E mafai faapefea ona ou faaaofiaina pe aapa atu ia i latou ua tosina atu i le itupa e tasi i la’u uarota po o le siteki?

Ta’ita’i e ala i Faataitaiga.

“I le avea ai ma se ekalesia, e leai se isi e tatau ona sili atu le alofa ma le agaalofa. Ia tatou ta’imua i le faatinoina o le alofa, agaalofa ma le aapa atu. … Ia aua nei faaesea e o tatou aiga pe le faaaloalo i e ua filifili se ituaiga olaga e ese o se taunuuga o o latou lagona e uiga i lo latou lava itupa”

“E manino o le mea sa aupito sili ona faigata ia te au a o ou peresitene i le siteki … [o le] taimi na faatoa iloa ai e tagata faafomai le AIDS, ma sa toatele se aofai o o matou alii na iloa ane ua maua i le AIDS. O nisi o i latou sa lei malolosi ma toaaga i le Ekalesia—o se vaega toatele o i latou, e toaitiiti na toaaga—ma na matou maua e 17 alii ua maua i le AIDS. O le taimi lena sa leai se togafitiga. Ma na iu ina maliliu uma le toa 17 o i latou i le AIDS, a o ou peresitene i le siteki.

“Sa ou aoaoina ni lesona e le matalitonuina i le aluga o lena faagasologa: E faapea o le nuu o le Au Paia o Aso e Gata Ai, o se nuu alolofa ma le agalelei. Sa ou matauina ia epikopo sa faia ni osigataulaga e le matalitonuina e tausia ai nisi o nei taulelea ua tali oti. Sa ou matauina i latou o taumafai malosi e toefaafesootai i latou i o latou aiga ma ia tausia e o latou aiga i latou. E toe fai atu foi, o le taimi lena sa leai se togafitiga ma sa leai se mea e taofiofia ai. Sa ou matauina i latou [o e sa mama’i] o fetausia’i e le tasi le isi. Ma sa ou matauina nisi o i latou—o se tasi o i latou lea ua ou manatua, o lē, sa faifeautalai a ua mae’a, ma se mea na tupu o le amio, na ia ofo atu ia lava e taulimaina tulaga aupito sili ona faigata ma i latou sa sili ona tigaina, ma o ia lava na mulimuli maliu.

“Ou te mafaufau o lena lesona sa ou aoaoina mai lena mea e faapea, i le avea ai ma se ekalesia, e leai se tasi e tatau ona sili atu le alofa ma le agalelei. E leai se aiga e i ai se tasi e i ai le faafitauli o le tosina i le itupa tutusa, e tatau ona le faitaulia i latou mai le li’o faaleaiga. E manaomia le avea o i latou ma vaega o le li’o faaleaiga” (Quentin L. Cook, “Let Us Be at the Forefront,” ChurchofJesusChrist.org).

Faailoa Atu le Alofa, Agaalofa, ma le Aapa Atu

“Pe o tatou aoao atua le folafolaga i le aiga? Pe o tatou aoao atua le fuafuaga a le Tama Faalelagi? Pe o tatou aoao atua le uluai mataupu i le tusitaulima lona lua? Ioe, tatou te faia. E i ai sa tatou fuafuaga o le faaolataga. O le i ai o fanau e o mai i o tatou olaga, o se vaega o le fuafuaga a le Tama Faalelagi. Ae ia tatou taulamua i le faaali atu o le alofa, agaalofa ma le aapa atu ia i latou. Ia aua nei faaesea e o tatou aiga pe le faaaloalo i e ua filifili se ituaiga olaga e ese o se taunuuga o o latou lagona e uiga i lo latou lava itupa. … E malosi lava lo’u lagona e uiga i lenei mea, ma e mafai ona outou iloa. Ou te manatu o se mataupu faavae taua tele” (Quentin L. Cook, “Let Us Be at the Forefront,” ChurchofJesusChrist.org).