o se Tipima’a

Afai e le mafai ona e matamata i le vitio, faitau le tusiga lenei.

O le Malumalu o Sate Leki o loo fausiaina

ELDER HOLLAND: O John R. Moyle sa avea o se paionia mai Egelani o le sa sopoia le Iunaite Setete a o tosoina se taavale toso. Sa ia nofo i Alpine, Iuta, pe tusa ma le 22 maila (35 kilomita) pe a sau sao i le Malumalu o Sate Leki.

Sa valaauina e Polika Iaga ia Uso Moyle e avea ma pule sili i le faiga o maamora a o fausia le Malumalu o Sate Leki.

Ina ia mautinoa e taunuu tonu i le 8:00 i le taeao o Aso Gafua taitasi, e amata ona savali mai ia Uso Moyle i le 22 maila e tusa i le 2:00 i le vaveao. E uma lana galuega i le 5:00 i le afiafi o le Aso Faraile ona amata ai lea ona savali i le fale, e taunuu ae toeitiiti ta le sefululua i le po. O le mea lava lena na te faia i vaiaso taitasi mo le toeitiiti 20 tausaga i le taimi atoa na galue ai i le fausiaina o le malumalu.

Sa i ai se taimi a o i ai i lona aiga i le faaiuga o le vaiaso, sa ulavale se tasi o ana povi a o tatauina le susu, ma sa aaina ai Uso Moyle i le vae, ma nuti ai le ponaivi i lalo tonu o le tulivae.

Ona o le leai o se isi fesoasoani faafomai e sili atu i le faatoaga, na tatala ese ai e lona aiga ma uo se faitotoa mai faamau, na fai ma laulau tipitipi ma saisai i ai o ia. Ona latou avane lea o se ’ili sa latou faaaogaina e tatuu ai lala laau mai se laau latalata ane, ma tipi ai lona vae pe a ma ni nai inisi mai le tuli.

Ina ua amata ona toe pe lona vae, sa faia e Uso Moyle se vae faapipii i se fasilaau. Muamua, sa savalivali o ia i le fale. Ona savalivali solo ai lea i lumafale Na iu lava ina fesavalia’i i lona fanua.

Ina ua ia lagona ua mafai ona ia onosaia le tiga, sa savali o ia i le 22 maila i le Malumalu o Sate Leki, ma a’e i luga o le tulaga faaapefa’i ma se tofi i lona lima, ona ia vaneina ai lea o le tautinoga “E Paia i le Alii.”

(Tagai foi Jeffrey R. Holland, “E Pei O ni Lupe i o Tatou Faamalama,” Liahona, Iulai 2000, 92–93.)