Wase 10

Na Susugi Cake ni Veitokani Tawamudu ni Vakawati

“Na veivakilai kamikamica duadua ni bula, na veigagadre lomasoli ka veivakacegui levu sara ni uto ni tamata, sa vakataudeitaki ena dua na vakawati e savasava vakaoti ka sega ni vakacacani mai na veika tawasavasava ni vuravura.”

Na Bula nei Gordon B. Hinckley

Dua na bogi ni rau dabe malua vata toka o Peresitedi kei Sisita Hinckley, a kaya o Sisita Hinckley, “O sa dau tekia na tabaqu meu vuka kina e veigauna, kau sa domoni iko kina.”¹ Ni vakamacala voli ena vosa oya mai vua na watina, a kaya o Peresitedi Hinckley, “Au sa dau saga meu kila na [nona] bula vakaikoya, nona ituvaki ni bula, nona gagadre e so, na veika e baleti koya, na nona tatadra. Laiva me vuka. Io, laiva me vuka! Laiva me taracake na nona taledi vakaikoya. Laiva me cakava na veika ena nona ivalavala. Kakua ni vakalatilati vua, ka qoroya na ka e cakava.”² O Sisita Hinckley sa dau veitokoni tu vakakina kivua na watina—vaka e dua na tama, ena veika e dau taleitaka, kei na nona veiqaravi tawayalani ena Lotu.

Ena levu na yabaki ni nodrau tubu vata voli, rau a tiko ena dua vataga na tabanalevu o Gordon B. Hinckley kei Marjorie Pay, ka rau dui vakaitikotiko veibasai mai na gaunisala ena vuqa na yabaki. “Au a raici koya vakailiu ena Lalai,” a nanuma lesu emuri o Peresitedi Hinckley. “A wilika voli o koya e dua na ivola. Au sega ni kila na ka e cakava vei au, ia au sega ni guilecava rawa. Sa qai tubu cake o koya ki na dua na goneyalewa totoka, ka sa noqu na vakasama vinaka meu vakamautaki koya.”³

A yaco na imatai ni nodrau veigadivi—ena dua na danisi ni Lotu—ni sa 19 o koya ka 18 o vunimarama. “Na cauravou oqo ena lako tiko ki na dua na vanua,” a tukuna vei tinana o Marjorie emuri.⁴ A tubu tikoga na nodrau veimaliwai ni sa gole o Gordon ki na Univeseti e Utah. Ia ena 1933, na yabaki a taurivola oti kina, a kacivi o koya me veiqaravi vakaulotu ki Igiladi. Ena nona lesu mai ena 1935, rau a tomana na nodrau veigadivi, ia ena 1937 rau a vakamau ena Valetabu e Salt Lake. Ni nanumi lesu na itekitekivu ni nodrau bula vakawati, a kaya o Sisita Hinckley:

“A lailai sara na ilavo, ia e levu tu na neirau vakanuinui kei na yalo ni toso ki liu. A sega ni wananavu sara na veisiga eliu oya, ia era a vakatawani tu ena sasagaka kei na gagadre levu me tauyavutaki e dua na itikotiko marautaki. Keirau a veilomani dina sara, sega ni vakatitiqataki na tikina oya. Ia sa dodonu talega me keirau veivakamatautaki vakaikeirau. Au nanuma ni sa dodonu ki na veiwatini kecega mera veivakamatautaki vakaiira.

“Au a vakila vakailiu ni na vinaka cake me keirau cakacaka vakaukauwa ni veikilai yalo rawa mada mai na kena sagai voli me keirau veisautaki keirau—kau raica ni na sega ni rawa. … Sa dodonu me vakalailai na solia kei na taura, ka levu cake na veiraurau, me rawati kina e dua na itikotiko marautaki.”⁵

A kacivi o Peresitedi Hinckley me dua na Vakaitutu Raraba ena 1958, ka donuya na veiyabaki eliu ni nona veiqaravi, a tiko voli ga e vale o Sisita Hinckley me qarava na luvedrau e lima ni veitosoyaki voli o koya ena ilesilesi vaka-Lotu. Ni ra sa tubucake na luvedrau, rau sa dau tosovata voli na Hinckley—e dua na ka rau dau vakamareqeta. Ena Epereli 1977, a yaco na ivakananumi ni nodrau ika 40 ni yabaki ni vakawati ena nodrau a gole voli ena dua na ilakolako balavu ni veisotari vata kei ira na Yalododonu e Ositerelia. Ena siga oya, a vakananuma lesu o Peresitedi Hinckley ena nona ivolaniveisiga:

“Keirau sa mai tu oqo nikua e Perth, Ositerelia, na neirau tiko oqo sa ivakaraitaki ni ka e sa kauta mai vei keirau na veiyabaki. Keirau sa vakayagataka na siga ena veisotari vata kei ira na daukaulotu ena Tabana ni Kaulotu e Perth, Ositerelia. E sa dua dina na siga totoka eda a mai rogoca kina na ivakadinadina e so kei na veituberi. Era a solia na daukaulotu vei Marjorie e dua na ivutu senikau lailai ka ra dau tokara na marama, e dua na ka a sega na noqu gauna meu rawata vua vakaiau.

“Sa rawa ni keirau vola e vica vata na volimu ena 40 na yabaki sa sivi. … Keirau a sotava na neirau sasaga dredre kei na neirau leqa e so. Ia ni soqoni vata, e sa rui vinaka na bula. Keirau sa mai vakalougatataki ena qoroqoro. Ena yabaki oqo, sa tekivu vakila e dua na ibalebale ni veika tawamudu kei na bibi ni veitokani tawamudu. Ke keirau a tiko e vale ena bogi oqo, sa na rawa ni yaco e dua na mataqali vakayakavi vakamatavuvale. Me vaka oqo, keirau sa yawa mai vale ena qaravi ni Turaga, ka sa dua na ka kamikamica.”⁶

Ni oti e ruasagavulu karua na yabaki, ni veiqaravi voli vaka Peresitedi ni Lotu, a vola o Peresitedi Hinckley e dua na ivola kivei Sisita Hinckley ka vakamacalataka kina na nona nanuma ni oti e sivia na 60 na yabaki ni vakawati. “O sa dua dina na itokani vakasakiti,” a kaya o koya. “Oqo keirau sa mai qase vakatautauvata, ka sa dua dina na ka kamikamica. … Ena so na siga mai liu ni sa na tatara malua na liga i mate ki na dua vei keirau e sa na turu na wai ni mata, io, ena yaco talega e dua na veivakadeitaki lo ka matata me baleta na veivakaduavatataki tale kei na veitokani tawamudu.”⁷

Ena itekivu ni 2004, rau a gole voli tiko ki vale na Hinckley mai na veivakatabui ni Valetabu e Accra Ghana ni mai ciba vakasauri o Sisita Hinckley ena oca. A sega ni rawata lesu o koya na nona kaukauwa ka mani mate enai ka 6 ni Epereli, 2004. Ni oti e ono na vula ena koniferedi raraba ni Okotova, a kaya o Peresitedi Hinckley:

“Niu taura tu na ligana ka raica ni sa drodro tani yani vakamalua mai ligana na bula oqo, au vakatusa niu a luluvu. Ni se bera niu vakamautaki koya, sai koya ga na goneyalewa ni noqu tatadra. … Sai koya na noqu itokani lomani ena sivia na rua na ikatolu ni senijiuri, na kequ isa ena mata ni Turaga, na noqu iliuliu. Ia qo ena noqu sa qase sara, sa yaco tale me goneyalewa ni noqu tadra.”⁸

Ena nona luluvu, a tokoni o Peresitedi Hinckley ena kena kilai ni sa vauci tawamudu tu o koya kei Marjorie. “Me vakayali e dua na itokani lomani dina ka sa balavu na nona lako curuma vata e dua na sigarama kei na kena iyaloyalo e sa veivakarusai saraga,” a kaya o koya. “E sa tiko e dua na galili veiologi ka tosocake voli na kena kaukauwa. E veivakatotogani mosimosi ki na yalo saraga ni dua na tamata. Ia ena vakanomodi ni bogi e sa rogoci e dua na vakasolokakana lo e kaya, ‘Sa daumaka na ka oti. Sa daumaka na ka oti.’ Ka sa kauta mai na domo oya mai na taudaku ni ka tawakilai na vakacegu, kei na veivakamatatataki, kei na veivakadeitaki tawavakatitiqa ni o mate e sega ni icavacava, ni toso tu ga na bula, ena cakacaka me qaravi kei na qaqa me rawati. Na domo lo oya, ka tawarogoci rawa ena daliga vakayago, e kauta mai na veivakadeitaki ni, dina ga sa mai yaco na veitawasei, ena yaco e dua na veivakaduavatataki rekitaki.”⁹

A rekitaka o Peresitedi kei Sisita Hinckley e dua na vakawati bula marau ka veilomani ka a vaqaqacotaki mai na “veivakadeitaki lo ka matata me baleta na veivakaduavatataki tale kei na veitokani tawamudu.”

iVakavuvuli nei Gordon B. Hinckley,

Na Tamada Vakalomalagi a tauyavutaka na vakawati mai na ivakatekivu.

Sa dua na ka totoka na vakawati ena ituvatuva ni Tamada Tawamudu, e dua na ituvatuva e vakarautaki ena Nona vuku vakalou me baleta na nodra bula marau kei na tiko taqomaki na Luvena kei na tomani voli ni kawa.

Sai Koya na noda Dauveibuli, ka sa tauyavutaka o Koya na vakawati mai na ivakatekivu. Ena gauna a buli kina o Ivi, “A kaya ko Atama, oqo dina na sui mai na suiqu, kei na lewe mai na lewequ: … O koya oqo sa na biuta kina na tamana kei tinana na tagane, ka kabita na watina; a rau na lewe dua ga.” ( Ai Vakatekivu. 2:23–24.)

A volavola o Paula kivei ira na Yalododonu mai Korinica, “Ia sa sega ni tu duadua ga na tagane ka me tu tani na yalewa, se tu duadua ga na yalewa me tu tani na tagane ena Turaga.” (1 Kori. 11:11.)

Ena vakatakila vou, sa kaya na Turaga, “Au sa kaya vakaidina vei kemudou, ko koya sa vakatavuvulitaka ni tabu na vakawati, sa sega ni lesi mai vua na Kalou, raica sa vakarota na Kalou me vakawati na tamata kece ga.“ (V&V 49:15.) …

Sa dina e sega ni dua e wilika voli na ivolanikalou, ka makawa kei na ka vou, e rawa ni vakatitiqataka na ivakavuvuli vakalou ni vakawati. Na veivakilai kamikamica duadua ni bula, na veigagadre lomasoli ka veivakacegui levu sara ni uto ni tamata, sa vakataudeitaki ena dua na vakawati e savasavavuka ka sega ni vakacacani mai na veika tawasavasava ni vuravura.

Na vakawati vakaoqo, au vakabauta, e sa gagadre—na ka nuitaki, dau divi, na ka masulaki gadrevi—ni turaga kei na marama e veivanua kecega.¹⁰

Ena valetabu, sa rawa ni vauci vata e dua na turaga kei na marama vakawati me tawamudu sara.

[Na] valetabu … e soli veivakalougatataki ka sega ni rawa ena dua tale na vanua. Na ka kece e yaco ena veivale vakatabui oqo e sa baleta na ivakarau tawamudu ni tamata. Eke, era sa vauci vata vakamatavuvale na turaga kei na marama vakawati kei ira na luvedra me tawamudu sara. Na vakawati e sega ni “me yacova ga na mate.” E sa tawayalani, kevaka e bula kilikili na veiwatini ena kena veivakalougatataki.¹¹

E a tiko li e dua na turaga ka lomana vakaidina e dua na marama, se dua na marama ka lomana vakaidina e dua na turaga, ka sega ni masuta me na tomani voli na nodrau veilasamaki ena taudaku ni ibulubulu? Sa bau buluti mada e dua na gone mai vei ira na itubutubu ka sega ni diva voli na veivakadeitaki ni na rawa ni nodra tale na daulomani oya ena dua na vuravura ka lako mai? E rawa li ni vakatitiqataka e dua ga ka vakabauta voli na bula tawamudu ni na solia kivei ira na Luvena tagane kei na yalewa na Kalou ni lomalagi na isolisoli vakamareqeti duadua oya ni bula, na loloma ka kunea na kena ivakaraitaki vakaibalebale sara ena veimaliwai vakamatavuvale? Sega, sa cikeva na vuna ni veimaliwai vakamatavuvale sa na tomani ni oti na mate. Sa diva tu na uto ni tamata, ka sa vakatakila na Kalou ni lomalagi e dua na sala me na rawati kina. Na veicakacaka tabu vakalotu ena vale ni Turaga ena vakarautaka.¹²

Sa ka kamikamica na veivakadeitaki, sa veivakalomavinakataki na vakacegu e lako mai na kilaka ni kevaka eda vakawati donu ka bula dodonu, ena tomani na noda veimaliwai, sega ni vakuwai kina na yaco deivaki ni mate kei na itosotoso ni gauna. Era na rairai vola sere ni gagano na turaga ka lagati ira. Era na rairai lalawaka ka vakanuinui ka tadra. Ia na ka kece oqo ena dua walega na lalawa ni dodomo vakavo ke cakacakataki e dua na dodonu ni lewa e cecere cake mai na kaukauwa ni gauna kei na mate.¹³

Era lako veitikivi na turaga kei na marama vakawati ena dua na ilakolako tawamudu.

Ena Nona ituvatuva cecere, ni a bulia taumada na tamata na Kalou, a bulia o Koya e rua na mataqali tikina tabu. Na ivakamacala veivakaturagataki ni rua na mataqali oya e sa kune ena bula vakawati. Dua na tamata e sa vu ni marau ki na dua tale.¹⁴

Ena veitokani ni bula vakawati e sega kina na itovo lolovira se cecere. Na marama e sega ni lako eliu mai vua na turaga; ka sega ni lako eliu na turaga mai vua na marama. Rau lako veitikivi vaka na luvena tagane kei na yalewa na Kalou ena dua na ilakolako tawamudu.¹⁵

Na vakawati, ena kena ibalebale dina taucoko, e sa dua na veitokani ni duavata, ka sega ni dua e qatia voli e dua tale, ia, ena nodrau veivakauqeti ka veitokoni vakataki rau ena itavi kei na sasaga ena dui tiko vei rau.¹⁶

Kemuni na marama vakawati, raica na watimuni me vaka na nomuni itokani vakamareqeti ka bula kilikilitaka na veimaliwai oqori. Kemuni na turaga vakawati, raica ena watimuni na nomu iyau yaga duadua ena gauna oqo se tawamudu, era sa luvena yalewa yadua na Kalou, ka dua na itokani o rawa ni veitauriliga lako vata kaya, ena sigarama se cagitataba, ena veidredre kei na cavuisausau taucoko ni bula.¹⁷

Au nanuma e rua na [itokani] au kila … ena veiyabaki ena koronivuli torocake kei na univeseti. O koya e dua na gonetagane mai na tauni ena sau-la ni vanua, e dua tu ga na kena irairai, sega vua na ilavo se nuitaki soti. A tubu cake o koya ena iteitei, ka kevaka e tu vua e dua na ka e matau kina e a veilauti sa ikoya na sasagataki ni cakacaka. … Ia mai na kena irairai sakuca taucoko, a tiko vua e dua na matadredredre kei na itovo ka vaka me lagataka na ka vinaka. O koya e dua na goneyalewa ena siti ka sa lako mai ena dua na itikotiko veivakacegui. …

E dua na ka matalia a yaco kivei rau. Rau a veidomoni. … [Rau] veidredrevaki ka danisi ka vuli vata ena veiyabaki oya. Rau a vakamau ni ra vakananuma voli na tamata se na rawa vakacava ni rau rawailavo me rau bula tiko kina. A sasaga dredre voli o vunituraga ena nona koronivuli ni veivakarautaki ka voleka sara ni liutaka na nona kalasi ena rawaka. A sasaga me bula voli o vunimarama ena ilavo lailai ka vakabulailavo ka cakacaka ka masumasu. A veivakauqeti ka veitokoni o koya ka ni gauna e votivoti vakaidina kina na veika e kaya lo o koya, “Daru na rawata ena dua na sala.” Ni vakauqeti mai na nona vakabauta kivua, a tomana me lako curuma o vunituraga na veiyabaki dredre oya. A basika mai na luvedrau, ka rau lomani ira ka susugi ira vata ka solia vei ira na veivakadeitaki a vu mai na nodrau ivakaraitaki ni loloma me baleta na veidinadinati kivei rau yadua. Oqo sa sivi e sivia ni vasagavulu kalima na yabaki. Era sa tubucake na luvedrau ka ra sa isakisaki kivei rau, ki na Lotu, kei na vanua vakaitikotiko eratou tiko kina.

Wale tikoga oqo, niu vodoka voli e dua na waqavuka mai Niu Ioka, au a lakova sobu yani na sala galala ena buto-veimama ni rumu lailai ka raica e dua na marama, ulu vulavula, na uluna e kala toka ena taba i na watina ni moce koto ka qumia vakatakata voli o vunituraga na ligai watina. A yadra tu o koya ka kilai au rawa. A yadra mai o vunimarama ni sa tekivu na neirau veivosaki. Erau lesu tale tikoga mai Niu Ioka, ka a vosa kina o vunituraga ki na dua na isoqosoqo levu ni tamata vuli vinaka ena matanitu. A vakamacalataka ga vakalailai o koya, ia a vosa sakitaka o vunimarama na veidokai a vagolei vua. …

Au a vakasamataka toka oya ena noqu lesu tale ki na noqu idabedabe ena waqavuka. Au kaya e lomaqu, na nodrau itokani ena gauna oya a raica walega e dua na gonetagane ni veiteitei mai na sau-la ni vanua kei na dua na goneyalewa matadredredre ka tavutonotono tu na ucuna. Ia o rau na rua oqo erau a dui raica kivei rau yadua na loloma, veidinadinati, vakacegu, vakabauta, kei na icavacava. Vakatoka na veisau matalia ke o vinakata; de a vakalailai beka oya, ia e tiko e levu cake sara. A vaka me tiko e dua na seraka ni ka vakalou, ka teivaka ekea na Tama oya ka sa noda Kalou. Ena nodrau gauna ni vuli a kilikili na nodrau bulataka na seraka oya. Rau a bulataka na ivalavala dodonu kei na vakabauta, kei na nodrau veitaleitaki ka veivakarokorokotaki vakairau. Ena yabaki e so ni nodrau sasaga dredre vakacakacaka ka vakailavo, rau sa kunea na nodrau kaukauwa levu duadua vakavuravura ena nodrau veimaliwai. Oqo ena nodrau qase voli rau sa kune vakacegu tiko, na nodrau veivakacegui lo vakatakirau. Ena kena taudaku rau sa vakadeitaki tu ki na dua na veimaliwai tawamudu ni reki vakaiyanaqa mai na veidinadinati a caka makawa sara kei na yalayala a soli makawa sara ena vale ni Turaga.¹⁸

Na Kalou ena sega ni tarova e dua na veivakalougatataki mai vei ira na tamata bula kilikili ka ra sega ni vakawati.

Ia vaka eda sa biuta e dua na ivakatakilakila ena dua na ilawalawa bibi sara ena Lotu. E tukuna “Lewedua.” Au vakanuinui eda na sega ni cakava oya. O ni sa tamata yadua, turaga kei na marama, luvena tagane ka yalewa na Kalou, sega ni dua na iwiliwili levu ni “irairai-vata” se “daucakava-vata.” Baleta ga ni o sega tu ni vakawati e sega ni vakavuna vei iko mo duatani sara mai vei ira tale e so. Eda sa tautauvata taucoko ena irairai kei na veika ni ituvaki ni bula, ena noda kaukauwa meda vakasama, meda veidutaitaka, meda na tawavakacegu, meda na marau, meda loloma ka lomani.

Ko sa bibi saraga me vaka tale e dua ena inaki ni Tamada mai Lomalagi, ka mai na Nona loloma veivueti e sega na veivakalougatataki ka mo na sega ni rawata taumada me na tarovi vakaoti mai vei iko.¹⁹

Vakatarai au oqo meu tukuna e dua na vosa kivei ira ka se sega tu na nodra madigi mera vakawati. Au vakadeitaka vei kemuni ni keitou sa kila deivaki tu na galili sa vakila voli e vuqa vei kemuni. Na galili sa dua na ka drakidrakita ka mosimosi. Au kila na tamata kece e sa vakila ena dua na gauna se dua tale. Na yaloi keitou sa tosovi kemuni yani ena veikilai kei na loloma. …

… Sa rawa ni totoka na itabayabaki oqo ni noda bula. E tiko vei iko na yalomatua. E tiko vei iko na vakatulewa. E levu vei kemuni sa veituberi ka kilaka. Sa tiko vei kemuni na kaukauwa vakayago, ni vakasama, kei na vakayalo me veilaveti ka veivuke ka veivakauqeti.

E vuqa sa tu oqori ka gadrevi kemuni. … Raica me taucoko tu na kaukauwa ni nomu batiri vakayalo ka vakawaqaca na nodra cina tale e so.²⁰

Kivei kemuni na sega ni vakawati, … sa solia vei kemuni na Kalou e dua na mataqali taledi se dua tale. Sa solia vei kemuni o Koya na kaukauwa mo ni qarava na nodra gagadre tale e so ka vakalougatataka na nodra bula ena nomu lomavinaka kei na kauwai. Torova yani e dua e leqa tu. …

Vakuria na kilaka ki na kilaka. Vakamatautaka na nomu vakasama kei na kila matai ena dua na sala digitaki ni bulavakaivakarau. Sa vuqa tu na madigi me baleti iko kevaka o sa vakavakarau mo tauri ira me yaga sara. … Kakua ni nanuma ni baleta o sa ledua, sa guilecavi iko na Kalou. Na vuravura e gadrevi iko. Na Lotu e gadrevi iko. E vuqa sara na tamata kei na sasaga era gadreva tu na nomu kaukauwa kei na vuku kei na taledi.

Dau masumasu, ka kakua ni yalolailai. … Bulataka na bula vinaka duadua sa dodonu mo rawata, ka na solia vei iko na Turaga ena nona vuku levu sara kei na itabayabaki tawamudu na isau ni nomu masu.²¹

Kivei kemuni na sa veisere, yalovinaka ni kila ni keitou sega ni raici kemuni sobu vaka na tamata druka baleta ni sa druka na vakawati. … Sa sega ni neitou itavi na veibeitaki, ia na veivosoti kei na guilecava, na veilaveti kei na veivukei. Ena nomu aua e so ni galili vuki kivua na Turaga, ka a kaya: “Dou lako mai vei au koi kemudou vakaaduaga sa oca ka colata na icolacola bibi ia kau na vakacegui kemudou. … “Ni sa rawarawa na noqui vua, ka mamada na noqui colacola.” (Maci. 11:28, 30.)

Ena sega ni cakitaki iko na Turaga se vakatalai iko tani. Ena rairai sega ni vakasauri na isau ni nomu masu e so; era na rairai sega ni kilai vakamatata rawa se taleitaki talega. Ia ena yaco mai na gauna o na kila kina ni o sa vakalougatataki.²²

Na bula marau ni vakawati sa ivakaraitaki ni kauwai loloma me baleta na tiko vinaka ni nona itokani e dua.

Susuga ka vakabulabulataka na nomu vakawati. Taqomaka ka cakacakataka me qaqaco voli ka totoka. … Na vakawati e sa dua na konitaraki, e sa ka taucoko, e sa dua na veisemati ni turaga kei na marama ena ituvatuva ni Kalou Cecere. E sa rawa ni kavoro. E sa gadreva na veisusu kei na sasaga levu sara.²³

Ni oti na qaravi ni vica vata na drau ni ituvaki ni veisere ena veiyabaki sa sivi, au sa yalovakacegu ni kena tutaki e dua na itavi vakaikoya ena vakaibalebale cake mai na kena tale e so me walia na leqa bibi oqo.

Kevaka era na cakava wasoma taucoko na turaga kei na marama vakawati na cava ga ena rawa me vakadeitaka na bula vakacegu kei na bula marau voli ni nona itokani, ena lailai sara, ke dua, na veisere. Ena sega ni rogo na veiba. Ena sega ni tautauvata na veibeitaki. Ena sega ni yaco na cudru katakata. Ia, na loloma kei na kauwai ena sosomitaka na veivakacacani kei na vakaduiduile. …

Na iwali ni levu sara na leqa ni bula vakawati e sega ni koto ena veisere. E koto ga ena veivutuni kei na veivosoti, ena ivakaraitaki ni yalovinaka kei na kauwai. E sa dodonu me kune ena tutaki ni Lawa Koula.

E dua na ka cecere na kena totoka na nodrau veitauriliga ena icabocabo ni soro e dua na cauravou kei na dua na goneyalewa ena nodrau veiyalayalati ena mata ni Kalou ni rau na veirokovi ka veilomani. Qai vakacava na kena dragali na iyaloyalo oqori ni oti ga e vica na vula, se na yabaki emuri, sa basika na vosa veivakacudrui, na veivosa vakamosiyalo, na karakara, kei na veibeitaki.

E sega ni dodonu me vakakina, kemuni na taciqu kei na ganequ. Sa rawa ni da ulabaleta na vei vu ni ka tawadodonu ka ka wale ena noda bula (raica na Kalatia 4:9). Sa rawa ni da vakaraica ka kila rawa na ka sa vakalou kivei keda yadua, ka lako mai vei keda me vaka na luvena na Tamada mai Lomalagi. Sa rawa ni da bula vata ena ituvatuva soli va-Kalou ni vakawati ena qaravi vakataucoko ni veika eda rawata kevaka eda na tutaka na noda bula vakaivakarau ka vakatikitiki mai na kena sagai voli me bula vakaivakarau na noda itokani.²⁴

marama kei na turaga — “Susuga ka vakabulabulataka na nomu vakawati. Taqomaka ka cakacakataka me qaqaco voli ka totoka.”

Na vakawati kece sa vakatau ki na draki voravora vagauna. Ia ena yalomalua, veivakarokorokotaki muavata, kei na yalo ni veiciqomi, sa rawa ni da lako curuma na veivoravora oqo. Ni sa vakayacori na cala, sa rawa ni tiko na kere veivuke, veivutuni, kei na veivosoti. Ia sa dodonu me tiko na veivakadonui me cakava na yasana ruarua. …

Au vulica rawa ni isaluwaki dina ni bula marau ni vakawati e koto … ena dua na kauwai veiganiti me baleta na bula vakacegu kei na tiko vinaka ni itokani ni dua. Na vakasamataki koya duadua ga kei na gagadre ni nanumi koya ga vakaikoya ena sega ni taracake na veidinadinati, loloma, se bula marau. Ni sa tiko walega na tawakocokoco sa na rawa ki na loloma, ena kena tuvaki e so ni veimaliwai, me seraka ka vua.²⁵

Vuqa vei keda sa gadrevi me tinia na vaqarai ni cala ka tekivu vaqara voli na ivalavala dodonu. … Kena ca, era vinakata e so na marama mera vakaduatanitaki ira na watidra me vaka ga na nodra nanuma. E so na turaga vakawati era nanuma ni sa nodra dodonu mera vakasaurarataki ira na watidra me donuya na nodra ivakatagedegede ni ka era nanuma ni sa dodonu. E sega ni dau vakakina. E dau muataki ga ki na veiba, tawaveivakilai, kei na lomabibi.

Sa dodonu me tiko na veivakarokorokotaki me baleta na nodrau gagadre vakairau. Sa dodonu me tiko na madigi e so kei na veivakayaloqaqataki me baleta na taraicake kei na vakatakilai ni taledi yadua.²⁶

Dau dina vakaoti ka yalodina kivua na nomu itokani digitaki. Me baleta na gauna oqo kei na bula tawamudu, o koya ena nomu iyauqaqa levu duadua o rawa ni taukena. O koya sa na rauti koya donu na ka vinaka duadua e sa tiko vei iko.²⁷

Vakatutu ni Vuli kei na Veivakavulici

Taro

A vakatavulica o Peresitedi Hinckley ni a tuvalaka na Tamada Vakalomalagi na vakawati ni dua na turaga kei na marama “me baleta na bula marau kei na taqomaki ni Luvena” (iwasewase e 1). E rawa vakacava ni vakayarayarataka na veisemati ni dua na turaga kei na marama vakawati na kila oqo. E rawa vakacava ni maroroya na nodrau bula vakawati e dua na turaga kei na marama me “savasavavuka ka sega ni vakacacani mai na veika tawasavasava ni vuravura”?
Na cava soti na veivakalougatataki ni dua na vakamau tawamudu ena bula oqo kei na veigauna tawamudu? (Raica na iwasewase e 2.) Na cava soti o sotava e sa vakamarautaki iko vakalevu sara me baleta na veimaliwai tawamudu? E rawa vakacava ni da vakatavulici ira na gone ena bibi ni vakawati tawamudu?
Cava na vuna e gadrevi kina na vakawati me “dua na veitokani ni duavata”? (Raica na iwasewase e 3.) Na cava o vulica mai na italanoa ena iwasewase e 3? E rawa vakacava ki na dua na turaga kei na marama vakawati me vakabulabulataka na mataqali qaqaco vakaoqo ena nodrau bula vakawati?
E rawa ni vukei ira vakacava na tamata era sega ni vakawati tu na yalayala kei na ivakasala e so nei Peresitedi Hinckley ena iwasewase e 4? E tutaki vakacava na ivakavuvuli ena iwasewase oqo ki na tamata taucoko? Cava na vuna e bibi kina na vakayagataki ni noda taledi kei na kila matai mera qaravi tale kina e so.
Na cava e so na sala e rawa kivua na turaga kei na marama vakawati me rau “susuga ka vakabulabulataka” na nodrau bula vakawati? (Raica na iwasewase e 5.) Na cava o sa vulica me baleta na iwalewale e rawa ni ulabaleta kina na bolebole e so e dua na turaga kei na marama vakawati ka kune marau vakalevu vata? Na ivakaraitaki cava soti o sa bau raica?

iVolanikalou Veisemati

1 Korinica 11:11; Maciu 19:3–6; V&V 42:22; 132:18–19; Mosese 2:27–28; 3:18, 21–24

Veivuke ena Vuli

“Ni ko vakacabo gauna ena veisiga, vakaiiko vata kei na nomu matavuvale, ki na kena vulici na vosa ni Kalou, ena yaco mai na vakacegu ki na nomuni bula. Na vakacegu oqori ena sega ni solia o vuravura. Ena yaco mai ena loma ni nomudou vale, ena loma ni matavuvale, mai na yalomu e loma” (Richard G. Scott, “Vakaliuca Mo Bulataka Nomu Vakabauta,” Ensign se Liaona, Nove. 2014, 93).