E mafai faapefea ona ou lagolagoina ia tagata o le au paia ma o latou aiga o e atonu ua maua i le loto popole po o mafaufauga e pule i le ola?

Agaalofa ma le Faatuatuaga

O tagata ua iloa le tosina atu i le itupa e tasi pe ua faailoaina i latou lava o faafafine/faafatama e mafai ona maualuga le tulaga matautia mo le loto popole po o le pule i le ola. O tagata ua loto popole pe ono mafaufau e pule i le ola e manaomia ona latou iloa e alofaina i latou ma e tatau ona faasino atu i se polofesa tomai faapitoa faalemafaufau. O lagona o le loto popole e moni ma e mafai ona lofituina ma faalotovaivaia ai.

Ua saunoa ma le agaalofa ia Elder Jeffrey R. Holland i le taulimaina o le loto popole:

“Po o a lava ou luitau, o’u uso e ma tuafafine—faalemafaufau pe faalelagona pe faaletino po o le a lava—aua e te filifili e faasaga i le taua tele o le ola e ala i le faamutaina! Faalagolago i le Atua. Taofimau i Lona alofa. Ia iloa o le a i ai le aso e susulu mai ai se malamalama ma mou atu ai le pogisa o tiga faaletino. E ui lava atonu tatou te lagonaina ‘peiseai se ipu ua nutililii,’ e pei ona fai mai ai le fai Salamo, ae e tatau ona tatou manatua, o lena ipu o loo i ai i aao o le tufuga faalelagi.” (“Peiseai O Se Ipu Ua Nutililii,” Liahona, Nov. 2013, 42).

Meafaigaluega ma Punaoa

Pe a oo ina liliu atu lagona o le loto popole i mafaufauga e pule i le ola, e taua tele le i ai o se tasi e talanoa i ai. O tagata ua mafaufau e pule i le ola, ua i ai i latou i se tiga ogaoga faaletino, faalemafaufau, pe faalelagona; e tele ina faaesea; ma e ono lagonaina foi ua leai so latou faamoemoe mo le lumanai. Atonu latou te lagonaina ua leai lava se isi auala e faamuta ai le tiga ogaoga sei vagana ai le faamutaina o o latou lava ola. O mafaufauga i le oti e ala i le pule ai, e tele ina mafaufau loloto i ai, fuafua, ma toe mafaufauina a o lei faia se taumafaiga. I lenei vaitaimi o le mafaufau loloto i ai, e mafai e se faalavefau ona lavea’ia se ola.

• Laina Fesoasoani mo Faalavelave.

• E mafai ona fesoasoani le faufautua faapolofesa ma le tausiga faafomai i tagata e feagai ma le loto popole.

• O punaoa e talanoaina ai le pule i le ola, e pei o le Thoughts of Suicide, e mafai ona maua i le Life Help and Self-Reliance i luga o le ChurchofJesusChrist.org po o le polokalame o le Gospel Library app.

• Matamata le vitio “Understanding Suicide” e aoao ai le auala e faagaoioia ai le puipuiga o le pule i le ola ma le tali atu pe a mavae se maliu.

• O le puipuiga o se pule i le ola e amata i le iloaina o faailoga o lapataiga. Mo se lisi o faailoga o lapata’iga, faamolemole asiasi i le American Foundation of Suicide Prevention.

• Afai e foliga mai ua lamatia se tasi, o le mea aupito sili e mafai e se tagata ona fai o le talanoa lea ia i latou e uiga i ai. Atonu e foliga mai e le lelei pe ua polepolevale foi, ae o tagata ua loto popole e tele ina matua manaomia vave lava se tasi e talanoa i ai, se tasi e fesoasoani ia i latou e faagasolosolo mafaufauga ma lagona. O nei talatalanoaga e ono faigata, ae e matua taua tele i le faaitiitia o lagona o le faaesea ma le leai o se faamoemoe lea e mafai ona tau atu i le pule i le ola. Afai e foliga mai ua i ai se tagata i se tulaga lamatia vave o le taumafai e pule i le ola, vili le laina fesoasoani mo le puipuiga a le atunuu i le 1-800-273-TALK (8255).