Puas muaj ib tug Vajtswv uas hlub kuv? Kuv yuav ua li cas kom paub tias Nws hlub kuv?
Kuv yuav ua li cas kom ntseeg Vajtswv thaum muaj ntau yam xwm txheej phem?
Vim li cas lub neej no nyuaj heev? Kuv yuav ua li cas kom muaj zog txaus thaum raug xwm txheej li no?
Kuv yuav ua li cas kom ua ib tug neeg zoo dua?
Yuav muaj li cas tom qab kuv tso lub ntiaj teb no tseg?
Yexus Khetos txoj moo zoo pab peb teb tej lus nug ntawm sab siab ntsws. Los ntawm txoj moo zoo, peb kawm tias peb yog neeg uas los saum ntuj ceeb tsheej los thiab peb muaj peev xwm los ua neeg zoo li Vajtswv vim peb yog Nws cov me nyuam. Txoj moo zoo ua rau peb muaj kev cia siab thiab pab peb nrhiav tau kev kaj siab lug, kev zoo siab, thiab lub hom phiaj ntawm peb lub neej. Kev ua raws li txoj moo zoo pab peb loj hlob tuaj thiab muaj zog thaum peb sim kov yeej tej teeb meem hauv lub neej no.
Vajtswv xav kom Nws cov me nyuam tau tej yam zoo thiab xav kom muab Nws cov koob hmoov zoo tshaj plaws rau peb, uas yog txoj kev tsis txawj tuag thiab txoj sia nyob mus ib txhis (saib Mauxes 1:39; Lus Qhuab Qhia thiab Kev Khi Lus 14:7). Vim Nws hlub peb, Nws twb tau npaj ib txoj hau kev rau peb kom txais tau cov koob hmoov ntawd. Nyob hauv cov vaj lug kub, txoj hau kev no hu ua txoj hau kev cawm seej, txoj hau kev zoo siab, thiab txoj hau kev txhiv dim (saib Amas 42:5, 8, 11, 13, 15, 16, 31).
Nyob hauv Vajtswv txoj hau kev, peb txhua tus tau muaj lub neej ua ntej yug los, peb yug los, peb nyob hauv lub ntiaj teb no, ceb peb yuav tuag, thiab muaj lub neej tom qab kev tuag thiab. Vajtswv tau npaj txhua yam uas peb yuav tsum muaj hauv lub neej no kom tom qab peb tuag, peb yuav rov qab mus cuag Nws thiab txais kev xyiv fab puv npo.
Yexus Khetos yeej tseem ceeb rau Vajtswv txoj hau kev. Dhau los ntawm Nws txoj Kev Theej Txhoj, Yexus ua rau peb txais tau txoj kev tsis txawj tuag thiab txoj sia nyob mus ib txhis.
Nyob hauv peb lub neej hauv lub ntiaj teb no, peb tsis nco qab peb lub neej ua ntej yug los. Peb kuj tsis to taub tag nrho txog lub neej tom qab kev tuag. Tiam sis, Vajtswv tau qhia tej lus tseeb ntau heev txog ob qho no ntawm peb lub neej mus ib txhis li. Tej lus tseeb no ua rau peb paub txaus kom to taub lub hom phiaj ntawm lub neej no, kom peb muaj kev xyiv fab, thiab muaj kev cia siab txog tej yam zoo uas yuav muaj thaum yav tom ntej. Qhov uas peb paub li no yog ib qho uas muaj nqis heev vim yuav pab peb paub ua li cas nyob hauv lub ntiaj teb no.
Tej lub Tswv Yim rau Kev Qhia
Feem no muab ib tug txheej txheem qhia rau koj kom pab koj npaj qhia. Kuj muaj tej lus nug thiab tej lus caw uas koj hais tau.
Thaum koj npaj qhia, thov Vajtswv kom xav txog txhua tus neeg tej xwm txheej thiab tej kev xav tau ntawm sab ntsuj plig. Txiav txim siab tias koj yuav qhia dab tsi kom pab zoo tshaj. Cia li npaj siab txhais tej lo lus uas tib neeg yuav tsis to taub. Npaj raws li lub sij hawm uas muaj, thiab nco ntsoov kom tsis txhob qhia ntev dhau.
Xav seb koj yuav nug tej lus twg thaum koj qhia. Npaj siab caw txhua tus neeg kom lawv ua tej yam.
Qhia txog cov koob hmoov uas Vajtswv tau cog lus tseg, thiab hais lus tim khawv txog tej yam uas koj qhia.
Daim Duab
ob tug tub txib qhia ib tsev neeg
Tej Yam uas Koj Qhia Tau Tib Neeg Thaum Muaj 15–25 Feeb
Xaiv ib los sis ob peb lub ntsiab cai txog txoj hau kev cawm seej kom qhia rau lawv. Cov lus qhuab qhia lub hauv paus rau txhua lub ntsiab cai los muaj nyob hauv tus txheej txheem qhia no.
Lub Neej Ua Ntej Yug Los: Vajtswv lub Hom Phiaj thiab txoj Hau Kev rau Peb
Peb txhua tus yog Vajtswv cov me nyuam ntsuj plig. Nws tau tsim peb kom muaj yam ntxwv zoo li Nws.
Peb tau nrog Vajtswv nyob ua ntej peb yug los hauv lub ntiaj teb no. Peb yog Nws tsev neeg. Nws paub thiab hlub peb txhua tus.
Vajtswv tau npaj ib txoj hau kev kom peb zoo siab thiab hloov los ua zoo zuj zus nyob hauv lub neej no thiab nyob mus ib txhis li.
Nyob hauv lub neej ua ntej yug los, peb tau xaiv kom coj raws li Vajtswv txoj hau kev. Peb yuav tsum los rau hauv lub ntiaj teb no peb thiaj li yuav nce ib theem mus tom ntej kom txais tau txoj sia nyob mus ib txhis li.
Yexus Khetos yeej tseem ceeb rau Vajtswv txoj hau kev. Nws qhib kev rau peb txais tau txoj kev tsis txawj tuag thiab txoj sia nyob mus ib txhis.
Kev Tsim Ntiaj Teb
Raws li Vajtswv qhia, Yexus Khetos tau tsim lub ntiaj teb.
Adas thiab Evas txoj Kev Poob
Adas thiab Evas yog thawj ob tug ntawm Vajtswv cov me nyuam ntsuj plig uas tau los rau hauv lub ntiaj teb. Vajtswv tau tsim nkawd lub cev thiab tso nkawd hauv lub Vaj Edees.
Adas thiab Evas ua txhaum, raug ntiab tawm ntawm lub vaj mus, thiab tsis nrog Vajtswv nyob ntxiv lawm. Qhov no hu ua txoj Kev Poob.
Tom qab txoj Kev Poob, Adas thiab Evas txawj tuag. Vim nkawd txawj tuag, nkawd muaj sij hawm kawm, ua zoo zuj zus, thiab muaj me nyuam. Nkawd kuj yuav raug kev tu siab, kev txhaum, thiab kev tuag.
Txoj Kev Poob yeej yog ib qho uas pab tau tib neeg. Txoj Kev Poob twb qhib kev rau peb yug los hauv lub ntiaj teb no thiab ua tau zoo zuj zus hauv Leej Txiv Saum Ntuj Ceeb Tsheej txoj hau kev.
Peb lub Neej hauv Ntiaj Teb
Nyob hauv Vajtswv txoj hau kev, peb yuav tsum los rau hauv lub ntiaj teb kom txais tau lub cev nqaij daim tawv, kawm, thiab hloov los ua neeg zoo.
Nyob hauv lub ntiaj teb, peb kawm kom taug kev los ntawm kev ntseeg. Tiam sis, Leej Txiv Saum Ntuj Ceeb Tsheej tsis tau tso peb tseg kom nyob ib leeg xwb. Nws tau npaj ntau yam txiaj ntsim thiab tej yam kom pab coj peb rov qab mus cuag Nws.
Yexus Khetos txoj Kev Theej Txhoj
Peb txhua tus ua txhaum, thiab peb txhua tus yuav tuag. Vim Vajtswv hlub peb, Nws tau txib Nws Leej Tub, Yexus Khetos, los rau hauv lub ntiaj teb kom txhiv peb dim kev txhaum thiab kev tuag.
Vim Yexus tau theej peb lub txhoj, ces Nws ntxuav peb tej kev txhaum mus thiab yuav zam txim rau peb. Peb lub siab yuav xav ua zoo thaum peb hloov siab lees txim. Qhov no qhib kev rau peb rov qab mus cuag Vajtswv thiab txais kev xyiv fab tag nrho.
Vim Yexus tau Sawv Rov Los, peb txhua tus yuav sawv rov los tom qab peb tuag. Qhov no txhais hais tias txhua tus neeg tus ntsuj plig thiab lub cev yuav rov qab los koom ua ke, thiab peb txhua tus yuav muaj ib lub cev zoo tag nrho uas tau sawv rov los nyob mus ib txhis li.
Tom qab peb siv sij hawm hauv lub ntuj ntsuj plig, ces peb yuav nce ib theem ntxiv thaum peb Sawv Rov Los.
Kev Sawv Rov Los yog qhov uas peb tus ntsuj plig rov qab los koom peb lub cev. Peb txhua tus yuav sawv rov los thiab muaj ib lub cev nqaij daim tawv zoo tag nrho. Peb yuav ua neej tas mus li. Muaj li no vim tus Cawm Seej tau theej peb lub txhoj thiab sawv rov los.
Txawm yog peb sawv daws yuav sawv rov los, los peb yeej tsis tau txais yeeb koob nyob mus ib txhis zoo ib yam. Yexus yuav txiav txim rau peb raws li peb txoj kev ntseeg, peb tej hauj lwm, thiab txoj kev hloov siab lees txim nyob hauv lub neej no thiab nyob hauv lub ntuj ntsuj plig. Peb yuav rov qab mus nyob hauv Vajtswv xub ntiag yog peb rau siab ntseeg.
Tej Lus Nug uas Zoo Nug Tib Neeg
Tej lus nug no yog piv txwv txog tej yam uas koj nug tau neeg. Tej lus nug no pab tau koj nrog lwm tus sib tham thiab to taub ib tug neeg xav tau dab tsi thiab xav li cas.
Koj xav tias lub hom phiaj ntawm lub neej no yog dab tsi?
Muaj dab tsi uas ua rau koj zoo siab?
Koj muaj teeb meem dab tsi uas koj xav tau Vajtswv pab koj?
Koj tau kawm dab tsi los ntawm tej teeb meem uas koj raug?
Koj paub dab tsi txog Yexus Khetos? Nws lub neej thiab txoj hauj lwm tau hloov koj lub neej li cas?
Koj puas kam peb teem sij hawm rau wb rov qab tuaj xyuas koj?
Daim Duab
daim duab txog txoj hau kev cawm seej
Cov Lus Qhuab Qhia lub Hauv Paus
Feem no muaj cov lus qhuab qhia thiab tej nqe vaj lug kub rau koj kawm kom txhawb nqa koj txoj kev txawj ntse thiab zaj lus tim khawv txog txoj moo zoo thiab pab koj qhia.
Daim Duab
pawg hnub qub
Lub Neej Ua Ntej Yug Los: Vajtswv lub Hom Phiaj thiab txoj Hau Kev rau Peb
Peb Yog Vajtswv cov Me Nyuam thiab Peb Tau Nrog Nws Nyob Ua Ntej Peb Yug Los
Vajtswv yog Leej Txiv ntawm peb sab ntsuj plig. Peb yog Nws cov me nyuam tiag, Nws tau tsim peb kom muaj yam ntxwv zoo li Nws. Peb txhua tus muaj peev xwm ua neeg zoo li Vajtswv vim peb yog Nws cov me nyuam. Qhov uas peb paub li no yuav pab peb nyiaj mus dhau tej lub sij hawm nyuaj thiab tshoov peb lub siab kom xav ua neeg zoo.
Peb tau nrog Vajtswv nyob ua ntej peb yug los hauv lub ntiaj teb no. Peb yog Nws tsev neeg.
Daim Duab
Thawj Tswj Hwm M. Russell Ballard
“Muaj ib qho tseem ceeb uas qhia tias peb yog leej twg tam sim no thiab mus ib txhis li, peb yeej yuav tsum nco ntsoov qho no, thiab ua Vajtswv tsaug rau qhov no. Qhov no yog qhov koj yeej yog Vajtswv ib tug tub los sis ib tug ntxhais uas muaj ib sab ntsuj plig uas nyob mus ib txhis li.
“… Qhov uas yus paub qhov tseeb no—to taub tiag thiab ntseeg huv tib si—yeej hloov yus lub neej. Ua rau yus paub tias yus yog leej twg es tsis muaj leej twg uas tshem tau qhov tseeb no mus. Tiam sis tsis tas li ntawd, qhov no ua rau yus paub tias yus yeej yuav muaj nqis heev. Qhov kawg, qhov no ua rau yus muaj ib lub hom phiaj tseem ceeb thiab tsim nyog hauv lub neej no uas los ntawm Vajtswv los” (M. Russell Ballard, “Children of Heavenly Father” [Brigham Young University kev sib ntsib hawm Vajtswv, Peb Hlis Ntuj 3, 2020], 2, speeches.byu.edu).
Peb Tau Xaiv Los rau hauv lub Ntiaj Teb No
Peb Leej Txiv Saum Ntuj Ceeb Tsheej hlub peb thiab xav kom peb hloov los ua neeg zoo li Nws. Nws yog ib tug neeg uas tau txais kev tsa nto uas muaj ib lub cev nqaij daim tawv uas muaj yeeb koob.
Nyob hauv lub neej ua ntej yug los, peb tau kawm tias Vajtswv muaj ib txoj hau kev uas Nws npaj kom peb hloov los ua neeg zoo li Nws. Nws txoj hau kev qhia tias peb yuav tawm peb qhov chaw nyob saum ntuj ceeb tsheej los rau hauv lub ntiaj teb kom txais tej lub cev nqaij daim tawv. Peb kuj yuav tsum kawm ua neej thiab muaj kev ntseeg nyob rau lub sij hawm uas peb tsis nrog Vajtswv nyob. Peb yuav tsis nco qab txog peb lub neej nrog Vajtswv. Tiam sis, Nws yuav muab tej yam uas peb xav tau kom peb rov qab mus cuag Nws.
Kev ywj siab xaiv yog ib yam tseem ceeb ntawm Vajtswv txoj hau kev rau peb. Nyob hauv lub neej ua ntej yug los, peb txhua tus tau xaiv kom coj raws li Vajtswv txoj hau kev thiab los rau hauv lub ntiaj teb peb thiaj li yuav ua tau zoo zuj zus mus tom ntej kom txais tau txoj sia nyob mus ib txhis. Peb to taub tias thaum peb nyob no, peb yuav muaj tej lub cib fim tshiab kom loj tuaj thiab muaj kev xyiv fab. Peb kuj tau to taub tias peb yuav raug kev tawm tsam. Peb yuav raug kev ntxias, kev sim siab, kev tu siab, thiab kev tuag.
Thaum peb xaiv los rau hauv lub ntiaj teb, peb tau tso siab rau Vajtswv txoj kev hlub thiab txoj kev pab. Peb tau tso siab rau Nws txoj hau kev kom peb txais kev cawm seej.
Leej Txiv Saum Ntuj Ceeb Tsheej Tau Xaiv Yexus Khetos Los Txhiv Peb Dim
Yexus Khetos yeej tseem ceeb rau Vajtswv txoj hau kev. Ua ntej peb tau los rau hauv lub ntiaj teb, peb paub tias peb yuav tsis muaj peev xwm rov qab mus cuag Vajtswv nyob peb tus kheej xwb. Leej Txiv Saum Ntuj Ceeb Tsheej tau xaiv Yexus Khetos, Nws thawj tus Tub, kom peb thiaj li yuav rov qab mus cuag Nws, thiab muaj txoj sia nyob mus ib txhis li.
Yexus txaus siab ua txoj hauj lwm no. Nws pom zoo los rau hauv lub ntiaj teb no thiab txhiv peb dim thaum Nws theej peb lub txhoj. Nws txoj Kev Theej Txhoj thiab Kev Sawv Rov Los yuav ua kom muaj raws li Vajtswv tej lub hom phiaj.
Phau Qhia Kev Coj lub Koom Txoos, 1.1: “Vajtswv Txoj Hau Kev Zoo Siab”
Txoj Moo Zoo tej Ntsiab Lus: “Lub Neej Ua Ntej Yug Los,” “Txoj Hau Kev Cawm Seej”
Daim Duab
hnub poob ntawm dej hiav txwv
Kev Tsim Ntiaj Teb
Nyob hauv Leej Txiv Saum Ntuj Ceeb Tsheej txoj hau kev, yuav tsim lub ntiaj teb, nyob ntawd Nws cov me nyuam ntsuj plig yuav txais lub cev nqaij daim tawv thiab kawm los ntawm lub neej no. Peb yuav tsum ua neej hauv lub ntiaj teb kom hloov los ua neeg zoo li Vajtswv zuj zus.
Raws li Leej Txiv Saum Ntuj Ceeb Tsheej qhia, Yexus Khetos tau tsim lub ntiaj teb thiab tag nrho txhua yam uas muaj sia. Ces Leej Txiv Saum Ntuj Ceeb Tsheej tau tsim txiv neej thiab poj niam kom muaj raws li Nws tus yam ntxwv. Kev Tsim lub Ntiaj Teb yeej qhia tias Vajtswv hlub peb thiab Nws xav kom peb muaj cib fim kawm.
Tawm hauv lub Vaj Edees Mus, los ntawm Joseph Brickey
Adas thiab Evas txoj Kev Poob
Ua Ntej txoj Kev Poob
Adas thiab Evas yog thawj ob tug ntawm Leej Txiv Saum Ntuj Ceeb Tsheej cov me nyuam ntsuj plig uas tau los rau hauv lub ntiaj teb. Vajtswv tau tsim nkawd lub cev nqaij daim tawv raws li Nws tus yam ntxwv thiab tso nkawd hauv lub Vaj Edees. Nyob hauv lub vaj nkawd tsis muaj txim, thiab Vajtswv tau pub nkawd noj pub nkawd haus.
Thaum Adas thiab Evas nyob hauv lub vaj, Vajtswv tau txib nkawd tsis txhob noj cov txiv ntawm tsob ntoo ntawm kev paub qhov zoo thiab qhov phem. Yog tias nkawd ua raws li txoj lus txib no, ces nkawd yuav nyob hauv lub vaj tas mus li xwb. Tiam sis, nkawd yuav kawm tsis tau kom ua zoo zuj zus dhau los ntawm tej kev tawm tsam thiab tej teeb meem nyob rau hauv lub neej hauv ntiaj teb no. Nkawd yuav tsis paub kev xyiv fab vim tias nkawd yuav tsis paub kev tu siab thiab kev mob kev nkees.
Dab Ntxwg Nyoog tau ntxias Adas thiab Evas kom noj cov txiv uas txwv tsis pub noj, thiab nkawd tau xaiv ua li ntawd. Vim tias nkawd xaiv li no, nkawd raug ntiab tawm hauv lub vaj mus thiab tsis nrog Vajtswv nyob ntxiv lawm. Qhov no hu ua txoj Kev Poob.
Tom Qab txoj Kev Poob
Tom qab txoj Kev Poob, Adas thiab Evas txawj tuag. Vim nkawd muaj txim lawm, nkawd to taub thiab paub txog qhov zoo thiab qhov phem. Nkawd txawj siv nkawd txoj kev ywj siab xaiv. Vim Adas thiab Evas raug qhov fab ntxeev thiab tej teeb meem, nkawd kawm tau ua zoo thiab. Vim nkawd paub kev tu siab, nkawd kuj paub kev xyiv fab. (Saib 2 Nifais 2:22–25.)
Txawm yog nkawd raug tej kev nyuaj siab los, Adas thiab Evas xav tias kev ua neej yeej yog ib txoj koob hmoov zoo kawg. Ib txoj koob hmoov yog qhov uas nkawd muaj taus me nyuam. Qhov no twb qhib kev rau Vajtswv cov me nyuam ntsuj plig los rau hauv lub ntiaj teb thiab txais lub cev nqaij daim tawv.
Hais txog txoj koob hmoov uas yog txoj Kev Poob, Adas thiab Evas zoo siab kawg. Evas hais tias, “Yog hais tias wb tsis tau ua txhaum ces wb twb yuav tsis muaj tub ki, thiab yuav tsis paub qhov zoo thiab qhov phem, thiab txoj kev xyiv fab ntawm wb txoj kev txhiv dim, thiab txoj sia nyob mus ib txhis uas Vajtswv muab rau txhua tus uas mloog lus” (Mauxes 5:11; kuj saib nqe 10).
Txoj Moo Zoo tej Ntsiab Lus: “Adas thiab Evas txoj Kev Poob,” “Kev Ywj Siab thiab Kev Lav Ris”
Peb lub Neej hauv Ntiaj Teb
Neeg coob xav seb, “Vim li cas kuv nyob hauv lub ntiaj teb no?” Peb lub neej hauv lub ntiaj teb no yog ib qho tseem ceeb ntawm Vajtswv txoj hau kev kom peb ua tau zoo zuj zus mus ib txhis li. Peb lub hom phiaj yog kev npaj rov qab mus cuag Vajtswv thiab txais kev xyiv fab puv npo. Nov yog tej yam uas peb lub neej hauv lub ntiaj teb npaj peb rau qhov no.
Daim Duab
me nyuam tub luag nyav
Txais lub Cev Nqaij Daim Tawv
Ib lub hom phiaj rau peb txoj kev los nyob hauv lub ntiaj teb no yog kev txais ib lub cev nqaij daim tawv rau peb sab ntsuj plig nyob. Peb lub cev yeej yog ib yam dawb huv uas Vajtswv tau tsim. Thaum peb muaj cev nqaij daim tawv, peb ua thiab kawm ntau yam uas peb sab ntsuj plig ua thiab kawm tsis taus. Peb ua tau zoo zuj zus ua tej yam uas ua tsis taus yog peb yog ntsuj plig xwb.
Vim peb lub cev nqaij daim tawv txawj tuag, peb muaj kev mob kev nkees thiab lwm yam kev sim siab. Tej yam no yuav pab peb kawm ua siab ntev, hlub lwm tus, thiab lwm yam cwj pwm uas Vajtswv muaj. Tej no yuav pab peb muaj kev xyiv fab. Qhov uas peb xaiv ua ncaj ncees thaum nyuaj ua li ntawd yeej yog qhov uas peb peb muaj kev ntseeg, kev cia siab, thiab kev siab hlub.
Kawm Muaj Tswv Yim Siv Kev Ywj Saib Xaiv
Ib lub hom phiaj ntawm lub neej no yog kev kawm muaj tswv yim siv peb txoj kev ywj siab xaiv—xaiv kev ncaj ncees. Peb yuav tsum kawm muaj tswv yim siv peb txoj kev ywj siab xaiv kom hloov los ua neeg zoo li Vajtswv.
Leej Txiv Saum Ntuj Ceeb Tsheej thiab Yexus Khetos qhia peb txog qhov yog thiab muab cov lus txib rau peb kom peb zoo siab. Dab Ntxwg Nyoog ntxias peb kom ua txhaum, vim nws xav kom peb nyuaj siab npaum li nws. Peb raug tej yam kom xaiv qhov zoo los sis qhov phem, es yeej yuav tsum muaj li no kom kawm siv peb txoj kev ywj siab xaiv (saib 2 Nifais 2:11).
Thaum peb mloog Vajtswv lus, peb kawm ua zoo thiab txais Nws cov koob hmoov raws li Nws tau cog lus tseg lawm. Thaum peb tsis mloog lus, peb tsis muab siab npuab Nws thiab peb raug lub txim ntawm peb txoj kev txhaum. Kev txhaum yeej yuav ua rau tib neeg tsis zoo siab, txawm yog tej lub sij hawm peb xav tias tsis zoo li no los yog. Feem ntau cov koob hmoov uas los ntawm kev mloog lus—thiab tej yam uas raug vim ua txhaum—los peb tsis pom thaum xub thawj los sis tsis pom nyob sab nraud. Tiam sis yeej yuav raug tej yam ntawd, vim Vajtswv yog ib tug uas ncaj.
Txawm yog peb sim ua zoo npaum li cas peb ua tau, peb txhua tus ua txhaum thiab “tsis tau Vajtswv lub yeeb koob” (Loos 3:23). Vim Nws paub qhov no, Leej Txiv Saum Ntuj Ceeb Tsheej tau npaj ib txoj kev rau peb hloov siab lees txim kom peb yuav rov qab mus nrog Nws nyob.
Ib lub hom phiaj ntxiv ntawm lub neej no yog kev kawm tej yam uas peb tsuas kawm tau thaum peb tsis nrog Leej Txiv Saum Ntuj Ceeb Tsheej nyob. Vim peb tsis pom Nws, peb yuav tsum kawm taug kev raws li kev ntseeg (saib 2 Kauleethaus 5:6–7).
Vajtswv tsis tau tso peb tseg hauv lub neej no. Nws tau muab tus Vaj Ntsuj Plig Dawb Huv rau peb kom coj peb kev, txhawb nqa peb thiab peb pab hloov los ua neeg dawb huv. Nws tau muab cov vaj lug kub, cov yaj saub, kev thov Vajtswv, thiab Yexus Khetos txoj moo zoo rau peb.
Txhua yam hauv peb lub neej no—kev xyiv fab thiab kev tu siab, tej yam peb ua zoo thiab tej yam uas ua yuam kev—yuav pab peb hloov los ua neeg zoo thaum peb npaj rov qab mus cuag Vajtswv.
Txoj Moo Zoo tej Ntsiab Lus: “Txawj Tuag,” “Nyuaj Siab”
Yexus Khetos txoj Kev Theej Txhoj
Los ntawm Adas thiab Evas txoj Kev Poob, peb txhua tus ua txhaum thiab yuav tuag. Peb kov tsis yeej kev txhaum thiab kev tuag peb tus kheej xwb. Nyob hauv Leej Txiv Saum Ntuj Ceeb Tsheej txoj hau kev cawm seej, Nws tau npaj ib txoj kev kom kov yeej txoj Kev Poob peb thiaj li yuav rov qab mus cuag Nws. Ua ntej tau tsim lub ntiaj teb, Nws tau xaiv Yexus Khetos los ua peb tus Cawm Seej thiab tus Txhiv Dim.
Tsuas yog Yexus Khetos xwb muaj hwj chim txhiv peb dim kev txhaum thiab kev tuag. Nws yog Vajtswv Leej Tub tiag. Nws tsis tau ua txhaum hlo li, Nws mloog Vajtswv lus ua txhua yam. Nws tau npaj siab thiab txaus siab ua raws li Leej Txiv Saum Ntuj Ceeb Tsheej lub siab nyiam.
Tus Cawm Seej txoj Kev Theej Txhoj yog qhov uas Nws raug txom nyem hauv lub Vaj Khexemanes, Nws txoj kev raug txom nyem thiab kev tuag saum tus ntoo khaub lig, thiab Nws txoj Kev Sawv Rov Los. Nws twb raug txom nyem loj tshaj qhov to taub—ua rau Nws los ntshav ntawm txhua lub qhov hws (saib Lus Qhuab Qhia thiab Kev Khi Lus 19:18).
Yexus Khetos txoj Kev Theej Txhoj yog lub sij hawm zoo kawg nkaus nyob hauv tag nrho tib neeg zaj keeb kwm. Dhau los ntawm Nws txoj kev txi theej txoj, Yexus tau ua kom muaj raws li Leej Txiv txoj hau kev. Peb pab tsis tau peb tus kheej yog tsis muaj Yexus Khetos txoj Kev Theej Txhoj vim peb cawm tsis taus peb tus kheej kom dim kev txhaum thiab kev tuag (saib Amas 22:12–15).
Peb tus Cawm Seej txoj kev txi yeej yog ib yam Nws ua kom qhia tias Nws hlub Nws Txiv thiab hlub peb. Yexus Khetos txoj kev hlub “dav li cas, ntev li cas, siab li cas thiab tob li cas” yeej loj tshaj qhov peb to taub (Efexus 3:18; kuj saib nqe 19).
Daim Duab
Raug Ntsia Saum Ntoo Khaub Lig, los ntawm Harry Anderson
Thaum Yexus Khetos tuag saum tus ntoo khaub lig, Nws tus ntsuj plig ncaim tawm Nws lub cev. Thaum txog hnub thib peb, Nws tus ntsuj plig thiab Nws lub cev rov qab los koom ua ke, yeej yuav tsis sib ncaim hlo li. Nws tau tshwm sim rau tib neeg coob, ua rau lawv paub tias Nws muaj ib lub cev tsis txawj tuag uas muaj nqaij thiab muaj txha. Qhov uas tus ntsuj plig thiab lub cev rov qab los koom ua ke hu ua txoj Kev Sawv Rov Los.
Vim peb yog neeg nyob hauv lub ntiaj teb no, peb txhua tus yuav tuag. Tiam sis, vim Yexus tau kov yeej kev tuag, txhua tus neeg uas yug los hauv lub ntiaj teb yuav sawv rov los. Txoj Kev Sawv Rov Los yog ib lub txiaj ntsim uas Vajtswv pub rau txhua leej txhua tus, los ntawm tus Cawm Seej txoj kev hlub tshua thiab txoj kev txhiv peb dim. Txhua tus neeg tus ntsuj plig thiab lub cev yuav rov qab los koom ua ke, thiab peb txhua tus yuav muaj ib lub cev zoo tag nrho uas tau sawv rov los nyob mus ib txhis li. Yog tsis muaj Yexus Khetos, ces kev tuag yuav ua rau peb tsis muaj kev cia siab tias peb yuav nrog Leej Txiv Saum Ntuj Ceeb Tsheej nyob (saib 2 Nifais 9:8–12).
Vajtswv txoj hau kev qhib kev rau peb ua zoo loj zuj zus thiab txais txoj sia nyob mus ib txhis. Tom qab lub sij hawm uas peb nyob hauv lub ntuj ntsuj plig, ces Kev Sawv Rov Los yog qhov uas yuav pab peb ua li ntawd.
Txoj Kev Sawv Rov Los yog qhov uas peb tus ntsuj plig thiab lub cev rov qab los koom ua ke. Peb txhua tus yuav sawv rov los. Muaj li no vim tus Cawm Seej tau theej peb lub txhoj thiab sawv rov los. (Saib Amas 11:42–44.)
Thaum peb sawv rov los, peb txhua tus yuav muaj ib lub cev nqaij daim tawv uas zoo tag nrho, yeej yuav tsis raug kev mob kev nkees. Peb yuav tsis txawj tuag thiab yuav nyob tas mus li.
Kev Cawm Seej
Vim peb txhua tus yuav sawv rov los, peb txhua tus yuav txais kev cawm seej tsis raug kev tuag ntawm sab cev nqaij daim tawv ntxiv. Peb txais lub txiaj ntsim no los ntawm Yexus Khetos txoj kev tshav ntuj.
Peb kuj yuav txais txoj kev cawm seej kom peb dim lub txim los ntawm peb tej kev txhaum raws li txoj kev cai txim lij qhia tias peb yuav tsum raug. Kuj yog los ntawm Yexus Khetos txoj kev theej txhoj thiab txoj kev hlub tshua uas peb txais tau lub txiaj ntsim no thaum peb hloov siab lees txim. (Saib Amas 42:13–15, 21–25.)
Kev Tsa Nto
Kev tsa nto, los sis txoj sia nyob mus ib txhis, yeej yog txoj kev zoo siab thiab yeeb koob loj tshaj plaws hauv lub nceeg vaj xilethi-aus. Kev tsa nto yog ib lub txiaj ntsim uas Vajtswv muab tsuas yog peb ua tej yam xwb. Thawj Tswj Hwm Russell M. Nelson qhia hais tias, “Tej yam uas peb yuav tsum ua kom tsim nyog txais yog kev ntseeg tus Tswv, kev hloov siab lees txim, kev cai raus dej, kev txais tus Vaj Ntsuj Plig Dawb Huv, thiab kev rau siab ntseeg ua raws li cov kab ke thiab tej kev khi lus hauv lub tuam tsev” (“Kev Cawm Seej thiab Kev Tsa Nto,” Liahona, Tsib Hlis Ntuj 2008, 9).
Kev tsa nto txhais tias yus nrog Vajtswv nrog tas mus li nrog yus tsev neeg. Yog kev paub Vajtswv thiab Yexus Khetos, kev hloov los ua neeg zoo li Nkawd, thiab kev muaj lub neej zoo Nkawd muaj.
Lus Cim: Thaum xub qhia txog tej nceeg vaj uas muaj yeeb koob, siv tej lus yooj yim raws li ib tug neeg yuav xav tau thiab to taub.
Thaum peb sawv rov los, Yexus Khetos yuav txiav txim rau peb raws li kev ncaj ncees thiab kev muaj lub siab hlub. Peb txhua tus yuav muaj chaw nyob hauv ib lub nceeg vaj uas muaj yeeb koob, tshuav tsawg tus neeg xwb. Txawm yog peb txhua tus yuav sawv rov los, tsis yog peb yuav txais lub yeeb koob mus ib txhis li uas zoo ib yam (saib Lus Qhuab Qhia thiab Kev Khi Lus 88:22–24, 29–34; 130:20–21; 132:5).
Tib neeg uas tsis tau muaj cib fim to taub thiab ua raws li Vajtswv txoj kev cai nyob hauv lawv lub neej hauv lub ntiaj teb no yuav muaj cib fim ua li ntawd hauv lub ntuj ntsuj plig. Yexus yuav txiav txim rau txhua tus neeg raws li nws txoj kev ntseeg, tej hauj lwm, tej kev xav, thiab kev hloov siab lees txim nyob hauv lub ntiaj teb no thiab nyob hauv lub ntuj ntsuj plig (saib Lus Qhuab Qhia thiab Kev Khi Lus 138:32–34, 57–59).
Cov vaj lug kub qhia txog tej nceeg vaj uas muaj yeeb koob hu ua xilethi-aus, thawlethi-aus, thiab thilethi-aus. Peb lub nceeg vaj no yeej qhia peb txog Vajtswv txoj kev hlub, kev txim lij, thiab kev siab hlub.
Cov neeg uas muab siab rau ntseeg Yexus Khetos, hloov siab lees txim rau lawv tej kev txhaum, txais cov kab ke ntawm txoj moo zoo, ua raws li lawv tej kev khi lus, txais tus Vaj Ntsuj Plig Dawb Huv, thiab nyiaj kom mus txog thaum kawg yuav txais kev cawm seej hauv lub nceeg vaj xilethi-aus. Lub nceeg vaj no kuj yuav muaj neeg uas tsis tau muaj cib fim txais txoj moo zoo nyob hauv lub neej no tiam sis “yuav xav txais txoj moo zoo nrog tag nrho lawv lub siab” ces lawv txais nyob hauv lub ntuj ntsuj plig (Lus Qhuab Qhia thiab Kev Khi Lus 137:8; kuj saib nqe 7). Cov me nyuam uas taug ua ntej lawv muaj hnub nyoog paub tab (yim xyoo) kuj yuav txais kev cawm seej hauv lub nceeg vaj xilethi-aus (eight years old),(saib Lus Qhuab Qhia thiab Kev Khi Lus 137:10).
Tib neeg uas tau ua neej zoo tiam sis “tsis txais yuav zaj lus tim khawv txog Yexus thaum muaj cev nqaij daim tawv, tiam sis tom qab ntawd txais yuav” lawv yuav muaj chaw nyob hauv lub nceeg vaj thawlethi-aus (Lus Qhuab Qhia thiab Kev Khi Lus 76:74). Qhov no muaj tseeb rau cov neeg uas lawv zaj lus tim khawv txog Yexus tsis khov. Lub nceeg vaj no los piv txog lub hli lub yeeb koob. (Saib Lus Qhuab Qhia thiab Kev Khi Lus 76:71–80.)
Cov uas tseem ua txhaum ntxiv thiab tsis hloov siab lees txim hauv lub neej no los sis tsis txais yuav Yexus Khetos txoj moo zoo hauv lub ntuj ntsuj plig yuav txais lawv nqi zog hauv lub nceeg vaj thilethi-aus. Lub nceeg vaj no los piv txog cov hnub qub lub yeeb koob. (Saib Lus Qhuab Qhia thiab Kev Khi Lus 76:81–86.)
Txheej Txheem Qhia uas Tsis Ntev Los Ntev Me Ntsis
Tus txheej txheem qhia no yog tej yam uas tej zaum koj yuav xav qhia ib tug neeg yog tias tsis muaj sij hawm ntev. Thaum koj siv tus txheej txheem qhia no, cia li xaiv ib los sis ob lub ntsiab cai kom qhia xwb. Cov lus qhuab qhia lub hauv paus rau txhua lub ntsiab cai los muaj nyob hauv zaj lus qhia no thaum xub thawj.
Thaum koj qhia, cia li nug tej yam thiab mloog lawv hais li cas. Caw tib neeg kom pab lawv kawm ua li cas kom muab siab npuab Vajtswv. Ib cov lus caw tseem ceeb yog kom tug neeg ntawd rov qab nrog koj sib ntsib ua ke. Qhov uas koj qhia ntev li cas yuav nyob ntawm seb koj nug tej yam twg thiab koj mloog zoo npaum li cas.
Tej Yam uas Koj Qhia Tau Tib Neeg Thaum Muaj 3–10 Feeb
Vajtswv tau npaj ib txoj hau kev kom peb zoo siab thiab hloov los ua zoo zuj zus nyob hauv lub neej no thiab nyob mus ib txhis li.
Nyob hauv Vajtswv txoj hau kev, peb yuav tsum los rau hauv lub ntiaj teb kom txais tau lub cev nqaij daim tawv, kawm, thiab hloov los ua neeg zoo.
Yexus Khetos yeej tseem ceeb rau Vajtswv txoj hau kev. Nws qhib kev rau peb txais tau txoj sia nyob mus ib txhis.
Raws li Vajtswv qhia, Yexus Khetos tau tsim lub ntiaj teb.
Peb lub neej hauv lub ntiaj teb no yuav pab peb npaj rov qab mus rau hauv Vajtswv xub ntiag.
Peb txhua tus ua txhaum, thiab peb txhua tus yuav tuag. Vim Vajtswv hlub peb, Nws tau txib Nws Leej Tub, Yexus Khetos, los rau hauv lub ntiaj teb kom txhiv peb dim kev txhaum thiab kev tuag.
Yexus Khetos txoj Kev Theej Txhoj yuav muab txhua yam uas tsis ncaj ncees txog lub neej kho kom zoo.
Thaum peb lub cev nqaij daim tawv tuag, peb tus ntsuj plig yuav nyob mus ntxiv. Thaum kawg txhua tus yuav sawv rov los. Qhov no txhais hais tias txhua tus neeg tus ntsuj plig thiab lub cev yuav rov qab los koom ua ke, thiab peb txhua tus yuav muaj ib lub cev zoo tag nrho uas tau sawv rov los nyob mus ib txhis li.