Exodo 1–2

Masuso nga Moises

Pagpanalipod sa umaabut nga lider sa mga Israelihanon

Ang pamilya ni Jacob nahimong daghan kaayo sa Ehipto. Gitawag sila og mga Israelihanon. Si Paraon, ang hari sa Ehipto, nahadlok nga usa ka adlaw niana modaghan kaayo ang mga Israelihanon ug nga sila moilog sa Ehipto, busa gihimo niya ang mga Israelihanon nga iyang mga ulipon.

Exodo 1:7–14

Niana ang Paraon mimando nga ang tanang bag-ong natawo nga masuso nga Israelihanon kinahanglan nga patyon. Ang mga pamilyang Israelihanon nahadlok kaayo.

Exodo 1:15–22

Usa ka Israelihanon nga inahan nga gihinganlan og Jocabed naghunahuna og paagi sa pagluwas sa iyang bag-ong natawo nga anak nga lalaki. Gibutang niya ang iyang masuso nga bata sa usa ka basket ug gitago ang basket didto sa tag-as nga mga sagbut sa Suba Nile. Ang igsoong babaye sa masusong bata nga si Miriam mibantay kaniya aron siya magpabilin nga luwas.

Exodo 2:1–4

Samtang nangaligo sa suba, ang anak nga babaye ni Paraon nakadiskubre sa basket. Nakit-an niya ang makalolooy nga Israelihanon nga batang masuso nga naghilak ug gusto nga mopadako kaniya isip iyang kaugalingong anak. Miduol si Miriam ngadto sa anak nga babaye ni Paraon ug nangutana kon makadala ba siya og Israelihanon nga babaye nga moamuma sa masuso nga bata.

Exodo 2:5–6

Gidala ni Miriam ang iyang inahan, si Jocabed, ngadto sa anak nga babaye ni Paraon. Ang anak nga babaye ni Paraon miuyon sa pagbayad ni Jocabed sa pag-amuma alang sa masuso.

Exodo 2:8–9

Midako ang masuso nga batang Israelihanon. Gipadako siya sa anak nga babaye ni Paraon isip iyang kaugalingong anak nga lalaki. Iyang gihinganlan siya og Moises.

Exodo 2:10