Ang Mahinungdanon nga Plano sa Kaluwasan

“Ang mahinungdanon nga plano sa kaluwasan maoy usa ka tema nga angay gayud nga moukopar sa atong tuman nga pagtagad, ug pagaisipon sa hunahuna nga pinakamaayo nga mga gasa sa langit ngadto sa katawhan.”

Gikan sa Kinabuhi ni Joseph Smith

Niadtong Septyembre 1831, ang Propeta nga si Joseph Smith ug ang iyang pamilya mibalhin mga 48 kilometro sa habagatang silangan sa Kirtland ngadto sa Hiram, Ohio, diin sila nagpuyo og mga usa ka tuig didto sa panimalay ni John ug Alice (nga nailhan usab isip Elsa) Johnson. Niini nga panimalay, ang Propeta mihimo sa kadaghanan sa iyang trabaho sa Joseph Smith nga Paghubad sa Biblia.

Kining importante nga trabaho, nga gitawag sa Propeta nga usa ka “sanga sa akong katungdanan,”¹ nakatampo sa makahuluganon nga paagi sa atong salabutan sa plano sa kaluwasan. Ang Propeta misugod niini nga trabaho niadtong Hunyo 1830 sa dihang ang Ginoo misugo kaniya sa pagsugod sa paghimo og usa ka dinasig nga pag-usab sa King James Version sa Biblia. Dugay na kaayo nga nahibaloan sa Propeta nga ang Biblia dili kanunay nga klaro sa pipila ka importante nga mga butang. Namatngonan niya nga si Moroni mikutlo sa pipila ka mga tudling sa kasulatan ngadto kaniya “uban sa gamay nga kausaban sa pamaagi [mabasa kini] sa atong mga Biblia” ( Joseph Smith—Kasaysayan 1:36). Samtang naghubad sa 1 Nephi 13:23–29, iyang nasayran nga daghang “mga bahin diin mga yano ug labing bililhon” gikuha diha sa Biblia, lakip ang “daghang mga pakigsaad sa Ginoo” (1 Nephi 13:26).

Sa kaulahian ang Propeta miingon: “Mituo ako sa Biblia nga tinuod kon nagagikan kini sa pluma [pen] sa orihinal nga mga tigsulat. Ignorante nga mga maghuhubad, dili mabinantayon nga mga magsusulat, o malinglahon ug kurakot nga mga pari ang nakahimo og daghang mga kasaypananu…. Tan-awa sa [Mga Hebreohanon 6:1] alang sa mga kalainan—‘Busa ang pagbiya sa mga baruganan sa doktrina ni Kristo, magpadayon kita ngadto sa kahingpitan.’ Kon ang tawo mobiya sa mga baruganan sa doktrina ni Kristo, unsaon man niya sa pagkaluwas niana nga mga baruganan? Mao kini ang kalainan. Dili ako motuo niini. Buhaton ko kini nga sama gayud sa ingon—‘Busa sa walay pagbiya sa mga baruganan sa doktrina ni Kristo, magpakabuhi kita sa kahingpit.’”²

Maingon nga gigiyahan sa Espiritu, si Joseph migahin og mga tulo ka mga tuig sa pagsiksik sa Biblia, naghimo og linibo nga mga pagpatul-id sa teksto ug mipahiuli sa mga kasayuran nga nawala. Kining gipahiuli nga kasayuran matingalahon nga nagpasabut sa daghang mga doktrina nga dili klaro nga gipakita diha sa Biblia sama nga anaa karon. Kining dinasig nga mga pag-usab sa mga teksto sa Biblia ang nailhan isip Hubad ni Joseph Smith sa Biblia. Gatusan sa mga tudling gikan sa Hubad ni Joseph Smith gilakip na karon sa Santos sa Ulahing mga Adlaw nga edisyon sa King James Version sa Biblia.

Ang paghubad sa Biblia sa Propeta maoy importante nga bahin sa iyang kaugalingong espirituhanon nga edukasyon ug sa pagbutyag sa pagpahiuli sa ebanghelyo sa kamatuoran. Samtang nag-usab siya sa Daan ug Bag-ong Tugon, kanunay siya nga makadawat og mga pagpadayag nga nagpatin-aw o nagpalapad sa mga tudling sa kasulatan. Sa ingon niini nga paagi, ang Propeta nakadawat og daghang mga doktrina gikan sa Ginoo, lakip na niadtong makita karon diha sa Doktrina ug mga Pakigsaad 74, 76, 77, 86, ug 91, ug sa mga kabahin sa daghang uban nga mga seksyon sa Doktrina ug mga Pakigsaad.

Sa dihang bag-o pa nga nagsugod ang Propeta sa iyang paghubad sa Biblia niadtong Hunyo 1830, ang Ginoo mipadayag kaniya og taas kaayo nga tudling gikan sa mga sinulat ni Moises. Kini nga tudling nahimo nga kapitulo 1 sa basahon ni Moises sa Perlas nga Labing Bililhon. Nagtala kini sa panan-awon diin si Moises nakakita ug nakigsulti sa Dios—usa ka panan-awon nga hilabihan ka talagsaon nga gitawag kini ni Joseph Smith og “usa ka bililhon nga lugas” ug “usa ka sangkap sa kalig-on.”³ Niini nga panan-awon, ang Dios mitudlo ni Moises sa sukaranan nga katuyoan sa mahinungdanon nga plano sa kaluwasan:

“Ug ang Ginoong Dios misulti ngadto kang Moises, nga nag-ingon: … Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:37, 39).

Ang mga doktrina, mga ordinansa, ug mga panaad nga naglangkob sa plano sa kaluwasan nga gipadayag diha sa yuta niining ulahing mga adlaw pinaagi ni Propeta Joseph Smith. Isip usa ka tawo nga klarong nakasabut sa kamahinungdanon niini nga plano, ang Propeta mipahayag: “Ang mahinungdanon nga plano sa kaluwasan maoy usa ka tema nga kinahanglan gayud nga moukopar sa atong tuman nga pagtagad, ug pagaisipon sa hunahuna nga pinakamaayo nga mga gasa sa langit ngadto sa mga tawo.”⁴

Mga Pagtulun-an ni Joseph Smith

Didto sa kalibutan sa kinabuhi nga wala pa dinhi sa yuta, si Jesukristo gipili nga mahimong Manluluwas, ug mipili kita nga modawat sa plano sa kaluwasan.

“Sa unang organisasyon didto sa langit didto kitang tanan ug nakakita sa Manluluwas nga gipili ug gitudlo ug ang plano sa kaluwasan gihimo, ug gitugotan nato kini.”⁵

“Ang Ginoo [mao] ang sacerdote nga walay katapusan, human sa laray sa Melchizedek, ug ang dinihog nga Anak sa Dios, sa wala pa ang katukuran sa kalibutan [tan-awa sa Salmo 110:4].”⁶

“Ang kaluwasan gikan ni Jesukristo giandam alang sa tanang mga tawo, aron molampus ibabaw sa dautanu.… Ang tanan mag-antus hangtud nga sila mosunod ni Kristo sa iyang kaugalingon.

“Ang panagbangi didto sa langit mao—nga si Jesus miingon adunay piho nga mga kalag nga dili maluwas, ug ang yawa miingon nga iyang luwason silang tanan, ug mipahimutang sa iyang plano atubangan sa dakong konseho, kinsa mihatag sa ilang mga boto pabor ni Jesuskristo. Mao nga ang yawa mibarug aron pagsupak batok sa Dios, ug gihinginlan, uban sa tanan nga misuporta kaniya.”⁷

Kita mahangturon nga mga binuhat; mahimo nga mouswag kita sa kahimayaan samtang atong sundon ang mga balaod sa Dios.

Si Propeta Joseph Smith nakadawat sa mosunod nga pagpadayag gikan sa Ginoo niadtong Mayo 1833, nga sa kaulahian gi-rekord diha sa Doktrina ug mga Pakigsaad 93:29: “Ang tawo mao usab diha sa sinugdanan uban sa Dios. Ang salabutan, o ang kahayag sa kamatuoran, wala malalang o mabuhat, ni dili gayud mahimo.” Pagka-Abril 1844, ang Propeta mitudlo: “Aduna ako’y laing hilisgutan nga pagahisgutan, diin gibanabana nga mohimaya sa tawou.… Kabahin ra kini uban sa hilisgutan sa pagkabanhaw sa patay,—nga mao, ang kalag—ang hunahuna sa tawo—ang imortal nga espiritu. Diin kini gikan? Ang tanang makinaadmanon nga mga tawo ug mga doktor sa pagkabalaan nag-ingon nga ang Dios milalang niini sukad pa sa sinugdanan; apan dili kini mao: ang mao gayud nga ideya mipakubos sa tawo diha sa akong pagkalkulo. Wala ako magtuo sa doktrina; Mas labaw pa ako nga nasayud. Paminawa kini, kamong tanan nga mga tawo sa kalibutan; kay ang Dios nagsulti kanako sa ingon, ug kon dili kamo motuo kanako, dili mahimo ang kamatuoran nga walay epektou.…

“Naghisgot ako sa pagka-imortal sa espiritu sa tawo. Makatarunganon ba kini sa pag-ingon nga ang pagkamaalamon sa mga espiritu imortal, ug gani kini adunay sinugdanan? Ang kaalam sa espiritu walay sinugdanan, ni adunay pagkatapus. Maayo kana nga katarungan. Kana nga may sinugdanan mahimong adunay katapusan. Wala gayuy higayon diin walay mga espirituu.…

“…Akong husloon ang akong singsing gikan sa akong tudlo ug ipakisama kini sa hunahuna sa usa ka tawo—ang imortal nga bahin, tungod kay kini walay sinugdanan. Pananglitan putlon ninyo kini ngadto sa duha; dayon aduna na kini’y sinugdanan ug katapusan; apan isumpay kini pag-usab, ug magpadayon kini sa mahangturong pagkalingin. Maingon man usab sa espiritu sa tawo. Sama sa pagpakabuhi sa Ginoo, kon aduna kini’y sinugdanan, aduna kini’y katapusan. Ang tanang mga buang ug makinaadmanon ug maalamon nga mga tawo gikan pa sa pagsugod sa paglalang, kinsa nag-ingon nga ang espiritu sa tawo adunay sinugdanan, sulayi kon aduna ba gayud kini’y katapusan; ug kon kana nga dotrina tinuod, nan ang doktrina sa pagkahanaw matinuod. Apan kon husto ako, tingali uban sa kaisug mopahayag ibabaw sa mga atup sa kabalayan nga ang Dios wala gayuy gahum sa paglalang sa espiritu sa tawo. Ang Dios sa iyang kaugalingon dili makalalang sa iya mismong kaugalingon.

“Ang kaalam mahangturon ug anaa diha sa kinaugalingon nga pagkaanaa nga baruganan. Usa kini ka espiritu nga gikan sa tanang panahon ug walay nagmugna niini. Ang tanang mga salabutan ug mga espiritu nga sukad gipadala sa Dios nganhi sa kalibutan ang dali ra nga mapalambo.

“Ang unang baruganan sa tawo mao ang kinaugalingon nga pagkaanaa uban sa Dios. Ang Dios mismo sa kaugalingon, nakakita nga siya anaa sa taliwala sa mga espiritu ug kahimayaan, tungod kay siya mas labaw pa ka maalamon, nakakita nga angayan sa pagmugna og mga balaod diin ang uban makabaton og kahigayunan sa pag-uswag sama sa iyang kaugalingon. Ang pakigsuod nga atong naangkon uban sa Dios nagbutang kanato sa sitwasyon nga mouswag diha sa kahibalo. Aduna siyay gahum sa pagmugna og mga balaod aron sa pagtudlo sa mas huyang nga salabutan, nga unta mahimo silang mahimaya uban sa iyang kaugalingon, aron nga sila unta makabaton ug usa ka himaya sa usag usa, ug sa tanan nga kahibalo, gahum, kahimayaan, ug salabutan, diin gikinahanglan aron makaluwas kanila didto sa kalibutan sa mga espiritu.”⁸

“Atong giisip nga ang Dios milalang sa tawo nga dunay pangutok nga mahimong matudloan, ug salabutan nga mahimong mapalambo sa kaangayan sa pagpakabana ug pagkugi nga gihatag sa kahayag nga gitugyan gikan sa langit ngadto sa maalamon; ug kon magkaduol ang tawo sa kahingpitan, mas labaw pa ka tin-aw ang iyang mga panglantaw, ug mas hilabihan pa ang iyang kalipay, hangtud nga iyang mabuntog ang mga kadautan sa iyang kinabuhi ug mawala ang matag tinguha sa pagpakasala; ug sama sa karaan, nga midangat nianang higayon sa hugot nga pagtuo diin giputos siya sa gahum ug himaya sa iyang Tiglalang, ug gibayaw aron magpuyo uban Kaniya. Apan atong hunahunaon nga kini usa ka dapit diin wala pay tawo sukad nga nakaabut niini nga panahona.”⁹

Mianhi kita sa yuta aron makabaton og lawas, aron makaangkon og kahibalo, ug aron makabuntog pinaagi sa hugot nga pagtuo.

“Tanang mga tawo nasayud nga kinahanglan gayud sila nga mamatay. Ug importante kini nga kinahanglan nga makasabut kita sa mga katarungan ug mga katuyoan sa atong pagkabantang ngadto sa nagkausab nga mga kahimtang sa kinabuhi ug sa kamatayon, ug sa mga plano ug mga katuyoan sa Dios sa atong pag-anhi sa kalibutan, ang atong mga pag-antus dinhi ug sa atong pagbiya niini nga kalibutan. Unsay katuyoan sa atong pagtunga sa pagkaanaa, dayon mamatay ug mobiya niini nga kalibutan, aron mawala dinhi? Apan makatarunganon lamang ang pagdahum nga ang Dios mopadayag og usa ka butang agi og pagpasabut niana nga hilisgutan, ug usa kini ka butang nga kinahanglan atong tun-an labaw pa kaysa bisan unsa nga butang. Kinahanglan nga atong tun-an kini maadlaw ug magabii, tungod kay ang kalibutan ignorante sa pagsabut sa ilang tinuod nga kahimtang ug relasyon [sa Dios].”¹⁰

“Ang plano sa Dios sa wala pa ang katukuran sa kalibutan mao ang pagbaton nato og mga tabernakulo [mga lawas], nga pinaagi sa pagka-matinuuron kinahanglan nga makabuntog kita ug sa ingon makabaton og pagkabanhaw gikan sa patay, sa ingon niini nga paagi makabaton og himaya, dungog, gahum, ug kaharianon.”¹¹

“Kita mianhi dinhi sa yuta aron kita makaangkon og lawas ug dad-on kini nga putli sa atubangan sa Dios sa celestial nga gingharian. Ang dakong baruganan sa ebanghelyo naglangkob sa pag-angkon og usa ka lawas. Ang yawa walay lawas, ug kini mao ang iyang silot. Siya ganahan kon siya makaangkon sa tabernakulo sa tawo, ug sa diha nga gihinginlan sa Manluluwas siya mihangyo sa pag-adto sa panon sa mga baboy, nagpakita nga gipili niya ang lawas sa baboy kay sa wala. Ang tanang mga tawo kinsa adunay mga lawas adunay gahum niadtong wala.”¹²

“Ang kaluwasan maoy alang sa tawo aron maluwas gikan sa tanan niya nga mga kaaway; tungod kay hangtud nga ang tawo makabuntog ibabaw sa kamatayon, dili pa siya luwasu.…

“Ang mga espiritu didto sa mahangturon nga kalibutan sama sa mga espiritu dinhi sa kalibutan. Kon kadtong mianhi niini nga kalibutan ug nakadawat og mga tabernakulo dayon namatay ug mibangon na usab ug nakadawat og nahimaya nga mga lawas, makabaton sila og gahum ibabaw sa mga espiritu kinsa wala makadawat og mga lawas, o wala managpabilin diha sa ilang nahimutangan, sama sa yawa. Ang silot sa yawa mao nga kinahanglan dili siya makabaton og lawas sama sa mga tawo.”¹³

“Ang baruganan sa kahibalo mao ang baruganan sa kaluwasan. Kini nga baruganan mahimong masabut sa matinud-anon ug matinguhaon, ug ang matag usa nga wala makabaton og kahibalo nga igong makaluwas pagasilotan. Ang baruganan sa kaluwasan gihatag kanato pinaagi sa pagkahibalo kabahin ni Jesukristo.

“Ang kaluwasan dili labaw ni kulang kay sa pagbuntog ibabaw sa tanan natong mga kaaway ug ibutang sila ilalum sa atong mga tiil. Ug kon makabaton kita og gahum sa pagbutang sa tanan natong mga kaaway ilalum sa atong mga tiil niini nga kalibutan, ug usa ka kahibalo sa pagbuntog sa tanang dautan nga mga espiritu sa kalibutan nga moabut, dayon luwas na kita, sama sa hitabo ni Jesus, kinsa momando hangtud nga Iyang mabutang ang tanang mga kaaway ilalum sa iyang mga tiil, ug ang katapusang kaaway mao ang kamatayon [tan-awa sa 1 Mga Taga-Corinto 15:25–26].

“Tingali adunay mga baruganan dinhi nga pipila lang ka mga lalaki ang nakahunahuna. Walay tawo nga makabaton niini nga kaluwasan gawas kon pinaagi sa usa ka tabernakulo.

“Karon, niini nga kalibutan, ang mga tawo may kinaiya nga pagkahakog, ambisyoso ug naningkamot nga molabaw ngadto sa lain, sa laing bahin pipila ang andam nga molig-on sa uban sama usab sa ilang mga kaugalingon. Ingon man usab sa laing kalibutan adunay nagkalain-laing mga espiritu. Ang pipila nagtinguha nga molabaw. Ug mao kini ang nahitabo ni Lucifer sa dihang napakyas siya. Nagtinguha siya sa mga butang nga dili pinasubay sa balaod. Mao nga gihinginlan siya, ug giingon nga daghan ang miuban kaniya; ug ang pinakadako sa iyang silot mao nga dili siya makabaton og lawas. Mao kini ang iyang silot.”¹⁴

Ang Dios naghatag kanato og matarung nga kabubut-on ug ang gahum sa pagpili sa pagkabuotan ibabaw sa pagkadautan.

“Kon ang mga tawo magkinahanglan og kaluwasan, kinahanglan sila nga mahimong mapaubos, sa dili pa sila mobiya niini nga kalibutan, sa piho nga mga lagda ug mga baruganan, nga gihanay pinaagi sa usa ka dili mausab nga mando sa wala pa matukod ang kalibutanu.… Ang pagkatukod sa espirituhanon ug langitnong mga kalibutan, ug sa mga espirituhanon ug langitnong mga binuhat, mao ang nahiuyon sa labing hingpit nga han-ay ug panag-uyon: ang mga kinutoban ug mga padulngan gipiho nga dili mabakwi, ug boluntaryo nga gidawat ang ilang langitnong pagkabutang sa ilang mga kaugalingon, ug nga pinaagi sa atong unang mga ginikanan nga gidawat dinhi sa yuta. Mao nga importante ang pagsagup ug pagdawat sa mga baruganan sa mahangturong kamatuoran sa tanang mga tawo dinhi sa yuta nga nagpaabut og kinabuhing dayon.”¹⁵

“Ang tanang mga tawo adunay katungod sa ilang kabubut-on, tungod kay gi-orden kini sa Dios. Gihimo Niya ang matarung nga kabubut-on sa katawhan, ug gihatagan sila og gahum sa pagpili sa maayo o dautan, sa pagtinguha niana nga matarung, pinaagi sa paglakaw sa dalan sa pagkabalaan diha sa iyang kinabuhi, nga magdala og kalinaw sa hunahuna, ug kalipay sa Espiritu Santo dinhi, ug kahingpitan sa kahimayaan ug kalipay diha sa Iyang tuong kamot human niana, o sa paglakaw sa usa ka dautan nga agianan, nga nagpaingon sa kasal-anan ug pagbatok sa Dios, nga sa ingon magdala og panghimaraut sa ilang mga kalag niini nga kalibutan, ug sa mahangturon nga pagkawala sa umaabut nga kalibutan.”¹⁶

“Si Satanas dili makatintal kanato pinaagi sa iyang mga pagdani gawas kon kita motugot ug monunot diha sa atong mga kasingkasing. Ang atong kinaiya mao nga kita makabatok sa yawa; kon kita wala pa gilalang sa ingon, dili unta kita mahimong gawasnon sa kabubut-on.”¹⁷

“Ang yawa walay gahum ibabaw kanato gawas lamang kon ato siyang tugotan, sa higayon nga kita mobatok sa bisan unsang butang nga nagagikan sa Dios, ang yawa makagahum.”¹⁸

Niadtong Mayo 16, 1841,ang Propeta namulong ngadto sa mga Santos: “Si Presidente Joseph Smith … miingon nga si Satanas gibasol sa hingpit tungod sa mga kadautan nga atong gihimo, apan kon siya ang hinungdan sa tanan natong pagkadautan, ang mga tawo dili mahimo nga panghimarauton. Ang yawa dili makapugos sa mga tawo sa pagbuhat og dautan, ang tanan tinuyo. Kadtong misupak sa Espiritu sa Dios, mahimo nga may kapangakohan nga mahulog sa tintasyon ug dayon ang kapunongan sa langit pagabawion gikan niadtong kinsa midumili nga mahimong mga tig-ambit sa hilabihan ka mahinungdanon nga kahimayaan. Ang Dios dili maghimo og bisan unsang pamugos nga paagi, ug ang yawa dili makahimo; ug ang sama nga mga ideya nga ingon sa gihunahuna [kabahin niini nga mga hilisgutan] sa kadaghanan dili makatarunganon.”¹⁹

Si Eliza R. Snow mi-rekord: “[Si Joseph Smith] miingon dili siya magsapayan kon unsa ka paspas ang atong pagdagan diha sa agianan sa pagkahiyasnon. Batoki ang kadautan, ug diha walay kakuyaw; and Dios, mga tawo, ug mga anghel dili manghimaraut niadto nga nanagbatok sa matag butang nga dautan, ug ang mga yawa dili makahimo sa pagpanghimaraut; ingon man usab ang yawa dili molampus sa pagbuntog sa usa ka walay sala nga kalag kinsa mobatok sa tanang butang nga dautan sama sa iyang pagsulay sa pagbuntog ni Jehovah.”²⁰

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Unsa ang pipila ka piho nga mga kamatuoran mahitungod sa plano sa kaluwasan ug ang katuyoan sa kinabuhi nga atong nahibaloan tungod sa mga pagpadayag ngadto ni Propeta Joseph Smith? Sa unsa nga paagi kini nga mga kamatuoran makatabang kaninyo?
Si Joseph Smith mitudlo nga ang plano sa kaluwasan “usa ka butang nga labaw pa kay sa bisan unsa nga butang” (pahina 252) ug “usa ka tema nga kinahanglan gayud nga moukopar sa atong tuman nga pagtagad” (pahina 249). Sa unsa nga mga paagi atong matun-an ang plano sa kaluwasan? Samtang nagbuhat kita sa inadlaw nato nga mga buluhaton, unsay atong mabuhat aron paghatag sa plano sa kaluwasan sa atong tuman nga pagtagad? Unsay pipila ka mga paagi nga makatudlo kita sa plano sa kaluwasan ngadto sa uban?
Ribyuha ang mga pagtulun-an ni Joseph Smith mahitungod sa Konseho didto sa Langit ug mahitungod sa atong mahangturon nga kinaiya (mga pahina “249–252). Sa unsa kaha nga paagi sa pagkasayud niini nga mga doktrina nahimong panalangin sa inyong kinabuhi dinhi sa yuta?
Si Propeta Joseph mipamatuod nga, “Ang tanang mga salabutan ug mga espiritu nga sukad gipadala sa Dios nganhi sa kalibutan dali ra nga mapalambo” (pahina 210). Unsa sa inyong huna-huna ang ipasabut niini? Sa unsa kaha nga paagi kini nga kamatuoran makaimpluwensya sa paagi sa inyong pagsagubang sa mga hagit? Sa paagi nga inyong gibati mahitungod sa inyong kaugalingon nga bili ug mga kasarang? Sa paagi sa inyong pagtagad sa mga tawo?
Basaha ang paragrap nga nagsugod diha sa ubos sa pahina 250. Palandunga ang mga panalangin nga atong nadawat sa atong paghatag og “pagpakabana ug pagkugi … sa kahayag nga gitugyan gikan sa langit.”
Ribyuha ang mga pagtulun-an ni Joseph Smith mahitungod sa kamahinungdanon sa pagbaton og pisikal nga lawas (mga pahina 252–54). Sa unsa kaha nga paagi kini nga kahibalo makaapekto sa pamaagi sa atong pag-atiman sa atong mga lawas?
Basaha ang ikatulong paragrap sa pahina 255 ug ang ikaunom nga paragrap sa pahina 255. Hunahunaa kon unsay kahulugan niining mga pagtulun-an diha kaninyo samtang naggamit kamo sa inyong kabubut-on. Unsay pipila ka piho nga mga butang nga atong mabuhat aron sa pagbatok sa impluwensya ni Satanas?

May kalabutan nga mga Kasulatan: 2 Nephi 2:25; 9:6–12; Alma 34:31–33; D&P 76:25–32; 101:78; Abraham 3:22–25

Christ speaking to Moses — “Ug ang Ginoong Dios miingon ngadto ni Moises, nga nag-ingon:… Kay tan-awa, mao kini ang akong buhat ug ang akong himaya—ang pagpahinabo sa pagka-mortal ug sa kinabuhi nga dayon sa tawo.”

father reading — “Ang plano sa Dios sa wala pa ang katukuran sa kalibutan mao ang pagbaton nato og mga tabernakulo [mga lawas], nga pinaagi sa pagka-matinuuron kinahanglan nga makabuntog kita.”