O le a le fautuaga e uiga i le faatinoina o uunaiga faalefeusuai?

Ola i se Olaga Mama Mai Feusuaiga

“Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou?” (1 Korinito 3:16).

O o tatou tino o ni meaalofa faapitoa mai le Atua. Latou te saunia mo o tatou agaga se faiga e maua ai le poto masani i le lalolagi faaletino. O mea autu ia i lo tatou faaeaga e tatau ai. O le aoao e pulea o tatou tino o se vaega taua o le avea ia faapei o o tatou Matua Faalelagi. O le pulea atoatoa e alu ai le taimi, faata’ita’i, ma le onosai ae e i ai ona taunuuga e faavavau.

Ua poloaiina i tatou e le Atua ia “pulea [o tatou] tuinanau uma, ina ia faatumuina [i tatou] i le alofa” (Alema 38:12).

O le ola i le tulafono o le ola mama o se punavai o faamanuiaga silisili. E pei ona sa tautino mai e Peresitene Marion G. Romney: “Ou te le iloa po o a faamanuiaga e sili atu ona manaomia malosi nai lo faamanuiga ua folafola mai i e mama a’ia’i ma amioatua. Na fetalai Iesu e uiga i taui patino mo amioatua eseese ae sa ia taofia le aupito silisili, o lea la e foliga mai ia te au, mo ē loto mama, ‘aua latou te’ na ia fetalai ai ‘iloa atu le Atua’ (Mat. 5:8). E le gata la ina latou vaai atu i le Alii, ae o le a latou lagona foi le toafimalie i lona afioaga.

“O le folafolaga … lenei a le Faaola: ‘Ia tuu le amiomama e teuteuina ai ou mafaufauga e le aunoa; ona solo malosi ai lea o lou lototele i luma o le Atua’ (M&F&F 121:45)” (“Trust in the Lord,” Ensign, Me 1979, 42).

O feusuaiga o se vaega taua o le avea ai ma tagata soifua ma o se faapogai foi o lagona malolosi e manaomia ona taofiofi. E ui i nei lagona o’oo’o, e i ai lava le Au Paia o Aso e Gata Ai e gauai ma le faamaoni i le tulafono a le Alii mo le ola mama i le tele o tausaga.

O nei tagata ua latou faia se tautinoga naunautai e ola i se olaga mama mai feusuaiga ma aloese mai soo se mea o le a faaitiitia ai le lilifa atu i uiga faaosofia. E le gata i lea, ua latou saunia foi se auaunaga tulaga ese mo isi, aemaise i se faatulagaga a le Ekalesia. O le faia o na mea, latou te maua ai le olioli, faamalieina, ma le filemu.

E Ao i Matua Ona Aoao a Latou Fanau

E manaomia e fanau iti ma le autalavou le fesoasoani a matua ma tagata matutua e faatuatuaina latou te aoao ai e uiga i feusuaiga ma malamalama ai i ona matalalaga paia: “Ua i matua le uluai tiutetauave mo le aoaoina o a latou fanau e uiga i feusuaiga. O le aoaoina o lenei mataupu ma le faamaoni ma le mama i le aiga, o le a fesoasoani ai foi i tupulaga talavou e aloese mai solitulafono ogaoga o amioga mama.

“I aoga o loo faia ai aoaoga i tulaga faalefeusuai, e tatau i matua ona sailia ina ia mautinoa o aoaoga o loo tuuina atu i a latou fanau e ogatasi ma tulaga ma amioga o le ola mama” (“Sex Education,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 38.6.14).

Faataitaiga i fafo atu o le Faaipoipoga

O le faataitaiga o aga faalefeusuai i fafo atu o le faaipoipoga o se agasala matuiā lea.

O le tulafono a le Alii o le ola mamā o le:

• Aloese mai sootaga feusuai i fafo atu o se faaipoipoga i le va o se alii ma se tamaitai e tusa ai ma le tulafono a le Atua.

• Faamaoni a’ia’i i totonu o le faaipoipoga.

“O lagona faamama’i faaletino i le va o le tane ma le avā ua faamoemoeina ia matagofie ma paia. Ua faauuina e le Atua mo le foafoaga o fanau ma mo le faaalia o le alofa i le va o le tane ma le ava.

“Ua na o se alii ma se tamaitai ua faaipoipoina faaletulafono o se tane ma se avā e tatau ona faia sootaga feusuai. I le silafaga a le Atua, e taua tele le mamā o amioga. O le solia o le tulafono o le ola mamā e matuia tele (tagai i le Esoto 20:14; Mataio 5:28; Alema 39:5). O i latou e aofia ai ua latou faaaogaseseina le mana paia na tuuina mai e le Atua e foafoa ai le ola” (“Chastity and Fidelity,” Tusitaulima Aoao, 38.6.5).

“O poloaiga a le Atua ua faasa ai amioga uma e le mama, pe o le itupa e tasi po o itupa uma e lua. E apoapoai e taitai o le Ekalesia ia tagata o le au paia e solia le tulafono o le ola mama. E fesoasoani taitai ia i latou ina ia maua se malamalama manino i le faatuatua ia Iesu Keriso ma Lana Togiola, o le faagasologa o le salamo, ma le faamoemoega o le olaga i le lalolagi. O amioga e le ogatusa ma le tulafono o le ola mama e ono matua’ia ai le faia o se fono o le avea ai ma tagata o le Ekalesia (tagai i le [Tusitaulima Aoao,] 38.6.5). E mafai ona faamagaloina e ala i le salamo faamaoni” (“Same-Sex Attraction and Same-Sex Behavior,” Tusitaulima Aoao, 38.6.12).