Wase 23

Na Veivakalougatataki ni Valetabu

“Yaco na cakacaka vakalotu ni valetabu me isala vakatui ni veivakalougatataki e solia tu na valetabu.”

Na Bula nei Gordon B. Hinckley

“Au vakabauta ni sega ni dua na lewe ni Lotu sa na rawata na ituvuka e rawa ni solia na Lotu oqo me yacova ni sa ciqoma na nona veivakalougatataki ni valetabu ena vale ni Turaga,” e kaya o Peresitedi Gordon B. Hinckley ena soqoni ni matabete ni Koniferedi raraba ni Okotova 1997. “Qori na vuna, eda sa cakava tiko kina na ka kece sara eda kila na cakava me vakatotolotaki na tara ni veivale vakatabui oqo ka vakarabailevutaki na kena rawa ni ciqomi na veivakalougatataki e dau ciqomi e loma.”¹ A cavuta kina e vica vata na valetabu sa tu ena itagede eso na kena tuvalaki kei na kena tara, oti qai kacivaka e dua na ka ena veisautaka na nodra bula na tamata e vuravura raraba:

“E vuqa na vanua ena Lotu era tu vakayawa sara, lailai na lewena ka kena irairai ni na sega soti ni tubu totolo ena dua na gauna lekaleka ka tu mai. Me ra sa vakuwai tu beka ga vakadua ena veivakalougatataki ni cakacaka vakalotu ni valetabu o ira oqo? Niu sikova voli e dua na vanua vakaoqori ena vica na vula sa oti, keimami a vakasamataka ena yalomasumasu na taro oqo. Na kena isau, keimami vakabauta, a ramase ka matata na kena yaco mai.

“Eda na tara eso na valetabu lalai ena so na vanua oqori. … Era [na] tara ena ivakatagedegede ni valetabu, ka cecere cake sara mai na ivakatagedegede ni valenilotu. Ena vakayacori kina na nodra papitaiso na mate, na edaumeni, veivauci, kei na veicakacaka vakalotu kece tale e dau vakayacori ena vale ni Turaga ena vukudra na mate kei ira na bula.”²

Na veivakauqeti ni ituvatuva oqo se tekivu ena sivia na 20 na yabaki yani i liu, ni veiqaravi voli o Peresitedi Hinckley vakajeameni ni Komiti ni Valetabu ena Lotu. Ni kauwaitaka tiko ni levu na Yalododonu Edaidai e sega ni rawarawa na nodra yacova na veivakalougatataki ni valetabu, a vola kina ena nona ivolaniveisiga, “E rawa ni tara na Lotu e [levu] na valetabu lalai ena isau ni Valetabu e Washington [ka a tara tiko ena gauna oya]. Ena kauta vakavoleka na valetabu vei ira na tamata mai na nodra lako vakabalavu na tamata me ra yacova yani.”³

Ena 1997 a vakabulai mai na vakasama oqo ena dua na ivakatakila ni Turaga. A wasea o Peresitedi Hinckley e dua na ka me baleta na ivakatakila oqori ena nona cabora na masu ni kena vakatabui na Valetabu mai Colonia Juárez Chihuahua Mexico. A cavuta vaqo ena nona masu, “ena vanua oqo ena Vualiku kei Mexico, ko ni a vakatakila kina na nomuni vakasama me baleta na valetabu lalai, vakataucokotaki ena veika kece sara e gadrevi, ia veirauti na kena levu ki na nodra gagadre kei na kedra ituvaki na lewe ni Lotu ena iwase oqo ni Nomuni were ni vaini. Na ivakatakila oya a yaco mai ena dua na gagadre kei na dua na masu me ra vukei na Nomuni tamata ena veikoloni oqo era sa dina ka yalodina tiko.”⁴

Ni oti e ono na vula mai na kena kacivaki na ituvatuva ni tara valetabu lalai, a kacivaka tale o Peresitedi Hinckley e dua na ka bibi:

“Keimami sa dau veilakoyaki vakarabailevu ena kedra maliwa na lewe ni Lotu. Au sa dau maliwai ira e lailai sara tu na veika vinaka ni vuravura oqo era taukena. Ia na yalodra e caudre kina na vakabauta cecere baleta na cakacaka ni veisiga e muri oqo. Era lomana na Lotu. Era lomana na kosipeli. Era lomana na Turaga ka vinakata me ra cakava na Lomana. Era sauma na nodra ikatini, dina beka ni lailai. Era solibula vakalevu me ra lako rawa ki na valetabu. Era dau lako me vica tu na siga ena dua na gauna ena basi sau lalai kei na boto makawa. Era maroroya nodra ilavo ka vakuwai ira ena vuqa na ka me rawa kina.

“Era gadreva na valetabu voleka—lalai, totoka, rawarawa ni qaravi. O koya, au taura kina na madigi oqo meu kacivaka ki na Lotu raraba e dua na parokaramu me tara sara ga oqo e rauta ni 30 na valetabu lalai. …

“Oqo ena dua na cakacaka vakaitamera. E sega ni dua na ka me bau volekata mada ga yani a sa bau tovolei e liu me caka. … Oqo sa na 47 taucoko kina na valetabu vovou me ikuri ni 51 sa vakayagataki tiko. Au vakabauta ni vinaka me da vakuria tale ena 2 me 100 taucoko kina ena mua ni senijiuri oqo, ni sa oti e 2,000 na yabaki ena nona lako mai vakayago na Turaga ka noda iVakabula ko Jisu Karisito’ (V&V 20:1). Ena parokaramu oqo eda sa toso tiko ena dua na totolo eda sega vakadua ni se bau raica e liu.”⁵

Ena imatai ni Okotova, 2000, a vakatabuya kina o Peresitedi Hinckley na Valetabu mai Boston Massachusetts, na ika 100 ni valetabu sa vakayagataki tiko. Ni se bera ni cava na yabaki, sa vakatabuya e rua na valetabu mai Brazil. Ia ni mai mate ena 27 ni Janueri, 2008, sa 124 kina na valetabu sa vakayagataki tiko ena Lotu, ka 13 tale era sa kacivaki tu. Mai na 124 na valetabu sa vakayagataki tiko, a vakaitavi o Peresitedi Hinckley ena tuvai kei na tara ni vuqa sara vei ira ka vakatabuya saraga o koya e 85 vei ira.

Ia ni kacivaka o Peresitedi Hinckley na iwiliwili levu ni valetabu vovou, kei na nona qoroya na kedra totoka, e vakananuma vei ira na Yalododonu Edaidai ena inaki ni veivale bibi oya: me vakalougatataka na tamata yadua kei na matavuvale, yadudua. Ni vosa tiko me baleta na Valetabu e San Diego California, e kaya kina: “Sa dua na vale totoka ka vakasakiti oya. Ia ena totoka kece ni vale oya, oqori e dua ga na idewadewa ki na dua na icavacava ka sega ni icavacava vakataki koya. Na vale oqori a tara ka vakatabui me vakayacori kina na veicakacaka tabu vakalotu sa vakatakila mai na Turaga ena gauna oqo.”⁶

Ena dua tale na gauna a kaya kina o koya: “E sega ni dua na tamata sa tu kece vua na kosipeli me yacova na gauna sa rawa kina ni ciqoma [na cakacaka vakalotu ni valetabu]. Ka sa noda na itavi me da raica ni ra sa tu na veivale oqori. Au sega ni kila se na vakacava beka na balavu ni noqu bula, ia au nuitaka meu na vakaotia yani na noqu gauna ni bula niu tara valetabu tiko ni Turaga, me kau yani na valetabu vei ira na tamata me ra rawata na veivakalougatataki vakasakiti ena rawati mai [kina].”⁷

Na Valetabu Colonia Juárez Chihuahua México

iVakavuvuli nei Gordon B. Hinckley,

Na valetabu era ivakaraitaki ni noda ivakadinadina, ka matataka na ituvuka ni noda sokalou.

Na valetabu yadua e tara na Lotu i Jisu Karisito ni Yalododonu Edaidai era tu me ivakaraitaki ni nodra ivakadinadina na tamata oqo ni bula tiko na Kalou na Tamada Tawamudu, ni tiko e dua na nona ituvatuva me baleta nodra vakalougatataki na Luvena tagane kei na yalewa ena veitabatamata kecega, na Luvena Lomani, o Jisu na Karisito, ka a sucu mai Peceliema e Jutia ka vakamatei ena kauveilatai mai Kolikoca, sai koya na iVakabula ka Dauveivueti ni vuravura, na nona isoro ni veivakaduavatataki sa rawa ni vakataucokotaki kina na ituvatuva oya ena nodra bula tawamudu o ira yadua era ciqoma ka bulataka na kosipeli.⁸

Na veika kece e yaco ena valetabu e veilaveti ka veivakaturagataki. E tukuna na bula eke kei na bula ni sa oti na ibulubulu. E tukuna na bibi ni tamata yadua me vaka ni ra luve ni Kalou. E tukuna na bibi ni matavuvale me vaka ni ibulibuli i Koya sa Cecere Sara. E tukuna na tawamudu ni isema vakaveiwatini. E tukuna na lako yani ki na reki cecere cake. E vanua ni rarama, e vanua ni vakacegu, e vanua ni veilomani ka da cakava kina na veika ni tawamudu.⁹

Na valetabu yadua … era tu me ivakananumi ki na noda vakabauta ena tawamate rawa ni tamata, na iwase eda lakova tiko qo ni bula vakayago, me da kaya mada, e tiki ni dua na kaba cake toso tikoga, ia e dei tu me vaka ni tu na bula eke, ena tu talega na bula mai kea. Oqori na noda vakabauta dei. E yaco mai ena vuku ni nona Veisorovaki na iVakabula, sa yaco kina na valetabu, me vaka au sa tukuna oti, na ikawakawa mai na bula oqo ki na kena e tarava. Na valetabu e baleta na veika ni tawamate rawa.¹⁰

Na veivale cecere duatani ka vakasakiti oqo, kei na veicakacaka vakalotu e vakayacori kina, era sa tukuna tiko na ituvaki cecere ni noda sokalou. Era sa yaco kina na cakacakatabu vakalotu oqo me ra sa ivakaraitaki bibi duadua ni noda vakabauta vakalotu.¹¹

Na veika tabu e ganita me dau vakasamataki sara vakabibi. … Ni o biuta mai na katuba ni Vale ni Turaga, dinata na veivakabauti bibi mo kakua ni tukuna na veika e tabu ka savasava.

E kaya na Turaga, “Ia mo dou kila ni sa ka tabu na veika vakalomalagi, io me cavuti ena vosa e kilikili ena veituberi ni Yalo Tabu.” (V&V 63:64.) Tokaruataki, “Mo kakua ni vakawaletaka na veika tabu.” (V&V 6:12.)¹²

Mai na cakacaka vakalotu ni valetabu, eda sa ciqoma kina na ulumatua ni veivakalougatataki ni kosipeli.

Na veivaletabu oqo, ka ra sa roboti vuravura tu ena gauna oqo, era gadrevi ena kena vakataucokotaki na nona Veisorovaki na iVakabula. Ena lewa ni Matabete Tabu, eke, era na qaravi kina na cakacaka vakalotu oqori ka na vakavuna sega walega na veivakabulai, ia na vakacerecerei tawamudu talega.¹³

A solia na nona bula o Jisu Karisito, na Luve ni Kalou, ena kauveilatai mai Kalivari me isoro ni ivalavala ca ni kawatamata. Na nona isoro e caka vakaveisosomitaki ena vukuda yadua. Mai na isoro oqori sa yaco kina na yalayala ni tucaketale ena vukuda yadua. Oqo e yaco mai na lolomasoliwale ga ni Kalou, ka sega kina ni dua na nona itavi na tamata. Ia ni oti oqo, mai na idola ni matabete tabu a solia vei iratou na Tinikarua na Turaga ni tiko vata voli kei iratou, na idola vata oqori sa vakalesui tale mai ena itabagauna oqo mai vei ira era a taura tu ena gauna oya—mai na veika oqo sa yaco mai kina na ikuri ni veivakalougatataki cecere, oka kina na veicakacaka vakalotu duatani ka vakasakiti era dau vakayacori ena loma ni vale ni Turaga. Ena veicakacaka vakalotu duadua ga oqori ena vakavotukanataki kina na “ilesilesi kece vakabete.” (V&V 124:28.)¹⁴

Na cakacaka vakalotu ni valetabu sai koya na ituvuka ni veivakalougatataki e vakarautaka tu na Lotu.¹⁵

Na veivakalougatataki ni valetabu me baleta na tagane kei na yalewa era sa kilikili me ra curu kina… e okati kina na noda savai ka lumuti me da savasava ena mata ni Turaga. Era okati kina na veidusimaki ka soli vei keda e dua na isolisoli ni itavi kei na kena veivakalougatataki ka na vakauqeta vei keda na itovo e sala vata kei na ivakavuvuli ni kosipeli. E okati talega kina na cakacaka vakalotu ni veivauci me vauci kina mai lomalagi na veika e vauci e vuravura, ka rawa kina me tomani tikoga na matavuvale.¹⁶

Au a kacivi [ena dua na gauna] ki na yasa ni nona idavodavo e dua na tina ka bikai koto ena dua na tauvimate bibi. Qai takali yani na nona bula ena dua na gauna lekaleka e muri, ka biuta tu mai na watina kei na va na gonelalai, oka kina e dua na gonetagane lailai yabaki ono. E yaco na yaluma, titobu ka vakamosiyalo ka veivakararawataki vakalevu. Ia e serau mai na wainimata e dua na vakabauta totoka ka tudei ni sa dina sara ni rarawataki vakalevu na veitawasei oqo, ia e dei ni ra na duavata tale ena yalomarau ena dua na siga, ni a tekivu na vakamau oqori ena dua na veivauci ni gauna oqo kei na veigauna tawamudu ena vale ni Turaga, ena ruku ni lewa ni matabete tabu. …

E vuqa era lako [vakayawa sara] me ra ciqoma na veivakalougatataki ni vakamau ena valetabu. Au a raica e dua na ilawalawa Yalododonu Edaidai mai Japani—ni se bera ni tara e dua na valetabu mai nodra vanua—era a vakuwai ira ena kakana me rawa kina na ilakolako balavu ki na Valetabu mai Laie Awai. Ni se bera ni dua na valetabu mai Johannesburg, keitou a sotavi ira eso era a vakuwai ira mai na veika ni bula vakayago me rawa kina ni ra sauma nodra ivodovodo ni waqavuka ena 7,000 na maile (11,000-km) mai Sauca Aferika ki na valetabu e Surrey, Igiladi. E tu na rarama e matadra ka ra matadredredre kei na ivakadinadina mai na tebenigusudra ni sa mate vinaka na ilavo kece era sauma ena ilakolako oya.

Kau nanuma niu a rogoca mai Niu Siladi ena vuqa na yabaki sa oti na nona ivakadinadina e dua na turaga mai na yasai Ositerelia kadua, sa vakamau oti vakamatanitu ratou qai curu ki na Lotu kei na watina kei ira na luvedrau, eratou lako kosova na vanua rabailevu oya, ka kosova na Wasawasa na Tasman ki Okaladi, ka yaco sara ki na valetabu ena buca totoka mai Waikato. Niu nanuma na nona vosa, a kaya, “Keitou sega ni rawa ni ceguva na ilakolako mai. Na veika vakavuravura keitou taukena e oka kina e dua na motoka makawa, neitou iyaya ni vale, kei na neitou iyaya ni kana. Au kaya vei iratou noqu matavuvale, ‘Tou na sega ni rawa ni lako.’ Au qai raica na matadratou na watiqu rairai totoka kei ira na luvei keirau totoka, kau qai kaya, ‘E sega ni rawa ni tou sega ni lako. Kevaka ena solia vei au na Turaga na igu, ena rawa niu cakacaka ka volia rawa tale e dua na motoka kei na iyaya ni vale kei na iyaya ni kana, ia kevaka meu na vakayali ira na noqu daulomani oqo, au sa na dravudravua dina sara ena bula oqo kei na veigauna tawamudu.’”¹⁷

E sega ni vakurabuitaki, kemuni na taciqu kei na ganequ, ena dolavi ni … veivaletabu au sa raica kina na wainimatadra na tamata qaqa ka ra mokoti ira na watidra ena icabocabo ni soro ni veivaletabu oqo. Au sa raica na wainimatadra na tama kei na tina ena nodra mokoti ira na luvedra ena icabocabo ni soro vata oqori. Ena lewa vata ka vakayagataki eke era sa kila kina ni sega ni rawa ni vakarusa na ivau era sa vauci vata kina na gauna se na mate.¹⁸

Na valetabu e vanua ni veiqaravi eda ciqoma kina na cakacaka vakalotu ni veivakabulai ena vukudra era sa mate yani ka ra sega ni ciqoma na kosipeli.

Era milioni vakaoba era sa lakova oti na vuravura ka ra se bera ni sotava na madigi me ra rogoca na kosipeli. Me ra vakuwai beka mai na veivakalougatataki eso e vakarautaki tu ena valetabu?

Mai na veisosomitaki bula ka ra tucake ena vukudra na mate, sa vakarawarawataki kina na cakacaka vakalotu ni kosipeli kivei ira era sa yali yani mai na bula vakayago. Ena vuravura ni yalo era sa galala kina me ra ciqoma se besetaka na veicakacaka vakalotu e vuravura sa caka ena vukudra, oka kina na papitaiso, vakamau, kei na vauci vata ni matavuvale. Me kakua ni ia na veivakasaurarataki ena cakacaka ni Turaga, ia e dodonu me caka ena madigi.¹⁹

Oqo na vanua ni veiqaravi. E vuqa na cakacaka e vakayacori ena vale tabu oqo e vakayacori vakaveisosomitaki ena vukudra era sa takali yani. Au sega ni kila e dua tale na cakacaka e rawa ni vakatauvatani kaya. Oqo duadua na cakacaka e viavia volekata yani na nona solibula vakaveisosomitaki na Luve ni Kalou ena vukuda na kawatamata mai na veicakacaka kece tale au kila. E sega ni namaki na nodra vakavinavinaka o ira era sa tu ena vuravura kadua ka caka ena vukudra na veiqaravi bibi oqo. E nodra veiqaravi na bula ena vukudra na mate. Oqo e dua na veiqaravi e vakavotuka sara ga ni sega ni nanumi koya.²⁰

Era sa dau vakananumi e vuqa sara na gonetagane kei na goneyalewa ni veivaletabu e sega walega ni baleti ira na tamadra kei na tinadra ia sa baleti ira talega. Ni ra sa yabaki 12, e rawa ni ra curuma na vale ni Turaga ka tu vakaveisosomitaki ena papitaiso ena vukudra era sa tu ena yasa kadua ni ilati ni mate. Sa dua na veiqaravi cecere sega ni nanumi koya ga oqo. Sa dua na ka vasakiti me ra vakaitavitaki na noda itabagone ena ivalavala sega ni nanumi koya ga oqo ena vukudra eso sa sega ni tu vei ira na kaukauwa me ra vukei ira vakataki ira.

Erau salavata … kei na tosoi cake ni itaviqaravi ena valetabu na tosoi cake ni cakacaka ni tuvakawa. Na kompiuta kei na kena veitabana eso sa vakatotolotaka cake na cakacaka, ka ra sa vakayagataka tiko na tamata na veiwalewale vovou sa vakarautaki tu vei ira. Ena rawa vakacava vua e dua me drotaka na vakasama ni tiko ena veika kece oqo na Turaga? Ni sa vinaka cake na veiqaravi vakompiuta, sa levu cake talega na iwiliwili ni valetabu me sotava na cakacaka ni tuvakawa sa vakatotolotaki.²¹

Sa noda itavi na veivakalougatataki, na veivakalougatataki tawamudu, me baleti ira kece era sa mai bula oti e vuravura, na itabatamata sega ni wiliki, tawakilai na kedra iwiliwili ni tagane kei na yalewa era sa mai bula oti e vuravura, o ira kece era bula tiko e vuravura nikua, kei ira kece era na qai mai bula e vuravura. Sa cecere sara na noda itavi. Sa dodonu me da wavutu vakabalavu vakalailai ka cakacaka vakaukauwa vakalailai me rawati.²²

O ira era tu ena tai kadua, era sega ni sa mate ia era se bula tu vakayalo, era na reki ka vakamarautaki ni ra sa yadra mai ka toso ki liu ena nodra ilakolako ki na “tawamate rawa kei na bula tawamudu” (Mosese 1:39).²³

Sa waraki keda tu na veivakalougatataki cecere ni da maroroya na noda bula me kilikili tiko ka lako wasoma ki na valetabu.

Au sa bolei kemuni yadua kina nikua mo ni vakadodonutaka na nomuni bula mo ni lako ki na vale ni Turaga ka vakaivotavota mai kea ena veivakalougatataki e nomuni duadua ga. … E cecere na veika e gadrevi, ia e cecere cake na veivakalougatataki.²⁴

Au sa vakamasuti ira kina na tamata ena veivanua kecega, ena veivakayarayarataki au rawa ni veivagolei kina, mo ni bula kilikili mo ni taura e dua na nomuni ivolatara ni valetabu, ka mo taukena ka rokova ni sa dua na iyau talei, ka mo ni saga vagumatua mo ni gole ki na vale ni Turaga ka votai ena yalotabu kei na veivakalougatataki me nomuni ka ra tu kina.²⁵

Se rawa ni o lako wasoma [ki na valetabu] se sega, rawata e dua na ivolatara ni valetabu ka maroroya toka e dua na ivolatara ena nomu taga. Ena ivakananumi tiko vei iko ena veika e namaki vei iko me vaka e dua na Yalododonu Edaidai.²⁶

“Na turaga se marama yadua e lako ki na valetabu ena yalodina kei na vakabauta ena biuta na vale ni Turaga ni sa dua na turaga se marama vinaka cake. E gadrevi me tudei tikoga na kena vakavinakataki cake na noda bula taucoko. E sa gadrevi ena veigauna me biu tu mada na rorogo kei na kosakosa ni vuravura ka da kalawa yani ki loma ni vale tabu ni Kalou, me na vakilai kina na Nona Yalotabu ena dua na vanua ni veika tabu vakalou kei na vakacegu.²⁷

Sa yaco na vale dokai oqo me koronivuli ni veidusimaki ena veika kamica ka bibi ni Kalou. Eke sa tuvai kina vei keda na nona ituvatuva e dua na Tamada dauloloma ena vukuda na Luvena tagane kei na yalewa ena veitabatamata kecega. Eke sa droinitaki kina vei keda na ilakolako balavu tawamudu vakatamata mai na bula taumada curuma na bula oqo ki na bula sa bera mai. Era vakavuvulitaki vakamatata ka rawarawa na dina bibi ka tawamudu ka rawa ni da kila o keda kece eda rogoca. …

Na valetabu e vanua talega ni veivakauqeti yadua kei na ivakatakila. E lewe vuqa ena gauna ni lomaocaoca, ena gauna me vakatauci kina na vakatulewa dredre ka sotavi na leqaleqa bibi, era lako mai ki na valetabu ena yalo ni lolo kei na masumasu me segati na veidusimaki vakalou. Era lewe levu era sa vakadinadinataka ni gauna e sega ni rogoci kina na domo ni ivakatakila, sa sotavi na veivakauqeti ni veika me vakayacori ena gauna oya se ena dua na gauna e muri sa yaco kina me isau ni nodra masu.

Peresitedi Hinckley ena vatunitutu ni valetabu. — “Lako ki na vale ni Turaga ka vakila kina na Yalona ka veivosaki vata Kaya ko na vakila e dua na vakacegu ko na sega tale ni vakila ena dua na vanua.”

Na valetabu oqo e mataniwai tovure ni dina tawamudu. “Ia ko koya sa gunuva na wai kau na solia vua, ena sega sara ni viagunu ka tawamudu.” (Joni 4:14.) Eke era vakavuvulitaki kina na dina e vakalou na kedra bibi ka tawamudu na kedra yaga.

Vei ira era curuma yani na veilalaga oqo, sa yaco na vale oqo me vale ni veiyalayalati. Eke eda sa yalataka kina, vakabibi ena vakatatabu, me da bulataka na kosipeli i Jisu Karisito ena kena iwalewale matailalai duadua. Eda sa yalataka vua na Kalou na Tamada Tawamudu me da bulataka na ivakavuvuli ka ra itikotiko ni lotu dina kece sara.²⁸

E vakasinaiti tu beka nomu bula ena ogaoga? E tu beka na nomu kauwai kei na lomaleqa kei na lomaocaoca? O vinakata na vakacegu e yalomu kei na madigi mo veivosaki kei na Turaga ka vakananuma vakatitobu na Nona sala? Lako ki na vale ni Turaga ka vakila kina na Yalona ka veivosaki vata Kaya ko na vakila e dua na vakacegu ko na sega tale ni vakila ena dua na vanua.²⁹

Ena gauna ni butobuto, tovolea mo lako ki na vale ni Turaga ka sogoti vuravura laivi mai kea. Ciqoma na Nona veicakacaka tabu vakalotu, ka vakateteya yani vei ira na nomu kawa. Ena mua ni veisoqoni yadua ena valetabu, laki dabe vakadigagalu ena rumu vakaselesitieli ka vakananuma vakatitobu na veivakalougatataki o sa ciqoma ena vukumu se na kena o vakayacora vei ira era sa lako yani. Ena vakasinaiti na yalomu ena vakavinavinaka, kei na vakanananu ni veika tawamudu ni nona ituvatuva cecere na Turaga ena vakatawa na yalomu.³⁰

Ena vuravura kosakosa, osooso, ka dauveisisivi oqo, sa dua na ka dokai me tu e dua na vale bibi ka da rawa ni vakila kina na veivakayarayarataki savasava ni Yalo ni Turaga. Sa dau sinai vakawasoma e yaloda na veika eso ni bulakocokoco. Eda na gadreva me da vakamalumalumutaka, ka sega tale ni dua na sala vinaka cake mai na noda lakova na vale ni Turaga ka veiqaravi kina vakaveisosomitaki ena vukudra era sa tu ena tai kadua ni ilati ni mate. …

… Au vakayaloqaqataki kemuni mo ni vakayagataka vakalevu na galala vakalougatataki oqo. Ena vakasavasavataka na nomuni bula. Ena vocia laivi na qa ni kocokoco e bula voli kina e vuqa vei keda. Ena kauta dina mai e dua na itovo ni bula savasava ki vei keda ka vakavuna me da tagane ka yalewa vinaka cake.³¹

Au kila ni osooso nomuni bula. Au kila ni levu tu na ka mo ni cakava. Ia meu cakava e dua na yalayala vei kemuni ni kevaka mo ni lako ki na nona vale na Turaga, o ni na vakalougatataki, ena vinaka cake vei kemuni na bula.” Ia yalovinaka, yalovinaka, kemuni na taciqu kei na ganequ, ni soli kemuni ki na madigi cecere mo ni lako ki na vale ni Turaga ka vakaivotavota mai kea ena veivakalougatataki vakasakiti e nomuni me laki ciqomi kina.³²

Vakatutu ni Vuli kei na Veivakavulici

Taro

E kaya o Peresitedi Hinckley ni cakacaka vakalotu ni valetabu era sa “ivakaraitaki bibi duadua ni noda vakabauta” (wasewase e 1) ka “ulumatua ni veivakalougatataki e vakarautaka tu na Lotu” (wasewase e 2) Na veivakalougatataki cava so o sa bau ciqoma mai na veicakacaka vakalotu oqo?
E vosa o Peresitedi Hinckley me baleti ira na tagane kei na yalewa era vakaturu wainimata ni reki ena valetabu (raica na wasewase e 2). Mai na veika o sa sotava na cava na vuna, e dau vakatubu luluvu kina na cakacaka vakalotu ni valetabu?
Ena cakacaka ni nodra vueti na mate, e kaya kina o Peresitedi Hinckley, “Sa dua na ka vakasakiti vei ira na noda itabagone me ra vakaitavi ena cakacaka ni sega ni nanumi koya oqo” (wasewase e 3). Na cava e rawa ni ra cakava na itubutubu kei ira na itabagone me ra cakacaka vata kina ena veiqaravi oqo?
Na cava e rawa ni da cakava me rawa kina na gauna ni veiqaravi kei na sokalou ena valetabu? Na sala cava e rawa ni vakauqeta kina na noda bula ena taudaku ni valetabu na noda veiqaravi ena loma ni valetabu? (Me baleta na ivakaraitaki eso, raica na iwasewase e 4.) Sa vakalougatataki iko beka vakacava na lako ki na valetabu?

iVolanikalou Veisemati

Na Lako Yani 25:8; 1 Tui 6:11–13; V&V 88:119–20; 109:12–13, 24–28; 110:1–10; 128:22–24

Veivuke ena Vuli

“Wasea na veika o sa vulica. Ena gauna o vakayacora kina, ena makare na nomu vakasama, vakarabailevutaka ka vakaukauwataka tale ga na dei ni nomu kila” (Veituberi, Me iLutua Ni Noda Bula [1999], 18).