“Elias ug ang mga Pari ni Baal,” Mga Istorya sa Daang Tugon (2022)
“Elias ug ang mga Pari ni Baal ” Mga Istorya sa Daang Tugon
1 Mga Hari 18
Elias ug ang mga Pari ni Baal
Ang propeta sa Ginoo batok sa mini nga mga pari
Ang gingharian sa Israel mipadayon sa pag-antus gikan sa pagkawalay tubig. Gisultihan ni Hari Achab ang mga katawhan sa pagsunod sa usa ka mini nga dios nga gihinganlan og Baal.
Gipadala sa Ginoo si Elias ang propeta sa pagpakigkita ni Achab. Gidapit ni Elias ang tanang mga katawhan ngadto sa tumoy sa usa ka bukid. Gidapit niya ang hari ug ang iyang mga pari sa usa ka hagit aron mahibaloan kon ang Ginoo o si Baal ba ang tinuod nga Dios.
Gipasabut ni Elias ang hagit. Siya ug ang mga pari mosakripisyo og usa ka laki nga baka diha sa usa ka altar, apan dili sila mismo ang mopasiga sa kalayo. Hinoon, ang mga pari moampo ngadto ni Baal sa pagpasiga sa kalayo. Dayon si Elias moampo ngadto sa Ginoo sa pagpasiga sa kalayo. Nahibalo si Elias nga ang tinuod lamang nga Dios ang makapasiga sa kalayo.
Ang mga pari ni Baal nag-ampo ngadto sa ilang dios gikan sa buntag hangtud sa udto, apan walay nahitabo. Mitiaw-tiaw si Elias ngadto kanila ug miingon nga ang ilang dios tingali natulog.
Ang mga pari nahimong nasuko, giluksoan ang altar, ug misinggit hangtud sa kagabhion. Milaum sila sa ilang dios nga motubag, apan sa gihapon walay kalayo.
Dayon turno na ni Elias. Mitukod siya og altar ngadto sa Ginoo, mikalot og kanal libut sa altar, ug giandam ang sakripisyo.
Mihangyo si Elias sa mga katawhan sa pagpuno sa upat ka mga tadyaw sa tubig ug sa pagbu-bu niini ngadto sa kahoy sa iyang altar sa makatulo ka mga higayon. Ang tubig mituhop sa kahoy ug sa altar. Mipuno kini sa tibuok kanal.
Giampo ni Elias ngadto sa Ginoo nga ipakita ang tinuod nga gahum sa Dios. Ang kalayo sa Ginoo nanaog ug giugdaw ang sakripisyo, kahoy, mga bato, ug tubig. Nahibalo ang mga katawhan nga ang Dios ni Elias mao ang tinuod nga Dios. Giampo ni Elias nga ang huwaw matapos, ug mipadala ang Ginoo og ulan.