Përvoja Nr. 9 e të Nxënit

Përgatitja e një Mësimi: Marrja Vendim se Çfarë të Jepet Mësim

Vështrim i Përgjithshëm

Shënim: Pesë përvojat e radhës të të nxënit janë hartuar për t’ju ndihmuar të mësoni se si të përgatitni një mësim. Përvojat nr. 9–10 të të nxënit përqendrohen te marrja e vendimit se çfarë të jepet mësim dhe përvojat nr. 11–13 të të nxënit përqendrohen te marrja e vendimit se si të jepet mësim.

Kjo përvojë e të nxënit trajton konceptet vijuese:

• Mësimdhënien e shkrimeve të shenjta sipas radhës

• Baraspeshimin e asaj se çfarë të jepet mësim dhe si të jepet ai

• Marrjen e vendimit se çfarë të jepet mësim

Konceptet Kyçe

Mësuesit e sapothirrur shpesh kanë pyetje të tilla si këto që vijojnë:

• Në ç’mënyrë është e ndryshme mësimdhënia në seminar nga mësimdhënia në klasat e tjera si Doktrina e Ungjillit, Shoqata e Ndihmës, kuorumi i pleqve, e kështu me radhë?

• Si ta përgatit një mësim?

• Sa kohë duhet të kaloj për të zgjedhur se çfarë të jap mësim dhe si ta jap mësim atë?

• Si të vendos se çfarë të jap mësim?

Kjo përvojë e të nxënit do të ndihmojë për t’iu përgjigjur disa prej këtyre pyetjeve.

Studimi dhe Mësimdhënia e Shkrimeve të Shenjta Sipas Radhës

Në kurset e seminarit dhe institutit që përqendrohen te veprat standarde, librat dhe kapitujt e shkrimeve të shenjta jepen mësim sipas radhës që shfaqen në shkrimet e shenjta. Mësimet janë organizuar sipas bllokut të shkrimit të shenjtë sesa me tema. Çdo bllok i shkrimit të shenjtë mund të përmbajë kapituj, parime dhe tema të shumta që mund t’i theksoni. Kjo qasje është e ndryshme nga kurset e institutit që jepen mësim me një qasje tematike.

Shihni materialin filmik “Studimi i Shkrimeve të Shenjta Sipas Radhës” (00:46), të mundësuar në churchofjesuschrist.org. Në këtë material filmik, Plaku Dejvid A. Bednar, i Kuorumit të Dymbëdhjetë Apostujve, përshkruan dobitë nga studimi i shkrimeve të shenjta sipas radhës.

Veprimtaria e Manualit Mësimdhënia dhe të Nxënit e Ungjillit

Lexojeni hyrjen te kapitulli 3 në faqet 42–43 të manualit Mësimdhënia dhe të Nxënit e Ungjillit: Një Manual për Mësuesit dhe Udhëheqësit në Seminaret dhe Institutet e Fesë (2012), për t’ju ndihmuar të kuptoni se përse kurset e seminarit dhe të institutit që përqendrohen te veprat standarde i trajtojnë shkrimet e shenjta sipas radhës. Teksa e lexoni këtë seksion, shenjoni në manualin tuaj mënyrat në të cilat studimi i shkrimeve të shenjta sipas radhës do t’ju bekojë juve dhe studentët tuaj.

Kur e jepni mësim një bllok të shkrimit të shenjtë sipas radhës, ju do të jepni mësim parime të shumta brenda një mësimi të vetëm. Çdo parim mund të marrë një nivel theksimi të ndryshëm.

Shihni materialin filmik “Mësimdhënia e Shkrimeve të Shenjta Sipas Radhës” (04:28), të mundësuar në churchofjesuschrist.org. Ky material filmik ilustron disa koncepte të rëndësishme për t’u marrë në shqyrtim kur planifikoni të jepni mësim një bllok të shkrimit të shenjtë sipas radhës.

Çfarë dhe Si: Drejtpeshimi i Përgatitjes Suaj

Gjatë përgatitjes së mësimit, është e rëndësishme që të drejtpeshoni përpjekjet tuaja për të vendosur se çfarë të jepni mësim dhe si ta jepni mësim.

Përgatitje jo e Drejtpeshuar

1. Çfarë

   Kur një mësues kalon shumë kohë dhe përpjekje duke marrë vendimin se çfarë të japë mësim, ai ose ajo nuk do të ketë kohë të mjaftueshme për të marrë në shqyrtim se si t’i ndihmojë studentët të marrin pjesë në [procesin] e të nxënit. Shpesh, kjo do të pasojë mësime që janë të mërzitshme dhe shumë të përqendruara te mësuesi.

2. Si

   Kur një mësues kalon shumë kohë dhe përpjekje duke marrë vendimin se si ta japë mësimin, mësimeve mund t’iu mungojë qëllimi dhe fuqia. Në këtë rast, studentët mund të kujtojnë metodën e mësimdhënies më shumë sesa mesazhet e frymëzuara nga shkrimet e shenjta.

Përgatitje e Drejtpeshuar

“Kur përgatit një mësim, çdo mësues duhet të vendosë: ‘Çfarë do të jap mësim?’ dhe ‘Si do ta jap mësim?’” (Mësimdhënia dhe të Nxënit e Ungjillit, f. 56.) Ju keni mësuar vetëm se ç’ndodh kur [mënyrat] çfarë dhe si nuk janë të drejtpeshuara në përgatitjen tuaj. Tani lexojini seksionet vijuese dhe vëreni veçoritë e përgatitjes kur [mënyrat] çfarë dhe si janë të drejtpeshuara.

1. Çfarë

   Përgatitja se çfarë të jepet mësim përbëhet nga:

   • Të kuptuarit e kontekstit dhe përmbajtjes (sfondi, kultura dhe mjedisi).

   • Të kuptuarit e përmbajtjes (radha e ngjarjes, njerëzit, ndodhitë, predikimet dhe shpjegimet e frymëzuara).

   • Dallimi i doktrinës apo parimeve të rëndësishme.

2. Si

   Përgatitja si të japësh mësim përbëhet nga përcaktimi i metodave, qasjeve dhe veprimtarive që do të përdorni për t’i ndihmuar studentët të mësojnë (diskutimi në klasë, pyetjet, burimet audiopamore, ushtrimet me shkrim, punët në grupe të vogla, e kështu me radhë).

Për më shumë informacion, shihni seksionin 4.3.2 (“Vendosni se Çfarë dhe Si të Jepni Mësim”) në faqen 56 të manualit Mësimdhënia dhe të Nxënit e Ungjillit.

Shqetësimi i një Mësueseje të Re

Shihni materialin filmik “Fitojeni Fjalën” (08:54), të mundësuar në churchofjesuschrist.org. Në këtë material filmik, Lea Murrei është një nënë e zënë me punë, e cila është thirrur së fundmi si mësuese seminari. Si shumë mësues të sapothirrur, ajo ndihet e merakosur për gjetjen e kohës për të përgatitur mësimet dhe për të dhënë mësim çdo ditë. Ajo madje e pyet veten se nga t’ia nisë. Teksa e shihni materialin filmik, kërkoni se kujt i drejtohet ajo kur ka nevojë për ndihmë me thirrjen e saj. Kërkoni edhe se çfarë këshille i jepet asaj lidhur me gjënë më të rëndësishme nga ku t’ia nisë kur përgatit mësimet.

Marrja Vendim se Çfarë të Jepet Mësim: Katër Faza

Teksa përgatitni një mësim, ndiqini këto katër faza që t’ju ndihmojnë të merrni vendimin se çfarë të jepni mësim. Këto faza shpjegohen te manuali Mësimdhënia dhe të Nxënit e Ungjillit, seksioni 4.3.3 (“Vendosni se Çfarë të Jepni Mësim”), në faqet 56–60.

1. Thellohuni në shkrimet e shenjta për ta kuptuar kontekstin dhe përmbajtjen e bllokut të shkrimit të shenjtë.

2. Dalloni dhe përpiquni të kuptoni doktrinën dhe parimet që gjenden në bllok.

3. Vendosni se cila doktrinë dhe cilat parime janë më të rëndësishme për studentët tuaj që t’i mësojnë dhe zbatojnë.

4. Vendosni se çfarë niveli theksimi t’i jepni secilit segment të bllokut të shkrimit të shenjtë.

Veprimtaria vijuese do të përqendrohet në katër hapat e marrjes së vendimit se çfarë të jepet mësim. Për secilën nga katër pjesët e veprimtarisë, shihni materialin filmik që paraqet se si të plotësohet çdo fazë. Më pas, ushtrojeni atë që keni mësuar duke krijuar shënime për mësimet ndërkohë që jeni duke përmbledhur Mosian 27.

Veprimtaria e Përgatitjes së Mësimit

Faza 1: Kuptojeni Kontekstin dhe Përmbajtjen e Bllokut të Shkrimit të Shenjtë

Manuali Mësimdhënia dhe të Nxënit e Ungjillit jep katër sugjerime për t’u marrë në shqyrtim kur përpiqeni të kuptoni kontekstin dhe përmbajtjen e bllokut të shkrimit të shenjtë:

• Thellohuni në bllokun e shkrimit të shenjtë gjersa përmbajtja të bëhet e qartë dhe e njohur.

• Vëreni ndërprerje të dukshme në bllokun e shkrimit të shenjtë ku ndodh një ndryshim në temë ose veprim.

• Ndajeni bllokun e shkrimit të shenjtë në segmente ose grupe të vogla vargjesh bazuar në ndërprerje të dukshme. (Shënim: Ju do t’i përdorni këto segmente më të vogla për të organizuar rrjedhën e mësimit dhe për t’i kushtuar të paktën pak vëmendje të gjithë përmbajtjes brenda një blloku të shkrimit të shenjtë.)

• Përmblidheni atë që ndodh brenda çdo segmenti të vargjeve.

Shihni materialin filmik “Përgatitja e Mësimit: Grupe Vargjesh dhe Thënie Përmbledhëse” (05:08), të mundësuar në churchofjesuschrist.org. Në këtë material filmik, Motra Uillson paraqet këto hapa.

Krijoni një dokument bosh të ngjashëm me atë që patë te materiali filmik ose përdorni fletushkën e titulluar “Përcaktimi se Çfarë të Jepet Mësim”, e cila është dhënë në shtojcën e këtij manuali. Më pas, dallojeni kontekstin dhe përmbajtjen e bllokut të shkrimit të shenjtë duke bërë sa vijon:

1. Studiojeni bllokun e shkrimit të shenjtë (Mosia 27) për t’u njohur me kontekstin dhe përmbajtjen.

2. Vëreni ndërprerje të dukshme ku ndodh një ndryshim në temë ose veprim.

3. Ndajeni bllokun e shkrimit të shenjtë në grupe më të vogla vargjesh bazuar në këto ndërprerje të dukshme.

4. Te dokumenti juaj, shkruani thënie përmbledhëse që përshkruajnë se çfarë ndodhi brenda çdo segmenti të vargjeve.

Faza 2: Dallojeni dhe Kuptojeni Doktrinën dhe Parimet

Pasi t’i keni përmbledhur segmentet e vargjeve, ju do të dalloni te secili prej tyre doktrinën dhe parimet. Më pas, do të shkruani thënie të qarta dhe të thjeshta që përmbledhin doktrinën dhe parimet që keni dalluar.

Shihni materialin filmik “Përgatitja e Mësimit: Përcaktimi i Doktrinës dhe Parimeve” (02:57), të mundësuar në churchofjesuschrist.org. Në këtë material filmik, Motra Uillson paraqet se si i përcakton doktrinën dhe parimet, si i përmbledh ato në thënie të thjeshta dhe si i shkruan ato në përvijimin e mësimit të vet.

Kthehuni te shënimet tuaja të mësimit lidhur me Mosian 27 dhe bëni sa vijon:

1. Dallojeni doktrinën dhe parimet në çdo segment të vargjeve.

2. Në dokumentin tuaj, shkruajeni çdo doktrinë ose parim duke përdorur thënie të qarta dhe të thjeshta.

Faza 3: Vendosni se Cila Doktrinë dhe Cilat Parime Janë më të Rëndësishme për Studentët Tuaj që t’i Mësojnë dhe Zbatojnë

Blloqet e shkrimit të shenjtë shpesh përmbajnë më shumë material nga ç’mund të diskutohet në klasë. Merrini në shqyrtim pikat vijuese kur e merrni vendimin se cila doktrinë dhe cilat parime janë më të rëndësishme për studentët tuaj që t’i mësojnë dhe zbatojnë:

• Nxitjet e Frymës së Shenjtë

• Synimi i autorit të frymëzuar

• Doktrina dhe parimet që kthejnë në besim

• Nevojat dhe aftësitë e studentëve tuaj

Shihni materialin filmik “Përgatitja e Mësimit: Vendosni se Cilat Parime të Vini në Pah” (05:07), të mundësuar në churchofjesuschrist.org. Në këtë material filmik, Motra Uillson paraqet se si ajo vendos se cila doktrinë dhe cilat parime janë më të rëndësishme për studentët e saj që t’i mësojnë dhe zbatojnë.

Kthehuni te shënimet tuaja të mësimit lidhur me Mosian 27 dhe bëni sa vijon:

1. Vendosni se cila nga doktrina dhe parimet që dalluat janë më të rëndësishme për studentët tuaj që t’i mësojnë dhe zbatojnë. Teksa e bëni këtë, merrni në shqyrtim sa vijon:

   • Nxitjet e Frymës së Shenjtë

   • Synimin e autorit të frymëzuar

   • Doktrinën dhe parimet që kthejnë në besim

   • Nevojat dhe aftësitë e studentëve tuaj

2. Në dokumentin tuaj, qarkoni ose vendosni një shenjë në anë të doktrinës dhe parimeve që keni vendosur se janë më të rëndësishme për studentët tuaj që t’i mësojnë dhe zbatojnë.

Faza 4: Vendosni Çfarë Niveli Theksimi t’i Jepni Secilit Segment të Bllokut të Shkrimit të Shenjtë

Pasi ta keni përcaktuar doktrinën dhe parimet që janë më të rëndësishme për studentët që t’i mësojnë dhe zbatojnë, hapi tjetër është të vendosni se cilave segmente të vargjeve të bllokut të shkrimit të shenjtë duhet t’i vihet më shumë theksim gjatë mësimit. Segmenteve që përmbajnë të vërtetat që i dalluat si më të rëndësishme, do t’u vihet në përgjithësi më shumë theksim.

Për t’ju ndihmuar të vendosni nivelin e theksimit që do t’i vini çdo segmenti të vargjeve, ju mund t’i bëni vetes disa nga pyetjet vijuese, të cilat përputhen me modelin e të nxënit. Në këtë segment të vargjeve, a do të planifikoj t’i ndihmoj studentët e mi:

• Të kuptojnë kontekstin dhe përmbajtjen?

• Të dallojnë doktrinën dhe parimet e rëndësishme?

• Të kuptojnë doktrinën dhe parimet?

• Të ndiejnë të vërtetën dhe rëndësinë e atyre doktrinave dhe parimeve?

• Të zbatojnë të vërtetat në jetën e tyre?

Shihni materialin filmik “Përgatitja e Mësimit: Përcaktoni Nivelin e Theksimit të Secilës Pjesë Vargjesh” (06:57), të mundësuar në churchofjesuschrist.org. Në këtë material filmik, Motra Uillson paraqet se si ajo e përdor modelin e të nxënit për të vendosur nivelin e theksimit që do t’i japë secilit segment të vargjeve në bllokun e shkrimit të shenjtë.

Kthehuni te shënimet tuaja të mësimit lidhur me Mosian 27 dhe përfundojini detyrat vijuese:

1. Teksa i shihni segmentet e vargjeve në dokumentin tuaj, merrni në shqyrtim se çfarë niveli theksimi do t’i vihet secilit segment, duke i bërë vetes pyetjet vijuese nga modeli i të nxënit. Në këtë segment të vargjeve, a do të planifikoj t’i ndihmoj studentët e mi:

   • Të kuptojnë kontekstin dhe përmbajtjen?

   • Të dallojnë doktrinën dhe parimet e rëndësishme?

   • Të kuptojnë doktrinën dhe parimet?

   • Të ndiejnë të vërtetën dhe rëndësinë e atyre doktrinave dhe parimeve?

   • Të zbatojnë të vërtetat në jetën e tyre?

2. Shkruajeni nivelin e theksimit që keni zgjedhur për secilin segment në shënimet e mësimit tuaj.

Përmbledhja dhe Zbatimi

Parime për t’u Mbajtur Mend

• Në kurset e seminarit dhe institutit që përqendrohen te veprat standarde, doktrina dhe parimet duhet të jepen mësim sipas radhës që shfaqen në shkrimet e shenjta.

• Kur të përgatitni një mësim, drejtpeshimi i asaj se çfarë të jepet mësim dhe si të jepet mësim, siguron një përvojë nxënieje më të fuqishme dhe më me qëllimshmëri.

• Kur të merrni vendimin se çfarë të jepni mësim:

  1. Thellohuni në shkrimet e shenjta për ta kuptuar kontekstin dhe përmbajtjen e bllokut të shkrimit të shenjtë.

  2. Dalloni dhe përpiquni të kuptoni doktrinën dhe parimet që gjenden në bllok.

  3. Vendosni se cila doktrinë dhe cilat parime janë më të rëndësishme për studentët tuaj që t’i mësojnë dhe zbatojnë.

  4. Vendosni se çfarë niveli theksimi t’i jepni secilit segment të bllokut të shkrimit të shenjtë.

“Përcaktoni, sipas aftësive dhe nevojave vetjake të studentëve tuaj se çfarë ka më shumë përparësi. Nëse një parim kyç kuptohet, përvetësohet dhe bëhet pjesë e librit udhërrëfyes të studentëve për jetën, atëherë synimi më i rëndësishëm është përmbushur” (Richard G. Scott, “To Understand and Live Truth” [një mbrëmje me Plakun Riçard G. Skot, 4 shkurt, 2005], f. 2–3, si.churchofjesuschrist.org).

“Pastaj, Çfarë?”

Për ta përfunduar këtë përvojë të të nxënit, hidhini në letër disa gjëra që do të bëni bazuar te parimet që keni mësuar sot.