Kev Hu rau Qhov Chaw Tshaj Tawm Txoj Moo Zoo
Tshooj 3: Zaj Lus Qhia 3—Yexus Khetos txoj Moo Zoo

“Tshooj 3: Zaj Lus Qhia 3—Yexus Khetos txoj Moo Zoo,” Qhia Kuv txoj Moo Zoo: Phau Ntawv Pab Qhia txog Yexus Khetos txoj Moo Zoo (2023)

“Tshooj 3: Zaj Lus Qhia 3,” Qhia Kuv txoj Moo Zoo

Tshooj 3: Zaj Lus Qhia 3

Yexus Khetos txoj Moo Zoo

Daim Duab
Txoj Kev Los Zaum Ob, los ntawm Harry Anderson

Tej Zaum Tib Neeg Yuav Xav Paub

  • Yexus Khetos yog leej twg? Nws yuav ua li cas kom pab kuv thiab kuv tsev neeg?

  • Lub ntsiab ntawm kev ntseeg Yexus Khetos yog dab tsi? Qhov uas kuv ntseeg Nws yuav ua li cas kom kuv tau koob hmoov?

  • Lub ntsiab ntawm kev hloov siab lees txim yog dab tsi?

  • Kuv yuav ua li cas kom paub txog Vajtswv txoj kev kaj siab lug thiab kev zam txim tom qab kuv tau xaiv ua tej yam tsis zoo?

  • Vim li cas tib neeg ua kev cai raus dej?

  • Lub txiaj ntsim Vaj Ntsuj Plig Dawb Huv yog dab tsi?

  • Lub ntsiab ntawm kev nyiaj kom mus txog thaum kawg yog dab tsi?

Yexus Khetos txoj moo zoo yog txoj kev uas peb los cuag Yexus Khetos. Qhov no yooj yim heev uas ib tug me nyuam yeej to taub tau. Zaj lus qhia no qhia txog Yexus Khetos txoj moo zoo thiab cov lus qhuab qhia, tsis hais kev ntseeg Yexus Khetos, kev hloov siab lees txim, kev cai raus dej, lub txiaj ntsim Vaj Ntsuj Plig Dawb Huv, thiab nyiaj mus kom txog thaum kawg. Zaj lus qhia no kuj hais txog qhov uas txoj moo zoo foom koob hmoov rau tag nrho Vajtswv cov me nyuam.

Lo lus gospel txhais tias “txoj moo zoo.” Yeej yog Yexus Khetos txoj moo zoo vim tias muaj cov lus qhuab qhia—cov lus tseeb mus ib txhis li—uas peb xav tau kom los cuag Nws thiab txais kev cawm seej (saib 1 Nifais 15:14). Txoj moo zoo qhia peb kom ua neej zoo uas muaj nqis heev. Txoj moo zoo ua rau peb txais tau kev zam txim rau peb tej kev txhaum, hloov los ua neeg dawb huv, thiab rov qab mus nyob hauv Vajtswv lub xub ntiag.

Tej lub Tswv Yim rau Kev Qhia

Feem no muab ib tug txheej txheem qhia rau koj kom pab koj npaj qhia. Kuj muaj tej lus nug thiab tej lus caw uas koj hais tau.

Thaum koj npaj qhia, thov Vajtswv kom xav txog txhua tus neeg tej xwm txheej thiab tej kev xav tau ntawm sab ntsuj plig. Txiav txim siab tias koj yuav qhia dab tsi kom pab zoo tshaj. Cia li npaj siab txhais tej lo lus uas tib neeg yuav tsis to taub. Npaj raws li lub sij hawm uas muaj, thiab nco ntsoov kom tsis txhob qhia ntev dhau.

Xaiv tej nqe vaj lug kub uas yuav siv thaum koj qhia. “Cov Lus Qhuab Qhia lub Hauv Paus” hauv txhua zaj lus qhia muaj ntau nqe vaj lug kub uas pab tau.

Xav seb koj yuav nug tej lus twg thaum koj qhia. Npaj siab caw txhua tus neeg kom lawv ua tej yam.

Qhia txog cov koob hmoov uas Vajtswv tau cog lus tseg, thiab hais lus tim khawv txog tej yam uas koj qhia.

Daim Duab
ob tug tub txib qhia ib tsev neeg

Tej Yam uas Koj Qhia Tau Tib Neeg Thaum Muaj 15–25 Feeb

Xaiv ib los sis ob peb lub ntsiab cai kom qhia rau lawv. Cov lus qhuab qhia lub hauv paus rau txhua lub ntsiab cai los muaj nyob hauv tus txheej txheem qhia no.

Yexus Khetos Ntiag Tug Hauj Lwm uas Los Saum Ntuj Los

  • Vajtswv txib Nws tus Tub uas Nws Hlub, Yexus Khetos, los rau hauv lub ntiaj teb los txhiv peb dim kev txhaum thiab kev tuag.

  • Vim Yexus tau theej peb lub txhoj, ces Nws ntxuav peb tej kev txhaum mus thiab ua rau peb hloov los ua neeg dawb huv thaum peb hloov siab lees txim.

  • Tom qab Yexus raug ntsia saum ntoo khaub lig, Nws tau sawv rov los. Vim Nws tau Sawv Rov Los, peb txhua tus yuav sawv rov los tom qab peb tuag. Qhov no txhais hais tias txhua tus neeg tus ntsuj plig thiab lub cev yuav rov qab los koom ua ke, thiab peb txhua tus yuav muaj ib lub cev zoo tag nrho uas tau sawv rov los nyob mus ib txhis li.

Kev Ntseeg Yexus Khetos

  • Kev ntseeg yog thawj lub ntsiab cai ntawm Yexus Khetos txoj moo zoo.

  • Kev ntseeg Yexus Khetos yog kev ntseeg tias Nws yog Vajtswv Leej Tub thiab kev tso siab rau Nws hais tias Nws yog peb tus Cawm Seej thiab tus Txhiv Dim.

  • Kev ntseeg Yexus Khetos yog ib lub ntsiab cai ntawm kev muaj peev xwm thiab hwj chim.

  • Peb txhawb nqa peb txoj kev ntseeg thaum peb thov Vajtswv, kawm vaj lug kub, thiab ua raws li cov lus txib.

Hloov Siab Lees Txim

  • Kev ntseeg Yexus Khetos yuav ua rau peb xav hloov siab lees txim. Kev hloov siab lees txim yog kev tig mus rau Vajtswv thiab kev tso kev txhaum tseg. Thaum peb hloov siab lees txim, ces tej yam peb ua thiab xav hloov kom haum Vajtswv lub siab nyiam.

  • Thaum peb hloov siab lees txim tiag tiag, Vajtswv yuav zam txim rau peb. Peb txais tau kev zam txim vim Yexus Khetos tau theej peb lub txhoj.

  • Thaum peb hloov siab lees txim, peb yuav nyob kaj siab lug vim Nws kho peb lub txim thiab kev tu siab.

  • Kev hloov siab lees txim yog ib yam peb ua tas peb lub neej. Vajtswv zoo siab tos txais peb txhua zaus peb hloov siab lees txim. Nws yeej yuav tsis tso peb tseg.

Kev Cai Raus Dej: Peb txoj Kev Khi Lus thib Ib Nrog Vajtswv

  • Kev cai raus dej yog txoj kab ke uas peb ua kom nrog Vajtswv khi lus

  • Muaj ob hom kev cai raus: kev cai raus dej thiab kev cai raus ntawm tus Ntsuj Plig. Thaum peb ua kev cai raus dej thiab txais kev pom zoo, ces peb tej kev txhaum ploj mus, ua rau peb pib tau ib lub neej tshiab.

  • Peb ua kev cai raus dej kom ua raws li Yexus tus yam ntxwv.

  • Cov me nyuam tsis ua kev cai raus dej mus txog thaum lawv muaj yim xyoo. Cov me nyuam uas tuag ua ntej hnub nyoog ntawd txais kev txhiv dim dhau los ntawm Yexus Khetos txoj Kev Theej Txhoj.

  • Peb txais lub cim nco txog txhua lub lim tiam kom nco txog Yexus txoj kev txi thiab rov qab nrog Vajtswv khi lus.

Lub Txiaj Ntsim Vaj Ntsuj Plig Dawb Huv

  • Tus Vaj Ntsuj Plig Dawb Huv yog tus thib peb hauv Pawg Vajtswv.

  • Tom qab peb ua kev cai raus dej, peb txais lub txiaj ntsim Vaj Ntsuj Plig Dawb Huv nyob hauv txoj kab ke ua kev pom zoo.

  • Thaum peb txais lub txiaj ntsim Vaj Ntsuj Plig Dawb Huv, Nws yuav nrog peb nyob kom mus tas peb lub neej yog tias peb rau siab ntseeg.

  • Tus Vaj Ntsuj Plig Dawb Huv ua rau peb hloov los ua neeg dawb huv, coj peb, nplij peb lub siab, thiab pab peb paub qhov tseeb.

Nyiaj Kom Mus txog Thaum Kawg

  • Kev nyiaj mus yog kev muab siab rau ntseeg Yexus Khetos txhua hnub tsis tu tsis tseg. Peb tseem ua raws li peb tej kev khi lus nrog Vajtswv, hloov siab lees txim, nrhiav kom muaj tus Vaj Ntsuj Plig Dawb Huv nrog peb nyob, thiab txais lub cim nco txog.

  • Thaum peb rau siab ntseeg nrhiav kev coj raws li Yexus Khetos, Vajtswv cog lus tias peb yuav txais txoj sia nyob mus ib txhis.

Yexus Khetos txoj Moo Zoo Foom Koob Hmoov rau Tag Nrho Vajtswv cov Me Nyuam

  • Kev ua raws li txoj moo zoo ua rau peb haj yam xyiv fab, ua rau peb xav ua zoo, thiab pab peb nrog lwm tus sib raug zoo.

  • Peb yuav zoo siab tshaj plaws—tsis hais peb ib leeg thiab nyob hauv peb tsev neeg los yog—thaum peb ua neej raws li Yexus Khetos tej lus qhia.

  • Los ntawm Yexus Khetos txoj moo zoo, peb tsev neeg tau koob hmoov nyob hauv lub neej no thiab yuav nyob ua ke mus ib txhis li thiab yuav nrog Vajtswv nyob.

Tej Lus Nug uas Zoo Nug Tib Neeg

Tej lus nug no yog piv txwv txog tej yam uas koj nug tau neeg. Tej lus nug no pab tau koj nrog lwm tus sib tham thiab to taub ib tug neeg xav tau dab tsi thiab xav li cas.

  • Koj paub dab tsi txog Yexus Khetos?

  • Koj xav li cas kev ntseeg Yexus Khetos yog dab tsi?

  • Koj xav hloov dab tsi hauv koj lub neej?

  • Koj to taub dab tsi txog kev hloov siab lees txim?

  • Koj to taub dab tsi txog kev cai raus dej? Koj yuav ua li cas tam sim no kom npaj ua kev cai raus dej?

  • Tus Vaj Ntsuj Plig Dawb Huv yuav ua li cas kom pab koj rov qab mus rau hauv Vajtswv xub ntiag?

  • Koj los sis koj tsev neeg raug teeb meem dab tsi tam sim no? Koj puas kam wb qhia koj txog vim li cas Yexus Khetos txoj moo zoo yuav pab tau koj?

Tej Lus Caw uas Koj Hais Tau

  • Koj puas kam thov Vajtswv kom pab koj paub tias tej yam uas wb qhia muaj tseeb? (Saib “Laj Lim Tswv Yim txog Kev Qhia: Kev Thov Vajtswv” nyob hauv nqe lus kawg ntawm zaj lus qhia 1.)

  • Koj puas kam koom lub koom txoos Hnub Sunday no kom kawm ntxiv txog tej yam uas wb tau qhia?

  • Koj puas kam nyeem Phau Ntawv Maumoos thiab thov Vajtswv seb puas yog Vajtswv txoj lus? (Tej zaum koj yuav xav hais kom lawv nyeem tej tshooj los sis tej nqe vaj lug kub.)

  • Koj puas kam ua raws li Yexus tus yam ntxwv thiab ua kev cai raus dej? (Saib “Kev Caw Neeg Ua Kev Cai Raus Dej thiab Txais Kev Pom Zoo,” uas muaj tom qab zaj lus qhia 1.)

  • Koj puas kam peb teem sij hawm rau wb rov qab tuaj xyuas koj?

Cov Lus Qhuab Qhia lub Hauv Paus

Feem no muaj cov lus qhuab qhia thiab tej nqe vaj lug kub rau koj kawm kom txhawb nqa koj txoj kev txawj ntse thiab zaj lus tim khawv txog txoj moo zoo thiab pab koj qhia.

Daim Duab
Yexus Txib Kaum Ob tug Thwj Tim Mus, los ntawm Walter Rane

Yexus Khetos Ntiag Tug Hauj Lwm uas Los Saum Ntuj Los

Leej Txiv Saum Ntuj Ceeb Tsheej tau txib Nws Tib Leeg Tub, Yexus Khetos, los rau hauv lub ntiaj teb kom peb txhua tus yuav muaj kev xyiv fab hauv lub neej no thiab txoj sia nyob mus ib txhis hauv lub neej tom ntej. “Thiab qhov no yog txoj moo zoo, tej moo zoo siab, … [hais tias Yexus Khetos] los rau hauv lub ntiaj teb … los ris neeg ntiaj teb tej kev txhaum, thiab los ua rau neeg ntiaj teb hloov ua neeg dawb huv, thiab los ntxuav lawv tawm ntawm tag nrho tej kev ua tsis ncaj ncees; hais tias los ntawm nws tag nrho sawv daws … yuav txais kev cawm cawm dim;” (Lus Qhuab Qhia thiab Kev Khi Lus 76:40–42).

Nyob hauv lub neej no, peb txhua tus ua txhaum, thiab peb txhua tus yuav tuag. Kev txhaum thiab kev tuag yuav ua rau peb txais tsis tau txoj sia nyob mus ib txhis nrog Vajtswv tsuas yog peb muaj ib tug neeg Txhiv Dim xwb (saib 2 Nifais 9). Ua ntej Nws tsim lub ntiaj teb, Leej Txiv Saum Ntuj Ceeb Tsheej tau xaiv Yexus Khetos txhiv peb dim. Vim Nws hlub peb kawg nkaus li, Yexus tau los rau hauv lub ntiaj teb no thiab ua ntiag tug hauj lwm no. Nws tau txhiv peb dim peb tej kev txhaum, thiab Nws qhib kev rau peb sawv daws sawv rov los tom qab peb tuag.

Yexus tsis tau ua txhaum hlo li. Thaum Nws txoj hauj lwm qhuab qhia hauv lub ntiaj teb no yuav tiav, Nws tau ris peb tej kev txhaum thaum Nws raug txom nyem hauv Khexemanes thiab thaum Nws raug ntsia saum ntoo khaub lig (saib 1 Nifais 11:33). Yexus raug txom nyem loj heev thiaj li ua rau Nws “tshee hnyo vim yog txoj kev mob, thiab los ntshav ntawm txhua lub qhov hws” (Lus Qhuab Qhia thiab Kev Khi Lus 19:18). Tom qab Nws raug Ntsia Saum Ntoo Khaub Lig, Yexus tau sawv rov los, kov yeej kev tuag. Ua ke, tej xwm txheej no yog Yexus Khetos txoj Kev Theej Txhoj.

Peb tej kev txhaum ua rau peb sab ntsuj plig tsis huv, thiab “tus uas tsis huv nrog Vajtswv nyob tsis taus” (1 Nifais 10:21). Tsis tas li ntawd, txoj kev cai txim lij kom peb raug tej xwm txheej thaum peb ua txhaum.

Yexus txoj kev theej txhoj qhib kev rau peb txais kev ntxuav huv tsis muaj kev txhaum thiab pab peb hloov ua neeg dawb huv thaum peb hloov siab lees txim. Kuj qhib kev kom tau them tej nqi ntawm txoj kev txim lij (saib Amas 42:15, 23–24). Tus Cawm Seej hais tias, “Kuv … tau raug tej yam no rau tag nrho sawv daws, xwv kom lawv yuav tsis raug txom nyem yog hais tias lawv hloov siab lees txim; tiam sis yog hais tias lawv tsis hloov siab lees txim ces lawv yeej yuav raug txom nyem ib yam li kuv” (Lus Qhuab Qhia thiab Kev Khi Lus 19:16–17). Yog tsis muaj Yexus Khetos, ces kev txhaum yuav ua rau peb tsis muaj kev cia siab tias peb yuav nrog Leej Txiv Saum Ntuj Ceeb Tsheej nyob.

Vim Nws theej peb lub txhoj, Yexus tsis tau tshem peb txoj kev lav ris. Peb yuav tsum ntseeg Nws, hloov siab lees txim, thiab siv zog ua raws li cov lus txib. Thaum peb hloov siab lees txim, Yexus yuav sawv peb cev mus cuag Leej Txiv kom txais tau Nws txoj kev muaj cai hlub tshua peb (saib Maulaunais 7:27–28). Vim tus Cawm Seej pab daws peb dim, Leej Txiv Saum Ntuj Ceeb Tsheej zam txim pub rau peb, ua rau peb dim lub txim ntawm peb tej kev txhaum uas peb ris (saib Mauxiyas 15:7–9). Nws ntxuav peb txhua tus sab ntsuj plig kom huv thiab thaum kawg yuav tos txais peb los nyob rau hauv Vajtswv lub xub ntiag.

Yexus ntiag tug hauj lwm yog kom cawm peb dim kev tuag. Vim Nws tau sawv rov los, peb txhua tus yuav sawv rov los tom qab peb tuag. Qhov no txhais hais tias txhua tus neeg tus ntsuj plig thiab lub cev yuav rov qab los koom ua ke, thiab peb txhua tus yuav muaj ib lub cev zoo tag nrho uas tau sawv rov los nyob mus ib txhis li. Yog tsis muaj Yexus Khetos, ces kev tuag yuav ua rau peb tsis muaj kev cia siab tias peb yuav nrog Leej Txiv Saum Ntuj Ceeb Tsheej nyob.

Kev Kawm Vaj Lug Kub

Vajtswv Txib Nws Leej Tub Los

Kev Cawm Seej Dhau Los ntawm Yexus Khetos

Kawm Ntxiv txog lub Ntsiab Cai No

Kev Ntseeg Yexus Khetos

Thawj txoj ntsiab cai ntawm txoj moo zoo yog kev ntseeg tus Tswv Yexus Khetos. Kev ntseeg yog lub hauv paus rau txhua yam ntsiab cai ntawm txoj moo zoo.

Kev ntseeg Yexus Khetos yog kev ntseeg tias Nws yog Vajtswv Tib Leeg Tub. Kev ntseeg kuj yog kev tso siab rau Nws hais tias Nws yog peb tus Cawm Seej thiab tus Txhiv Dim—Nws yog tib txoj kev rau peb rov qab mus nyob hauv Vajtswv lub xub ntiag (saib Tes Hauj Lwm 4:10–12; Mauxiyas 3:17; 4:6–8). Tus Tswv caw peb kom “ntseeg nws … khov kho, vam khom tag nrho rau tej hauj lwm zoo ntawm tus uas muaj hwj chim cawm tau” (2 Nifais 31:19).

Kev ntseeg Yexus Khetos yog kev ntseeg tias Nws tau raug txom nyem rau peb tej kev txhaum thaum Nws theej peb lub txhoj. Vim Nws tau ua kev txi li no, ces peb yuav huv thiab txais kev txhiv dim thaum peb hloov siab lees txim. Txoj kev ntxuav no pab peb nrhiav tau kev kaj siab lug thiab kev cia siab hauv lub neej no. Kuj ua rau peb txais tau kev xyiv fab puv npo tom qab peb tuag.

Kev ntseeg Yexus Khetos yog kev cia siab hais tias dhau los ntawm Nws, peb txhua tus yuav sawv rov los tom qab peb tuag. Kev ntseeg zoo li no yuav txhawb nqa peb thiab nplij peb lub siab thaum raug kev tu siab. Kev tu siab vim ib tug neeg tau tuag yuav ploj mus vim twb tau cog lus tias tus ntawd yuav Sawv Rov Los.

Kev ntseeg Yexus Khetos yog kev ntseeg thiab kev tso siab rau Nws hais tias Nws tau ris peb tej kev txom nyem thiab tej kev nyuaj siab (saib Yaxayas 53:3–5). Los ntawm Nws lub neej Nws paub muaj siab hlub tshua txhawb nqa peb kom dhau tej teeb meem hauv lub neej no (saib Amas 7:11–12; Lus Qhuab Qhia thiab Kev Khi Lus 122:8). Thaum peb muab siab rau ntseeg, Nws pab peb nyiaj mus tom ntej kom dhau tej yam nyuaj heev.

Dhau los ntawm peb txoj kev ntseeg Nws, Yexus kho tau peb sab cev nqaij daim tawv thiab sab ntsuj plig. Nws yeej tos txais peb kom pab peb thaum peb nco txog Nws tej lus caw peb kom “ntsia ntsoov kuv nrog txhua txoj kev xav; tsis txhob ua xyem xyav, tsis txhob ntshai” (Lus Qhuab Qhia thiab Kev Khi Lus 6:36).

Ib lub Ntsiab Cai ntawm Kev Muaj Peev Xwm thiab Hwj Chim

Kev ntseeg Yexus Khetos ua rau peb xav ua tej yam. Peb siv peb txoj kev ntseeg thaum peb ua raws li cov lus txib thiab ua zoo txhua hnub. Peb hloov siab lees txim. Peb muab siab npuab Nws. Peb siv zog hloov los ua neeg zoo li Nws.

Thaum peb muab siab rau ntseeg, peb yuav muaj Yexus lub hwj chim hauv peb lub neej txhua hnub. Nws yuav ua kom peb muaj peev xwm thaum peb ua zoo npaum li peb ua taus. Nws yuav pab peb ua zoo zuj zus thiab tiv taus kev ntxias.

Kev Txhawb Nqa Peb txoj Kev Ntseeg

Tus yaj saub Amas qhia tias kev txhawb kev ntseeg pib thaum peb tsuas “xav ntseeg” xwb (Amas 32:27). Ces, kom peb txoj kev ntseeg Yexus Khetos loj tuaj, peb yuav tsum tu zoo zoo los ntawm peb txoj kev kawm Nws txoj lus, ua raws li Nws tej lus qhia, thiab ua raws li Nws cov lus txib. Amas qhia tias thaum peb ua siab ntev, thiab rau siab tu Vajtswv txoj lus nyob hauv peb lub siab, ces txoj lus ntawd “yuav tuaj taus cag; thiab saib seb yuav [zoo li] ib tsob ntoo loj tuaj mus rau txoj sia uas kav ib txhis”—yog li ntawd yuav txhawb peb txoj kev ntseeg kom muaj zog ntxiv (Amas 32:41; saib nqe 26–43).

Kev Kawm Vaj Lug Kub

Kev Ntseeg, lub Hwj Chim, thiab Kev Cawm Seej

Cov Lus Qhuab Qhia ntawm Kev Ntseeg

Tej zaj Lus txog Kev Ntseeg

Tej Hauj Lwm thiab Kev Mloog Lus

Kev Ntseeg Mus rau Kev Hloov Siab Lees Txim

Kawm Ntxiv txog lub Ntsiab Cai No

  • Phau Qhia txog Vaj Lug Kub: “Yexus Khetos,” “Theej Txhoj,” “Kev Ntseeg”

  • Phau Piav txog phau Npaivnpaum: “Kev Ntseeg”

  • Txoj Moo Zoo tej Ntsiab Lus: “Yexus Khetos,” “Yexus Khetos txoj Kev Theej Txhoj,” “Kev Ntseeg Yexus Khetos”

Hloov Siab Lees Txim

Kev Hloov Siab Lees Txim Yog Dab Tsi?

Kev hloov siab lees txim yog lub ntsiab cai thib ob ntawm txoj moo zoo. Kev ntseeg Yexus Khetos thiab peb txoj kev hlub Nws ua rau peb hloov siab lees txim (saib Hilamas 14:13). Kev hloov siab lees txim yog kev tig mus rau Vajtswv thiab kev tso kev txhaum tseg. Thaum peb hloov siab lees txim, ces tej yam peb ua thiab xav hloov kom haum Vajtswv lub siab nyiam. Peb txais tau kev zam txim rau peb tej kev txhaum dhau los ntawm Yexus Khetos thiab Nws txoj kev theej txhoj.

Kev hloov siab lees txim tsis yog kev siv zog kom hloov cwj pwm los sis tso kev qaug zog tseg xwb. Kev hloov siab lees txim yog kev tso siab rau Yexus Khetos tiag tiag, tus uas muab hwj chim rau peb lub siab “hloov loj heev” (saib Amas 5:12–14). Thaum peb txais tau kev hloov siab no, peb sab ntsuj plig yug dua tshiab (saib Mauxiyas 27:24–26).

Los ntawm kev hloov siab lees txim, peb saib Vajtswv, peb tus kheej, thiab neeg ntiaj teb rau nqi. Peb rov qab hnov tau Vajtswv txoj kev hlub rau peb vim peb yog Nws cov me nyuam—thiab peb tus Cawm Seej txoj kev hlub rau peb. Lub cib fim hloov siab lees txim yog ib txoj koob hmoov loj tshaj plaws uas Vajtswv tau pub rau peb dhau los ntawm Nws Leej Tub.

Tus Txheej Txheem Hloov Siab Lees Txim

Thaum peb hloov siab lees txim, peb paub tias peb tau ua txhaum thiab ua rau peb nyuaj siab tiag. Peb lees txhaum rau Vajtswv thiab thov kom Nws zam txim pub rau peb. Peb kuj lees txhaum loj heev rau cov thawj coj uas muaj txoj cai hauv lub Koom Txoos, cov uas yuav txhawb nqa peb thaum peb hloov siab lees txim. Peb ua tej yam uas peb ua taus kom kho peb txoj kev txhaum, uas txhais hais tias peb kho tej teeb meem uas los ntawm tej yam uas peb tau ua. Peb qhia tias peb hloov siab lees txim tiag thaum peb ua ncaj ncees rau ib lub sij hawm ntev.

Kev hloov siab lees txim yog ib tug txheej txheem uas peb ua txhua hnub kom tas peb lub neej. “Rau qhov txhua tus puav leej ua txhaum thiab tu ncua Vajtswv lub hwj chim lawm” (Loos 3:23). Peb yuav tsum hloov siab lees txim tsis tu tsis tseg, thiab nco ntsoov tias “vim Yexus Khetos txhawb nqa [peb] lub zog, [peb] thiaj tiv taus txhua tsav yam huv tib si” (Filipis 4:13). Tus Tswv tau qhia peb tias “txhua zaus uas kuv cov neeg yuav hloov siab lees txim kuv yuav zam txim rau lawv tej kev txhaum” (Mauxiyas 26:30).

Cov Koob Hmoov Los ntawm Kev Hloov Siab Lees Txim

Kev hloov siab lees txim yog ib lub ntsiab cai zoo uas ua rau peb xyiv fab thiab nyob kaj siab lug. Kev hloov siab lees txim ua rau peb “los rau tus Txhiv Dim lub hwj chim, mus rau txoj kev cawm seej ntawm [peb] tus ntsuj plig” (Hilamas 5:11).

Thaum peb hloov siab lees txim, tus Tswv kho peb txoj kev muaj txim thiab kev tu siab thaum sij hawm dhau mus. Peb muaj tus Ntsuj Plig lub hwj huam ntau ntxiv. Peb haj yam xav coj raws li Vajtswv.

Daim Duab
Thawj Tswj Hwm Russell M. Nelson

“Neeg coob xav tias kev hloov siab lees txim yog kev raug txim—ib yam uas yuav tsum tsis txhob ua. … Tiam sis Dab Ntxwg Nyoog yog tus uas ua rau yus xav tias yus raug txim. Nws xav kom peb tsis txhob ntsia Yexus Khetos, tus uas qhib caj npab tos nej, cia siab thiab txaus siab kom kho mob, zam txim, ua kom huv, txhawb zog, thiab muab peb hloov ua dawb huv” (Russell M. Nelson, “Peb Muaj Peev Xwm Ua Zoo Dua thiab Ua Neeg Zoo Dua,” Liyahaunas, Tsib Hlis Ntuj 2019, 67).

Kev Kawm Vaj Lug Kub

Hloov Siab Lees Txim

Kev Txhiv Dim thiab Kev Zam Txim

Kev Siab Hlub Tshua rau cov uas Hloov Siab Lees Txim

Kawm Ntxiv txog lub Ntsiab Cai No

  • Phau Qhia txog Vaj Lug Kub: “Hloov Siab Lees Txim,” “Theej Txhoj”

  • Phau Piav txog Npaivnpaum: “Hloov Siab Lees Txim”

  • Phau Qhia Kev Coj lub Koom Txoos, 32.1

  • Txoj Moo Zoo tej Ntsiab Lus: “Hloov Siab Lees Txim,” “Yexus Khetos txoj Kev Theej Txhoj”

Daim Duab
ntxhais hluas ua kev cai raus dej

Kev Cai Raus Dej: Peb txoj Kev Khi Lus thib Ib Nrog Vajtswv

Kev ntseeg Yexus Khetos thiab kev hloov siab lees txim npaj peb txais cov kab ke ntawm kev cai raus dej thiab kev pom zoo. Txoj kev cai raus dej yog thawj txoj kab ke cawm seej ntawm Yexus Khetos txoj moo zoo. Thaum peb txais txoj kab ke ntawm kev cia siab no, peb nrog Vajtswv khi peb thawj txoj kev khi lus.

Ib txoj kab ke yog ib tus txheej txheem dawb ceev uas ib tug uas tuav txoj cai ntawm lub pov thawj hwj ua. Muaj ib txhia cov kab ke, xws li kev cai raus dej, uas yuav tsum ua kom txais tau kev cawm seej.

Los ntawm cov kab ke, peb nrog Vajtswv khi lus. Tej kev khi lus no yog tej lus cog tseg dawb huv uas Vajtswv thiab peb ua ib ke. Nws cog lus tias Nws yuav foom koob hmoov rau peb thaum peb ua raws li peb tau cog lus rau Nws. Peb yuav tsum rau siab xav ua raws li tej yam uas peb cog lus rau Vajtswv peb yuav ua.

Vajtswv tau muab cov kab ke thiab kev khi lus rau peb kom pab peb los cuag Nws thiab muaj txoj sia nyob mus ib txhis. Thaum peb txais cov kab ke pov thawj hwj thiab ua raws li tej kev khi lus ntawd, peb yuav muaj “lub hwj chim ua li Vajtswv” nyob hauv peb lub neej (Lus Qhuab Qhia thiab Kev Khi Lus 84:20).

Kev Khi Lus Thaum Ua Kev Cai Raus Dej

Tus Cawm Seej qhia tias kev cai raus dej yog ib yam uas peb yuav tsum ua kom nkag hauv lub nceeg vaj saum ntuj ceeb tsheej (saib Yauhas 3:5). Kuj yog ib yam uas yuav tsum ua kom los ua ib tug mej zeej hauv Yexus Khetos lub Koom Txoos. Peb tus Cawm Seej tau coj yam ntxwv rau peb thaum Nws tau ua kev cai raus dej (saib Mathais 3:13–17).

Thaum peb ua kev cai raus dej thiab ua raws li peb tej kev khi lus, Vajtswv cog lus rau peb tias Nws yuav zam txim pub rau peb tej kev txhaum (saib Tes Hauj Lwm 22:16; 3 Nifais 12:1–2). Txoj koob hmoov zoo no yeej los ntawm qhov uas Yexus Khetos tau theej peb lub txhoj, “tus uas hlub peb [thiab] tus uas ntxuav peb tej kev txhaum mus los ntawm nws tus kheej cov ntshav” (Tshwm Sim 1:5). Vajtswv kuj cog lus tias Nws yuav foom koob hmoov rau peb kom muaj tus Vaj Ntsuj Plig Dawb Huv nrog peb nyob peb thiaj li yuav hloov los ua neeg dawb huv, Nws yuav coj peb, thiab nplij peb lub siab.

Ib feem ntawm peb txoj kev khi lus thaum ua kev cai raus dej yog qhov uas ua tim khawv tias peb txaus siab ris Yexus Khetos lub npe. Peb kuj cog lus tias peb yuav nco ntsoov txog Nws thiab coj raws li Nws cov lus txib. Peb cog lus tias peb yuav hlub thiab pab lwm tus, “nyuaj siab nrog cov uas nyuaj siab; … nplij cov uas xav tau kev nplij siab, thiab ua tim khawv txog Vajtswv txhua lub sij hawm thiab ua tim khawv txog txhua yam, thiab ua tim khawv nyob hauv txhua qhov chaw uas [peb] nyob” (Mauxiyas 18:9; saib nqe 8–10, 13). Peb qhia tias peb yuav mob siab ua hauj lwm rau Yexus Khetos kom mus txog thaum hnub kawg (saib Lus Qhuab Qhia thiab Kev Khi Lus 20:37; Mauxiyas 2:17).

Peb tej kev khi lus uas khi thaum ua kev cai raus dej yog ib txoj kev lav ris loj heev. Peb tej kev khi lus kuj tshoov peb lub siab thiab ua rau peb zoo siab. Ua rau peb nrog Leej Txiv Saum Ntuj Ceeb Tsheej sib raug zoo es Nws thiaj li muab Nws txoj kev hlub rau peb tsis tu tsis tseg.

Kev Cai Raus rau hauv Dej

Yexus qhia tias peb yuav tsum ua kev cai raus rau hauv dej thiaj li yuav txais kev zam txim rau peb tej kev txhaum (saib Lus Qhuab Qhia thiab Kev Khi Lus 20:72–74). Kev cai raus dej yog ib lub cim txog Yexus Khetos txoj kev tuag, kev faus thiab kev Sawv Rov Los (saib Loos 6:3–6).

Kev cai raus dej kuj yog ib lub cim rau peb txhua tus. Kev cai raus dej yog ib lub cim txog qhov uas peb lub qub neej tuag, peb muab faus, thiab peb sab ntsuj plig rov qab yug dua tshiab. Thaum peb ua kev cai raus dej, peb pib yug dua tshiab thiab hloov los ua Yexus Khetos cov tub thiab ntxhais ntawm sab ntsuj plig (saib Mauxiyas 5:7–8; Loos 8:14–17).

Cov Me Nyuam

Cov me nyuam tsis ua kev cai raus dej mus txog thaum lawv muaj hnub nyoog paub tab, uas yog yim xyoo (saib Lus Qhuab Qhia thiab Kev Khi Lus 68:27). Cov me nyuam uas tuag ua ntej ntawd los Yexus Khetos txoj Kev Theej Txhoj txhiv lawv dim (saib Maulaunais 8:4–24; Lus Qhuab Qhia thiab Kev Khi Lus 137:10). Ua ntej cov me nyuam ua kev cai raus dej, yuav tsum qhia txoj moo zoo rau lawv, lawv thiaj li yuav npaj siab ua qhov tseem ceeb no hauv lawv lub neej nrog Vajtswv khi lus.

Lub Cim Nco Txog

Peb Leej Txiv Saum Ntuj Ceeb Tsheej xav kom peb rau siab ua raws li peb tej kev khi lus uas peb nrog Nws khi ua ke. Xwv kom pab peb ua li no, Nws tau txib peb sib ntsib ua ke ntau kom txais lub cim nco txog. Lub cim nco txog yog ib txoj kab ke pov thawj hwj uas Yexus tau muab rau Nws cov Thwj Tim ua ntej Nws txoj Kev Theej Txhoj.

Kev txais lub cim nco txog yog lub hom phiaj tseem ceeb tshaj plaws ntawm kev sib ntsib txais lub cim nco txog txhua lub lim tiam. Cov uas tuav lub pov thawj hwj foom koob hmoov thiab muab cov mov mog thiab cov dej rau pawg ntseeg. Cov mov mog piv txog tus Cawm Seej muab Nws lub cev txi rau peb. Cov dej piv txog Nws cov ntshav, uas Nws tau nrog rau peb.

Peb txais ob lub cim no kom nco txog tus Cawm Seej txoj kev txi thiab nrog Vajtswv rov qab khi lus. Peb rov qab txais kev cog lus tias tus Ntsuj Plig yuav nrog peb nyob.

Kev Kawm Vaj Lug Kub

Yexus Khetos tus Yam Ntxwv

Kev Khi Lus Thaum Ua Kev Cai Raus Dej

Tej Yam Yuav Tsum Ua Kom Ua Tau Kev Cai Raus Dej

Tej Lus Cog Tseg Los ntawm Kev Cai Raus Dej

Yuav Tsum Muaj txoj Cai

Yexus Khetos Txhim Tsa lub Cim Nco Txog

Ob zaj Lus Thov Vajtswv Foom Koob Hmoov rau lub Cim Nco Txog

Txais lub Cim Nco Txog

Kawm Ntxiv txog lub Ntsiab Cai No

Daim Duab
Yexus Khetos tso tes saum ib tug poj niam lub taub hau

Lub Txiaj Ntsim Vaj Ntsuj Plig Dawb Huv

Kev Txais lub Txiaj Ntsim Vaj Ntsuj Plig Dawb Huv

Txoj kev cai raus dej muaj ob feem. Yexus qhia tias peb yuav tsum “yug los ntawm dej thiab los ntawm tus Ntsuj Plig” kom nkag tau hauv Vajtswv lub nceeg vaj (Yauhas 3:5; ntxiv qhov uas ntawv qaij). Joseph Smith qhia tias, “Txoj kev cai raus dej tsuas yog ib nrab ntawm txoj kab ke ntawd, thiab yuav tsis muaj qab hau dab tsi li yog tias tsis ua lwm qhov ntawd—uas yog kev cai raus ntawm tus Vaj Ntsuj Plig Dawb Huv” (Teachings of Presidents of the Church: Joseph Smith [2007], 95).

Tom qab ib tug neeg ua kev cai raus dej nws yuav tsum raug raus ntawm tus Ntsuj Plig thiaj tiav lawm. Thaum peb txais ob txog kab ke no, ces peb yug dua tshiab thiab peb tej kev txhaum raug ntxuav mus. Ces peb pib ib lub neej ua Yexus Khetos cov thwj tim.

Peb txais txoj kev cai raus ntawm tus Ntsuj Plig los ntawm ib txoj kab ke hu ua txoj kev cai pom zoo. Ib los sis ob peb tug uas tuav lub pov thawj hwj ua txoj kab kab ke no thaum lawv muab lawv tes tso saum peb lub taub hau. Thaum xub thawj lawv muab peb pom zoo ua ib tug mej zeej hauv lub Koom Txoos, ces lawv muab lub txiaj ntsim Vaj Ntsuj Plig Dawb Huv rau peb. Nov yog tib txoj kab ke uas hais txog nyob hauv Phau Tshiab thiab Phau Ntawv Maumoos (saib Tes Hauj Lwm 8:14–17; 3 Nifais 18:36–37).

Tus Vaj Ntsuj Plig Dawb Huv yog tus thib peb hauv Pawg Vajtswv. Nws koom siab ua hauj lwm nrog Leej Txiv Saum Ntuj Ceeb Tsheej thiab Yexus Khetos. Thaum peb txais lub txiaj ntsim Vaj Ntsuj Plig Dawb Huv, Nws yuav nrog peb nyob kom mus tas peb lub neej yog tias peb rau siab ntseeg.

Tus Vaj Ntsuj Plig Dawb Huv Ua Li Cas Kom Foom Koob Hmoov rau Peb

Lub txiaj ntsim Vaj Ntsuj Plig Dawb Huv yog Leej Txiv Saum Ntuj Ceeb Tsheej ib lub txiaj ntsim uas tseem ceeb tshaj plaws. Tus Vaj Ntsuj Plig Dawb Huv ua rau peb hloov los ua neeg dawb huv, peb thiaj li yog neeg zoo dua thiab zoo li Vajtswv ntxiv (saib 3 Nifais 27:20). Nws pab peb hloov siab thiab ua rau peb sab ntsuj plig zoo zuj zus thaum peb siv zog coj raws li Vajtswv tej kev cai.

Tus Vaj Ntsuj Plig Dawb Huv pab peb kawm thiab paub qhov tseeb (saib Maulaunais 10:5). Nws kuj pom zoo rau qhov tseeb hauv peb lub siab lub ntsws. Tsis tas li ntawd xwb, tus Vaj Ntsuj Plig Dawb Huv pab peb qhia qhov tseeb (saib Lus Qhuab Qhia thiab Kev Khi Lus 42:14). Thaum peb kawm thiab qhia qhov tseeb los ntawm tus Vaj Ntsuj Plig Dawb Huv lub hwj chim, Nws ua kom qhov tseeb ntawd nkag hauv peb lub siab (saib 2 Nifais 33:1).

Thaum peb txo hwj chim nrhiav tus Vaj Ntsuj Plig Dawb Huv tej lus qhia, ces Nws yuav coj peb kev (saib 2 Nifais 32:5). Nws yuav tshoov peb lub siab kom peb paub yuav ua li cas kom pab lwm tus.

Tus Vaj Ntsuj Plig Dawb Huv muab dab zog rau peb sab ntsuj plig kom pab peb kov yeej tej kev qaug zog. Nws pab peb tiv taus kev ntxias. Nws ceeb toom peb txog tej xwm txheej phem rau peb sab ntsuj plig thiab sab cev nqaij daim tawv.

Tus Vaj Ntsuj Plig Dawb Huv yuav pab peb kov yeej tej teeb meem hauv lub neej no. Nws yuav nplij peb lub siab thaum peb raug kev sim siab los sis kev tu siab, thiab ua rau peb muaj kev cia siab (saib Maulaunais 8:26). Los ntawm tus Vaj Ntsuj Plig Dawb Huv, peb yuav hnov Vajtswv txoj kev hlub rau peb.

Kev Kawm Vaj Lug Kub

Tus Vaj Ntsuj Plig Dawb Huv Zoo Li Cas

Cov Koob Hmoov thiab lub Hwj Huam ntawm tus Vaj Ntsuj Plig Dawb Huv

Lub Txiaj Ntsim Vaj Ntsuj Plig Dawb Huv Tseem Ceeb Npaum Li Cas

Kawm Ntxiv txog lub Ntsiab Cai No

Daim Duab
Yexus puag cov me nyuam

Nyiaj Kom Mus txog Thaum Kawg

Thaum peb ua kev cai raus dej thiab ua kev cai pom zoo, peb nrog Vajtswv khi lus. Peb cog lus tias peb yuav ua raws li Nws cov lus txib thiab ua hauj lwm rau Nws kom tas peb lub neej (saib Mauxiyas 18:8–10, 13; Lus Qhuab Qhia thiab Kev Khi Lus 20:37).

Tom qab peb tau pib taug txoj kev ua raws li txoj moo zoo thaum peb ua kev cai raus dej thiab ua kev cai pom zoo, peb siv zog kom taug txoj kev ntawd tsis tu tsis tseg. Thaum peb ua yuam kev me ntsis xwb, peb muab siab rau ntseeg Yexus Khetos thiab hloov siab lees txim. Kev hloov siab lees txim pab peb rov qab los taug txoj kev ua raws li txoj moo zoo peb thiaj li tseem muaj cov koob hmoov los ntawm peb txoj kev khi lus nrog Vajtswv. Thaum peb hloov siab lees txim tiag tiag, Vajtswv yeej txaus siab zam txim pub rau peb thiab zoo siab txais peb.

Kev nyiaj mus kom txog thaum kawg txhais tias peb rau siab ntseeg Vajtswv kom mus txog thaum yuav tas ib sim neej no—txawm yog peb raug tej yam zoo thiab tej yam nyuaj los, txawm raug vam meej thiab raug txom nyem los yog. Peb txo hwj chim cia Yexus Khetos hloov peb lub neej thiab ua rau peb hloov los ua neeg zoo li Nws. Peb ntsia ntsoov Yexus Khetos thaum peb ntseeg, tso siab rau, thiab cia siab rau Nws tsis hais peb raug dab tsi los xij.

Kev nyiaj mus kom txog thaum kawg tsis hais tias peb nyiaj dhau mus txog thaum peb tuag xwb. Tiam sis, yog kev ua neej, xav txog, thiab ua tej yam raws li Yexus Khetos tau ua. Kev nyiaj mus yog kev muab siab rau ntseeg Yexus Khetos txhua hnub tsis tu tsis tseg. Peb kuj tseem hloov siab lees txim, ua raws li peb tej kev khi lus, thiab nrhiav kom muaj tus Vaj Ntsuj Plig Dawb Huv nrog peb nyob.

Kev nyiaj mus kom txog thaum kawg yog kev “sib zog mus lawm tom hauv ntej nrog txoj kev ntseeg Khetos uas khov kho, muaj ib txoj kev cia siab uas ci kawg nkaus, thiab muaj ib txoj kev hlub rau Vajtswv thiab rau tib neeg txhua tus.” Peb Leej Txiv Saum Ntuj Ceeb Tsheej cog lus tias thaum peb nyiaj mus kom txog thaum kawg, peb “yuav muaj txoj sia nyob mus ib txhis” (2 Nifais 31:20).

Kev Kawm Vaj Lug Kub

Nyiaj Kom Mus txog Thaum Kawg

Cov uas Nyiaj Mus Yuav Tau Koob Hmoov

Kawm Ntxiv txog lub Ntsiab Cai No

  • Txoj Moo Zoo tej Ntsiab Lus: “Nyuaj Siab”

  • Phau Qhia txog Vaj Lug Kub: “Nyiaj Dhau,” “Adversity”

Daim Duab
tsev neeg luag nyav

Yexus Khetos txoj Moo Zoo Foom Koob Hmoov rau Tag Nrho Vajtswv cov Me Nyuam

Yexus Khetos txoj moo zoo yeej pub rau tag nrho Vajtswv cov me nyuam. Cov vaj lug kub qhia tias “txhua tus yeej zoo tib yam rau Vajtswv” tsis hais peb tuaj qhov twg tuaj los sis raug xwm txheej dab tsi los yog. Nws caw “txhua tus kom los cuag nws thiab los txais yuav nws txoj kev tshav ntuj; thiab nws tsis txwv leej twg ntawm cov uas los cuag nws” (2 Nifais 26:33).

Txoj moo zoo foom koob hmoov rau peb tas peb lub neej thiab nyob mus ib txhis li. Peb yuav zoo siab tshaj plaws—tsis hais peb ib leeg thiab nyob hauv peb tsev neeg los yog—thaum peb ua neej raws li Yexus Khetos tej lus qhia (saib Mauxiyas 2:41; “Tsev Neeg: Ib zaj Lus Tshaj Tawm rau lub Ntiaj Teb,” ChurchofJesusChrist.org). Kev ua raws li txoj moo zoo ua rau peb haj yam xyiv fab, ua rau peb xav ua zoo, thiab pab peb nrog lwm tus sib raug zoo.

Kev ua neej raws li Yexus Khetos txoj moo zoo yuav pov hwm peb kom txhob xaiv tej yam uas ua rau peb raug mob ntawm sab cev nqaij daim tawv los sis sab ntsuj plig. Yuav pab peb muaj zog thiab nplij peb lub siab thaum lub sij hawm muaj kev sim siab thiab kev tu siab. Yeej qhib kev rau txoj sia nyob mus ib txhis uas muaj kev zoo siab kawg nkaus.

Ib zaj lus zoo tshaj plaws los ntawm txoj moo zoo uas tau muab txum tim rov qab los yog qhov uas peb txhua tus yog Vajtswv tsev neeg. Peb yog Nws cov tub thiab cov ntxhais uas Nws hlub. Txawm peb tsev neeg zoo li cas nyob hauv lub ntiaj teb los, peb txhua tus yog ib tug hauv Vajtswv tsev neeg.

Ib yam zoo ntawm peb zaj lus kuj yog qhov uas peb tsev neeg nyob tau ua ke mus ib txhis li. Vajtswv tau pom zoo rau tsev neeg. Leej Txiv Saum Ntuj Ceeb Tsheej txoj hau kev zoo siab ua rau kev ua niam ua txiv, ua tub ua ntxhais, ua kwv ua tij, ua neej ua tsa nyob mus li dhau lub qhov ntxa. Cov kab ke dawb ceev thiab tej kev khi lus hauv lub tuam tsev ua rau tej tsev neeg nyob ua ke mus ib txhis li.

Los ntawm txoj moo zoo txoj kev kaj, ib tsev neeg yuav kho tej kev to taub yuam kev, kev sib cav sib ceg, thiab tej teeb meem. Tej tsev neeg uas tau tawg los ntawm tej kev tsis sib haum yuav rov qab los nyob ua ke thaum lawv hloov siab lees txim, zam txim, thiab ntseeg Yexus Khetos txoj Kev Theej Txhoj lub hwj chim.

Yexus Khetos txoj moo zoo pab peb sib raug zoo nrog peb tsev neeg zoo dua ntxiv. Lub tsev yog qhov chaw zoo tshaj plaws kom qhia thiab kawm txoj moo zoo tej ntsiab cai. Ib lub tsev uas muaj lub hauv paus ntawm txoj moo zoo cov ntsiab cai yuav ua ib qho chaw uas pov hwm thiab nyab xeeb. Yuav yog ib qho chaw rau tus Tswv tus Ntsuj Plig nyob tau.

Kev Kawm Vaj Lug Kub

Kawm Ntxiv txog lub Ntsiab Cai No

Txheej Txheem Qhia uas Tsis Ntev Los Ntev Me Ntsis

Tus txheej txheem qhia no yog tej yam uas tej zaum koj yuav xav qhia ib tug neeg yog tias tsis muaj sij hawm ntev. Thaum koj siv tus txheej txheem qhia no, cia li xaiv ib los sis ob lub ntsiab cai kom qhia xwb. Cov lus qhuab qhia lub hauv paus rau txhua lub ntsiab cai los muaj nyob hauv zaj lus qhia no thaum xub thawj.

Thaum koj qhia, cia li nug tej yam thiab mloog lawv hais li cas. Caw tib neeg kom pab lawv kawm ua li cas kom muab siab npuab Vajtswv. Ib cov lus caw tseem ceeb yog kom tug neeg ntawd rov qab nrog koj sib ntsib ua ke. Qhov uas koj qhia ntev li cas yuav nyob ntawm seb koj nug tej yam twg thiab koj mloog zoo npaum li cas.

Daim Duab
tub txib qhia cov poj niam

Tej Yam uas Koj Qhia Tau Tib Neeg Thaum Muaj 3–10 Feeb

  • Vajtswv txib Nws tus Tub uas Nws Hlub, Yexus Khetos, los rau hauv lub ntiaj teb los txhiv peb dim kev txhaum thiab kev tuag.

  • Kev ntseeg Yexus Khetos yog ib lub ntsiab cai ntawm kev muaj peev xwm thiab hwj chim. Kev ntseeg pab peb txais tau tus Cawm Seej lub hwj chim uas txhawb nqa peb hauv peb lub neej.

  • Kev ntseeg Yexus Khetos yuav ua rau peb xav hloov siab lees txim. Kev hloov siab lees txim yog kev tig mus rau Vajtswv thiab kev tso kev txhaum tseg. Thaum peb hloov siab lees txim, ces tej yam peb ua thiab xav hloov kom haum Vajtswv lub siab nyiam.

  • Thaum peb hloov siab lees txim tiag tiag, Vajtswv zam txim rau peb. Peb txais tau kev zam txim vim Yexus Khetos tau theej peb lub txhoj.

  • Muaj ob hom kev cai raus: kev cai raus dej thiab kev cai raus ntawm tus Ntsuj Plig. Thaum peb ua kev cai raus dej thiab txais kev pom zoo, ces peb tej kev txhaum ploj mus, ua rau peb pib tau ib lub neej tshiab.

  • Tom qab peb ua kev cai raus dej, peb txais lub txiaj ntsim Vaj Ntsuj Plig Dawb Huv nyob hauv txoj kab ke ua kev pom zoo.

  • Thaum peb rau siab ntseeg ua raws li txoj moo zoo kom mus tas peb lub neej, Vajtswv cog lus tias peb yuav txais txoj sia nyob mus ib txhis.

Luam