“Kapitulo 8: Tumana ang Buhat pinaagi sa mga Tumong ug mga Plano,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)
“Kapitulo 8,” Isangyaw ang Akong Ebanghelyo
Kapitulo 8
Tumana ang Buhat pinaagi sa mga Tumong ug mga Plano
Hunahunaa Kini
-
Nganong kinahanglan man ko nga magtakda og mga tumong?
-
Sa unsang paagi nga ang importante nga mga timailhan alang sa pagkakabig makatabang kanako nga motutok sa espirituwal nga pag-uswag sa mga indibidwal?
-
Unsaon nako pagtakda og mga tumong, paghimo og mga plano sa pagtuman niini, ug sa pagpatuman sa akong mga plano?
-
Unsaon man nako pagpahigayon og sinemana ug inadlaw nga mga sesyon sa pagplano?
-
Unsaon nako paggamit ang Isangyaw ang Akong Ebanghelyo nga app aron sa pagtabang kanako sa pagtuman sa buhat?
-
Unsa ang baroganan sa pagkamay-tulubagon? Sa unsang paagi nga kini makapanalangin sa akong mga paningkamot?
Gisangonan ka sa pagtabang sa buhat sa Ginoo diha sa usa ka piho nga dapit. Gusto Siya nga panalanginan nimo ang mga indibidwal sa Iyang gugma ug kamatuoran. Gusto Siya nga imbitaron ug tabangan nimo sila nga moduol ngadto Kaniya.
Ang Ginoo nagtinguha nga ikaw “matinguhaon nga moapil [niini nga] maayo nga katuyoan.” Siya naghangyo nga ikaw “mobuhat og daghan nga mga butang diha sa [imong] kaugalingon nga gawasnon nga kabubut-on, ug magpahinabo sa daghan nga pagkamatarong” (Doktrina ug mga Pakigsaad 58:27; tan-awa sa mga bersikulo 26–29). Buhata ang tanan nimong mabuhat nga mobiya sa ward o branch diin ikaw nagserbisyo nga mas lig-on kay sa dihang miabot ka.
Kini nga kapitulo motabang kanimo sa pagkat-on unsaon sa pagtakda og mga tumong, paghimo og mga plano sa pagtuman niini, ug makugihong mopatuman sa imong mga plano. Kini naghulagway sa importante nga mga timailhan alang sa pagkakabig, nga mogiya sa imong mga paningkamot sa pagtabang sa mga anak sa Dios nga mouswag sa espirituwal nga paagi. Kini dayon mopresentar og yano nga proseso sa pagtakda og tumong nga imong magamit sa tanang aspeto sa misyonaryo nga buhat, lakip na sa imong personal ug managkompanyon nga mga tumong. Kini usab naglatid kon unsaon sa pagpahigayon og sinemana ug inadlaw nga mga sesyon sa pagplano uban sa imong kompanyon.
Ang pagkat-on sa pagtakda og mga tumong ug paghimo og mga plano makapanalangin kanimo sa imong tibuok kinabuhi. Kini makatabang kanimo sa paghimo ug sa pagtuman sa mga pakigsaad ngadto sa Dios, sa matinud-anong pagserbisyo diha sa Simbahan, sa pagtinguha og edukasyon, sa pagpalambo sa imong panarbaho, ug sa pag-ugmad og lig-on nga pamilya.
Pagtuon sa Kasulatan
Unsay imong makat-onan gikan sa mosunod nga mga kasulatan mahitungod sa pagplano aron matabangan nga matuman ang buhat sa Dios?
Tabangan ang Uban nga Mahimong Makabig ngadto sa Manluluwas
Itumong ang Imong Hunahuna sa Imong Misyonaryo nga Katuyoan
Tingali naghunahuna ka kon hain sa daghan nimong misyonaryo nga mga katungdanan ang labing importante. Usa kini ka maayo nga pangutana nga ikonsiderar samtang ikaw magtakda og tumong ug magplano matag semana ug matag adlaw. Aron matabangan sa pagtubag niini, hunahunaa ang kabahin sa imong katuyoan isip usa ka misyonaryo:
“Imbitara ang uban sa pagduol ngadto kang Kristo pinaagi sa pagtabang kanila nga makadawat sa gipahiuli nga ebanghelyo pinaagi sa pagbaton og hugot nga pagtuo diha ni Jesukristo ug sa Iyang Pag-ula, paghinulsol, pagpabunyag, pagdawat sa gasa sa Espiritu Santo, ug paglahutay hangtod sa kataposan.”
Himoa nga ang imong misyonaryo nga katuyoan mogiya sa imong mga tumong ug mga plano. Tutoki kon sa unsang paagi nga ikaw makatabang sa mga indibidwal nga mogamit sa ilang kabubut-on nga mahimong makabig ngadto sa Manluluwas ug makadawat sa Iyang ebanghelyo.
Tinguhaa ang giya sa Espiritu ug pakigtambag sa imong kompanyon samtang ikaw magtakda og mga tumong ug maghimo og mga plano. Dayon sunda ang imong mga plano ug gamita ang imong panahon sa epektibo nga paagi.
“Kita wala magsangyaw ug magtudlo aron sa ‘pagdala og mga katawhan ngadto sa Simbahan’ o sa pagpadaghan sa mga miyembro sa Simbahan. Kita wala magsangyaw ug magtudlo aron lamang sa pagdani sa mga tawo nga mopuyo og mas maayo nga mga kinabuhi. … Kita nag-imbitar sa tanan nga moduol kang Kristo pinaagi sa paghinulsol ug bunyag ug kompirmasyon aron maabli ang mga pultahan sa celestial nga gingharian ngadto sa mga anak nga lalaki ug mga anak nga babaye sa Dios. Walay lain ang makahimo niini” (Dallin H. Oaks, “The Purpose of Missionary Work,” misyonaryo nga satellite nga sibya, Abr. 1995).
Pagtuon sa Kasulatan
Giunsa niini nga mga misyonaryo ug mga propeta pagtuman sa ilang mga plano uban sa tabang sa Ginoo?
Pagpahiangay ngadto sa Importante nga mga Timailhan alang sa Pagkakabig
Ang mga lider sa Simbahan miila og unom ka importante nga mga timailhan alang sa pagkakabig. Ang importante nga mga timailhan motabang kanimo sa pagtutok sa espirituwal nga pag-uswag sa mga anak sa Dios. Kini gituyo aron sa pagtabang kanimo sa pagpahiangay sa imong inadlaw nga mga paningkamot ngadto sa imong misyonaryo nga katuyoan.
Ang importante nga mga timailhan alang sa pagkakabig gipakita sa ubos.
|
|
Bag-o nga mga Tawo nga Gitudloan. Matag tawo (wala pa mabunyagi) kinsa nakadawat og usa ka leksiyon sa nahisgotan nga semana (apan wala matudloi sa milabay nga tulo ka bulan) ug midawat og piho nga panagsabot nga makigkita og balik. Ang usa ka leksiyon kasagaran maglakip og pag-ampo (kon tukma), pagtudlo sa dili momenos sa usa ka baroganan sa ebanghelyo, ug pagpadangat og imbitasyon. |
|
|
Mga Leksiyon nga adunay usa ka Miyembro nga Miapil. Ang gidaghanon sa mga leksiyon sa nahisgotan nga semana diin ang usa ka tawo (wala mabunyagi) gitudloan ug usa ka miyembro ang miapil. |
|
|
Mga Tawo nga Gitudloan Kinsa Mitambong og Panagtigom alang sa Sakramento. Matag tawo (wala mabunyagi) nga inyong gitudloan kinsa nakatambong og panagtigom alang sa sakramento sa nahisgotan nga semana. |
|
|
Mga Tawo nga dunay Petsa sa Bunyag. Matag tawo nga miuyon nga magpabunyag ug magpakompirma sa usa ka piho nga petsa. |
|
|
Mga Tawo Kinsa Nabunyagan ug Nakompirmahan. Matag bag-o nga miyembro nga nakadawat sa mga ordinansa sa bunyag ug kompirmasyon ug kang kinsa ang porma nasumiter sa elektronik nga paagi sa gihisgotan nga semana. (Tan-awa sa kapitulo 12 alang sa kahulogan sa usa ka bunyag sa kinabig ug alang sa impormasyon sa paghimo og mga rekord.) |
|
|
Bag-ong mga Miyembro nga Nagtambong sa Panagtigom alang sa Sakramento. Matag bag-o nga miyembro kansang Porma sa Bunyag ug Kompirmasyon nasumiter sulod sa milabay nga 12 ka bulan kinsa mitambong og panagtigom alang sa sakramento sa nahisgotan nga semana. |
Sa katingbanan, hatagi og prayoridad ang pagtabang sa mga tawo nga mopili sa pag-apil niini nga mga kasinatian. Isentro ang inyong mga paningkamot sa mosunod nga mga kalihokan:
-
Kadtong motabang kaninyo sa pagpangita og bag-o nga mga tawo nga katudloan
-
Kadtong motabang sa mga tawo nga mouswag paingon sa paghimo ug pagtuman sa mga pakigsaad
-
Kadtong motabang sa mga tawo kinsa nabunyagan ug nakompirmahan sa miaging tubig
Kon dili kamo makakita kon sa unsang paagi nga ang inyong mga paningkamot makatabang sa usa ka tawo nga mouswag sa paagi nga mapakita diha sa inyong importante nga mga timailhan, timbang-timbanga kon ang kalihokan usa ba ka maayo nga gamit sa inyong panahon.
Alang sa mga tawo nga inyong gahinan og menos nga panahon, padayon sa pag-amuma sa ilang interes sa ebanghelyo. Mahimo ninyong imbitaron ang mga miyembro nga mokontak kanila. Mahimo usab ninyong gamiton ang teknolohiya sa pag-awhag kanila ug sa pagpadayon sa pangalagad ngadto kanila. Tan-awa sa “Gamita ang Teknolohiya” diha sa kapitulo 9 alang sa dugang nga mga ideya.
“Ang labing dako nga katuyoan sa pagplano ug pagtakda og mga tumong mao ang paghimo og mga disipulo—kana mao, ang pagbaton og mapahinungoron nga mga kinabig kinsa mohimo ug motuman og sagrado nga mga pakigsaad, sugod sa pakigsaad sa bunyag nga modala ngadto sa mga pakigsaad sa templo” (Quentin L. Cook, “Purpose and Planning,” seminar sa pagpangulo sa misyon, Hunyo 25, 2019).
Pagtakda og mga Tumong sa Importante nga mga Timailhan ug Paghimo og mga Plano
Atol sa sinemana nga pagplano, ikaw ug ang imong kompanyon magtakda og mga tumong alang sa tanang importante nga mga timailhan. Ang inyong mga tumong sa importante nga mga timailhan kinahanglang magpakita sa inyong tinguha sa pagtabang og daghan pang mga tawo nga makasinati sa mga panalangin sa pagkakabig.
Pagtakda og mga tumong ug paghimo og mga plano sa pagbuhat sa mga butang nga anaa sa inyong kontrol nga makaimpluwensya sa mga sangpotanan sa importante nga mga timailhan. Pananglitan:
-
Mahimo kamong magtakda og tumong sa importante nga timailhan aron sa pagsugod og tudlo sa piho nga gidaghanon sa bag-o nga mga tawo atol sa semana. Kon makab-ot ba ninyo kana nga tumong nagdepende sa kabubut-on sa ubang mga tawo. Apan buhata kon unsay anaa sa inyong kontrol aron sa pagtuman niini. Usa ka paagi mao ang pagtakda og tumong sa pakig-estorya sa piho nga gidaghanon sa bag-o nga mga tawo sa matag adlaw. Dayon pagplano kon unsaon ninyo kana pagbuhat. Tan-awa ang mga ideya diha sa Apendiks 2 niini nga kapitulo ug diha sa kapitulo 9.
-
Mahimo kamong magtakda og mga tumong sa importante nga timailhan aron adunay piho nga gidaghanon sa bag-o nga mga miyembro ug mga tawo nga inyong gitudloan nga motambong sa panagtigom alang sa sakramento. Kon moadto ba sila o dili nagdepende sa ilang kabubut-on. Apan buhata kon unsay anaa sa inyong kontrol sa pag-impluwensya sa mga sangpotanan niining importante nga timailhan. Pagplano kon kanus-a sila imbitaron ug unsaon sa pag-follow up.
-
Mahimo kamong magtakda og tumong sa importante nga timailhan aron adunay mga miyembro nga moapil diha sa piho nga gidaghanon sa mga leksiyon atol sa semana. Kon makab-ot ba ninyo kana nga tumong nagdepende sa mga miyembro ug sa mga tawo nga inyong gitudloan. Apan buhata kon unsay anaa sa inyong kontrol sa pag-impluwensya sa sangpotanan niining importante nga timailhan. Pagtakda og tumong sa pakigtambayayong sa mga lider sa ward aron adunay mga miyembro nga moapil. Dayon pagplano kon unsaon ninyo sa pakigsabot sa ilang partisipasyon.
Isip managkompanyon, kamo ang motakda sa mga tumong sa importante nga timailhan alang sa inyong kaugalingon nga area. Ibase kini (1) sa pag-uswag niadtong inyong gitudloan ug (2) sa panginahanglan sa pagpangita og bag-o nga mga tawo nga katudloan. Ang pagpangita og bag-o nga mga tawo nga katudloan usa ka kanunay nga panginahanglan.
Ang tibuok misyon nga mga tumong sa importante nga mga timailhan gibase sa mga tumong nga gitakda sa matag managkompanyon.
Ang Isangyaw ang Akong Ebanghelyo nga app motabang kaninyo nga magpabiling nakatutok sa mga tawo samtang kamo magtakda og mga tumong sa importante nga mga timailhan. Kini nga app motabang usab kaninyo nga makat-on gikan sa nangagi nga mga tumong ug mopakita sa inyong pag-uswag paingon sa kasamtangan nga mga tumong.
Ang mga tumong ug mga resulta sa importante nga mga timailhan awtomatik nga mareport ngadto sa inyong mga lider sa misyon ug sa batan-ong mga lider sa misyonaryo pinaagi sa Isangyaw ang Akong Ebanghelyo nga app.
Pagmainampingon nga dili hatagan og gibug-aton ang usa ka tumong sa importante nga timailhan labaw sa uban. Ang usa ka nagpadayon nga pagtutok sa tanang importante nga mga timailhan motabang kaninyo nga makanunayong moimbitar sa uban nga moduol ngadto kang Kristo ug mohimo og mga pakigsaad.
“Kon ang binuhatan gisukod, ang binuhatan molambo. Kon ang binuhatan gisukod ug gireport, ang kapaspason sa paglambo magkakusog” (gikutlo ni Thomas S. Monson, “Thou Art a Teacher Come from God,” Improvement Era, Dis. 1970, 101).
Makugihon nga Motrabaho
Ang Ginoo nagtinguha nga ikaw “[mo]buhat … diha sa tanan nga kakugi” sa imong misyonaryo nga pagserbisyo (Doktrina ug mga Pakigsaad 107:99). Ang kakugi mao ang kanunay, tinuoray nga paningkamot.
Makugihon nga motrabaho sa inyong mga tumong sa importante nga timailhan. Imbitara ang mga tawo nga mohimo og mga pasalig nga mosangpot sa pagkakabig. Ang inyong makugihon nga mga paningkamot makapadasig kanila sa paghimo og mga aksiyon nga motabang kanila nga moduol ngadto kang Kristo (tan-awa sa 2 Nephi 2:14–16).
Itudlo ang ebanghelyo sa mga paagi nga motubag sa mga panginahanglan sa mga tawo. Ang doktrina, kon masabtan pinaagi sa Espiritu, mas lagmit nga modasig kanila sa paglihok kaysa bisan unsang butang.
Sa samang higayon, ilha nga ang mga tumong sa importante nga timailhan nagdepende sa kabubut-on sa uban. Tahora kanunay ang kabubut-on sa mga tawo.
Hinumdomi nga ang importante nga mga timailhan dili mao ang kataposan nga tumong. Hinuon, kini nagrepresentar sa potensiyal sa usa ka tawo sa espirituwal nga pag-uswag ngadto sa bunyag, kompirmasyon, ug malahutayon nga pagkakabig. Ang aktuwal nga pag-uswag sa mga tawo nagdepende sa ilang mga pagpili. Kamo mosuporta sa ilang pag-uswag pinaagi sa pagpakita og hugot nga pagtuo kang Kristo alang kanila samtang kamo magtakda og mga tumong, magplano, makugihong molihok, ug mangalagad kanila diha sa usa ka dinasig nga paagi.
Unsaon sa Pagtakda og mga Tumong ug Paghimo og mga Plano aron sa Pagtuman Niini
Ang paghimo og tumong ug pagplano mao ang mga buhat sa hugot nga pagtuo. Ang mga tumong nagpakita sa mga tinguha sa imong kasingkasing ug sa imong panglantaw sa pagtabang sa imong kaugalingon ug sa uban nga moduol ngadto sa Manluluwas.
Ang mainampingon nga gikonsiderar nga mga tumong ug mga plano mohatag kanimo og klaro nga direksiyon. Makatabang kini kaninyo sa pagpangita og daghan pang mga tawo nga katudloan. Makagiya kini kaninyo sa pagtabang niadtong inyong gitudloan nga molig-on ang ilang hugot nga pagtuo ug mouswag paingon sa pagkakabig.
Himoa ang inyong pagtakda og tumong ug pagplano nga usa ka dinasig nga kasinatian. Matinguhaon nga mag-ampo, mopakita og hugot nga pagtuo, makigtambag sa imong kompanyon, ug mosunod sa mga pag-aghat sa Espiritu. Samtang magplano kamo niini nga paagi, mabati ninyo ang Ginoo nga naglihok pinaagi kaninyo aron sa pagpanalangin sa uban.
“Ang tumong usa ka destinasyon o kataposan, samtang ang plano mao ang rota aron makaabot mo didto. … Ang pagtakda og tumong magsugod nga maghunahuna sa kataposan. Ug ang pagplano mao ang paghimo og paagi aron moabot niana nga kataposan” (M. Russell Ballard, “Mobalik ug Modawat,” Liahona, Mayo 2017, 62–63).
Mga Baroganan alang sa Pagtakda ug Pagtuman sa mga Tumong
Ang mosunod nga mga proseso motabang kanimo sa pagtakda ug pagtuman sa mga tumong.
-
Mainampoon nga motakda og mga tumong ug magplano. Pagtakda og mga tumong nga makitinuoron [realistic] apan mohagit kanimo ug magkinahanglan og hugot nga pagtuo. Likayi ang pagtakda og mga tumong nga taas ra kaayo o ubos ra kaayo. Planoha kon unsaon nimo pagtuman niini.
-
Irekord ug Ieskedyul. Irekord ang imong mga tumong ug mga plano diha sa usa ka detalyado nga eskedyul.
-
Buhata ang imong mga plano. Makugihon nga motrabaho sa pagtuman sa imong mga tumong. Mopakita og hugot nga pagtuo nga ang Ginoo motabang kanimo.
-
Magrebyo ug mag-follow up. Timbang-timbanga ang pag-uswag ug irekord ang imong pag-uswag kanunay. Desisyoni kon unsa ang buhaton sa lahi nga paagi ug kon unsaon sa pagpalambo. Ipahiangay ang mga plano kon gikinahanglan.
Kon gamiton nimo kini nga proseso sa pagtakda og tumong, ang Ginoo mopadako sa imong mga paningkamot. Motubo ka sa imong kapasidad isip usa ka instrumento diha sa Iyang mga kamot. Makapahinabo ka og daghang kaayohan sa pagpanalangin sa mga anak sa Langitnong Amahan.
Pagtakda og mga Tumong ug Paghimo og mga Plano diha sa Tanang Aspeto sa Buhat
Mainampoon sa pagtinguha og giya sa Espiritu samtang imong gamiton ang proseso sa pagtakda og tumong ngadto sa tanang aspeto sa misyonaryo nga buhat. Ang pipila niini naglakip sa:
-
Pagtabang sa mga tawo nga imong gitudloan nga makahimo og pag-uswag (tan-awa sa Apendiks 1 niini nga kapitulo).
-
Pagpangita og bag-o nga mga tawo nga katudloan (tan-awa sa Apendiks 2 niini nga kapitulo).
-
Pakigtambayayong sa mga miyembro ug pagserbisyo sa mga tawo diha sa komunidad ug sa ward (tan-awa sa mga kapitulo 9 ug 13).
-
Pakigtambayayong sa panaghiusa sa imong kompanyon (tan-awa sa aytem 6 diha sa “Sinemana nga Pagplano nga Sesyon”).
-
Pagpalig-on sa imong hugot nga pagtuo diha ni Jesukristo.
-
Pagpalambo sa imong kahibalo ug mga abilidad, lakip sa pagkat-on og pinulongan (tan-awa sa kapitulo 7).
Pagtakda og Angay nga mga Tumong
Likayi ang pagtakda og mga tumong sa importante nga timailhan alang sa ubang mga misyonaryo. Hinuon, ikaw mahimong mogiya ug modasig kanila sa paggamit sa mga baroganan sa pagtakda og tumong samtang nagtakda sila og ilang kaugalingon nga mga tumong.
Pagmainampingon nga dili mohimo og mga pagtandi sa uban.
Ayaw gamita ang pagkab-ot sa tumong isip usa ka kuta, aron daygon sa publiko, o sa pagkorihir o pagpakaulaw ni bisan kinsa diha sa publiko.
“Nagtuo gayod kita sa pagtakda og mga tumong. Nagpakabuhi kita pinaagi sa mga tumong. … [Usa] ka importante nga tumong mao ang pagdala sa ebanghelyo ngadto sa tanang tawo. … Ang atong tumong mao ang pagkab-ot sa kinabuhi nga dayon. Mao kana ang kinadak-an nga tumong sa kalibotan” (Spencer W. Kimball, seminar sa mga representante sa rehiyon, Abr. 3, 1975, 6).
Pagpahigayon og Sinemana ug Inadlaw nga mga Sesyon sa Pagplano
Ang sinemana nga pagplano motabang kanimo nga makakita sa kinatibuk-an ug makatutok sa mga tawo. Kini usab motabang kanimo nga motutok sa mga kalihokan nga labing importante. Ang inadlaw nga pagplano motabang kanimo nga mopahiangay ug mangandam sa paghimo og piho nga aksiyon matag adlaw. Ganahan kang mahimong mabungahon, dili lang bisi.
Atol sa mga sesyon sa pagplano, pangutan-a ang imong kaugalingon sa sukaranan nga mga pangutana mahitungod sa unsay imong gibati nga ipabuhat sa Ginoo kanimo. Pagtinguha og inspirasyon sa pagtubag niini nga mga pangutana sa mga paagi nga angay alang sa matag sitwasyon ug tawo. Ang mga tubag kinahanglan gamiton inig himo nimo sa imong mga plano.
Sinemana nga Sesyon sa Pagplano
Pagpahigayon og sinemana nga sesyon sa pagplano kauban sa imong kompanyon sa adlaw ug sa oras nga gitakda sa inyong presidente sa misyon. Sunda ang mga lakang sa ubos.
-
Pag-ampo ug pagtinguha og inspirasyon. Hangyoa ang Langitnong Amahan sa paggiya kanimo sa paghimo og mga plano nga motabang sa pagtuman sa Iyang mga katuyoan. Hangyoa siya sa pagpanalangin sa imong mga paningkamot sa pagtabang sa mga tawo nga mouswag ug moduol ngadto kang Kristo.
-
Pagtakda og mga tumong ug paghimo og mga plano alang sa tanang importante nga mga timailhan gamit ang Isangyaw ang Akong Ebanghelyo nga app. Gamita ang proseso sa pagtakda og tumong nga gihulagway sa nahaunang bahin niini nga kapitulo. Pagsugod sa:
-
Mga tawo nga nabunyagan ug nakompirmahan sulod sa miaging tuig.
-
Mga tawo nga adunay petsa sa bunyag.
-
Mga tawo nga inyong gitudloan kinsa mitambong sa panagtigom alang sa sakramento.
-
Bag-o nga mga tawo nga gitudloan.
-
Mibalik nga mga miyembro, mga pamilya nga dili tanan miyembro sa Simbahan, ug umaabot nga mga elder.
-
Mga tawo nga gitudloan kaniadto.
Tan-awa sa Apendiks 1 niini nga kapitulo alang sa mga ideya mahitungod sa paggamit sa proseso sa pagtakda og tumong diha sa pakigtambayayong sa mga tawo nga inyong gitudloan.
-
-
Gamita ang proseso sa pagtakda og tumong aron sa pagpangita og mga tawo nga katudloan (tan-awa sa Apendiks 2 niini nga kapitulo ug sa kapitulo 9 alang sa tabang sa pagpangita).
-
Gamita ang proseso sa pagtakda og tumong aron sa pag-ugmad og mga relasyon uban sa mga lider ug mga miyembro sa ward. Pagtakda og mga tumong ug paghimo og mga plano kon unsaon nimo pagsuporta kanila sa ilang mga paningkamot sa pagpakigbahin sa ebanghelyo (tan-awa ang mga ideya diha sa mga kapitulo 9 ug 13). Pag-andam alang sa sinemana nga miting sa pakigsabot sa ward (tan-awa sa kapitulo 13).
-
Rebyoha ang imong mga plano ug mga tumong sa Isangyaw ang Akong Ebanghelyo nga app. Ikompirmar ang imong mga eskedyul ug mga miting.
-
Pagpahigayon og konseho sa managkompanyon. Kini sa kasagaran naglakip sa mosunod nga mga elemento:
-
Kon gitinguha, pagpakigbahin og tukma nga personal nga mga tumong ug pangayo og tabang sa imong kompanyon sa pagtuman niini.
-
Hisgoti ang kalig-on sa inyong relasyon. Hisgoti ang bisan unsa nga mga hagit sa pagkahimong masulundon o sa pagtrabaho nga nagkahiusa. Sulbara ang bisan unsa nga mga panagbingkil pinaagi sa (1) pagtugot sa matag tawo nga hingpit nga mopahayag sa iyang mga panglantaw, (2) pagsabot ug pagdawat sa mga problema sa matag tawo, ug (3) manag-uban sa paghimo og solusyon nga motubag sa labing importante nga mga problema.
-
Ipakigbahin sa imong kompanyon kon unsa sa imong hunahuna nga maoy iyang mga kalig-on. Pangayo og mga sugyot kon unsaon nimo sa paglambo.
-
Pagtakda og mga tumong nga mopalambo sa inyong relasyon.
Ang mga konseho sa managkompanyon makatabang kanimo sa pagpalambo og importante nga mga kahanas nga imong magamit sa imong personal ug pamilya nga kinabuhi, pagserbisyo sa Simbahan, panarbaho, ug ubang mga asosasyon.
-
-
Taposa uban sa pag-ampo.
Inadlaw nga Sesyon sa Pagplano
Pagtakda og mga tumong ug paghimo og mga plano uban sa imong kompanyon sulod sa 30 minutos matag buntag. Sunda ang mga lakang sa ubos.
-
Pag-ampo ug pagtinguha og inspirasyon.
-
Rebyoha ang pag-uswag paingon sa inyong sinemana nga mga tumong sa importante nga mga timailhan.
-
Rebyoha ang inyong mga plano sa pagtabang sa mga tawo nga inyong gitudloan. Hatagi og prayoridad ang inyong mga paningkamot sa pagtabang niadtong kinsa naghimo sa kinadak-an nga pag-uswag. Ipahiangay ang inadlaw nga mga tumong ug mga plano kon gikinahanglan.
-
Buhata ang mga aksiyon nga inyong himoon nianang adlawa sa pagpangita og bag-o nga mga tawo nga katudloan ug sa pagtabang sa mga tawo nga inyong gitudloan.
-
Planohi kon unsaon ninyo nga makigtambayayong sa lokal nga mga lider ug mga miyembro.
-
Taposa uban sa pag-ampo.
Pagtuon uban sa Kompanyon
Rebyoha ang Apendiks 1 ug Apendiks 2 sa kataposan niini nga kapitulo alang sa mga ideya mahitungod unsaon sa paggamit sa proseso sa pagtakda og tumong diha sa pagtudlo ug pagpangita. Ilha kon unsaon ninyo sa paggamit ang pipila niini nga mga ideya.
Gamita ang Isangyaw ang Akong Ebanghelyo nga App
Kabahin niadtong nabunyagan sa iyang panahon, si Moroni miingon, “Ang ilang mga ngalan gikuha, nga sila mahinumdoman ug maamumahan pinaagi sa maayo nga pulong sa Dios, aron pag-agak kanila sa matarong nga agianan” (Moroni 6:4). Ang pagtipig og maayo nga mga rekord mao ang usa ka paagi nga inyong magamit kini nga baroganan.
Irekord ang Inyong mga Paningkamot
Ang pagtipig og mga rekord kabahin sa makugihon nga pagbantay sa inyong area inubanan sa gugma ug pakabana. Tipigi nga tukma ug gi-update ang inyong mga rekord. Motabang kini kaninyo nga mahinumdom kon unsa ang inyong gikinahanglan nga buhaton aron sa pagtabang sa mga tawo.
Ang Isangyaw ang Akong Ebanghelyo nga app motugot kaninyo sa pagpakigsabot ug pagpakigbahin sa importante nga impormasyon ngadto sa lokal nga mga lider ug mga miyembro bahin sa pag-uswag sa mga tawo ug sa buhat.
Sunda ang mga Sumbanan sa Datos ug Pagkapribado
Sunda ang mga sumbanan sa pagtipig og datos ug sa pagkapribado kon magrekord og mga tumong ug mga plano diha sa Isangyaw ang Akong Ebanghelyo nga app ug diha sa giimprinta nga mga himan. Alang sa impormasyon, tan-awa sa Mga Sumbanan sa Misyonaryo alang sa mga Disipulo ni Jesukristo, 7.5.
Pangutan-a ang inyong kaugalingon sa mosunod nga mga pangutana sa dili pa kamo morekord o mopakigbahin og impormasyon diha sa Isangyaw ang Akong Ebanghelyo nga app, email, social media, mubo nga mga sulat, o ubang mga komunikasyon:
-
Unsa kaha ang bation niini nga tawo mahitungod sa unsay akong girekord?
-
Unsa kaha ang akong bation kon ang usa ka tawo mipakigbahin niini nga matang sa impormasyon mahitungod nako ngadto sa uban?
-
Gisunod ba nako ang mga palisiya sa Simbahan ug mga balaod sa pagkapribado sa datos alang sa akong area kon ako morekord o mopakigbahin niini nga impormasyon?
Pagkamay-tulubagon
Ang baroganan sa pagkamay-tulubagon mahinungdanon diha sa mahangtoron nga plano sa Dios (tan-awa sa Alma 5:15–19; Doktrina ug mga Pakigsaad 104:13; 137:9). Kini nga baroganan nag-impluwensya kon unsa ang imong hunahuna ug gibati mahitungod sa sagrado nga responsibilidad nga gihatag sa Ginoo kanimo. Ang pagkamay-tulubagon nag-impluwensya usab kon unsaon nimo paghimo ang imong buhat.
Atol sa Iyang yutan-on nga pangalagad, ang Manluluwas mihatag og mga buluhaton ngadto sa Iyang mga disipulo aron sa pagtabang nila nga motubo, molambo, ug motuman sa Iyang buhat. Siya usab mihatag kanila og mga oportunidad sa paghatag og subay sa buhat nga gihatag kanila nga himoon (tan-awa sa Lucas 9:10; 3 Nephi 23:6–13). Isip usa ka misyonaryo, ikaw usab mohatag og subay alang sa buhat nga gihatag sa Ginoo nga imong himoon.
Himoa ang imong pagtakda og tumong ug pagplano uban sa ideya nga ikaw mohatag og subay ngadto sa Ginoo matag adlaw pinaagi sa pag-ampo. Magmahimong may tulubagon usab sa imong kaugalingon ug sa imong mga lider sa misyon.
Ang paghatag og subay kinahanglan nga usa ka mahigugmaon, positibo nga kasinatian diin ang imong mga paningkamot maila ug ikaw moila og mga paagi nga ikaw mahimong mouswag.
Pagtuon sa Kasulatan
Unsa man ang buot ipasabot nga magmahimong may tulubagon?
Nganong ang kabubut-on importante man diha sa pagkamay-tulubagon?
Unsaon man sa misyonaryo ug sa lider sa misyon sa pagtinabangay og trabaho?
Unsa ang gisaad sa Ginoo ngadto niadtong kinsa matinud-anon sa ilang mga responsibilidad?
Mga Ideya sa Pagtuon ug Paggamit
Personal nga Pagtuon
-
Ikonsiderar ang mosunod nga kapahayag gikan sa imong sulat sa tawag: “Samtang imong igahin ang imong panahon ug atensiyon sa pag-alagad sa Ginoo, biyaan ang tanang personal nga mga kalihokan, ang Ginoo mopanalangin kanimo og dugang kahibalo ug pagpamatuod ni Jesukristo ug sa Iyang gipahiuli nga ebanghelyo.” Pangutan-a ang imong kaugalingon sa mosunod nga mga pangutana, ug irekord ang imong mga impresyon.
-
Unsa may akong gibuhat sa pagpahinungod sa akong panahon ug atensiyon sa pagserbisyo sa Ginoo?
-
Unsa nga mga panalangin ang akong nasinati?
-
Sa unsa nga paagi nga ang akong pagpamatuod nalig-on?
-
Unsaon man nako sa pagpalambo?
-
-
Pamalandong og pipila ka gutlo sa paghunahuna kabahin sa imong kataposan nga adlaw sa misyon. Kon kanang adlawa moabot:
-
Unsa ang imong gusto nga mahisama ang imong relasyon sa Langitnong Amahan ug ni Jesukristo?
-
Unsa man ang imong gusto nga mamahimo sa umaabot?
Sa imong journal sa pagtuon, pagsulat og tubag sa kada usa niini nga mga pangutana. Gamita ang proseso sa pagtakda og tumong aron sa pagplano kon unsa ang imong mabuhat karon paingon niini nga mga tumong. Irekord ang imong mga plano.
-
Pagtuon uban sa Kompanyon ug Panagbaylo sa Kompanyon
-
Gamita ang Isangyaw ang Akong Ebanghelyo nga app, tubaga ang mga pangutana sa ubos:
-
Ang tanang rekord ba bag-o ug tukma?
-
Makabenipisyo ba ang usa ka misyonaryo nga bag-o sa area gikan sa inyong rekord sa inyong mga paningkamot sa pagpangita og bag-o nga mga tawo nga katudloan?
-
Kon inyong rebyohon ang inyong app karon, makatabang ba kini kaninyo nga mahibalo kon asa ang mga tawo? Makatabang ba kini kaninyo nga mahibalo mahitungod sa ilang pag-uswag?
-
Konseho sa District, mga Komperensiya sa Zone, ug Konseho sa Pagpangulo sa Misyon
-
Imbitara ang mga misyonaryo sa pagpakigbahin og mga kasinatian bahin sa mga tumong nga ilang gitakda ug mga plano nga ilang gihimo aron sa pagtabang sa mga tawo nga mouswag. Ang mga ehemplo mahimong maglakip og mga tumong ug mga plano sa pagtabang sa mga tawo nga:
-
Makapalambo og mas dakong hugot nga pagtuo sa Manluluwas.
-
Maghinulsol ug mohimo og mga kausaban aron mas magpaduol ngadto sa Dios.
-
Magpabunyag ug magpakompirma.
-
Mobalik sa Simbahan ug sa pagbag-o sa ilang pakigsaad sa bunyag.
-
-
Basaha ang usa sa mosunod nga mga sitwasyon ngadto sa mga misyonaryo. Bahin-bahina ang mga misyonaryo ngadto sa gagmay nga mga grupo. Ipagamit sa matag grupo ang mga lakang 1 ug 2 diha sa proseso sa pagtakda og tumong aron sa pagtabang sa mga tawo niini nga mga ehemplo nga mouswag ngadto sa bunyag ug kompirmasyon. Tugoti ang matag grupo nga mopakigbahin sa ilang mga ideya.
-
Usa ka tawo nga inyong gitudloan midawat sa imbitasyon nga mosimba niining semanaha.
-
Usa ka tawo midawat sa imbitasyon sa bunyag ug mitakda og tumong uban kaninyo nga magpabunyag.
-
Usa ka tawo midawat sa inyong imbitasyon nga mobasa sa Basahon ni Mormon ug mipasalig nga mobasa sa 1 Nephi 1.
-
-
Imbitara ang mga misyonaryo sa paggamit sa Isangyaw ang Akong Ebanghelyo nga app aron sa pagtabang kanila sa pagtakda og makitinuoron ug mahagiton nga mga tumong pinaagi sa:
-
Pagrebyo sa miagi nga talaan sa importante nga timailhan ug pag-uswag.
-
Pagtakda og inadlaw, sinemana, ug binulan nga mga tumong.
-
Pagdugang og mga tawo ngadto sa mga tumong sa importante nga timailhan.
Hisgoti kon sa unsa nga paagi kini nga mga lakang makatabang sa mga misyonaryo nga mas epektibong magplano samtang sila motabang sa mga tawo nga mouswag. Hangyoa ang mga misyonaryo sa pagkonsiderar sa mosunod:
-
Unsaon man ninyo paggamit ang Isangyaw ang Akong Ebanghelyo nga app sa umaabot samtang kamo magplano?
-
Unsa ang ubang mga paagi nga inyong nadiskobrehan nga mas epektibong magamit ang app?
-
Mga Lider sa Misyon ug Mga Magtatambag sa Misyon
-
Rebyoha kanunay ang Isangyaw ang Akong Ebanghelyo nga app sa mga misyonaryo. Imbitara sila sa pagpakigbahin kon giunsa nila kini paggamit aron sa pagsubay sa ilang mga tumong ug mga plano ug sa pagtabang sa mga tawo nga mouswag.
-
Usahay obserbahi ang sinemana o inadlaw nga mga sesyon sa pagplano sa mga misyonaryo.
Apendiks 1
Gamita ang Proseso sa Pagtakda og Tumong diha sa Pakigtambayayong sa mga Tawo nga Inyong Gitudloan
Kini nga seksiyon naghatag og mga ehemplo kon unsaon ninyo paggamit ang proseso sa pagtakda og tumong aron sa pagtabang sa mga tawo nga inyong gitudloan.
1. Pagtakda og mga Tumong ug Paghimo og mga Plano
Mainampoon nga ikonsiderar ang espirituwal nga mga panginahanglan sa mga tawo nga inyong gitudloan. Pagtakda og mga tumong ug paghimo og mga plano nga motabang kanila sa pagtubag niini nga mga panginahanglan. Gamita ang Isangyaw ang Akong Ebanghelyo nga app sa pagrebyo sa pag-uswag sa matag tawo. Gamita ang importante nga mga timailhan alang sa pagkakabig aron sa pag-ila og mga aksiyon nga motabang sa matag tawo nga mohimo sa sunod nga lakang sa pagduol ngadto kang Kristo.
Samtang kamo magtakda og mga tumong ug maghimo og mga plano, pangutan-a ang inyong kaugalingon og mga pangutana nga sama niini:
-
Unsa nga mga pagpili ang gihimo sa tawo nga nagpakita og nagtubo nga hugot nga pagtuo diha ni Jesukristo?
-
Unsa nga mga kasinatian ang nabatonan sa tawo uban sa Espiritu?
-
Unsa kaha nga mga hagit nga iyang giatubang?
-
Unsa pa ang atong makat-onan gikan niini nga tawo aron matabangan siya?
-
Unsa ang gikinahanglan nga mahitabo aron matabangan kini nga tawo nga makaugmad og hugot nga pagtuo diha ni Jesukristo, mobati ug makaila sa Espiritu, maghinulsol, ug magpabunyag?
-
Sa unsa nga paagi kita makaandam alang sa sinemana nga miting sa pakigsabot sa ward aron sa paglakip sa mga lider sa ward ug mga miyembro sa pagtabang niini nga tawo? (Tan-awa sa kapitulo 13.)
-
Unsa nga mga tumong sa importante nga mga timailhan ang atong matakda nga magpakita sa atong hugot nga pagtuo sa Ginoo?
2. Irekord ug Ieskedyul ang Inyong mga Plano
Gamita ang Isangyaw ang Akong Ebanghelyo nga app aron irekord ug ieskedyul ang inyong mga tumong ug mga plano sa detalyado nga paagi. Kini motabang kaninyo sa pag-organisar sa buhat ug pag-ila og mga aksiyon nga himoon sa matag adlaw. Sunda ang mga balaod sa pagkapribado sa datos alang sa inyong area.
Samtang inyong irekord ug ieskedyul ang inyong mga plano, pangutan-a ang inyong kaugalingon og mga pangutana sama niini:
-
Unsa nga piho nga mga butang ang atong mahimo karon ug niini nga semana aron sa pagsuporta sa pag-uswag niini nga tawo?
-
Unsa nga doktrina (o leksiyon) ang makatabang niini nga tawo nga makapalambo og mas lig-on nga hugot nga pagtuo kang Kristo ug mosunod sa ebanghelyo? Unsaon nato sa pagtudlo niini nga doktrina aron makasabot siya niini ug mahatagan og kaayohan sa Espiritu Santo?
-
Unsaon ug kanus-a nato ikompirmar ang mga pakigkita?
-
Unsa nga mga imbitasyon ang kinahanglan natong ihatag o i-follow up? Unsaon ug kanus-a kita mo-follow up?
-
Unsaon ug kanus-a nato tabangan ang tawo nga mosimba, magbasa sa mga kasulatan, mag-ampo, ug motuman sa mga pasalig nga mosangpot ngadto sa paghimo og mga pakigsaad sa Dios?
-
Sa unsang paagi nga ang mga miyembro makaapil?
-
Unsa nga online nga mga kapanguhaan ang atong mapakigbahin ngadto sa tawo?
-
Unsa nga backup nga mga plano ang atong mahimo kon dili mahitabo ang usa ka butang segun sa giplano?
3. Buhata ang Iyong mga Plano
Pagbaton og pag-ampo diha sa inyong kasingkasing sa tibuok adlaw samtang inyong buhaton ang inyong mga plano. Ang Espiritu motabang kaninyo nga mahibalo kon asa moadto, unsa ang buhaton, unsa ang isulti, ug unsa nga mga pagpahiangay ang himoon.
Atol sa adlaw, pangutan-a ang inyong kaugalingon og mga pangutana sama niini:
-
Unsaon nato sa pagtrabaho inubanan sa hugot nga pagtuo, mosalig sa Ginoo sa pagtabang kanato ug pagpadako sa atong mga paningkamot sa pagserbisyo sa Iyang mga anak?
-
Unsaon nato nga mahimong mamugnaon ug maisogon kon magbuhat sa atong mga plano?
-
Unsaon nato sa pagpahiangay sa atong mga plano sumala sa mga panginahanglan ug mga kahimtang sa mga tawo?
Ang mga plano dili kanunayng mahitabo sama sa inyong gilaoman. Magmahimong mapailin-ilinon [flexible] ug mogamit sa backup nga mga plano kon gikinahanglan.
4. Rebyoha ang Pag-uswag ug Pag-follow Up
Uban sa imong kompanyon, rebyoha ang pag-uswag ngadto sa mga tumong nga inyong gitakda sa pagtudlo sa mga tawo ug sa pagtabang kanila nga mouswag. Pagplano og mga paagi sa pag-follow up. Ipahiangay ang inyong mga plano kon gikinahanglan samtang maningkamot kamo sa pagkab-ot sa inyong mga tumong.
Pangutan-a ang inyong kaugalingon og mga pangutana sama niini:
-
Ang mga tawo ba nga atong gitudloan nag-uswag sa paghimo og mga pakigsaad sa Dios?
-
Unsa nga mga hagit ang ilang giatubang? Unsa ang ilang mga kabalaka?
-
Unsa ang atong mabuhat karon aron sa pagtabang kanila ug pag-awhag kanila nga molihok—sa personal o pinaagi sa teknolohiya?
-
Sila ba nakabaton og mga kasinatian nga mibati sa Espiritu?
-
Sila ba napailaila ngadto sa mga lider sa Simbahan ug mga miyembro ug nakahimo og mga panaghigalaay? Kinsa ang makaapil sa sunod nga higayon nga kita motudlo?
-
Unsa ang atong makat-onan gikan sa mga kapakyasan?
-
Unsa ka maayo ang atong gibuhat sa pagkab-ot sa atong mga tumong? Aduna bay bisan unsa nga kinahanglan natong ipahiangay o buhaton sa lahi nga paagi?
-
Panahon na ba nga mas menosan ang pagkontak?
Tan-awa sa kapitulo 11 alang sa dugang nga mga baroganan ug mga ideya sa pag-follow up ug pagtabang sa mga tawo nga mouswag.
Apendiks 2
Gamita ang Proseso sa Pagtakda og Tumong sa Pagpangita og mga Tawo nga Katudloan
Kini nga seksiyon naghatag og mga ehemplo kon sa unsang paagi ninyo magamit ang proseso sa pagtakda og tumong sa pagpangita og bag-o nga mga tawo nga katudloan. Gamita kini nga proseso diha sa inyong sinemana ug inadlaw nga pagplano.
1. Pagtakda og mga Tumong ug Paghimo og mga Plano
Uban sa inyong kompanyon, mainampoon nga ikonsiderar kon unsa ang ipabuhat kaninyo sa Langitnong Amahan aron sa pagpangita og daghan pa nga mga tawo nga katudloan. Buhata kini sa matag semana ug sa matag adlaw. Pagbaton og hugot nga pagtuo nga Siya nag-andam og mga tawo alang kaninyo (tan-awa sa Doktrina ug mga Pakigsaad 100:3–8).
Pagtakda og mga tumong sa pagpangita matag adlaw. Paghimo og mga plano alang sa mga aksiyon nga anaa sa inyong kontrol nga makaimpuwensiya sa mga sangpotanan sa importante nga timailhan. Ang mga ehemplo naglakip sa:
-
Pila ka bag-o nga mga tawo ang inyong estoryahon matag adlaw bahin sa ebanghelyo.
-
Kapila kamo mangayo sa mga miyembro, sa mga tawo nga inyong gitudloan, ug sa mga tawo nga inyong makontak kon sila aduna bay kaila nga mahimong interesado sa inyong mensahe.
-
Unsa ka paspas kamo motubag ngadto sa mga referral o mga komentaryo sa mga post sa social media.
Rebyoha ang Isangyaw ang Akong Ebanghelyo nga app ug pangutan-a ang inyong kaugalingon og sama niini:
-
Unsa ang ipabuhat sa Langitnong Amahan kanato karon ug niining semanaha aron sa pagpangita og mga tawo nga katudloan?
-
Unsa nga inadlaw ug sinemana nga mga tumong sa importante nga mga timailhan ang atong matakda aron sa pagpangita og mga tawo nga katudloan?
-
Unsa nga kalihokan sa pagpangita ang labing maayo alang niini nga oras sa adlaw ug lokasyon?
-
Unsaon nato sa pagdasig ug pagsuporta ang mga miyembro sa ward sa ilang mga paningkamot sa pagpakigbahin sa ebanghelyo pinaagi sa mga baroganan sa paghigugma, pagpakigbahin, ug pag-imbitar?
-
Kinsa nga bag-o nga mga miyembro ang atong makontak aron matabangan sila nga motambong sa panagtigom alang sa sakramento? Sila ba adunay bisan kinsa nga mga higala nga ilang maimbitar?
-
Sa unsa nga paagi kita makigtambayayong sa konseho sa ward o sa mga partisipante sa sinemana nga miting sa pakigsabot sa ward aron sa pag-ila sa mga pamilya nga dili tanan miyembro, sa mibalik nga mga miyembro, ug sa umaabot nga mga elder nga kinahanglang kontakon?
-
Kinsa sa mga tawo nga kasamtangang gitudloan, mga tawo nga gitudloan kaniadto, ug gi-refer nga mga tawo ang atong makontak? Unsaon man nato sa pagkontak kanila? (Sa personal, pinaagi sa teknolohiya, pinaagi sa telepono, o sa ubang mga paagi)
-
Unsa ang pipila ka bag-o nga mga paagi sa atong pagpangita og mga tawo?
-
Unsa nga personal nga mga talento ug mga kalig-on ang atong magamit?
-
Unsaon nato sa pagpalambo sa atong abilidad sa pagpangita og mga tawo nga katudloan?
-
Unsaon nato sa pagtabang niadtong atong makontak nga mobati sa impluwensya sa Espiritu Santo?
Alang sa mga ehemplo sa mga kalihokan sa pagpangita, tan-awa sa mga kapitulo 9, 10, ug 13.
Gamita ang Isangyaw ang Akong Ebanghelyo nga app aron sa pagtabang kaninyo sa pag-ila og mga kalihokan sa pagpangita nga nahimong epektibo kaniadto. Pananglitan, inyong masuta kon sa unsang paagi nakit-an ang bag-o nga mga kinabig.
Pagtinguha og inspirasyon ug mahimong bukas sa bag-o nga mga impresyon ug mga ideya. Likayi nga magpabilin lang sa usa ka naandan. Ang mga misyonaryo nga kanunayng nakakaplag og bag-o nga mga tawo nga katudloan sa kasagaran naggamit og nagkadaiyang mga paagi matag semana. Kanunay silang nagbuhat niini.
2. Irekord ug Ieskedyul ang Inyong mga Plano
Uban sa imong kompanyon, gamita ang Isangyaw ang Akong Ebanghelyo nga app aron irekord ug ieskedyul ang inyong mga tumong ug mga plano sa detalyado nga paagi. Ang pagrekord ug pag-eskedyul sa inyong mga plano motabang kaninyo sa pag-ila kon unsa nga mga aksiyon ang himoon ug kanus-a kini himoon.
Pangutan-a ang inyong kaugalingon og mga pangutana sama niini:
-
Kanus-a ug unsaon nato pagkontak ang mga tawo? Unsa ang labing maayo nga mga pamaagi? Asa man ang labing maayo nga mga lokasyon? Unsa ang labing maayo nga mga panahon sa adlaw alang sa lainlain nga mga paagi sa pagpangita sa mga tawo?
-
Unsaon nato nga makabaton og makahuloganon nga mga panag-estoryahanay sa mga tawo nga atong mahimamat?
-
Unsaon ug kanus-a kita mangita sa online gamit ang social media ug ubang teknolohiya?
-
Kanus-a nato kontakon ang mga referral?
-
Unsa nga backup nga mga plano ang atong himoon kon dili mahitabo ang ubang mga plano?
3. Buhata ang Iyong mga Plano
Makugihon nga maningkamot sa pagkab-ot sa inyong mga tumong sa pagpangita og mga tawo nga katudloan. Pagbaton og pag-ampo diha sa inyong kasingkasing sa tibuok adlaw. Magmahimong andam sa pagtimbaya ug pakig-estorya sa mga tawo nga inyong mahimamat. Ang Espiritu motabang kaninyo nga mahibalo kon asa moadto, unsa ang buhaton, unsa ang isulti, ug unsa nga mga pagpahiangay ang himoon.
Atol sa adlaw, pangutan-a ang inyong kaugalingon og mga pangutana sama niini:
-
Unsaon nato sa pagtrabaho inubanan sa hugot nga pagtuo, mosalig sa Ginoo sa pagtabang kanato ug pagpadako sa atong mga paningkamot sa pagserbisyo sa Iyang mga anak?
-
Unsaon nato nga mahimong mamugnaon ug maisogon kon magbuhat sa atong mga plano?
-
Unsaon nato sa pagpahiangay sa atong mga plano sumala sa mga panginahanglan ug mga kahimtang sa mga tawo?
-
Unsaon nato sa pagtabang sa mga tawo nga mobati sa impluwensya sa Espiritu Santo?
Ang mga plano dili kanunayng mahitabo sama sa inyong gilaoman. Magmahimong mapailin-ilinon [flexible] ug mogamit sa backup nga mga plano kon gikinahanglan.
4. Rebyoha ang Pag-uswag ug Pag-follow Up
Sa tibuok adlaw ug semana, mainampoon nga morebyo sa pag-uswag sa pagkab-ot sa inyong mga tumong sa pagpangita og mga tawo nga katudloan. Pangutan-a ang inyong kaugalingon og mga pangutana sama niini:
-
Unsa ka maayo ang atong gibuhat sa pagkab-ot sa atong mga tumong ug pagsunod sa atong sa plano?
-
Unsa nga mga pagpahiangay ang kinahanglan natong himoon aron makab-ot ang atong mga tumong sa pagpangita og mga tawo?
-
Sa unsang paagi nga malikayan nato nga mogamit dayon og usa ka naandan nga dili epektibo sa pagpangita og mga tawo nga katudloan?
-
Unsa ang usa ka butang nga bag-o nga atong masulayan atol niining orasa sa adlaw?
-
Unsa ang pipila ka ideya nga atong mahisgotan diha sa sinemana nga miting sa pakigsabot sa ward aron matabangan kita sa pagpangita og mga tawo nga katudloan? (Tan-awa sa kapitulo 13.)
Isip usa ka managkompanyon, gamita ang “Mga Paningkamot sa Pagpangita” nga tsart diha sa kapitulo 9 aron sa pagtimbang-timbang sa inyong sinemana ug inadlaw nga mga paningkamot sa pagpangita. Ilha kadto nga mga butang nga maayo ninyong nabuhat, ug ikonsiderar kon unsaon ninyo nga molambo.
Sa tibuok adlaw, mohunong og kadali sa pipila ka minuto aron ilhon ang kamot sa Dios diha sa inyong buhat.