3

Magmasulundon

Pamalandungi:Unsa nga mga balaod ang kinahanglan nakong sundon aron mahimong self-reliant?

Tan-awa:“Obedience Brings Blessings” (Walay video? Basaha ang sunod nga pahina.)

Hisguti:Ang pagkamasulundon sa mga balaod ug mga baruganan sa Dios maghatag og espirituhanon ug temporal nga mga panalangin. Unsa nga mga kasinatian ang imong nasinati nga nagpamatuod niini?

Basaha:Doktrina ug mga Pakigsaad 130:20–21; pamahayag ni Joseph Smith (naa sa tuo)

“Adunay usa ka balaod … nga diha ang tanan nga mga panalangin gipasikad—Ug kon kita makadawat og bisan unsa nga panalangin gikan sa Dios, kini tungod sa pagsunod niana nga balaod diin diha kini gipasikad.”

Doktrina ug mga Pakigsaad 130:20–21

“Ako kining gihimo nga lagda: Kon ang Ginoo mosugo, buhata kini.”

Joseph Smith, sa History of the Church, 2:170.

Praktisa:Tan-awa ang table sa ubos. Bantayi kon sa unsang paagiha nga ang pagkamasulundon sa piho nga mga balaod makahatag og piho nga mga panalangin. Pipila ka mga example ang gihatag.

Karon, paggahin og pipila ka minutos aron:

1. Isulat ang piho nga mga panalangin nga inyong gitinguha sa inyong pagpangita og trabaho, self-employment, o edukasyon. Gamiton ang kolum diha sa tuo.

2. Gamita ang kolum diha sa wala aron sa paglista sa mga balaod nga inyong masunod aron makadawat niadtong mga panalangin.

Sunda	Aron Makadawat
Mga balaod o mga baruganan	Mga panalangin
Ang Pulong sa Kaalam (D&P 89)	Mas maayo nga panglawas, dakong kahibalo
Mga ikapulo ug mga halad (Malaquias 3:10–12)	Temporal ug espirituhanon nga mga panalangin, kalampusan sa atong trabaho, proteksyon
Motrabaho kada adlaw sa saktong oras	Padayon nga panarbaho ug abilidad sa pagtigum
Mokaon og makaayo sa lawas ug mag-exercise kanunay	Maminusan ang imong mga adlaw nga dili makatrabaho tungod sa sakit

Praktisa:Pagsulat og duha o tulo ka piho nga mga paagi nga inyong mapalambo ang inyong pagkamasulundon sa mga balaod nga inyong gipili:

I-commit:I-commit nga himoon ang mosunod nga buluhaton sa semana. I-tsek ang mga box kon makompleto ninyo ang matag buluhaton:

• Praktisa nga magmasulundon kada adlaw.

• Itudlo kini nga baruganan sa inyong pamilya.

• Padayuna pagpraktis ang miaging mga baruganan sa foundation.

“Kon ganahan kita og mga luho [luxury] o gani sa mga gikinahanglan labaw pa sa pagkamasulundon, mawala kanato ang mga panalangin nga gusto Niyang ihatag kanato.”

Spencer W. Kimball, sa Teachings of Spencer W. Kimball, ed. Edward L. Kimball (1982), 212

Tip alang sa Facilitator

Awhaga ang tanan sa paghimo ug pagtuman sa piho nga mga commitment ug sa pagtudlo sa ilang mga pamilya.

Ang Pagkamasulundon Makahatag og Panalangin

Kon dili mo makatan-aw sa video, basaha kini nga script.

President Thomas S. Monson

Pagkanindot nga saad! “Siya nga maghupot sa mga sugo [sa Dios] makadawat og kamatuoran ug kahayag, hangtud siya pagahimayaon diha sa kamatuoran ug masayud sa tanan nga mga butang” [D&P 93:28]. …

Akong mga kaigsoonan, ang labing dako nga pagsulay niini nga kinabuhi mao ang pagkamasulundon. “Kita mosulay kanila dinhi,” miingon ang Ginoo, “aron pagsuta kon sila mobuhat ba sa tanang butang bisan unsa ang isugo sa Ginoo nga ilang Dios ngadto kanila” [Abraham 3:25].

Mipahayag ang Manluluwas, “Alang sa tanan kinsa may panalangin sa akong mga kamot kinahanglan nga motuman sa balaod nga gitudlo alang niana nga panalangin, ug sa mga kinahanglanon niini, ingon nga gitukod sa wala pa ang katukuran sa kalibutan” [D&P 132:5].

Walay laing labaw nga ehemplo sa pagkamasulundon ang anaa kay sa atong Manluluwas. Kaniya, si Pablo nakaobserbar:

“Ug bisan tuod siya Anak, siya nakakat-on sa pagkamasinugtanon pinaagi sa mga butang nga iyang giantus;

“Ug sa nahimo siyang hingpit, siya nahimong tuburan sa dayong kaluwasan alang sa tanang magasugot kaniya” [Mga Hebreohanon 5:8–9].

Ang Manluluwas mipakita sa tiunay nga gugma sa Dios pinaagi sa pagpuyo og hingpit nga kinabuhi, pinaagi sa pagtuman sa balaang misyon nga para Kaniya. Wala gayud Siya magmapahitas-on. Wala gayud Siya magpagarbo. Wala gayud Siya magmabudhion. Nagmapainubsanon gayud Siya kanunay. Sinsero gayud Siya kanunay. Masulundon gayud Siya kanunay. …

Sa dihang Siya nakasinati sa panghingutas sa Getsemani, diin Siya milahutay sa ingon ka sakit nga ang “iyang singot gihulagway nga mga nanibug-ok daw apol nga nagpangatagak sa yuta” [Lucas 22:44], Iyang gipakita ang pagkamasulundon nga Anak pinaagi sa pagsulti, “Amahan, kon buot ka, kuhaa kining kopa gikan kanako: hinoon, dili ang akong pagbuot maoy matuman, kondili ang imo” [Lucas 22:42].

Sama sa sugo sa Manluluwas sa Iyang unang mga Apostoles, kamo ug ako gisultihan usab Niya, “Sumunod ka lang kanako” [Juan 21:22]. Andam ba kita sa pagsunod?

Ang kahibalo nga atong gitinguha, ang mga tubag nga atong gihandom, ug ang kalig-on nga atong gitinguha karon sa pag-atubang sa mga hagit sa komplikado ug nagkausab nga kalibutan atong madawat kon kita andam nga mosunod sa mga sugo sa Ginoo. Kutloon nako pag-usab ang mga pulong sa Ginoo: “Siya nga maghupot sa mga sugo [sa Dios] makadawat og kamatuoran ug kahayag, hangtud siya pagahimayaon diha sa kamatuoran ug masayud sa tanan nga mga butang” [D&P 93:28].

Akong pag-ampo nga kita mapanalanginan sa daghang mga ganti nga gisaad ngadto sa masulundon. Sa pangalan ni Jesukristo, atong Ginoo ug Manluluwas, amen.

(Thomas S. Monson, “Ang Pagkamasulundon Makahatag og Panalangin,” Ensign o Liahona, Mayo 2013, 89, 92)