“Ang Paglalang sa Yuta” Mga Istorya sa Daang Tugon (2022)
“Ang Paglalang sa Yuta,” Mga Istorya sa Daang Tugon
Genesis 1–2; Moises 1–3; Abraham 3–5
Ang Paglalang sa Yuta
Usa ka matahum nga panimalay alang sa mga anak sa Langitnong Amahan
Ang Dios nga atong Langitnong Amahan mipadayag sa plano sa kaluwasan didto sa langit. Tanan kita misinggit tungod sa kalipay! Kita makahimo sa pag-anhi sa yuta sa pagdawat og pisikal nga lawas. Samtang ania sa yuta, kita magkat-on sa pagsunod sa Anak sa Dios, si Ginoong Jesukristo. Gilalang sa Ginoo ang yuta nagsunod sa mga panudlo sa Dios.
Genesis 1:1; Job 38:4–7; Moises 1:32–33; 2:1; Abraham 3:22–27
Sa unang adlaw, gibulag sa Ginoo ang kahayag gikan sa kangitngit. Iyang gitawag ang kahayag og adlaw ug ang kangitngit gabii.
Genesis 1:3–5; Moises 2:3–5; Abraham 4:1–5
Sa ikaduha nga adlaw, gibahin niya ang mga katubigan tali sa mga panganod sa kalangitan ug ang mga lawod diha sa kayutaan.
Genesis 1:6–8; Moises 2:6–8; Abraham 4:6–8
Sa ikatulo nga adlaw, gibuhat sa Ginoo ang dagko nga mga lawod ug uga nga yuta. Iyang gihinganlan ang mga katubigan og dagat ug ang uga nga kayutaan og yuta. Gihimo niya ang yuta nga matahum nga may mga bulak, mga prutas, mga tanom, ug mga kahoy.
Genesis 1:9–13; Moises 2:9–13; Abraham 4:9–13
Sa ikaupat nga adlaw, gilalang Niya ang adlaw aron mohayag sa panahon sa adlaw. Dayon gilalang Niya ang bulan ug mga bitoon aron mohayag sa gabii.
Genesis 1:14–19; Moises 2:14–19; Abraham 4:14–19
Sa ikalima nga adlaw, gihimo sa Ginoo ang isda diha sa kadagatan ug ang mga langgam diha sa kalangitan. Gipanalanginan Niya ang mga binuhat sa pagsanay ug gipanalanginan ang isda nga mopuno sa mga katubigan.
Genesis 1:20–23; Moises 2:20–23; Abraham 4:20–23
Sa ikaunom nga adlaw, gilalang Niya ang mga hayop diha sa yuta, pipila ang molakaw ug pipila ang mokamang.
Genesis 1:24–25; Moises 2:24–25; Abraham 4:24–25
Ang Langitnong Amahan ug ang Ginoo nanaog sa yuta sa ikaunom nga adlaw. Lalaki og babaye gilalang diha sa panagway sa Dios. Gisultihan sila sa Langitnong Amahan sa pag-amuma sa usag usa ug sa pagbaton og mga anak. Ang lalaki ug babaye gisaligan usab sa pag-amuma sa yuta ug sa mga hayop.
Genesis 1:26–27; Moises 2:26–27; Abraham 4:26–31; 5:7–8
Nalipay ang Langitnong Amahan sa tanan nga Ilang gilalang. Sa ikapito nga adlaw, Sila mipahulay gikan sa tanan nga Ilang buhat. Ang yuta matahum ug puno sa kinabuhi.