3

Ia Usiusitai

Mafaufau loloto:O a tulafono e tatau ona ou usitaia ina ia sili atu ona ola tutoatasi?

Maimoa:“Obedience Brings Blessings” (A e a pe a le maua le vitio? Faitau i le itulau e sosoo ai.)

Talanoa: O le usitusitai i tulafono a le Atua e taitai atu i faamanuiaga faaleagaga ma le faaletino. O a ni aafiaga na e oo i ai e faamaonia ai lenei mea?

Faitau:Mataupu Faavae ma Feagaiga 130:20–21; saunoaga a Iosefa Samita (i le taumatau)

“E i ai se tulafono … ua faavae ai i luga faamanuiaga uma—Ma a tatou maua se faamanuiaga mai le Atua, e maua i le usiusitai i lena tulafono ua faavae ai i luga.”

Mataupu Faavae ma Feagaiga 130:20–21

“Pe a faatonuina ai e le Alii, ia faia loa.”

Iosefa Samita,i le History of the Church, 2:170.

Faataitai:Vaai i le siata o loo i lalo. Matau pe faapefea e le usiusitai i tulafono faapitoa ona taitai atu i faamanuiaga faapitoa. O nisi o faataitaiga ua tuuina atu.

Ia, faaalu ni nai minute e:

1. Tusi i lalo ni faamanuiaga faapitoa e te manao ai i lau sailiga mo se galuega, sa oe lava galuega, po o le aoga. Faaaoga le koluma taumatau.

2. Faaaoga le koluma agavale e lisi ai tulafono e mafai ona e usiusitai i ai ina ia maua na faamanuiaga.

Usitai	Ia Maua
Tulafono po o mataupu faavae	Faamanuiaga
O Le Upu o le Poto (MF&F 89)	Soifua maloloina sili atu, atamai silisili
Sefuluai ma taulaga (Malaki 3:10–12)	Faamanuiaga faaletino ma faaleagaga, manuia i a tatou galuega, puipuiga
Alu vave i le galuega i aso uma	Faigaluega faifai pea ma le tomai e fatu ai ni [tupe] e sefe
Taumafa paleni ma faamalositino e le aunoa	E itiiti aso e te misia ai le galuega ona o le ma’i

Faataitai:Tusi ni auala faapitoa se lua pe tolu e mafai ona e faateleina ai lou usiusitai i tulafono ua e filifilia:

Tautino:Tautino atu e faia faatinoga nei i le aluga o le vaiaso. Tuu se togi i pusa pe a e faamaeaina galuega taitasi:

• Faataitai le usiusitai i aso uma.

• Aoao atu lenei mataupu faavae i lou aiga.

• Faaauau pea ona faataitai mataupu faavae o faavae ua tuanai.

“Afai e sili atu ona tatou fiafia i mea taugata po mea e manaomia nai lo le tatou fiafia e usiusitai, o le a tatou misia faamanuiaga lea e Na te aumaia ia i tatou.”

Spencer W. Kimball, i le Teachings of Spencer W. Kimball, ed. Edward L. Kimball (1982), 212

Motugaafa e Faagaoioia ai

Uunaia tagata uma e osia ma tausia tautinoga faapitoa ma ia aoao atu i o latou aiga.

O Le Usiusitai e Aumaia ai Faamanuiaga

Afai e le mafai ona e matamata i le vitio, ia faitau le tusiga lenei.

E maeu lea folafolaga mamalu! “O ia o le e tausia ana [ poloaiga , e maua e ia le upumoni ma le malamalama, seia oo ina faamamaluina o ia i le upumoni ma iloa e ia mea uma.”[MF&F 93:28]. …

Ou uso e ma tuafafine, o le suega tele lava o lenei olaga o le usiusitai. “O le a tatou tofotofoina ai i latou,” na fetalai ai le Alii, “e vaai pe latou te faia mea uma o soo se mea e poloaiina ai i latou e le Alii lo latou Atua.” [Aperaamo 3:25].

Na tautino mai le Faaola, “Aua o i latou uma o e e fia mauaina se faamanuiaga i lo’u lima ia mau i le tulafono na tofia mo lena faamanuiaga, ma ona tulaga, e pei ona sa faatutuina mai i luma atu o le faavaega o le lalolagi.”[MF&F 132:5].

E leai se isi faataitaiga sili atu o le usiusitai o i ai nai lo lo tatou Faaola lava ia. Na saunoa Paulo e uiga ia te Ia:

“E ui lava o ia o le Alo, a o mea sa tiga ai o ia na aoaoina ai o ia ia usiusitai;

“Ua faaatoatoaina foi o ia, ona avea ai lea o ia ma tupuga o le ola e faavavau ia i latou uma o e usiusitai ia te ia.” [Eperu 5:8–9].

Sa faailoa e le Faaola le alofa faamaoni o le Atua e ala i le soifua i se soifuaga atoatoa, e ala i le faamamaluina o Lana lava misiona. Sa lei faasausili o Ia. Sa lei faafefeteina o Ia i le faamaualuga. Sa lotonuu o Ia. Sa lotomaualalo o Ia. Sa faamaoni o Ia. Sa usiusitai o Ia i taimi uma. …

Ina ua fetaiai ma tiga i Ketesemane, lea sa Ia onosaia ai ia tiga ma o “lona afu foi ua pei o alualu toto ua pau ifo i le eleele,” [Luka 22:44], o Ia o le faataitaiga atoatoa o le Alo usiusitai i Lona fetalai mai, “Lo’u Tama e, a e finagalo i ai, ia e ave ese lenei ipu ia te au: a e aua le faia lo’u loto, a o lou finagalo.”[Luka 22:42].

E pei lava ona faatonuina e le Faaola Ana uluai Aposetolo, ua faapena foi ona Ia faatonuina oe ma au: “Mulimuli mai ia te au.” [Ioane 21:22]. Pe ua tatou naunau ea e usiusitai?

O le malamalama lea tatou te sailia, o tali o loo tatou mananao ai, ma le malosi ua tatou manaomia i nei aso e faafetaiaia ai luitau o se lalolagi faigata ma fesuisuiai e mafai lava ona fai mā tatou pe a tatou naunau e usiusitai i poloaiga a le Alii. Ou te toe sii maia le fetalaiga a le Alii: “O le e tausia poloaiga , e maua e ia le upumoni ma le malamalama, seia oo ina faamamaluina o ia i le upumoni ma iloa e ia mea uma.” [MF&F 93:28].

O lau tatalo faamaualalo ina ia faamanuiaina i tatou i taui silisili ua folafolaina i e usiusitai. I le suafa o Iesu Keriso, lo tatou Alii ma le Faaola, amene.

(Thomas S. Monson, “O Le Usiusitai e Aumaia ai Faamanuiaga,” Ensign po o le Liahona, Me 2013, 89, 92)