E mafai faapefea ona ou fesoasoani ia i latou i la’u uarota po o le siteki ia lagonaina e alofagia i latou, faatauaina, ma manaomia?

E Manaomia e Tagata ona Lagonaina e Manaomia i Latou

I le avea ai ma tagata o le Ekalesia, ua tofu i tatou uma ma se tiutetauave e atiae se siosiomaga lagolagosua ma agaalofa mo o tatou uso ma tuafafine uma. O se faatulagaga lagolagosua faapenei e matua faigofie ai lava ona ola i le talalelei ma saili atu i le Agaga a o feasaa’i ai i soo se vaega o le olaga faaletino.

“Ou te le talitonu sa i ai se taimi sa ou feiloai ai i soo se tasi e le i manao e aofia i se mea lea sa latou lagonaina ai le ta’uaogaina, lea sa latou lagonaina ai e i ai lo latou taua.

“Pe a tuufesili tagata, pe i ai ea se nofoaga mo a’u? atonu lava e i ai se numera o mafuaaga i tua atu o lena fesili, ma o lea la ua latou fesili ifo ai ia i latou lava, Pe fetaui a’u iinei? Pe o se nofoaga ea lea mo a’u? Pe latou te matuai manaomia moni ea a’u? Ma ou te fia faapea atu ma le malosi, ‘Ioe!’

“Ou te mafaufau i le upu faataoto a Paulo, lea ou te matuā fiafia tele i ai, [lea e fai mai ai] o le Ekalesia o le tino lea o Keriso. Ma fai mai o ia, ua papatiso i tatou i lena tino. Ma fai mai a ia o le tino e tasi. E toatele tagata ae tasi le tino.

“Ou te malamalama i lagona o tagata i taimi atonu e le manaomia ai i latou. O nisi foi taimi e ta’usalaina ai isi i le faapea mai matou te le manaomia le tagata lea; matou te le manaomia lena tagata; o lea lava e lelei matou pei ona i ai nei. E leai se tasi o na faamatalaga e moni. E le o le ala Kerisiano lena. E le o faapena le silasila mai a Keriso ia i tatou. Na te silasila mai ia i tatou uma e le mafaitauina le taua. Ma pe o le a lava lo tatou tulaga i lea taimi, ua i ai le tino o Keriso iina e lagolagoina tagata taitasi o le au paia. Pe a oo ina lagona e se tagata lona faaesea—ou te le faafitia le moni o le lagona ma le mafuaaga o lena lagona masani—ae o i tatou taitoatasi, soo se taimi e ono oo mai ai lena faalogona ia i tatou, e manaomia ona tu ma mafaufau, na maliu Iesu Keriso mo au. Na manatu Iesu Keriso ou te agavaa mo Lona toto. Ma e alofa o Ia ia te a’u. O loo i ai Lona faamoemoe mo au. Ma e mafai ona Ia faia se eseesega i lo’u olaga? O Lona alofa tunoa e mafai ai ona liua a’u. Ma e masalo o le tagata lea o loo nofo i o’u autafa, ma lē amanaiaina a’u po o manao foi e aluese atu, pe atonu foi e le manao ai. Ae e le suia ai i lena mea le moni o le lagona o Keriso ia te a’u ma le tele o avanoa ou te maua ia Keriso.

“E ta’e lo’u fatu pe afai e sau se tasi ma e faavaivaia gofie ma faapea mai, ‘Ou te fia manao e taumafai. Ou te fia iai iinei,’ ae leai se mafanafana o se faauo pe le amanaiaina foi. Ma o le mea matautia lena. O se mea matautia moni lava. E tatau ona tatou sili atu nai lo lena.

“O le eseesega ua tatou vaaia nei i le Ekalesia atonu ua na o le amataga lea. O le mea moni, ou te manatu o le a tatou vaaia se eseesega ua matua faateleina. I le Ekalesia anamua sa i ai se eseesega tele naua. Ma e le o se eseesega mo na o le i ai o se eseesega ae o le mea moni, e mafai e tagata ona aumaia meaalofa ma vaaiga eseese, ma le poto masani tele na’ua ma talaaga ma luitau e feagai ma tagata o le faaali mai ai ia i tatou le mea moni e matuai taua i le talalelei a Keriso. Ma o le tele o mea na totoe na faapea ona maua i le aluga o taimi, ma e sili atu ona faaleaganuu nai lo o le faaleaoaoga faavae, e mafai ona see ese ma mafai ona tatou aoao moni e avea ma soo” (D. Todd Christofferson, “Is There a Place for Me?” ChurchofJesusChrist.org}.