« សម្រាប់អ្នកដឹកនាំ—ការជួយគ្រូបង្រៀនឲ្យទទួលជោគជ័យ » ការបង្រៀនតាមរបៀបរបស់ព្រះអង្គសង្គ្រោះ ៖ សម្រាប់អ្នកទាំងអស់ដែលបង្រៀននៅក្នុងគេហដ្ឋាន និងសាសនាចក្រ ( ឆ្នាំ ២០២២ )

« សម្រាប់អ្នកដឹកនាំ—ការជួយគ្រូបង្រៀនឲ្យទទួលជោគជ័យ » ការបង្រៀនតាមរបៀបរបស់ព្រះអង្គសង្គ្រោះ

រូបភាព

ថ្នាក់សាលាថ្ងៃអាទិត្យ

សម្រាប់អ្នកដឹកនាំ—ការជួយគ្រូបង្រៀនឲ្យទទួលជោគជ័យ

ទំនាក់ទំនងផ្ទាល់មួយទល់មួយ

ជារឿយៗរបៀបដ៏ល្អបំផុតដើម្បីបំពេញតម្រូវការពិសេសរបស់គ្រូបង្រៀន គឺតាមរយៈទំនាក់ទំនងផ្ទាល់មួយទល់មួយ ។ ឧទាហរណ៍ ក្នុងនាមជាអ្នកដឹកនាំ អ្នកអាចមានការពិភាក្សាខ្លីមួយជាមួយគ្រូបង្រៀនពីមុន និងក្រោយការបង្រៀន ដើម្បីពិភាក្សាអំពីគោលការណ៍នៃ ការបង្រៀនតាមរបៀបរបស់ព្រះអង្គសង្គ្រោះ ។ អ្នកអាចរៀបចំសម្រាប់ការពិភាក្សានេះ ដោយការមើលគ្រូបង្រៀនបង្រៀន ។ សូមព្យាយាមឈ្វេងយល់ពីភាពខ្លាំងរបស់គ្រូបង្រៀនឲ្យបានច្បាស់លាស់ ហើយស្វែងរកវិធីនានាដែលអ្នកអាចផ្តល់ការគាំទ្រដល់ពួកគេ ។

ការស្ថាបនាភាពខ្លាំងរបស់គ្រូបង្រៀនគឺវាសំខាន់ដូចការស្វែងរកឱកាសសម្រាប់ការកែលម្អឲ្យបានប្រសើរផងដែរ ។ វាមានប្រយោជន៍ដើម្បីចាប់ផ្តើមការពិភាក្សាជាមួយគ្រូបង្រៀន តាមរយៈការសូម ឲ្យពួកគេពិចារណាសម្រាប់ខ្លួនពួកគេនូវអ្វីដែលកំពុងធ្វើបានល្អហើយ និងចំណុចនានាដែលពួកគេមានអារម្មណ៍ថា គួរកែលម្អឲ្យបានប្រសើរឡើង ។

នៅពេលអ្នកជួបជាមួយគ្រូបង្រៀន សូមពិចារណាអំពីរបៀបនានាដើម្បីពង្រឹង និងលើកទឹកចិត្តពួកគេដោយសន្តានចិត្តល្អ និងមានអំណរគុណសម្រាប់ការបម្រើដែលពួកគេបានធ្វើ ។

ការប្រជុំក្រុមប្រឹក្សាគ្រូបង្រៀន

វួដនីមួយៗគួរធ្វើការប្រជុំក្រុមប្រឹក្សាគ្រូបង្រៀនប្រចាំត្រីមាស ដើម្បីឲ្យគ្រូបង្រៀនអាចប្រឹក្សាជាមួយគ្នាអំពីគោលការណ៍ទាំងឡាយនៃការបង្រៀនដូចជាព្រះគ្រីស្ទ ។ ការប្រជុំក្រុមប្រឹក្សាគ្រូបង្រៀនក៏អាចធ្វើឡើងសម្រាប់មាតាបិតាផងដែរ ( សូមមើល ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ, ១៣.៥, ChurchofJesusChrist.org) ។

តើការប្រជុំទាំងនេះគួរធ្វើឡើងនៅពេលណា ?

ការប្រជុំក្រុមប្រឹក្សាគ្រូបង្រៀនត្រូវបានធ្វើឡើងអំឡុងម៉ោងរៀនរយៈពេល ៥០ នាទីនៅថ្ងៃអាទិត្យ ។

គ្រូបង្រៀនបព្វជិតភាព សមាគមសង្គ្រោះ និងយុវនារីអាចចូលរួមនៅអាទិត្យទីមួយ ឬអាទិត្យទីបី តាមការកំណត់របស់ថ្នាក់ដឹកនាំក្នុងមូលដ្ឋាន ។
គ្រូបង្រៀនសាលាថ្ងៃអាទិត្យអាចចូលរួមនៅអាទិត្យទីពីរ ឬអាទិត្យទីបួន តាមការកំណត់របស់ថ្នាក់ដឹកនាំក្នុងមូលដ្ឋាន ។
គ្រូបង្រៀនថ្នាក់អង្គការបឋមសិក្សាអាចចូលរួមនៅថ្ងៃអាទិត្យណាក៏បាន ដូចបានកំណត់ដោយគណៈប្រធានថ្នាក់អង្គការបឋមសិក្សា និងគណៈប្រធានសាលាថ្ងៃអាទិត្យ ។ ប្រសិនបើមានបំណង នោះគ្រូបង្រៀនថ្នាក់អង្គការបឋមសិក្សាអាចជួបពេលផ្សេងដាច់ដោយឡែកពីគ្រូបង្រៀនដទៃទៀត ដើម្បីប្រឹក្សាអំពីចំណុចពិសេសនានាអំពីការបង្រៀនកុមារ ។ ការប្រជុំនេះអាចធ្វើឡើងនៅក្នុងម៉ោងច្រៀងចម្រៀងរយៈពេល ២០ នាទី ពីមុន ឬក្រោយការប្រជុំថ្ងៃអាទិត្យតាមធម្មតា ឬនៅថ្ងៃមួយទៀតអំឡុងសប្ដាហ៍ ។ ការប្រជុំក្រុមប្រឹក្សាគ្រូបង្រៀនលើសពីម្តងអាចធ្វើឡើងជាប្រចាំត្រីមាស សម្រាប់គ្រូបង្រៀនអង្គការបឋមសិក្សា ដើម្បីកុំឲ្យពួកគេទាំងអស់គ្នាអវត្តមានពីថ្នាក់អង្គការបឋមសិក្សាក្នុងសប្តាហ៍ដដែលនោះ ។ ( កំណត់ចំណាំ ៖ បើចាំបាច់ គណៈប្រធានអង្គការបឋមសិក្សាចាត់តាំងគ្រូបង្រៀនជំនួស បញ្ចូលថ្នាក់រៀន ឬធ្វើការរៀបចំផ្សេងទៀត ដើម្បីឲ្យគ្រូបង្រៀនថ្នាក់បឋមសិក្សាចូលរួមការប្រជុំក្រុមប្រឹក្សាគ្រូបង្រៀន ) ។
ការប្រជុំក្រុមប្រឹក្សាគ្រូបង្រៀនសម្រាប់មាតាបិតាអាចធ្វើឡើងនៅថ្ងៃអាទិត្យ ដូចបានកំណត់ដោយក្រុមប្រឹក្សាវួដ ។

តើនរណាខ្លះគួរតែចូលរួម ?

បុគ្គលគ្រប់រូបដែលបង្រៀនកូរ៉ុម ឬថ្នាក់រៀននៅក្នុងវួដគួរតែចូលរួម យ៉ាងហោចណាស់មានអ្នកដឹកនាំម្នាក់នៃបព្វជិតភាព ឬអង្គការដែលទទួលខុសត្រូវលើកូរ៉ុម ឬថ្នាក់រៀនទាំងនោះ ។ បើចាំបាច់ អ្នកចូលរួមអាចបែងចែកជាក្រុមទៅតាមតម្រូវការនៃអស់អ្នកដែលពួកគេបង្រៀន ។ ឧទាហរណ៍ គ្រូបង្រៀនយុវវ័យ ឬកុមារអាចទទួលប្រយោជន៍ពីការប្រជុំដាច់ដោយឡែកពីគ្នាយូរៗម្តង ដើម្បីពិភាក្សាអំពីបញ្ហាជាក់លាក់ចំពោះការបង្រៀនយុវវ័យ ឬកុមារ ។

សម្រាប់ការប្រជុំក្រុមប្រឹក្សាគ្រូបង្រៀនសម្រាប់មាតាបិតា ក្រុមប្រឹក្សាវួដកំណត់ថា ត្រូវអញ្ជើញមាតាបិតាជាក់លាក់ណាមួយ ឬធ្វើការបើកទូលាយដល់អស់អ្នកដែលចង់ចូលរួមគ្រប់គ្នា ។

តើនរណាដឹកនាំការប្រជុំទាំងនេះ ?

ដោយមានជំនួយពីគណៈប្រធានសាលាថ្ងៃអាទិត្យ ក្រុមប្រឹក្សាវួដមើលការខុសត្រូវការប្រជុំក្រុមប្រឹក្សាគ្រូបង្រៀន ។ ពួកគេប្រឹក្សាជាមួយគ្នាអំពីសេចក្ដីត្រូវការរបស់គ្រូបង្រៀន និងសិស្ស ដោយផ្អែកលើអ្វីដែលពួកគេបានអង្កេតឃើញនៅក្នុងថ្នាក់ និងការប្រជុំ ។ ពួកគេធ្វើការជាមួយគ្នាដើម្បីកំណត់ថា គោលការណ៍ និងការអនុវត្តន៍ណាមួយមកពី ការបង្រៀនតាមរបៀបរបស់ព្រះអង្គសង្គ្រោះ ដែលនឹងបំពេញសេចក្តីត្រូវការខ្លាំងបំផុត ដែលពួកគេបានរកឃើញ ។

ជាធម្មតាប្រធានសាលាថ្ងៃអាទិត្យដឹកនាំការប្រជុំក្រុមប្រឹក្សាគ្រូបង្រៀន ។ ទោះជាយ៉ាងណាក្តីសមាជិកផ្សេងទៀតក្នុងវួដអាចត្រូវបានចាត់ឲ្យដឹកនាំការប្រជុំម្ដងម្កាល ។ គណៈប្រធានកូរ៉ុម និងគណៈប្រធានអង្គការនានាពង្រឹងគ្រូបង្រៀនរបស់ពួកគេ នូវគោលការណ៍ និងការអនុវត្តន៍ដែលបានពិភាក្សានៅក្នុងការប្រជុំ ។

តើមានអ្វីខ្លះគួរធ្វើនៅក្នុងការប្រជុំក្រុមប្រឹក្សាគ្រូបង្រៀន ?

ការប្រជុំក្រុមប្រឹក្សាគ្រូបង្រៀនគួរតែធ្វើតាមទម្រង់ដូចតទៅនេះ ៖

ចែកចាយ និងប្រឹក្សាជាមួយគ្នា ។ អញ្ជើញគ្រូបង្រៀនឲ្យចែកចាយបទពិសោធន៍ការបង្រៀនថ្មីៗ សួរសំណួរដែលទាក់ទងនឹងការបង្រៀន ហើយចែកចាយគំនិតយោបល់ដើម្បីដោះស្រាយលើបញ្ហានានា ។ ក្នុងការប្រជុំផ្នែកនេះអាចរួមបញ្ចូលនូវការរំឭកអំពីគោលការណ៍នានាដែលបានពិភាក្សានៅក្នុងការប្រជុំលើកមុនផងដែរ ។
រៀនជាមួយគ្នា ។ សូមអញ្ជើញគ្រូបង្រៀនឲ្យពិភាក្សាអំពីគោលការណ៍មួយនៃគោលការណ៍ដូចតទៅនេះ ដែលមាននៅក្នុងធនធាននេះ ៖ ផ្តោតទៅលើព្រះយេស៊ូវគ្រីស្ទ ស្រឡាញ់អស់អ្នកដែលអ្នកបង្រៀន បង្រៀនដោយព្រះវិញ្ញាណ បង្រៀនគោលលទ្ធិ និង អញ្ជើញឲ្យរៀនសូត្រដោយឧស្សាហ៍ ។ គោលការណ៍ទាំងនេះអាចត្រូវបានដោះស្រាយតាមលំដាប់លំដោយណាក៏បាន ហើយលើកលែងតែមានការដឹកនាំដោយក្រុមប្រឹក្សាវួដ នោះអ្នកចូលរួមនៅក្នុងការប្រជុំអាចជ្រើសរើសគោលការណ៍បន្ទាប់ដើម្បីពិភាក្សាក៏បាន ។ ប្រសិនបើចាំបាច់ អ្នកអាចចំណាយការប្រជុំច្រើនជាងម្តងដើម្បីពិភាក្សាលើគោលការណ៍មួយ ។
ដាក់ផែនការ និងអញ្ជើញ ។ សូមជួយគ្រូបង្រៀនដាក់ផែនការអំពីរបៀបដែលពួកគេនឹងអនុវត្តគោលការណ៍ ដែលពួកគេបានពិភាក្សា ។ ប្រសិនបើសមរម្យ អ្នកក៏អាចអនុវត្តជាមួយគ្នានូវជំនាញដែលអ្នកបានពិភាក្សាគ្នាដែរ ។ សូមអញ្ជើញពួកគេឲ្យកត់ត្រា ហើយធ្វើសកម្មភាពទៅលើចំណាប់អារម្មណ៍នានាដែលពួកគេទទួលបាន អំពីរបៀបអនុវត្តគោលការណ៍នៅក្នុងការបង្រៀនរបស់ពួកគេ—រួមមានទាំងការខិតខំរបស់ពួកគេដើម្បីបង្រៀននៅក្នុងគេហដ្ឋានរបស់ពួកគេផងដែរ ។ សូមលើកទឹកចិត្តពួកគេឲ្យចាប់ផ្ដើមសិក្សាគោលការណ៍ដែលនឹងត្រូវយកមកពិភាក្សាបន្ទាប់ ។

ការប្រជុំក្រុមប្រឹក្សាគ្រូបង្រៀនគួរតែយកគំរូតាមគោលការណ៍នានាដែលបានពិភាក្សាឲ្យបានច្រើនតាមដែលអាចធ្វើទៅបាន ។

ការប្រជុំក្រុមប្រឹក្សាគ្រូបង្រៀនអាចជួយគ្រូបង្រៀនឲ្យយល់កាន់តែច្បាស់ និងអនុវត្តតាមគោលការណ៍ទាំងឡាយនៃការបង្រៀនដូចជាព្រះគ្រីស្ទ ។

ការណែនាំដល់គ្រូបង្រៀនដែលបានហៅថ្មី

ក្នុងនាមជាអ្នកដឹកនាំ អ្នកមានការទទួលខុសត្រូវដើម្បី « ជួបជាមួយគ្រូបង្រៀនដែលទើបនឹងហៅថ្មី » នៅក្នុងអង្គការរបស់អ្នក និង « ជួយពួកគេរៀបចំខ្លួនសម្រាប់ការហៅបម្រើរបស់ពួកគេ » (ក្បួនខ្នាតទូទៅ, ១៧.៣, ChurchofJesusChrist.org) ។ ការប្រជុំទាំងនេះគឺជាឱកាសដើម្បីណែនាំគ្រូបង្រៀនថ្មីអំពីការហៅបម្រើដ៏ពិសិដ្ឋនេះ និងបំផុសគំនិតពួកគេជាមួយនឹងទស្សនវិស័យមួយអំពីអត្ថន័យនៃការបង្រៀនតាមរបៀបរបស់ព្រះអង្គសង្គ្រោះ ។ ក្នុងនាមជាអ្នកដឹកនាំ អ្នកអាចជួយគ្រូបង្រៀនថ្មីៗឲ្យរៀបចំខ្លួនបម្រើដោយធ្វើកិច្ចការដូចតទៅនេះ ៖

សូមបង្ហាញទំនុកចិត្តថា ព្រះអង្គសង្គ្រោះនឹងជួយពួកគេនៅក្នុងការហៅបម្រើរបស់ពួកគេ ( សូមមើល គោលលទ្ធិ និងសេចក្ដីសញ្ញា ៨៨:៧៨ ) ។
សូមជូនសំណៅចម្លងនៃធនធាននេះទៅគ្រូបង្រៀនថ្មី ហើយលើកទឹកចិត្តពួកគេឲ្យរកមើលវិធីនានាដើម្បី អនុវត្តគោលការណ៍ដែលមាននៅក្នុងធនធាននេះ នៅក្នុងការបង្រៀនរបស់ពួកគេ ។
សូមចែកចាយអ្វីគ្រប់យ៉ាងអំពីអង្គការរបស់អ្នកជាមួយគ្រូបង្រៀនថ្មី ដែលនឹងមានប្រយោជន៍ឲ្យពួកគេដឹង ។
បើចាំបាច់ សូមប្រាប់គ្រូបង្រៀនថ្មីអំពីបន្ទប់បង្រៀន និងមេរៀនដែលចាប់ផ្តើមបង្រៀន ។ សូមផ្តល់ព័ត៌មានគ្រប់យ៉ាងដែលពួកគេត្រូវការអំពីថ្នាក់រៀន និងសមាជិកថ្នាក់របស់ពួកគេ ។
សូមពន្យល់គ្រូបង្រៀនថ្មីថា អ្នកអាចជួយពួកគេក្នុងការហៅបម្រើរបស់ពួកគេ ។ បើចាំបាច់ សូមផ្តល់ការគាំទ្រនៅក្នុងថ្នាក់រៀន ហើយផ្តល់សិទ្ធិចូលទៅកាន់ធនធានបង្រៀននានា ។
យូរៗម្តងសូមអង្កេតមើលថ្នាក់រៀនរបស់គ្រូបង្រៀននោះ ហើយផ្តល់មតិកែលម្អដូចបានបំផុសគំនិតដោយព្រះវិញ្ញាណ ។
អញ្ជើញគ្រូបង្រៀនឱ្យចូលរួមនៅក្នុងការប្រជុំក្រុមប្រឹក្សាគ្រូបង្រៀនប្រចាំត្រីមាស ។