8

Makig-istorya: Mohangyo ug Maminaw

Pamalandungi:Duna ba moy kasinatian sa dihang ang Langitnong Amahan mitubag sa inyong mga pag-ampo kalabut sa trabaho, sa inyong negosyo, o sa inyong edukasyon?

Tan-awa:“Creating Lift” (Walay video? Basaha ang sunod nga pahina.)

Hisguti:Sa gisulti ni Presidente Uchtdorf sa unsang paagi atong mapasaka [elevate] ang atong kaugalingon gikan sa kalibutanong mga kabalaka? Duna bay mga panahon nga wala nato mabantayi ang tubag sa atong mga pag-ampo? Ang pagpaminaw usa ba ka importante nga bahin sa pag-ampo?

Basaha:Doktrina ug mga Pakigsaad 8:2; kinutlo ni Elder Nelson (naa sa tuo)

“Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabut diha kanimo ug nga mopuyo diha sa imong kasingkasing.”

Doktrina ug mga Pakigsaad 8:2

“Ang inyong kalag mapanalanginan samtang magkat-on kamo sa pagpaminaw, dayon maminaw aron makakat-on gikan sa mga anak, mga ginikanan, mga kauban, mga silingan, ug mga lider sa Simbahan, kining tanan makapalambo sa kapasidad sa pagpaminaw sa tambag gikan sa kahitas-an.”

Russell M. Nelson, “Listen to Learn,” Ensign, Mayo 1991, 24

Hisguti:Isip grupo, hisguti kini nga mga pangutana: Nganong ang pagpaminaw usa man ka importante nga kahanas? Sa unsang paagi nga ang pagpaminaw og maayo makatabang kanato sa atong trabaho?

Praktisa:Buhata kini nga kalihokan aron makakat-on sa pagpalambo sa inyong mga kahanas sa pagpaminaw:

• Isip grupo, basaha ang mga lakang sa ubos ug hisguti kini sa daklit.

• Hangyoa ang usa o duha ka sakop sa grupo nga sultihan ang uban bahin sa usa ka hagit o pangutana nga sila aduna. Ang tanan kinahanglang maningkamot sa pagpaminaw, magsunod niining mga lakang.

• Pangutan-a ang mga sakop sa grupo kinsa misulti kon unsay ilang gibati sa dihang ang grupo naningkamot gayud sa pagpaminaw.

❶

Mo-concentrate

• Mag-focus sa mga pulong ug linihukan sa nag-istorya.

• Ayaw baldaha.

➋

Dayega

• Tan-awa ang nag-istorya.

• Gamit og mubo nga mga pulong sama sa “oo”o “okey.”

• Pasalamati ang nag-istorya.

➌

Ribyuha

• Ingna: “Sa ato pa, nag-ingon ka nga. …”

• Dayon sublia kon unsay inyong nadungog.

➍

Mangutana

• Mangutana: “Nasabtan ba nako?”

• Hulata ang tubag ug paminaw.

I-commit:I-commit nga himoon ang mosunod nga buluhaton sa semana. I-tsek ang mga box kon makompleto ninyo ang matag buluhaton:

• Praktisa ang mga lakang sa mas maayo nga pagpaminaw kauban ang inyong pamilya.

  • Hangyoa ang usa ka sakop sa pamilya sa pagpakigbahin og usa ka hagit o pangutana nga iyang gisagubang.

  • Praktisa ang mga lakang sa pagpaminaw samtang naminaw mo niini nga hagit.

• Itudlo kini nga baruganan sa inyong pamilya.

• Padayuna pagpraktis ang miaging mga baruganan sa foundation.

“Ang atong Langitnong Amahan naminaw sa mga pag-ampo sa Iyang mga anak sa tibuok yuta nga nangamuyo sa mga pagkaon aron kaunon, sa mga sinina aron itabon sa ilang mga lawas, ug sa dignidad nga magagikan sa pagkahimong makasangkap sa ilang kaugalingon.”

Henry B. Eyring, “Mga Oportunidad sa Paghimo og Maayo,” Ensign o Liahona, Mayo 2011, 22

“Kinahanglan kita nga mangayo og panabang sa atong Langitnong Amahan ug magtinguha og kusog pinaagi sa Pag-ula sa Iyang Anak, nga si Jesukristo. Diha sa temporal ug espirituhanong mga butang, [kini] makahimo kanato nga madaginuton nga tigsangkap sa atong mga kaugalingon ug sa uban.”

Robert D. Hales, “Pagkahimong Madaginuton nga mga Tigsangkap sa Temporal ug Espirituhanong Paagi,” Ensign o Liahona, Mayo 2009, 7–8

Creating Lift

Kon dili mo makatan-aw sa video, basaha kini nga script.

PRESIDENTE UCHTDORF: Aron ang eroplano malayo sa yuta, kinahanglan nga imo kining pasakaon. Sa aerodynamics, ang pagsaka mahitabo kon ang hangin moagi sa pako sa eroplano sa paagi nga ang gikusgon niini ubos sa pako mas kusog kay sa gikusgon ibabaw sa pako. Kon ang pagpasaka sa ibabaw mas kusog kaysa gibug-aton nga mobitad paubos sa gravity, ang eroplano mosaka gikan sa yuta ug molupad.

Sa sama nga paagi, kita makahimo sa pagbayaw sa atong espirituhanong kinabuhi. Kon ang pwersa nga motulod kanato padulong sa langit mas kusog kaysa mga pagtintal ug kasahol nga mobira kanato paubos, kita makasaka ug makaadto sa gingharian sa Espiritu.

Bisan og daghang mga baruganan sa ebanghelyo ang makatabang kanato aron makab-ot ang pagkabayaw, ako gusto nga mopokus og usa ka piho nga butang.

[Pag-ampo!]

Ang pag-ampo mao ang usa sa mga baruganan sa ebanghelyo nga makatabang sa pagpabayaw. Ang pag-ampo adunay gahum sa pagbayaw kanato gikan sa [kalibutanong mga kabalaka. Ang pag-ampo maka-] pasaka nato ngadto sa mga panganod sa kaalautan [o] kangitngit ngadto sa kahayag ug klaro nga kapunawpunawan.

Usa sa dakong mga panalangin ug mga pribilehiyo ug mga oportunidad nga atong naangkon isip mga anak sa atong Langitnong Amahan mao nga kita mahimong makig-istorya Kaniya [pinaagi sa pag-ampo]. Kita mahimong makig-istorya Kaniya sa atong mga kasinatian sa kinabuhi, mga pagsulay, ug mga panalangin. Kita mahimong maminaw ug makadawat og celestial nga giya gikan sa Balaang Espiritu [sa bisan unsang panahon ug sa bisan unsang dapit].

(Dieter F. Uchtdorf, “Pag-ampo ug ang Asul nga Kapunawpunawan,” Ensign o Liahona, Hunyo 2009, 5–6; ang mga pulong diha sa mga bracket gidugang ni Presidente Uchtdorf sa Marso 2014 nga interbyu)