2

Gamita ang Panahon sa Maalamon nga Paagi

“Kay tan-awa, kini nga kinabuhi mao ang panahon alang sa mga tawo sa pagpangandam sa pagsugat sa Dios; oo, tan-awa ang adlaw niini nga kinabuhi mao ang adlaw alang sa mga tawo sa paghimo sa ilang mga buluhaton.”

Alma 34:32

Pamalandungi:Ngano nga ang panahon usa man sa labing mahinungdanong mga gasa sa Dios?

Tan-awa:“The Gift of Time” (Walay video? Basaha ang sunod nga pahina.)

Hisguti:Unsay inyong nakat-unan gikan ni Sister Benkosi?

Praktisa:Ania ang lima ka mga lakang nga inyong mahimo kada adlaw aron magamit og maayo ang inyong panahon. Basaha ang kada usa. Gibuhat ba ni Sister Benkosi kining mga butanga?

❶

Ilista ang mga Buluhaton

Kada buntag, paghimo og lista sa mga buluhaton. Dugangi og mga ngalan sa mga tawo nga serbisyuhan.

❷

Mag-ampo

Mag-ampo alang sa giya. Maminaw. I-commit nga himoon ang inyong pinakamaayo.

❸

Maghimo og mga Prayoridad

Numeruhi ang inyong nag-unang mga prayoridad. Butangi og “1” ang labing importante nga buluhaton, butangi og “2” ang sunod, ug ipadayon.

❹

Maghimo og mga Tumong, Lihuka

Paminaw sa Espiritu. Paghimo og mga tumong. Paningkamot. Sugdi sa labing importante nga buluhaton ug trabahoa padulong sa ubos sa lista.

❺

Mo-report

Kada gabii, moreport sa Langitnong Amahan pinaagi sa pag-ampo. Mangutana. Maminaw. Batia ang Iyang gugma. Paghinulsol.

Sugdi karon. Isulat dinhi niini nga workbook o sa usa ka lain nga papel. Buhata ang unang lakang: Ilista ang inyong mga buluhaton para ugma. Kinahanglang importante gayud kini nga mga buluhaton alang sa inyong trabaho, alang sa inyong pagtuon, o alang sa pagserbisyo sa simbahan o pamilya—dili kay basta inadlaw lang nga buluhaton.

Buhata ang step 2 ug step 3.

Ugma, buhata ang step 4 ug step 5.

I-commit:I-commit nga himoon ang mosunod nga buluhaton sa semana. I-tsek ang mga box kon makompleto ninyo ang matag buluhaton:

• Praktisa kini nga mga lakang kada adlaw sa paggamit sa inyong panahon sa mas maalamong paagi.

• Itudlo kini nga baruganan sa inyong pamilya.

• Padayuna pagpraktis ang miaging baruganan sa foundation.

“Ang panahon mao ang tanang puhunan nga ania sa yuta. … Kon gamiton sa hustong paagi, magdala kini nianang unsay modugang sa inyong kahamugaway, kaharuhay, ug katagbawan. Ato kining hunahunaon, ug dili na molingkod nga mangiyugpos, mag-usik sa panahon.”

Brigham Young, sa Discourses of Brigham Young, sel. John A. Widtsoe (1954), 214

Tip alang sa Facilitator

Kon ang mga sakop sa grupo dunay mga pangutana, tabangi sila nga makakita og mga tubag alang sa ilang kaugalingon.

The Gift of Time

Kon dili mo makatan-aw sa video, pagpili og mga tahas [role] ug basaha kini nga script.

KOFI: Hello, Sister Benkosi. Kumusta ka?

SISTER BENKOSI: Okey ra ka, Kofi?

KOFI: Oh, Sister Benkosi. Busy kaayo ko. Kinahanglan kong motrabaho ug moserbisyo ug motabang sa akong pamilya … ug unya ang akong football, usab. Wala koy panahon!

SISTER B.: Kofi, naa nimo ang tanang panahon.

KOFI: Unsa?

SISTER B.: Dong, ang Dios mihatag nato og dakong gasa—ang atong panahon. Kinahanglan ato kining gamiton sa mga butang nga labing importante.

KOFI: Pero unsaon man, Sister Benkosi? Pirme kang dunay daghan kaayong nahimo. Nagmalampuson ka sa imong pamilya, sa imong negosyo. Nakaserbisyo ug nakapanalangin ka og daghan, sama nako. Wala ko kahibalo kon giunsa nimo kini paghimo.

SISTER B.: Gusto ba gyud kang masayud? Kon molingkod lang ka ug maminaw, sultihan ka nako sa akong sekreto.

Kada buntag mobangon ko sa di pa mosubang ang adlaw. Mag-ilis ko ug manghilam-us ug manghugas sa kamot.

Magbasa ko sa mga kasulatan. Dayon maghimo ko og lista kon unsay akong buhaton nianang adlawa.

Maghunahuna ko kon kinsa kaha ang akong maserbisyuhan. Mag-ampo ko aron masayud sa kabubut-on sa Dios. Ug ako maminaw.

Usahay ang mga ngalan o mga nawong sa mga tawo mosantup sa hunahuna. Idugang nako sila sa akong lista.

KOFI: Ingon niana ba kanunay aron ka masayud kon si kinsa ang nagkinahanglan sa imong serbisyo?

SISTER B.: Oo, Kofi. Ug nag-ampo ko alang sa kalig-on ug kaalam. Nag-ampo ko nga ang Dios “mopahinungod sa [akong] binuhatan.” Giingon kini diha sa 2 Nephi 32.

Nagpasalamat ko Kaniya. Misaad ko nga akong buhaton ang akong pinakamaayo. Nangayo ko nga Iyang buhaton ang unsay dili nako mabuhat.

Dayon motan-aw ko sa akong lista. Akong butangan og “1” ang labing importante nga butang, dayon “2.”

KOFI: Giunsa nimo pagkahibalo sa mga prayoridad?

SISTER B.: Maminaw ko kon mag-ampo ko! Dayon ipadayon nako ang akong gibuhat. Akong tan-awon ang numero 1 ug mosulay sa pagbuhat niini og una, dayon ang numero 2.

Usahay ang mga butang mausab. Ang Espiritu Santo misulti nako sa pagbuhat og laing butang. Maayo kana.

Nagtrabaho ko og maayo, pero duna koy kalinaw. Nasayud ko nga ang Dios motabang nako.

Mao nga, gamit ang akong lista ug ang Espiritu, akong buhaton kon unsay importante, Kofi.

KOFI: Morag simple lang kanang paminawon ug lisud sa samang higayon.

SISTER B.: Husto ka! Kon mangandam na ko aron mohigda, mag-ampo ko. Moreport ko sa Langitnong Amahan. Sultihan nako siya kon unsay nahitabo nianang adlawa. Mangutana ko. Mangutana ko kon unsay mahimo nako nga mas maayo. Maminaw ko. Gibati nako pirme ang Iyang gugma. Ako nasayud nga Iyang padak-an ang akong gibuhat. Dayon duna koy kalinaw, Kofi, ug matulog na ko.

KOFI: Maayo kana, Mamma Benkosi. Gusto ko niini nga kalinaw. Gusto nakong gamiton ang akong panahon. Gusto nakong motrabaho ug mas moserbisyo pa.

SISTER B.: Hununga ang mga butang nga dili importante, Kofi. Gamita ang imong panahon sa pagbuhat sa unsay importante. Ug ang Dios magauban kanimo kon ang imong kasingkasing maayo.

KOFI: Salamat.

SISTER B.: Karon lakaw na, dong. Daghan pa ka og buhaton.