amadoda efundisa usapho

Iingcebiso zeeNtlobo ngeeNtlobo zeeNdawo zokuFundisa naBafundi

Imigaqo yokufundisa ngendlela yoMsindisi inokusebenza kulo naliphi na ithuba lokufundisa—ekhaya, ebandleni, nakwenye indawo. Nangona kunjalo, ithuba ngalinye liza neemeko zalo ezizodwa. Eli candelo linika iingcebiso ezongezelelweyo ezithe ngqo kubafundi abahlukeneyo nakwiindawo zokufundisa.

Ikhaya noSapho

IKhaya yeYona Ndawo iLungileyo yokuFundisa nokufunda iVangeli

UMongameli uRussell M. Nelson ufundise ukuba ikhaya kufuneka libe “sisazulu semfundo yevangeli” (“Becoming Exemplary Latter-day Saints,” Liahona, Nkanga 2018, 113). Imfundiso eyenzekayo ebandleni okanye kwimfundo yolutsha ixabisekile kwaye iyafuneka, kodwa yenzelwe ukuxhasa imfundiso eyenzekayo ekhaya. Indawo engundoqo—kunye neyona ndawo ingcono—yokufunda ivangeli, yethu kunye neentsapho zethu, likhaya.

Kodwa oko akuthethi ukuba ukufunda ivangeli kuyenzeka ngokuzenzekelayo ekhaya; kufuna umgudu onenkathalo. UMongameli Nelson ucebise ukuba kungafuneka “uguqule” okanye “ukutshintsha imbonakalo yekhaya lakho”—kungeyomfuneko ngokudiliza iindonga okanye ukongeza umgangatho omtsha kodwa mhlawumbi ngokuhlola umoya uwonke kwikhaya lakho, kuquka igalelo lakho kuloo moya (“Becoming Exemplary Latter-day Saints,” 113). Ngokomzekelo, qwalasela umculo, imibomiso bhanya-bhanya, kunye nezinye izinto zokusasaza indaba ekhayeni lakho; imifanekiso eludongeni; kunye nendlela amalungu osapho lwakho athetha ngayo kwaye aphathane ngayo. Ngaba ezi zinto zimema impembelelo yoMoya oyiNgcwele? Ngaba ubekela bucala ixesha lokufunda ivangeli, mntu ngamnye nanjengosapho? Ngaba amalungu osapho aziva ethandwa, ekhuselekile kwaye esondele kuThixo xa esekhayeni lakho?

Usenokungavakalelwa kukuba unolawula phezu kwesimo sokomoya kwikhaya lakho. Ukuba kunjalo, yiba yeyona mpembelelo onokubayo kwaye ucele uncedo eNkosini. Yena uya kuyizukisa imigudu yakho yobulungisa. Xa uzama ukufundisa nokufunda ivangeli, nokuba awuziboni iziphumo ezinqwenelekayo ngoko nangoko,wena uya phumelela.

Ukufunda eKhaya KuSekwe kuBudlelwane

“Bathande abo ubafundisayo” kusebenza kuzo zonke iindawo zokufundisa ivangeli, kodwa ekhayeni, uthando kufuneka luze ngokwemvelo kwaye luviwe ngokunzulu kakhulu. Nokuba ikhaya lakho lingaphantsi kokufezekileyo, lenzelwe ukuba libe sisazulu semfundiso yevangeli kuba kulapho obona budlelwane bethu buhlala buhleli bakhelwa khona. Ootitshala abangaphandle kwekhaya banokuba namava okanye uqeqesho olungakumbi njengootitshala, kodwa abanakuze baphindaphinde amandla othando, ubudlelwane banaphakade obukhoyo ekhaya. Ngoko bukhulise obo budlelwane. Chitha ixesha kunye nenzame eyimfuneko yokuphulaphula amalungu osapho lwakho kwaye wakhe ukuthembeka kunye nokuqonda kunye nabo. Oku kuyakunceda ukudala isiseko esiluqilima kwiinzame zakho zokufundisa nokufunda ivangeli ekhaya.

Ukufunda eKhaya KunokuCwangciswa kodwa kananjalo Ngokuzenzekelayo

Iiklasi ezininzi zeBandla zenzeka kanye ngeveki, zinesiqalo nesiphelo esicwangcisiweyo, kodwa oku akusoloko kunjalo ekhaya. Unokuba nesifundo somhlangano wangorhatya wosapho esicwangcisiweyo okanye isifundo sezibhalo sosapho, kodwa amathuba okufundisa kusapho enzeka rhoqo kwengamiselekanga, imizuzwana yemihla ngemihla—ngelixa usitya isidlo, usenza imisebenzi yasekhaya, udlala umdlalo, usiya emsebenzini okanye esikolweni, ufunda incwadi, okanye nibukele umboniso-bhanyabhanya kunye. Isaqhwithi semvula singalithuba lokuthetha ngendlela uMsindisi asikhusela ngayo kwiinkqwithela zomoya. Umtsha onesigqibo esinzima ekufuneka asenze usenokuba ukulungele ukufunda ngesityhilelo sobuqu. Umntwana owoyikayo angaxhamla kubungqina bakho ngoMthuthuzeli. Abantwana abaziphatha kakubi okanye abaphathana kakubi banokufundiswa ngenguquko nokuxolela.

Ngenxa yokuba loo maxesha akacwangciswanga, awunokwazi ukuwalungiselela ngendlela obuya kusilungiselela ngayo isifundo semveli. Nangona kunjalo, ungazilungiselela wena ngokuba uphendule kuMoya kwaye uzame “nihlale ke nikulungile” (1 Petros 3:15 Nawuphi na umzuzu unokuba ngumzuzu wokufundisa okanye wokufunda.

Ukufunda eKhaya kuQulathe iiNzame eziNcinci, eziLula, ezingaGuquguqukiyo

Abazali ngamanye amaxesha baye batyhafe xa iinzame zabo zokufundisa ivangeli ekhaya zibonakala zingaphumeleli. Ukuthathwa nganye nganye, umhlangano wangorhatya wosapho omnye, uhlelo lokufunda izibhalo, okanye incoko yevangeli isenokungabonakali ngathi ayifezi okuninzi. Kodwa imfumba yemizamo emincinci, elula, ephindaphindwayo ngokuqhubekayo emva kwexesha, inokuba namandla kwaye yomeleze kunexesha elithile lomzuzwana elikhumbulekayo okanye isifundo esibaluleke kakhulu. “Zonke izinto zimele zenzeke ngexesha lazo,” utshilo uYehova. Ngako oko, musani ukudinwa kukwenza okulungileyo, kuba nibeka isiseko somsembenzi omkhulu. Kwaye kwizinto ezincinane kophuma oko kukhulu” (IMfundiso neMinqophiso 64:32-33; bona kananjalo Alma 37:6-7). Ngoko musa ukunikezela, kwaye ungakhathazeki ngokufezekisa into enkulu ngalo lonke ixesha. Ungaguquguquki nje kwimizamo yakho.

EKhayeni, ukuFunda nokuPhila Akwahlulwa

Ivangeli ithatha ukuphathelela kwangoko ekhayeni. Apho abantu ofunda nabo ivangeli ngabantu oyakuyiphila nabo—yonke imihla. Enyanisweni, ixesha elininzi, ukuphila ivangeli yindlela esifunda ngayo ivangeli. Ngoko njengokuba ufunda kwaye ufundisa ivangeli ekhaya, khangela iindlela zokuqhagamshela okufundayo noko ukwenzayo. Kwikhaya lakho, ivangeli mayibe yinto ozama ukuphila ngayo, hayi nje into othetha ngayo.

umfazi efundisa abantwana

Amathuba okufundisa kusapho enzeka rhoqo kwengamiselekanga, imizuzwana yemihla ngemihla

UkuFundisa Abantwana

Abantwana baFuna iiNtlobo ngeeNtlobo

Bonke abantwana bohlukile, kwaye njengoko bekhula, iimfuno zabo ziya kutshintsha. Ukutshintsha iindlela zakho zokufundisa kuya kunceda uhlangabezane neemfuno zabo ezahlukeneyo. Ngokomzekelo, cinga ukusebenzisa oku kulandelayo:

• Amabali Amabali anceda abantwana babone ukuba ivangeli isebenza njani na kubomi bemihla ngemihla. Sebenzisa amabali avela kwizibhalo, kubomi bakho, kwimbali yosapho lwakho, okanye kwiimagazini zeBandla, ngakumbi amabali ngoMsindisi. Cwangcisa iindlela zokubandakanya abantwana ebalini—ngokubamba imifanekiso, ukuphindaphinda amabinzana, okanye ukulinganisa iindima.

• Izinto ezibonakalayo ezincedisa ekufundiseni Imifanekiso, imiboniso-bhanyabhanya, kunye neenjongozenzi zinganceda abantwana baqonde kwaye bakhumbule imigaqo yevangeli. Imifanekiso nemiboniso-bhanyabhanya emininzi ingafumaneka kwi Thala Yezinto Zokusasaza Iindaba ku ChurchofJesusChrist.org.

• Umculo Amaculo kunye nezinye iingoma ezingcwele zinganceda abantwana baluve uthando lukaThixo, bave uMoya, kwaye bafunde iinyaniso zevangeli. Uncuthu lwengoma, izingqisho, kunye neemvano-siphelo ezilula zinganceda abantwana bakhumbule iinyaniso zevangeli kwiminyaka ezayo. Njengoko ucula nabantwana, bancede bafumane kwaye baqonde imigaqo efundiswa kwiingoma.

Uninzi lwabantwana lufunda ngcono xa kubandakanyeka izivo ezininzi. Fumana iindlela zokunceda abantwana basebenzise izivo zabo zokubona, zokuva nezokuchukumisa njengoko befunda. Kwezinye iimeko, unokufumana iindlela zokuquka izivo zabo zokunukisa kunye nokungcamla!

Abantwana Banobuchule

Xa umema abantwana ukuba bazobe, bakhe, bafake imibala, okanye babhale into enxulumene nomgaqo wevangeli, uyabanceda baqonde ngcono umgaqo kwaye ubanika isikhumbuzo esibambekayo ngoko bakufundileyo. Basenokusebenzisa izinto abazidalileyo ukuze babelane nabanye ngoko bakufundileyo. Ukhutsho ngalunye lwemagazini yo Mhlobo luquka imisebenzi yesiphiwo sokuyila sabantwana.

Abantwana Bafuna uKwazi

Xa abantwana bebuza imibuzo, yijonge njengamathuba, hayi njengeziphazamiso. Imibuzo yabantwana luphawu lokuba bakulungele ukufunda, kwaye imibuzo yabo ikunika ukuqonda okubalulekileyo kwinto abayicingayo neemvakalelo zabo. Bancede babone ukuba iimpendulo kwimibuzo yabo yokomoya ingafumaneka kwizibhalo nakumazwi abaprofeti abaphilayo.

Abantwana baFuna uThando kwaNaxa bePhazamisa

Ngamanye amaxesha umntwana wenza izinto ngendlela ephazamisa ukufunda kwabanye. Uninzi lweziphazamiso zokuziphatha zikhula ngaphandle kwemfuno engafezekanga. Xa oku kusenzeka, yiba nomonde, uthando, nokuqonda imiceli-mngeni umntwana asenokujamelana nayo. Yena usenokufuna nje amathuba angakumbi okuba athathe inxaxheba kwisifundo ngeendlela ezakhayo—ngokomzekelo, ngokubamba umfanekiso, ukuzoba into ethile, okanye ukufunda isibhalo.

Ukuba umntwana usaqhubeka ephazamisa, kusenokuba luncedo ukuthetha naye yedwa. Ngomoya wothando kunye nomonde, chaza izinto ozilindeleyo nokuzithemba kwakho ukuba yena unokuhlangabezana nazo. Mncome umntwana xa yena esenza ukhetho olungcono.

Abantwana baNokuninzi ukwaBelana Ngako

Xa abantwana befunda into entsha, ngokwemvelo bafuna ukwabelana ngayo nabanye. Khuthaza lo mnqweno ngokunika abantwana amathuba okufundisa imigaqo yevangeli omnye komnye, amalungu osapho lwabo, kunye nabahlobo babo. Kananjalo bacele ukuba babelane nawe ngeengcinga zabo, iimvakalelo zabo, kunye namava anxulumene nemigaqo oyifundisayo. Uya kufumanisa ukuba banokuqonda okulula, okumsulwa, kwaye okunamandla.

Abantwana bangaWuva uMoya kodwa bangaFuna uNcedo ukuQonda iMpembelelo yaKhe

Nabantwana abangekasifumani isipho soMoya oyiNgcwele bangayiva impembelelo yaKhe, ngakumbi xa befunda ngoYesu Krestu kunye nevangeli yaKhe. Xa besenza ukhetho olulungileyo, banokuva ukwamkeleka nguMsindisi ngoMoya. Fundisa abantwana ngeendlela ezahlukeneyo uMoya anxibelelana ngayo nathi. Bancede baqonde ilizwi laKhe njengokuba Yena ethetha nabo. Oku kuyakubanceda bakhulise umkhwa wokufuna nokwenza intshukumo kwisityhilelo sobuqu kubo bonke ubomi babo.

Ukufundisa uLutsha

Ulutsha LunaMandla Amakhulu Aleleyo

Ulutsha lunamandla aleleyo okwenza izinto ezimangalisayo enkonzweni yeNkosi. Amava amaninzi abhalwe kwizibhalo abonisa ukuba uThixo unokuthembela kwizakhono zokomoya zabantu abancinane. Ukuba ulutsha luvakalelwa kukuba uyaluthemba, ukuthembela kwabo kumandla aleleyo abo obuthixo kuya kukhula kwaye luya kukumangalisa ngoko lunokukufeza. Ngothando bancede babone into uBawo oseZulwini ayaziyo abanokuba yiyo. Landela umzekelo woMsindisi ngokuqhubeka ubathanda kwaye ubakhuthaza, usebenza nabo ngomonde, kwaye ungaze ubancame.

Ulutsha LuFunda Ngalo

Ulutsha olufundisayo lusenza iziseko zobungqina babo. Bakwinkqubo yokufumanisa iinkolelo neemvisiso zabo. Benza izigqibo eziya kuchaphazela ikhondo lobomi babo. Ukuphila ngokomoya kula maxesha anobungcipheko kwaye nokuzalisekisa umsebenzi weNkosi kubo, ulutsha olufundisayo luya kufuna ukwazi indlela yokufumana amandla ngexesha lezilingo zabo, iimpendulo kwimibuzo yabo, kunye nenkalipho “yokuma njengamangqina kaThixo” (Mozaya 18:9).

Ulutsha lunomnqweno okhulayo wokufunda izinto ngokuqiqa namava kunokuba nje luxelelwe izinto. Oku kuthetha ukuba ukufundisa ulutsha kuya kufuna izakhono ezifanelekileyo zokuphulaphula. Xa ulutsha luziva luqondwa, luya kuziva luvuleleke ngakumbi kwingcebiso nakukhokelo. Baqinisekise ukuba iNkosi iyabazi kwaye iya kubanceda njengoko bejijisana nemibuzo kunye nezilingo. Bangasebenzisa ukholo lwabo kuYe ngokuphuhlisa umkhwa wemihla ngemihla wokuthandaza kunye nokufunda izibhalo kwaye nangokunceda abanye. Ukukhuthaza ulutsha ukuba luthathe inxaxheba kwiiklasi zeBandla kwaye luzifundele ngokwalo lungabanceda babe namava obuqu anokuthi akhe ubungqina babo belifa labo lobuthixo.

Ulutsha Oluninzi LuKhululekile ngokuSebenzisa uLwazi ngoBugcisa Jikelele

Ukuba ulutsha olufundisayo lunezixhobo zalo zombane, khumbula ukuba ezi zixhobo zizixhobo zokuphucula ukufunda. Bafundise indlela yokusebenzisa izibhalo zabo zesixhobo sombane nezinye izinto ezifumaneka kwiThala leVangeli. Ungathumela imiyalezo kunye namakhonkco kulutsha ukubanceda balungiselele izifundo ezizayo.

Iklasi Yesikolo sangeCawe

Ulutsha kufuneka luqonde ukuba yintoni na uBawo oseZulwini ayaziyo lunokuba yiyo.

Ukufundisa Abantu Abadala

Abantu Abadala BanokuThatha uXanduva ngeMfundo Yabo

Abafundi abadala bayakwazi ukuzenzela ngokwabo kwiindawo zokufunda zevangeli (bona 2 Nifayi 2:26). Bameme ukuba balungiselele iingxoxo zevangeli ngokufunda okuthile kwangaphambili kwexesha, kwaye ubakhuthaze ukuba babelane ngoko bakufundayo ngoMoya. Ungababuza kananjalo ukuba yeyiphi imigaqo yevangeli abangathanda ukuchitha ixesha befunda ngayo kunye.

Abantu Abadala baSebenzisa aMava Abo Xa beFunda

UYobhi wathi, “Emaxhegweni kusebulumkweni” (Yobhi 12:12). Ngokubanzi, ubulumko nokuqonda kokomoya kuza emva kweminyaka yamava. Njengokuba ufundisa abantu abadala, bameme ukuba babelane ngamava akhe ukholo lwabo kuBawo oseZulwini noYesu Krestu. Oku kuyakubanika amathuba okungqina malunga nokuba bafikelele njani ekwazini ukuba imigaqo yevangeli abayifundayo iyinyani. Ukwabelana ngamava kuya kwakha ubudlelwane phakathi kwabo ubafundisayo, ukunceda “nonke … nihlaziyeke kuko konke” (IMfundiso neMinqophiso 88:122).

Abantu Abadala baFuna ukuBekeleleka okweNziwayo

Abantu abadala obafundisayo banokuba neendima ezininzi kunye noxanduva kwimisebenzi yabo, ekuhlaleni, ubizo lweBandla, nakwiintsapho. Xa befunda ivangeli, bahlala becinga ngendlela oko bakufundayo okungabanceda ngayo kwezo ndima. Bameme ukuba babone ukuba ilizwi likaThixo liphathelele njani neemeko zabo ezizodwa. Ungakwenza oku ngokubabuza ukuba imigaqo yevangeli inentsingiselo kwaye isebenza njani na ebomini babo.

Abantu Abadala banokuCinga ngeeNdlela eziNtsonkothileyo

Ngenxa yamava kunye nolwazi lwabo, abantu abadala bayazi ukuba akusoloko kukho iimpendulo ezilula kwimibuzo yevangeli. Banokuxabisa ukuba isicatshulwa sesibhalo sinokuba neentsingiselo ezininzi, kwaye bangasebenzisa umgaqo wevangeli kwiintlobo ngeentlobo zobomi. Bameme ukuba baphonononge imigaqo yevangeli inxulumana njani kwenye nenye kwaye nokuba kwenzeka ntoni na ebomini babo. Khuthaza ukuthatha inxaxheba kunye neengxoxo ukuze bafunde kwiimbono ezizodwa zomnye nomnye.

umfazi efundisa umntwana

Abantu abadala bangabelana ngamava amaninzi akhe ukholo lwabo kuBawo oseZulwini kunye noYesu Krestu.

Ukufundisa Abantu abaKhubazekileyo

Nceda Mntu ngaMnye Akhule abe neNkqubela

UJoseph Smith wafundisa, “Zonke iingqondo kunye nemimoya uThixo awathi wayithumela ehlabathini zithabatheka kulwandiso” (Teachings of Presidents of the Church: Joseph Smith [2007], 210). Cinga ukuba bonke abantwana bakaThixo banako ukukhula elwazini nasekwenzeni inkqubela. Cela iNkosi ikuncede wazi indlela yokunceda umntu ngamnye.

Funda ngeeMfuno eziZodwa

Thetha nabafundi okanye abazali okanye abanonopheli babo. Fumana indlela umntu ngamnye afunda ngayo ngcono kwaye ngawaphi amacebo aluncedo kakhulu. Ungacebisana kananjalo nezinye iinkokeli kunye nootitshala abanamava kunye neembono abanokwabelana ngazo. Ukufumana amacebo okufundisa aluncedo, bona disabilities.ChurchofJesusChrist.org.

Dala uMoya oMhle

Dala umoya omhle apho wonke umntu eziva ekhuselekile kwaye ethandwa. Musa ukucinga ukuba bonke abafundi abakhubazekileyo bayafana, kwaye uphathe umntu ngamnye ngothando nangentlonipho. Khuthaza abanye ukuba babe nobubele kwaye bamkele.

Qinisekisa Ukuba Bonke baNokuba neNxaxheba

Utshintsho oluncinci lunokwenziwa kwimisebenzi ukuqinisekisa ukuba bonke abafundi banokufunda, kuqukwa abo banezithintelo zomzimba okanye abanengxaki yokufunda. Umzekelo, ukuba umsebenzi ucebisa ukubonisa umfanekiso, ungacula ingoma ehambelanayo endaweni yokubandakanya abafundi abangaboniyo.

Misela iiNdlela eziQhubelekayo kunye noLwakhiwo

Indlela enye yokuseka umsebenzi wesiqhelo kukudala isibhengezo esibhaliweyo sesicwangciso. Ucwangciso lwakho lusenokuquka umthandazo, ixesha lokufundisa, kunye nexesha lomsebenzi. Ukulandela isicwangciso kunokunceda ukunciphisa iimvakalelo zokungaqiniseki kunye nokuxhalaba kwabanye abafundi.

Qonda Kutheni iZimilo eziMgumceli-ngeni Zisenzeka

Funda ngokhubazeko okanye iimeko ezinokuphembelela umntu ukuba enze izinto ezingafanelekanga. Nika ingqalelo kwinto eyenzekayo xa kuvela izimilo ezingumceli-ngeni. Ngokomthandazo cinga ngendlela yokuguqula imeko ukuze uxhase ngcono abafundi.

Ukufumana ulwazi oluthe vetshe ngokufundisa abantu abakhubazekileyo, bona disabilities.ChurchofJesusChrist.org.

Iklasi yaMantombazana Amancinane

Ootitshala banokudala isimo sokufunda eyakhayo apho wonke umntu aziva esamkelwa kwaye ethandwa.

Ukufundisa nge-Intanethi

Ziqhelanise noLwazi Bobugica Jikelele

Phambi kweklasi yakho okanye intlanganiso, chitha ixesha uziqhelanisa nolwazi bobugica jikelele ozobe ubusebenzisa. Phicotha ezinye zeempawu zayo, ezifana nendlela yokwabelana ngemiboniso-bhanyanya okanye imifanekiso. Cinga ngokubamba intlanganiso “yovavanyo” kunye namalungu osapho okanye nabahlobo.

Uninzi lwamasebe kunye neengqokelela zamasebe zinencutshe yolwazi bobugcisa jikelele Usenowazi kananjalo abanye abanamava weentlanganiso ze-intanethi. Cela ingcebiso okanye isikhokelo sabo.

Ziphelise iziPhazamiso ezinoKubakho

Ukuba kunokwenzeka, fumana indawo ezolileyo ukuze ubekhona kumhlangano yakho. Iingxolo ezingasemva zingabanokuphazamisa. Khuthaza abafundi ukuba benze into efanayo okanye bagcine izandisi-sandi zabo zicinyiwe ukuba abathethi.

Sebenzisa Isithathamfanekiso

Ukuba kuyenzeka, gcina isithathamfanekiso sakho silumekiwe ukuze abafundi babone ubuso bakho. Mema (kodwa unganyanzeli) abafundi ukuba balumeke izithathamfanekiso zabo nabo. Oku kunokunceda ukudala umoya womanyano kunye nenkxaso.

Sebenzisa uPhawu lokuNcokola Lwe-intanethi

Iinkqubo zeentlanganiso ezininzi ze-intanethi zivumela abathabathi-nxaxheba ukuba babhale imibuzo okanye bathethe kwifestile yokuncokola. Ezithile kananjalo zivumela abathathi-nxaxheba baphakamise izandla zabo kwi-intanethi. Yazisa abafundi malunga nezi mpawu. Usenokucela umntu ukuba ajonge okuphawulwa kwincoko okanye izandla eziphakanyisiweyo ukuze ukwazi ukujolisa ingqalelo yakho ekukhokeleni kwingxoxo.

Funa iiNdlela zokuBandakanya Abafundi

Iindawo zemfundo nge-intanethi ngamanye amaxesha zenza kube nzima ukuba abantu babonwe kwaye baviwe. Yenza inzame usezingqondweni yokubandakanya abo bafuna ukubandakanyeka. Ngamanye amaxesha oku kuthetha ukudala amaqela amancinci (umzekelo, ngokuqhawula iklasi enkulu yeSikolo sangeCawe). Ngamanye amaxesha kuthetha ukucela abafundi kwangaphambili ukuba bathathe inxaxheba ngendlela eyiyondwa. Ungavumeli imida yolwazi bobugcisa jikelele ibangele ukuba ulibale okanye ungabahoyi abantu abanomdla kwaye abazimisele ukufunda.