“Jonas ang Propeta,” Mga Istorya sa Daang Tugon (2021)
“Jonas ang Propeta,” Mga Istorya sa Daang Tugon
Jonas 1–4
Jonas ang Propeta
Pagkat-on nga mosalig sa kalooy sa Ginoo
Si Jonas usa ka propeta. Giingnan siya sa Ginoo nga pasidan-an ang katawhan sa Ninive nga ang ilang siyudad pagahugnoon kon sila dili maghinulsol.
Apan ang katawhan sa Ninive mga kaaway sa mga Israelita. Si Jonas dili gusto nga mosangyaw ngadto kanila. Mao nga misakay siya sa usa ka barko aron sa paglawig palayo gikan sa Ninive.
Samtang si Jonas diha sa barko, usa ka dakong unos ang miabot. Ang mga lalaki diha sa barko nangahadlok alang sa ilang kinabuhi. Gihangyo nila si Jonas sa pag-ampo sa Ginoo sa pagluwas kanila.
Nahibalo si Jonas nga ang Ginoo mipadala sa unos tungod kay siya mipalayo gikan sa unsay gisugo sa Ginoo kaniya nga buhaton. Gusto ni Jonas nga luwason ang katawhan diha sa barko. Miingon siya nga kon sila motambog kaniya ngadto sa dagat, ang unos mohunong.
Ang mga lalaki dili gustong motambog ni Jonas ngadto sa tubig. Gisulayan nila sa pagbugsay ang dakong sakayan paduol sa yuta, apan ang unos kusog kaayo. Sa kataposan, ilang gitambog si Jonas ngadto sa dagat.
Ang unos mihunong. Apan si Jonas gilamoy sa dakong isda.
Si Jonas didto sa sulod sa tiyan sa isda sulod sa tulo ka adlaw ug tulo ka gabii. Niana nga panahon, si Jonas nag-ampo ug naghinulsol. Gusto niyang buhaton ang unsay matarong ug maminaw sa Ginoo. Gidungog sa Ginoo ang mga pag-ampo ni Jonas ug gipaluwa sa isda si Jonas ngadto sa uga nga yuta.
Giingnan na usab sa Ginoo si Jonas sa pagsangyaw ngadto sa katawhan sa Ninive. Niining higayona mituman si Jonas. Miadto siya sa Ninive ug giingnan ang katawhan sa paghinulsol o hugnoon sa Ginoo ang ilang siyudad. Ang hari ug ang iyang katawhan naghinusol. Gipasaylo sila sa Ginoo ug wala hugnoa ang Ninive.
Apan si Jonas nasagmuyo nga ang katawhan wala malaglag. Wala siya magtuo nga sila angay nga pasayloon.
Aron sa pagtudlo ni Jonas og usa ka leksiyon, ang Ginoo mipatubo og tanom aron malandongan si Jonas gikan sa adlaw. Dayon ang tanom namatay, ug si Jonas gibati og kaguol alang sa tanom.
Ang Ginoo nagtudlo ni Jonas og usa ka leksiyon mahitungod sa Iyang mga anak. Nakakat-on si Jonas nga siya maguol gayod kon ang katawhan dili maghinulsol ug nga siya malipay gayod kon sila maghinulsol.