8

Fesootaiga: Talosaga ma Faalogo

Mafaufau Loloto:Pe sa i ai ea sau aafiaga lea sa tali ai e le Tama Faalelagi au tatalo e uiga i se galuega, o lau pisinisi, po o lau aoga?

Maimoa:“Creating Lift [Fatuina o le Siitiaina]” (A e a pe a le maua le vitio? Faitau le itulau e sosoo ai.)

Talanoa: O a auala ua tau mai e Peresitene Uchtdorf e mafai ai ona tatou siitia i tatou lava mai popolega faalelalolagi? O i ai ea ni taimi tatou te le iloa ai tali i a tatou tatalo? Pe o le faalogo o se vaega taua o le tatalo?

Faitau:Mataupu Faavae ma Feagaiga 8:2; upusii a Elder Nelson (i le itu taumatau)

“O le a ou tau atu ia te oe i lou mafaufau ma lou loto e ala i le Agaga Paia, lea o le a oo atu i ou luga ma lea o le a mau i lou loto.”

Mataupu Faavae ma Feagaiga 8:2

“O le a faamanuiaina o outou agaga pe a outou faalogo, ona faalogo lea e a’oa’o mai fanau, matua, soa, tuaoi, ma taitai o le Ekalesia, e faateleina ai le malosi e faalogo i fautuaga mai luga.”

Russell M. Nelson, “Faalogo e A’oa’o,” Liahona, Iulai 1991, 28

Talanoa: O se vaega, ia talanoaina fesili nei: Aisea ua avea ai le faalogo ma se tomai taua? E mafai faapefea e le faalogo ma le faaeteete ona fesoasoani ia i tatou i a tatou galuega?

Faataitai:Ia fai le gaoioiga lenei e aoao ai e faaleleia au tomai tau le faalogo:

• O se vaega, ia faitau i laasaga o i lalo ma faapuupuu le talanoaina o i latou.

• Ia fai atu i se tagata e toatasi pe toalua o le vaega e tau atu i isi e uiga i se luitau po o se fesili o ia i latou. E tatau ona taumafai isi tagata uma e faalogo, ma mulimuli i nei laasaga.

• Fesili atu i sui o le vaega na saunoa atu pe na faapei o latou lagona ina ua taumafai le vaega e matua faalogo.

❶

Gauai

• Taulai atu i upu a le failauga ma ana gaoioiga.

• Aua le faalavelave.

➋

Talisapaia

• Vaai i le failauga.

• Faaaoga upu laiti e pei o le “ioe” po o le “ua lelei.”

• Faafetai i le failauga.

➌

Toe iloilo

• Fai atu: “O lau tala la. …”

• Ona toe tau atu lea o le mea na e faalogo i ai.

➍

Fesili atu

• Fesili atu: “Pe na ou malamalama?”

• Faatali mo se tali ma faalogo.

Tautino:Tautino atu e fai faatinoga nei i le aluga o le vaiaso. Tuu se togi i pusa pe a e faamaeaina galuega taitasi:

• Faataitai laasaga i le faalogo lelei ma lou aiga:

  • Fai atu i se tagata o lou aiga e faasoa mai se luitau po o se fesili o feagai ma ia.

  • Faataitai laasaga o le faalogo a o e faalogo i lenei luitau.

• Aoao atu lenei mataupu faavae i lou aiga.

• Faaauau pea ona faataitai mataupu faavae o faavae ua tuanai.

“E faafofogina e lo tatou Tama Faalelagi tatalo a Lana fanau i le lalolagi atoa o loo augani atu mo mea e aai ai, o lavalava e ufiufi ai o latou tino, ma le mamalu o le a oo mai ona ua mafai ona tausia i latou lava. Ua oo atu na augani ia te Ia talu lava ona Ia tuuina o alii ma tamaitai i le fogaeleele.”

Henry B. Eyring, “O Avanoa e Fai Ai Mea Lelei” Ensign po o le Liahona, Me 2011, 22

“E tatau ona tatou ole atu mo se fesoasoani mai lo tatou Tama Faalelagi ma saili le malosi e ala i le Togiola a Lona Alo o Iesu Keriso. I mea uma faaletino ma faaleagaga, o le mauaina o lenei fesoasoani faalelagi e mafai ai ona avea i tatou ma e e tuuina atu ma le faautauta mea e manaomia e i tatou lava faapea ma isi.”

Robert D. Hales, “Ia Avea ma E Tuuina Atu ma le Faautauta Mea e Manaomia Faaletino ma le Faaleagaga,” Ensign po o leLiahona, Me 2009, 7–8

FATUINA O LE SIITIAINA

Afai e le mafai ona e matamata i le vitio, faitau le tusiga lenei.

PERESITENE UCHTDORF: Ina ia mafai ona aluese mai se vaalele mai le eleele, e tatau ona e fatuina se tulaga e masii i luga. I aoaoga i mea tau feoaiga i le ea, e tupu le masii i luga pe a pasi ae le ea i luga ae o apaapa o se vaalele i se auala o le a avea ai le ea i lalo ifo o le apaapa e malosi atu nai lo le savili i luga ae o apaapa. A sili atu le malosi o le uuna’i i luga e le savili nai lo le malosi o le toso i lalo e le kalave, ona masii lea i luga o le vaalele mai le laueleele ma mafai ai ona lele.

I se auala e talitutusa lava, e mafai ona tatou faia ni mea e sii ai i luga i o tatou olaga faaleagaga. Afai e malosi atu le malosiaga lea e tuleiina i tatou agai i le lagi nai lo faaosoosoga ma faanoanoaga lea e tosoina i tatou i lalo, o le a mafai ona tatou o a’e ma felelei atu i le malo o le Agaga.

E ui i le tele o mataupu faavae o le talalelei e fesoasoani ia i tatou i le mauaina o le masii i luga, ae ou te fia taulai faapitoa atu i se mataupu faavae e tasi.

[Tatalo!]

O le tatalo o se tasi lea o mataupu faavae o le talalelei e maua ai lena masii i luga. O le tatalo ua i ai le mana e siitia ai i tatou mai o tatou [popolega faalelalolagi. E mafai e le tatalo] ona sii ae ai i tatou mai ao o le faanoanoa [po o le] pogisa ma avatu ai i se tafailagi susulu ma le manino.

O se tasi o faamanuiaga aupito maoae ma avanoa ua tatou maua o ni fanau a lo tatou Tama Faalelagi o le mafai lea ona tatou fesootai ma Ia [e ala i le tatalo]. E mafai ona tatou talanoa ma Ia e uiga i mea e tutupu i o tatou olaga, tofotofoga, ma faamanuiaga. E mafai ona tatou faalogo atu ma maua le taitaiga faalelagi mai le Agaga Paia [i soo se taimi ma i soo se nofoaga].

(Dieter F. Uchtdorf, “O Le Tatalo ma le Tafailagi Lanumoana,” Ensign po o leLiahona, Iuni 2009, 5–6; o upu o loo puipuia na faaopoopoina e Peresitene Uchtdorf i se faatalatalanoaga ia Mati 2004)