“Samuel ang Propeta,” Mga Istorya sa Daang Tugon (2022)
“Samuel ang Propeta,” Mga Istorya sa Daang Tugon
1 Samuel 2–3
Samuel ang Propeta
Usa ka batang lalaki gitawag sa Ginoo
Sulod sa dugay na nga panahon, ang mga Israelihanon walay propeta sa Ginoo nga mogiya kanila. Hinoon, ang mga maghuhukom mimando sa Israel sulod sa daghang mga katuigan. Atol niini nga panahon, si Ana midala sa iyang batan-ong anak nga lalaki nga si Samuel sa pagpuyo uban ni Eli, ang pari ug maghuhukom sa Israel. Mitabang si Samuel ni Eli diha sa templo.
Ang duha ka anak nga mga lalaki ni Eli miserbisyo usab sa templo, apan ilang gikawat ang mga halad nga alang sa Ginoo. Pipila sa mga tawo misumbong ngadto ni Eli, apan si Eli wala mosilot kanila.
Usa ka gabii niana si Samuel nakadungog og usa ka tingog nga nagtawag kaniya. Kaingon niya og si Eli kadto, busa miadto si Samuel ngadto kaniya. Apan wala mitawag si Eli kaniya. Gisugo ni Eli si Samuel sa pagbalik og katulog.
Nadungog ni Samuel ang tingog nga nagtawag kaniya sa ikaduhang higayon. Miadto siya ni Eli ug nangutana unsay iyang tuyo. Apan wala mitawag si Eli kaniya. Gisugo ni Eli si Samuel sa pagkatulog.
Nadungog ni Samuel ang tingog nga nagtawag kaniya sa ikatulo nga higayon. Miadto siya ni Eli pag-usab ug nangutana unsay iyang tuyo. Niining higayona, nahibalo si Eli nga ang Ginoo mao kinsa ang nagsulti ngadto ni Samuel. Gisugo ni Eli si Samuel sa pagbalik og katulog. Miingon si Eli nga kon ang Ginoo motawag pag-usab, kinahanglan si Samuel nga maminaw.
Nadungog ni Samuel ang tingog nga nagtawag kaniya pag-usab. Niini nga panahon mihangyo si Samuel sa Ginoo sa pagsulti ug miingon nga siya maminaw. Ang Ginoo misulti ni Samuel nga sayop alang ni Eli ang pagtugot sa iyang dautang anak nga mga lalaki sa pagserbisyo diha sa templo. Ang pamilya ni Eli dili tugutan sa pagserbisyo pa didto.
Sa pagkasunod adlaw, si Eli nangutana ni Samuel kon unsay gisulti sa Ginoo. Gisultihan siya ni Samuel. Nahibalo si Eli nga ang Ginoo namulong pinaagi ni Samuel.
Ang balita miabut sa tibuok yuta sa Israel. Ang mga katawhan nahibalo nga ang Ginoo mipili ni Samuel nga mahimong Iyang propeta.