O le a se mea e tatau ona ou malamalama ai e uiga i le tosina atu i le itupa e tasi?

Tali i Fesili e Fesiligia Soo

• O le tosina atu i le itupa e tasi (TAIT) e faasino lea i tosinaga faalelagona, faaletino, faamama’i, pe faalefeusuaiga i se tagata o le itupa e tasi. Afai e te lagonaina le tosina atu i le itupa e tasi, e mafai pe le mafai foi ona e filifili e faaaoga se faailoga o sootaga faalefeusuaiga e faamatala ai oe lava ia. Po o le a lava le ala, o le tosina atu i le itupa e tasi o se faaupuga talafeagai e faamatala ai le aafiaga e aunoa ma le faaee atu o se faailoga. Ua faaaoga e le uepisaite lenei faaupuga e faaaofia uma ai ma tagata o e e le toafimalie i le faaaogaina o se faailoga, e le teenaina ai le i ai o se faasinomaga o se tosina atu o le tane i se tane (gay), tamaitai i le tamaitai (lesbian), po o itupa uma e lua (bisexual).

• O le tosina atu i le itupa e tasi e le tutusa mo tagata uma. O nisi tagata e filifili e faaaoga le igoa o le faasinomaga faalefeusuai, ae le faia e isi. O lenei tusiga o loo ofo atu ai se faauigaga faavae o faaigoaga masani o aga faalefeusuaiga.

• O aga moomia masani faalefeusuaiga e ono faasino i tosinaga faalelagona, alofa faamama’i, po o tosinaga faalefeusuai faapea foi ma se lagona o le faasinomaga. O nisi tagata, e fesoasani le faama’oti le eseesega o le tosinaga faalefeusuai, tosinaga faalelagona, ma le faasinomaga nai lo le luluu faatasi o “aga masani moomia faalefeusuaiga.”

• O igoa e sili ona taatele o le faafatama (o se tamaitai ua tosina i tamaitai), faafafine (o se alii ua tosina i alii), ma le aga feusuai itulua (o se alii po o se tamaitai e tosina i itupa uma e lua). O nisi foi tamaitai e faaaogaina le faaupuga o le gay e faamatala ai i latou lava. E ono faaaoga foi e tagata isi igoa, ma o nisi ua aafia i le tosina atu i le itupa e tasi e filifili e le faaaogaina se igoa e faamatala ai i latou lava. O le faiga e filifili ai e tagata le faailoaina o i latou e ono suia i le aluga o taimi.

• O le tosinaga e le o se faasinomaga. E mafai e tagata ona fai a latou lava filifiliga pe faapefea ona faailoa i latou. O loo i ai tagata o le Ekalesia malolosi e umia pepa faataga o le malumalu, o e usitaia le tulafono o le ola mama ma e faailoa foi i latou lava o faafafine, faafatama, pe faaitulua E i ai tagata malolosi o le Ekalesia o e ua aafia i le tosina atu i le itupa e tasi ae e le filifili lava e faailoa i latou lava e faaaoga se igoa e iloagofie ai. O lo tatou uluai faasinomaga lava i taimi uma o se atalii/afafine o le Atua.

• O manaoga feusuai e lavelave ma e mamanuina e le tele o mafuaaga. E ui o se tosinaga faamama’i, faalelagona, pe faalefeusuaiga e mafai ona faailo ai se sootaga faalefeusuaiga, ae e le tatau lava ona otometi ona e manatu o se faailo lea. O manaoga feusuai e mafai ona tafe ma e mafai ona suia.

• O le tosina atu i le itupa e tasi ma le atugalu faaleitupa e matua eseese lava. Mo se faataitaiga, o i latou e lagonaina le lofituina faaleitupa e mafai pe le mafai foi ona lagonaina le tosina atu i le itupa e tasi ma o le toatele o i latou e lagonaina le tosina atu i le itupa e tasi e le mananao e suia lo latou itupa. Mai se vaaiga faalemafaufau ma le faaletalalelei, e eseese mea ia e lua.