Wase 21

Na Cakacaka Mana Edaidai ni Cakacaka ni Kaulotu

“Au sureti kemuni mo ni yaco me dua na mataivalu levu ka vakanamata ki na cakacaka oqo ka ilutua ni nomuni gagadre mo ni vukei ira na daukaulotu ena itavi vakaitamera e nodra.”

Na Bula nei Gordon B. Hinckley

Ni se cauravou, a dua o Gordon B. Hinckley na matabete yalodina, ia a sega ni namaka me na kacivi me dua na daukaulotu tudei. “A donumaka na gauna dredre duadua ni bula vakailavo e vuravura,” a qai vakamacalataka e muri o koya. “Na sega ni cakacaka e [Salt Lake City] e rauta ni 35 na pasede, ka vuqa vei ira na sega ni cakacaka tu o ira na tagane vakawati kei na tama, ka ni lailai sara na marama era cakacaka. E vica wale sara na daukaulotu era lako tiko ki kaulotu ena gauna oya. … Au rawata na noqu koroi ni bejila ka nakita meu curu ki na koronivuli ni qeretueti. Qai tukuna mai o bisopi e dua na ka e vaka vei au ni dua na vakatutu veivakurabuitaki. E tukuna me baleta na kaulotu.”¹

A ciqoma o Gordon na “vakatutu veivakurabuitaki” nei nona bisopi, ena 1933 a kacivi me laki kaulotu e Igiladi—e dua vei ira na 525 walega na daukaulotu era a kacivi ena yabaki oya.² A sotava e vuqa sara na veivakatovolei ena nona kaulotu, ia a ikelekele ni nona vakabauta na nona veiqaravi:

“A sega ni rawarawa na cakacaka ena buturara. E dredre ka veivakayalolailaitaki. Ia sa dua na gauna vakasakiti. Niu vakasamataka lesu, au qai kila niu vaka e dua na cauravou kocokoco ena noqu yaco yani ki Peritania. Sa qai yaco me dua na veivakalougatataki ena noqu vakatikitikitaka na noqu nanuma kocokoco ki na nanuma cecere cake ni cakacaka ni Turaga. …

“Au sa vakavinavinakataka kina vakalevu na gauna vinaka au a sotava ena kaulotu oya. Au a tara na nodra bula e vica, ka ra sa mai vakaraitaka na nodra vakavinavinaka ena veiyabaki sa sivi. Sa ka bibi oya. Ia au sega soti ni kauwaitaka na iwiliwili ni papitaiso au rawata se ra rawata na daukaulotu tale eso. Na noqu vakacegu e yaco mai ena veivakadeitaki niu sa cakava na veika a vinakata vei au na Turaga kau sa iyaya kina ni cakacaka e ligana ena kena rawati na Nona inaki. Ena veika a sotavi oya, sa vakoti dei kina ki vuniyaloqu na veivakadeitaki kei na kila ni sai koya dina sara oqo na cakacaka dina ka bula ni Kalou, sa vakalesui mai vua e dua na parofita me ra vakalougatataki kina o ira kece era na ciqoma ka bulataka na kena ivakavuvuli.”³

Na kaulotu nei Peresitedi Hinckley sa vakadavora na kosi me gauna ni bula soli tabakidua ki na cakacaka ni Turaga. Ena nona gauna ni veiqaravi vaka-Peresitedi ni Lotu, a lakova e sivia ni dua na milioni na maile (1.6 na milioni na kilomita) ki na sivia e 70 na matanitu me wasea nona ivakadinadina kei Jisu Karisito kei na Nona kosipeli vakalesui mai.⁴

Dau vakarogoya e veigauna o Peresitedi Hinckley na kaci vei ira na lewe ni Lotu me ra duavata kei koya ena wasei ni kosipeli. E sivia na 400,000 na daukaulotu tudei era a sauma na kaci oya ena nona gauna vaka-Peresitedi. Ni ra vukei ena nodra veiqaravi kei na nodra cakacaka ni kaulotu na lewenilotu, era a papitaisotaki ena gauna oya e sivia na 3,500,000 na saumaki mai.⁵

Ena yalo nanamaki a wasea o Peresitedi Hinckley e dua na rai rabailevu ena ivakarau me na toso tikoga kina na cakacaka ni Turaga:

“Kevaka eda na toso ga ki liu, kakua ni buwawa na noda inakinaki, kakua ni vosavakacacana e dua, bulataka tiko na ivakavuvuli cecere eda kila ni dina, ena toso yani ena lagilagi kei na mana na inaki oqo me vakasinaita na vuravura. Era na tadolavi na katuba era tasogo tu ena gauna oqo ki na vunautaki ni kosipeli.”⁶

E cecere na noda vakanuinui me baleta na veisiga ni mataka ka tudei na noda vakabauta. Eda kila ni da se qai tekivu karia toka ga oqo na dela ni veika ena qai yaco mai ena veiyabaki sa tu e matada. … E vakaitamera na noda icolacola ni da toso ki liu. Ia na noda madigi e lagilagi.”⁷

era vakavulica tiko na daukaulotu e dua na matavuvale — “Me da tatara yani ki vuravura ena noda veiqaravi ni kaulotu, vakavulici ira kece era na vakarorogo me baleta na kena vakalesui mai na kosipeli.”

iVakavuvuli nei Gordon B. Hinckley,

Me da tatara yani ki vuravura taucoko ena veiqaravi vakadaukaulotu, vakavulici ira kece era na vakarorogo.

Sa noda na itavi vakalou ena kena vakau na itukutuku oqo ki na veimatanitu, matatamata, duivosavosa, kei na tamata kecega. Sa dua na noda ilesilesi me da veivakavulici ka veipapitaisotaki ena yaca ni Turaga ko Jisu Karisito. A kaya vakaoqo na iVakabula sa tucaketale mai na mate, “Dou lako yani ki vuravura taucoko ka vunautaka nai tukutuku vinaka vei ira na tamata kecega” (Marika 16:15). Eda sa vakaitavi ena dua na sasaga cecere ka veivakaogai me baleta na dina kei na vinaka.⁸

Ni se bera ni tauyavu na Lotu, sa tu rawa na cakacaka ni kaulotu. Sa tomani tikoga me tekivu mai na gauna oya, sega ni wilika na veika dredre ni veigauna era lako sivita mai na noda. Me da dui yalataka yadua oi keda kece sara e yaloda me da tucake yani ki na dua na madigi vou, e dua na ivakarau ni rai vou ki na itavi, e dua na ivakarau vou ni cola ivua me da vukea na Tamada mai Lomalagi ena Nona cakacaka lagilagi ena kena vakayacori na tawamate rawa kei na bula tawamudu ni Luvena tagane kei na yalewa e vuravura taucoko.⁹

Ni da Yalododonu Edaidai me da tarai ira yani era sega ni lewe ni noda vakabauta. Me kakua na cakacaka ena yalodokadoka se ena ivakarau ni rai ni o vinaka cake mai vua. Ia, me da vakaraitaka na noda loloma kei na veidokai kei na yalo ni veivuke vei ira. Sa dau vakacalai vakalevu na rai me baleti keda, kau leqataka ni vakalevu eda dau vakavuna o keda. Eda rawa ni dau veivosoti, veiwekani vinaka, itokani vinaka, ivakaraitaki vinaka cake mai na veigauna sa oti. Me da vakavulici ira na luveda me ra raici ira na tani ena yalo ni veitokani, vakarokoroko, loloma, kei na veivakalevulevui. Oqori ena vinaka sara na vuana mai na kauwaitaki koya ga vakalevu. …

Me da tatara yani ki vuravura ena noda veiqaravi ni kaulotu, ka vakavulici ira era na vakarorogo me baleta na vakalesui mai ni kosipeli, vosa ena yaloqaqa ia me kua na vakadonui koya ga, me baleta na iMatai ni Raivotu, vakadinadinataka na iVola i Momani kei na vakalesui mai ni matabete. Kemuni na taciqu kei na ganequ, me da tekiduru sobu e duruda ka masuta na madigi me da kauti ira mai na tani ki na reki ni kosipeli.¹⁰

Sa dua na ka talei ka vakasakiti ni udolu era sa tarai ena cakacaka mana ni Yalo Tabu, ni ra vakabauta ka ciqoma ka yaco me lewenilotu. Era papitaisotaki. Sa dau tarai tikoga na nodra bula me vinaka. E dau yaco na cakamana. E curuma na yalodra e dua na sore ni vakabauta. Sa rabailevu cake ni ra vuli tiko. Ka ra ciqoma na ivakavuvuli ena ivakavuvuli, me yacova ni ra sa rawata na veivakalougatataki vakasakiti yadua e dau yaco vei ira era lako ena vakabauta eke, ena Lotu i Jisu Karisito ni Yalododonu Edaidai.¹¹

Me da vukei ira na daukaulotu tudei ena nodra kila na dina tale eso.

Au a sotava e dua na marama ena ceva kei Amerika ka se qai lewena ga na Lotu. Ni vakauqeti ena loloma cecere me baleta na ka sa qai kunea, a veilakoyaki voli ka tukuna vei ira tale eso ena vakanuinui. Ena loma ga ni vitu na vula mai na gauna a papitaiso kina, sa solia na yacadra e tolunadrau na nona veikilai vei ira na daukaulotu me rawa ni ra vakamacalataka vei ira na kosipeli. Ena dua na gauna, era sa curu mai e onosagavulu ki na Lotu. E levu tale era a qai lako mai. Mai Sao Paulo, e Brazil, au a sotava kina na cauravou daukaulotu ka a vakavulica taumada vua na kosipeli. O koya talega a saumaki mai, a lako ki kaulotu me matataka na Lotu ena dua na solibula vakailavo levu toka. Na marama au tukuna tiko e dua vei ira na vasagavulukatolu a vukea ena nona curu mai ki na Lotu ena gauna oya. Na cauravou oqo ni Brazil sa vakalevutaki koya me sivia ni vakaduanadrau—vasagavulu katolu na nona saumaki mai ka onosagavulu mai vua e dua vei ira a saumakitaka mai, ka levu tale mai vei ira na vo ni nona saumaki mai ena qai yaco mai.¹²

Sa rui levu vei keda era raica na cakacaka ni kaulotu me tuki katuba wavoki ga. O ira kece era kila na cakacaka oqo era kila ni tiko e dua tale na ivakarau vinaka cake. Na ivakarau oqori mai vei ira na lewe ni Lotu. Ni dua na lewenilotu e vakaveikilaitaka mai e dua na dauvakadidike, sa koto e dua na ivakarau ni veitokoni totolo. Ena vakadinadinataka na lewenilotu na dina ni cakacaka. E namaka vakalevu o koya na nona marau na nona itokani dauvakadikeva na lotu. Sa yaco me marautaka ni sa toso na nona itokani oqo ena nona vulica na kosipeli.

Erau na veivakavulici tiko beka ga na daukaulotu, ia na lewenilotu, ena veigauna e rawa kina, ena tokona na veivakavulici oya ena nona solia na nona itikotiko me vakayacori kina na veiqaravi ni kaulotu oqo. Ena vakadinadinataka na lewenilotu mai vuniyalona na vakalou ni cakacaka oqo. Ena vakarau tu me sauma na taro ni rau yali na daukaulotu. Ena nona itokani o koya e saumaki mai ka vakayacora tiko e dua na veisau levu ka vakavuqa ni dau dredre.

Na kosipeli e sega ni dua na ka me madualaki. Oqo e dua na ka me da cibitaka. “O koya mo qai kakua ni madualaka na kena itukutuku ni noda Turaga.” a vola o Paula vei Timoci (2 Timo. 1:8). Na madigi me wasei na kosipeli e tu ena veivanua kecega …

vosa na yalewa — “Na madigi me wasei na kosipeli e tu ena veivanua kecega.”

Na iwalewale ni nodra kau mai na tamata vou ki na Lotu e sega ni nodra itavi walega na daukaulotu. Era na rawata vakavinaka duadua ni ra yaco na lewenilotu me ra ivurevure ni nodra kunei mai na vakadikeva na Lotu. …

Me vakabulabulataki ena yalo ni lewenilotu yadua me kila ni tu vua na kaukauwa me kauta mai eso tale me ra kila na dina. Me cakacakataka. Me masulaka vagumatua. …

…Kemuni na taciqu kei na ganequ, e rawa ni da laiva vei ira na daukaulotu me ra cakava ga vakataki ira, se e rawa ni da vukei ira. Kevaka era cakava ga, era na tuki katuba tiko e veisiga ka na lailai ga na tatamusuki. Se me vaka ni da lewenilotu e rawa ni da vukei ira ena nodra vaqarai ka vakavulici na dauvakadidike. …

Me tarai cake ena veiiteki yadua na yalo me vakilai na madigi ni nodra kunei o ira era na via rogoca na itukutuku ni kospeli. Ena iwalewale oqo me kakua na veivakacudrui. Me da kakua ni vakalevulevui keda. Na tikidua ni kaulotu mana duadua e rawa ni da kauta voli sai koya na vinaka ni noda bula kei na ivakaraitaki. Ni da vakaitavi ena veiqaravi oqo, ena vinaka cake na noda bula, ni da na qarauna me da kakua ni cakava se kaya e dua na ka ena rawa ni vakabera na nodra toso o ira eda via kauti ira tiko ki na dina. …

E gadrevi me vakoti na yalonanamaki ena veitagede kece sara ena Lotu. Me dau vunautaki na ulutaga oqo [ni cakacaka ni kaulotu] ena veigauna eso ena soqoni ni sakaramede. Me ra veitalanoataka na matabete kei na iSoqosoqo ni Veivukei ena nodra soqoni vakamacawa. Me ra veivosakitaka na Cauravou kei na Goneyalewa ka tuva na sala e rawa ni ra veivuke kina ena itavi bibi duadua oqo. Me ra vakasamataka na gonelalai sara mada ga ena Lalai na sala e rawa ni ra veivuke kina. E vuqa na itubutubu era sa lako mai ki Lotu baleta ni a sureti mai e dua na gone ki na Lalai. …

Kemuni na taciqu kei na ganequ, kemuni kece ena veitabanalevu kei na iteki kei na tikina kei na tabana, au sureti kemuni mo ni dua na mataivalu levu ena yalonanamaki ki na cakacaka oqo ka ilutua cecere ni nomuni gagadre mo ni veivuke vei ira na daukaulotu ena itavi vakaitamera e nodra ena kena kau yani na kosipeli ki na veimatanitu, veimataqali, duivosavosa, kei ira na tamata. “Sa matua na were ka sa [vakarau na] gauna ni tatamusuki [raica naV&V 4:4]. Sa tukuna vakavica oqo na Turaga. Me da kakua beka ni vakabauta na Nona vosa?¹³

Ena vukudra na daukaulotu … au via vakatakekere vei kemuni na Yalododonu mo ni cakava na veika kece sara o ni rawata mo ni soliyaca [o ira o ni kila] me rawa ni ra vakavulica. O ni na marau ke o ni vakayacora vakakina. Na tamata kece o ni raica ni ra lako mai ki na Lotu baleta na nomuni sasaga era na kauta mai na marau ki na nomuni bula. Oqori me noqu yalayala vei kemuni yadua.¹⁴

Na cakacaka vakadaukaulotu tudei e kauta mai na marau tawamudu vei ira era veiqaravi.

Me da sa laveta na ivakatagedegede ni bula kilikili kei na veika me ra vakadonui kina o ira era na lako yani ki vuravura me ra matataka na Turaga o Jisu Karisito.¹⁵

Na vuravura nikua e gadreva na mana ni ivakadinadina savasava. E gadreva na kosipeli i Jisu Karisito, ia kevaka me na rogoca ko vuravura na kosipeli oqori, me ra na tu na daukauitukutuku me ra vakavulica.

Eda kerei ira na itubutubu me tekivu vakamataka na nodra tuberi na luveda [me baleta na veiqaravi vakadaukaulotu] Na vanua e tu kina na masu vakamatavuvale, na vanua e dau caka kina na lotu vakamatavuvale, na vanua e dau caka kina na wili ivolanikalou, na vanua era bulabula tu kina vakalotu na tama kei na tina ka dau tukuna ena yaloreki na veika e baleta na Lotu kei na kosipeli, o ira na gone ena matavuvale vaqori era na vakasinaiti ena gagadre me ra vakavuvulitaka na kosipeli vei ira tale eso me vaka ga era a sucu vata mai. Ena dau ivakarau tudei ni bula ena matavuvale vaqori na cakacaka ni kaulotu. Ena vakaduri na akaude ni maroroi ilavo ni ra se lalai sara na gone. Era na tubu cake na gonetagane ena nanamaki era a sucu vata kaya mai ni ra na kacivi me ra daukaulotu ni Lotu. Sa yaco na kaulotu me tiki ni nona parokaramu ni bula na gonetagane me vaka ga na vuli.¹⁶

Na cakacaka ni kaulotu e itavi bibi ni matabete. Ni vakakina, sa dodonu me ra colata na noda cauravou na kena bi. Oqo na nodra itavi ka nodra icolacola.¹⁷

Ra [cauravou], au nuitaka ni o kemuni kece o ni sa dusimaki tiko ki na matanicagi ni kaulotu. Au sega ni rawa ni yalataka vei kemuni ni na lasa. Au sega ni rawa ni yalataka vei kemuni ni na rawarawa ka vakacegu. Au sega ni rawa ni yalataka vei kemuni na galala mai na yalolailai, mai na rere, mai na rarawa ena so na gauna. Ia au rawa ni yalataka vei kemuni ni o ni na tubu me vaka o ni se bera vakadua ni bau tubu ena gauna vata oqo ena nomuni bula taucoko. Au rawa ni yalataka vei kemuni e dua na marau ena duatani, vakasakiti ka sega ni oti rawa. Au rawa ni yalataka vei kemuni ni o ni na dikeva lesu nomuni bula, ni o ni na tauyavutaka na veika me vakaliuci vovou, ni o ni na bula volekata na Turaga, ni na yaco na masu me gauna dina ka vakasakiti, ni ko ni na lako ena vakabauta mai na vua ni veika vinaka o ni cakava.¹⁸

Eda gadreva eso na goneyalewa [me ra kaulotu]. Dau vakasakiti nodra cakacaka. E rawa ni ra dau curu ki na veivale era sega ni curu rawa kina na cauravou. …

[Ia], … me ra kakua ni nanuma na goneyalewa ni nodra itavi e tautauvata kei na nodra na cauravou. Eso vei ira era na gadreva sara vakalevu me ra lako. Ke vakakina, sa dodonu me ra veitalanoa kei na nodra bisopi vakakina na nodra itubutubu. … Vei kemuni na goneyalewa au kaya ni na tautauvata ga na cecere ni nomuni rokovi, o ni laurai ni ko ni qarava na itavi ko ni lesi kina, na nomuni igu ena ciqoma na Turaga kei na Lotu se o ni lako ki kaulotu se o ni sega ni lako ki kaulotu.¹⁹

E sala vata kei na nodra gadrevi na cauravou kei na goneyalewa gone, sa tubu tale tikoga na nodra gadrevi na veiwatini ena buturara ni kaulotu. O ira na veiwatini qase sa vakasakiti na nodra cakacaka ena kaulotu. E gadrevi tale e levu. Vakabibi nodra gadrevi o ira era kila tu na veivosa tani. E rawa ni ra veiqaravi ena vuqa na itavi ena ruku ni nodra veidusimaki na peresitedi ni kaulotu kidakida ka dauveinanumi.

Ni sa levu cake tikoga na kedra iwiliwili na tamata era sa vakacegu ka ra se bulabula ka waribariba vinaka tu, e vuqa e rawa ni ra mai vakatawana na gagadre vakaitamera e tu ena cakacaka ni Turaga.²⁰

Era tu na turaga kei na marama era sa vakacegu mai na cakacaka ka ra veiqaravi tu vakadaukaulotu ni Lotu oqo e vuravura taucoko. Sa tubu cake tiko ga na iwiliwili. Era lako ki na vanua era kacivi kina. Era veiqaravi ena vanua era gadrevi kina. Sa tauyavutaki na veitokani; wasei na maqosa vakacakacaka; vakarautaki na madigi ena vukudra era na sega ni guilecavi ira na turaga kei na marama era a lako yani vei ira ena yalo ni sega ni nanumi koya, me ra veivakavulici ka caka vinaka. Era sega ni saumi vakailavo. Era sauma ga na ka e baleti ira. E sega ni vakaiyalayala na ivakarau ni nodra yalodina. Na vua ni nodra sasaga e sega ni vakasamataki rawa.²¹

daukaulotu goneyalewa ena kedra maliwa na tamata — “Na vuravura nikua … e gadreva na kosipeli i Jisu Karisito, ia kevaka me na rogoca ko vuravura na kosipeli oqori, me ra na tu na daukauitukutuku me ra vakavulica.”

Ni da vakaveikilaitaki ira na tani ki na kosipeli, ena vukea na Yalo ni Turaga me da lakosivita na duidui ena keda maliwa.

Baleta ni da vu ga mai vua e dua na itubutubu [ni da luve ni Kalou], eda na kidava vata ga e dua na dina. Na vakasama ni duatani vakalailai na roka ni kuliniyagona e dua, ni duidui vakalailai na ibulibuli se itokatoka ni matana e dua, ni duidui vakalailai na nona isulusulu e dua e sega kina ni vakaduiduitaki koya ni duatani na mataqali tamata. Na tagane kei na yalewa e vuravura raraba era kidava na ivakayadra vata ena ivakarau vata ga. Era vakasaqara na katakata ni ra sa batabata; era kila na mataqali mosi vata ga; era na kila na cudru, ka ra kila na reki. …

Ni basika na duidui—vei ira noda neiba se ena itovo vakavanua tale eso—era dau tu me vaka na bolebole ni da segata me da wasea na kosipeli, na veivakaliuci malumu e dau kauta laivi na bolebole vaqo. Ni da rokova na ivakaro ni Kalou me da kauti ira mai eso ki na kosipeli, au vakadinadinataka na Yalo ni Turaga ena vukea me lako siviti na duidui vua e veivakavulici kei koya e vakavulici. E vakamatatataka na Turaga na iwalewale ena Nona kaya, “Raica ko koya sa vunau [ena Yalo] kei koya sa vakabauta [ena Yalo], erau sa veikilai yalo, io erau sa veivakavulici ka marau vata.” (V&V 50:22.)

Au yalodei ni sala mana duadua e tu vei keda ena noda ilesilesi me da wasea na kosipeli sai koya na Yalo ni Turaga. Eda sa raica kece vei ira tale eso. Ni da cakava na cakacaka ni Turaga, eda sa vakila talega vei keda. Ena veigauna vakaoqori, na duidui e matanavotu vei keda kei ira eda vakavulica ena qera mai matada me vaka na vari ni ika. (Raica na 2 Nifai 30:6.) Ena rairai mai na bula vakaveitacini kei na veiciqomi ka vakasakiti ni da raica. Eda na veiciqomi dina sara, ka da vakatataki cake ka marau vata.²²

Ni da toso ki liu ena vakabauta, ena vakalougatataka na Turaga na noda sasaga me da kauti ira mai na tani ki na kosipeli.

E dina eda vakaitavi ena dua na cakacaka vakasakiti ka qoroi. … Sa vakayacora mai na Kalou ni lomalagi na cakamana ni gauna oqo, kei na veika eda sa raica tu oqo e ikanakana taumada ni veika cecere se bera ni yaco mai. Na cakacaka oqo era na vakacavara na turaga kei na marama yalomalumalumu, gone kei na qase.²³

Ena qaqa na cakacaka oqo baleta ni sa yalataka na Turaga:

“Ia ko koya sa vakacegui kemudou sa vakacegui au talega, niu sa lako vata tiko kei kemudou. Au na tiko e yasamudou imatau ka tiko talega e yasamudou imawi, ia na noqu Yalo Tabu e na tiko e yalomudou; era na vakavolivoliti kemudou na noqu agilosi ka laveti kemudou cake.” (V&V 84:88.)

Ni sa isolisoli mai vakalou na noda ilesilesi, ka yalataki vakalou na noda veivakalougatataki, me da toso ki liu ena vakabauta. Ni da vakayacora vakakina, ena vakalougatataka na noda sasaga na Turaga. Me da vakayacora na noda itavi ena wasei ni kosipeli vei ira era wavoliti keda tu, taumada ena ivakaraitaki oti qai ivakavuvuli vakauqeti.

Na vatu sa kavida mai na ulunivanua ka sega ni taya na tamata ena qiqi tikoga me yacova ni sa roboti vuravura taucoko. (Raica Tani. 2.) Au vakadinadinataka vei kemuni na dina oqo kei na dina ni o keda yadua eda rawa ni veivuke ena veisala e veiganiti kei na keda ituvaki kevaka eda na vakasaqara na nona veituberi kei na veivakauqeti ni Tamada mai Lomalagi. Oqo na cakacaka ni Kalou eda cakava tiko, ena nona veivakalougatataki eda na sega ni druka.²⁴

Vakatutu ni Vuli kei na Veivakavulici

Taro

Na cava eda dau rerevaka kina na wasea na kosipeli? Na cava eso na sala eda rawa ni vakamalumalumutaka kina na rere oqori ka tatara yani vei ira na tani? Raica na iwasewase e 1. A cava e so na cakamana ni cakacaka ni kaulotu o sa vakadinadinataka?
Na cava na vuna era dau qaqa vakavinaka duadua kina na daukaulotu ni ra yaco na lewenilotu me ra ivurevure ni nodra kunei mai na vakadikeva na Lotu? (Raica na iwasewase e 2.) Na cava eso tale na sala e rawa ni ra vukei ira kina na daukaulotu tudei na lewenilotu?
Na cava sa rui dau veivakauqeti kina vakalevu ena nodra bula na veiqaravi kina na kaulotu tudei? Na sala cava e rawa ni ra vukei ira kina na luvedra o ira na itubutubu me ra laki kaulotu tudei? Raica na iwasewase e 3. E rawa vakacava ki na matavuvale me vukei ira na veiwatini qase cake me ra vakavakarau ki na veiqaravi?
Raicalesu na iwasewase e 4. Na cava eso na itovo ni bula e tu vei ira na tamata kecega? E rawa vakacava me da ulabaleta na duidui ka dau vaka me bolei kina na wasei ni kosipeli? Na sala cava o sa raica ni vukei ira kina na tamata na Yalo ni Turaga me ra ulabaleta na duidui?
E vakabibitaka o Peresitedi Hinckley ni na vakalougatataka na Turaga na noda sasaga me da wasea na kosipeli kevaka eda “toso ki liu ena vakabauta” (wasewase e 5). E rawa vakacava mo wasea na nomu gagadre kei na vakabauta mo wasea na kosipeli?

iVolanikalou Veisemati

Aisea 52:7; Maciu 28:19–20; Alama 26:1–5; V&V 1:20–23; 4; 18:15–16; 38:40–41

Veivuke ena Vuli

“Kua ni rerevaka na vakanomodi. Era dau gadreva na tamata na gauna mera vakasamataka kina na isau ni nodra taro se mera dau vakamacalataka na veika era vakila. E rawa ni o cegu vakalailai ni oti na nomu taroga e dua na taro, ni oti na kena wasei mai e dua na ka eda sotava vakayalo, se na gauna e dredre tiko kina na nona vakamacalataki koya e dua” (Veituberi, Me iLutua ni Noda Bula, [1999], 73).