Wase 15

Na Matabete Tabu

“Au taleitaka na matabete ni Lotu oqo. E sa dua na ka bibi ka bula. E sa uto saraga ka kaukauwa ni cakacaka oqo. E sa kaukauwa kei na dodonu e vakataucokotaka kina na Kalou, na Tamada Tawamudu, na Nona cakacaka e vuravura.

Na Bula nei Gordon B. Hinckley

Ena 1980, a vakaitavi o Elder Gordon B. Hinckley kei na watina, o Marjorie, ena qaravitavi tolu na macawa e Esia, ka vosa voli ena koniferedi ni iwasewase e so ka vakaitavi ena vakatabui ni Valetabu e Tokio Japani. Ni bera na lesu i vale, rau a gole ki na Tabana ni Kaulotu na Japan Sendai, ka a vakatulewa kina o Elder Hinckley ena tauyavutaki ni matai ni iteki ena tabana ni kaulotu. Ni bera toka e dua na soqoni vata kei iratou na mataveiliutaki vou ni iteki, a torovi peresitedi ni kaulotu, o Kiyoshi Sakai, o Elder Hinckley. “A tarogi Peresitedi Sakai ka kurabui voli kevaka e tiko vua e dua na waiwai ni veimasulaki ka qai kuria, ‘Au sa oca saraga; rawa ni o solia vei au e dua na veivakalougatataki?’ A nanuma o Peresitedi Sakai, ‘Au a rere saraga ka vakila na malumalumu meu vakalougatataka e dua na iApositolo ni Turaga. Au tukuna vua niu sega ni rawa ni solia na veivakalougatataki vaka-Valagi. A kaya o Elder Hinckley na vaka-Japani sa daumaka. Au sa mani vakayacora vata kei Elder Hitoshi Kashikura, na Mata ni iWasewase.’ Ni sa cava na cavuti ni veivakalougatataki, a kaya ga o Elder Hinckley, ‘Vinaka, vinaka. Oqo au sa rawa ni gole i vale ni mataka.’

“A rairai kaukauwa ka bulabula o Elder Hinckley ena mataka ka tarava, ka ni taroga o Peresitedi Sakai se sa vakacava toka a sauma o koya, ‘Dai Jobu, sa vinaka sara. Au sa bula vinaka.’ Ena vica na siga emuri a ciqoma o Peresitedi Sakai e dua na ivola ni vakavinavinaka mai vei Elder Hinckley, ka vola: ‘… Au sa vakavinavinakataka saraga na veivakalougatataki ko a solia vei au. Au a vakila saraga na noqu bula vinaka ni oti oya. A totolo ka taucoko na noqu kaukauwa tale mai. Na vakamuduo levu mai vei au kei Sisita Hinckley ena madigi ni tiko voli ena nomu tabana ni kaulotu.¹

A dau vakadinadinataka wasoma o Peresitedi Hinckley na veivakalougatataki ni matabete, mai na veivakalougatataki cakamana ka vagauna ni veivakabulai vakayago, ki na veivakalougatataki ni veivauci tawamudu mai na cakacaka vakalotu ni valetabu. A cauraka o koya, “Au vakabauta ni sa koto na dodonu vakalou ena Nona matabete—na kaukauwa me veivakalougatataki, na kaukauwa me veivakabulai, na kaukauwa me vakatulewa ena veika vakavuravura ni Kalou, na kaukauwa me vauca mai lomalagi na ka e sa vauci e vuravura.”²

ciqoma tiko na veivakalougatataki e dua na marama — “E [na matabete], sa sega na ka e tawarawa ena kena tosoi iliu na cakacaka ni matanitu ni Kalou.”

iVakavuvuli nei Gordon B. Hinckley,

Na Kalou e sa vakalesuya mai na matabete kei na idola e so ni matanitu ni lomalagi.

Na kaukauwa ni matabete kei na kena dodonu [a] soli taumada kivei ira na turaga ena gauna vakailiu. Na dodonu lailai sobu a soli kivei ira na luvei Eroni tagane mera qarava na veika vakayago ka vakakina ena so na cakacaka vakalotu tabu vakaveiliutaki. Na matabete levu cake a solia na Turaga vakai-Koya kivei ira na Nona iApositolo, me salavata kei na Nona cauraka kivei Pita: “Au na solia talega vei iko na idola ni matanitu vakalomalagi: ia na ka kecega ko na vauca e vuravura, ena vauci mai lomalagi: ia na ka kecega ko na sereka e vuravura, ena sereki mai lomalagi” (Maciu 16:19).

Na taucoko ni vakalesui mai ni matabete a okati ena lako mai nei Joni na Dauveipapitaiso … kei Pita, Jemesa, kei Joni. … A okati kina o Mosese, Ilaisa, kei Ilaija, ka ratou kauta yadua mai na idola ni matabete me vakacavari kina na cakacaka ni kena vakalesui taucoko mai na itavi kei na cakacaka vakalotu e so ni itabagauna sa oti ena ka oqo, na iotioti ni itabagauna levu ni sa yaco dina sara na kena gauna.

Sa tiko oqo na matabete. … Eda sa kila, ni da sa raica, na kaukauwa ni matabete. Eda sa raica na tauvimate ni vakabulai, na lokiloki me lako rawa, kei na basika mai ni rarama kei na kilaka kei na kila matata kivei ira ka a tiko ena butobuto.³

Na parofita o Josefa Simici a vakamacalataka ena dua na gauna [na matabete] ena veivosa oqo: “Sa dua na ivakavuvuli tawamudu na matabete, ka a tiko vata kei na Kalou mai na gauna tawamudu, ka na [tiko] me tawamudu, ni sega na kena itekitekivu ni siga se icavacava ni yabaki.” (History of the Church, 3:386.)

E sa itukuni dodonu ni kaukauwa ni Qaqa ka soli ki na tamata me cakacaka ena Yacana kei na Vukuna. E sa dua na veisolisoli ni dodonu vakalou, duidui mai na kaukauwa kei na dodonu kece tale e so ena dela ni vuravura. Sega ni ka ni kurabui ni a vakalesui mai kivua na tamata mai vei ira na tamata vakaturicake tale ka a taura tu vakailiu, me kakua kina ni dua na vakatataro me baleta na kena dodonu kei na veivakadeitaki. Kevaka e sega (na matabete) sa rawa ni yacana wale tu ga na Lotu, ka sega na dodonu ni lewa me qarava na veika ni Kalou. Vata kaya, sa sega na ka e tawarawa ena kena tosoi iliu na cakacaka ni matanitu ni Kalou. E sa ka vakalou ena kena ituvaki. E sa vakayago ka tawamudu ruarua ena kena ituvaki dodonu. E sa kaukauwa duaduaga ena vuravura ka yacova yani na taudaku ni ilati ni mate.⁴

Na matabete sa kaukauwa kei na dodonu e vakataucokotaka kina na Kalou na Nona cakacaka.

Au taleitaka na matabete ni Lotu oqo. E sa dua na ka bibi ka bula. E sa uto saraga ka kaukauwa ni cakacaka oqo. E sa kaukauwa kei na dodonu e vakataucokotaka kina na Kalou, na Tamada Tawamudu, na Nona cakacaka e vuravura.⁵

Na matabete tabu e tiko kina na dodonu me vakatulewataka na veika ni matanitu ni Kalou e vuravura. Mai na vakatakila e so ni Turaga, na Lotu me na dau liutaki mai na tolu na bete levu veiliutaki. Me ratou na tokoni mai na dua na matabose ni iApositolo Le Tinikarua, ka qai yaco me tokoni mai … na Vitusagavulu. Ena qarava na matabisopi vakatulewa lewe tolu na veika vakayago taucoko mai na veidusimaki ni Mataveiliutaki Taumada. Era sa vakailesilesi vakamatabete taucoko oqo. Na kaukauwa oya ka soli mai vakalou e sa dodonu era vakatulewa kina. Sa vakakina ena iteki kei na tabanalevu ena mataveiliutaki kei na matabisopi. Sa vakakina ena veikuoramu. Era tutaka na nodra cakacaka na vakailesilesi ni mataisoqosoqo ena vakatulewa kei na veisolisoli ni matabete. Ke sega na matabete sa na rairai tu ga na vatuka ni Lotu, ia sega na kena vakavotukana dina. Oqo na lotu i Jisu Karisito, ka sa vakatulewataki mai na dodonu oya ka sa “vaka na iLesilesi ni Luve ni Kalou.” (V&V 107:3.)⁶

Me sa rekitaka taucoko na tamata na veivakalougatataki ni matabete.

[Na matabete] … e sa tiki ni tuvatuva ni Kalou na Tamada Tawamudu me vakalougatataka na nodra bula na Luvena tagane kei na yalewa ena itabagauna taucoko.⁷

Na matabete tabu e oka kina na kaukauwa me veivakalougatataki. Kivei ira ena Matabete i Eroni, era sa kauta voli na dodonu mera qaravi ira na ivavakoso ena ivakatakilakila ni lewe kei na dra ni Turaga, ka a solia na Nona bula me imadrali ni tamata taucoko. Na sakaramede kei na vakayagataki ni ivakatakilakila oqo e sa uto saraga ni noda sokalou ena siga ni vakacecegu. E oka kina na vakavoui ni veiyalayalati kei na Kalou. E kauta voli e dua na yalayala ni Nona Yalo Tabu me tiko vata kei keda. E sa dua na veivakalougatataki vakailawalawa me rekitaki mai vei keda kece ka sa rawa ga mai na dodonu ni lewa ka soli vei ira na cauravou bula kilikili. …

Na Matabete i Melikiseteki e kauta voli na dodonu ni lewa me vakatikora na Yalo Tabu. Sa dua dina na veivakalougatataki levu me tiko na veivakayarayarataki veilesi ni dua na lewe ni Tolu va-Kalou, ena kena ciqomi na isolisoli oya mai na ligadra o ira ka vakaitavi ena dodonu ni lewa vakalou. Kevaka meda na bula dodonu voli, eda na marautaka na veivakataudeitaki ni yalayala a cakava na Turaga ena Nona kaya: “Ena sala vata voli ga kei iko na Yalo Tabu, ia na nomu ititoko sa ititoko ni yalododonu kei na dina sa tudei sara; raica na nomu lewa sa lewa e sega ni mudu, ia kevaka sa sega ni taurivaki vakatani sa na tudei tu ga me tawamudu.” (V&V 121:46.)

Na matabete e oka kina na kaukauwa me vakalougatataka na tauvimate. E tiko beka e dua e rogoci au voli ka se bera ni cakacakataka se vakila na kaukauwa vakalou oya? E rawa li ni dua vei keda e vakatitiqataka na kena vakavotukana? Sa rawa ni da tukuna na cakamana e so, ka tabu ka totoka, eda sa vakadinadinataka ena veika eda sotava. …

Na Matabete i Melikiseteki tabu oqo e kauta voli na kaukauwa me veivakalougatataki ena parofisai, me veivakacegui, me veitokoni, me veidusimaki. Sa tiko na peteriaki e so ena keda maliwa ka, ena dodonu ni lewa era taura tu, vakatakila na yavusa ka veivakalougatataki me baleta na noda idusidusi. Na veivakalougatataki oqo sa na yaco vaka e dua na iyaqa eda rawa ni tautauri kina meda toka matau mai na cagitataba ni bula.

Ena kena itukuni vakaoti na matabete tabu e kauta voli na dodonu ni lewa me veivauci e vuravura ka raica me vakadeitaki na veivauci oya mai lomalagi. E sa matalia ka totoka. E sa dodonu ni lewa ka cakacakataki ena valetabu ni Kalou. E sa baleta ruarua na bula kei na mate. E sa usutu saraga ni veika tawamudu. E sa kaukauwa vakalou ka solia na Kalou Qaqa me tiki ni Nona ituvatuva levu me baleta na nodra tucake tale mai na mate na tamata kecega ka rawata na bula tawamudu.

Sa ka vakasakiti dina na isolisoli ni Kalou ka sa lako mai vei keda.⁸

Sa dodonu mera dina tu o ira na Luvena tagane na Kalou ka taura voli na Nona dodonu ni lewa vakalou ki na vinaka duadua ni nodra bula.

Na tagane bula kilikili kece, veitalia na nodra vanua, itovo ni bula, se ile cava tale, sa rawa ni ciqoma na matabete. Na nona talairawarawa ki na ivunau ni Kalou sa yaco me ile vakatakilai. Na kena soli e sa vakatau duaduaga ena bula kilikili kivua na Turaga. …

Sa vaka tu oya na vakasakiti ni matabete. Sa sega ni dua na ile na iyau. Sa sega ni dua na ile na vuli. Sa sega ni dua na ile na veidokai ni tamata. Na ile qarauni e sa vakadonui vua na Turaga.⁹

Sa yaco mai na gauna kivei keda kece ka sa vakatikori ki na Matabete i Eroni se Melikiseteki, kei na tabana cavaga e tiko kina, meda railesuva na noda bula, meda dikeva na noda malumalumu, ka veivutunitaka na itovo e so ka duidui mai na ilesilesi tabu ka cecere eda sa ciqoma. …

Sega ni dua na tagane, gone se qase … ka sa … vakatikori, sa rawa ni taura vakamamada na ka e tiko vua. E sa veitokani o koya vata kei na Kalou ka sa tu vua e dua na itavi bibi ka tabu me bula kina vaka e dua sa kilikili me vosa ka cakacaka ena yaca ni Kalou me vaka na nona mata vakadonui.¹⁰

Dina ga ni ra tabaka na uluda o ira ka tu vei ira na dodonu ni lewa ka da sa vakatikori, sa rawa ni da bokoca ka vakayalia mai na noda itovo na dodonu cavaga me cakacakataki kina na dodonu vakalou oqo.

… “Raica sa sega sara ni kilikili me vakayacori na cakacaka vakabete ena ivakarau kaukauwa se vakasaurara, ia me vakayacori ga ena veivakauqeti, na vosota vakadede, na yalomalua, na yalomalumalumu, kei na loloma e sega ni veivakaisini;

“Io ena yalo e veidokai, kei na yalomatua, raica ena rarama sara kina na yalona, ka sega vua na veivakaisini kei na lawaki” (V&V 121:41–42).

Oqo, kemuni na taciqu, na ituvaki ni bula e so sa dodonu me vakatakilai kina na matabete oqo. E sega ni vaka e dua na kote meda dara ka kauta tani vakarawarawa. Ni sa cakacakataki vakadodonu, me vaka saraga na tiki ni yagoda, dua na tikida ena veigauna taucoko kei na veituvaki taucoko.¹¹

Sa dodonu meda dau dina ki na vinaka duadua ni noda bula. Eda sa luvena tagane na Kalou ka doka vakalevu meda taura na Nona dodonu vakalou. Ia eda sa bula ena dua na vuravura vakasisila. Sa tiko e dua na kaukauwa matau, e dreti keda sobu tiko, ka sureti keda tiko meda kitaka na veika e sa veicalati vakaoti kei na matabete vakalou eda taura tu. …

Kivei kemuni na turaga au sa solia e dua na bolebole. Cici tani mai na ua ni ivakarau lolovira ena via rawai iko. Drotaka na veika vakasisila ni vuravura. Dau doka na kemu ituvaki vinaka cake. Dau doka na ka vinaka duadua e tiko vei iko. Dau yalododonu ka dina ki na veiyalayalati era sa veisotari kei na matabete ni Kalou.¹²

Ki na ivakalesilesi kece, kivei ira kece na qasenivuli ena Lotu oqo ka vakaitavi ena dua na ilesilesi vakamatabete, sa kena gauna oqo mo vakarabailevutaka kina na veikacivi ni matabete ena veitavi tabu. Sa vakatautaki vei keda na nodra tiko vinaka kei na tubu kei na taraicake na tamata tale e so. Eda sega ni bula ga me baleti keda. Kevaka meda na vakarabailevutaka na noda veikacivi, eda sega ni rawa ni bula ga me baleti keda.¹³

Vuqa na turaga era nanuma ni baleta ga era sa vakatikori, sa nodra vakataucoko na matabete mera cakacakataka ena nodra digidigi ga vakaiira. Era nanuma ni rawa ni ra voroka e dua na veiyalayalati kei na ivunau eke vakakina e kea, ka valavala ca ena sala oqo se oya, ka se tiko vata ga kei ira na kaukauwa ni matabete ka na vakadonuya na Kalou na ka era cavuta ena Yacana tabu kei na yaca ni Dauveivueti. Oqo sa yaco me veivakaduiduitaki, kau vakabauta ena ivalavala vakaoqo, era sa vosavakacacataka na yaca ni Kalou. Era vakacacana na yaca ni Luvena Daulomani. Era beca na isolisoli tabu ka lako mai na veivakatikori, kei na dodonu ni lewa era sa vakayalia me baleta na cakacala. …

… Au sa veivakaroti kivei kemuni taucoko, cauravou kei na turaga, mo ni vakatikitikitaka na ivalavala ca. Na cakacala sa veisaqasaqa vata kei na dodonu ni lewa vakalou. Levea na iyaloyalo vakasisila me vaka o na levea na kena mate dewa. Levea na ivalavala ca ni veiyacovi ena ivakatagedegede cavaga. Vakatikitikitaka na tawadodonu kei na veicavilaki. Au sa vakamamasu mo tarovi iko mai na vu ni dokadoka cavaga kei na ivalavala tawadodonu. Au kerei kemuni mo ni dikevi kemuni mada ka raica ni sega ni vakayacori tiko na lewa tawadodonu se veivakasaurarataki kivei ira na watimuni se luvemuni. …

… Au sa yalovakacegu ni sa sega ni yalovinaka na Tamada mai Lomalagi kivua na turaga se cauravou cavaga ka vakadonuya na veivakatikori ka qai vakaogai koya ena veika vakasisila. Ena gauna saraga sa vakadonui kina na veivakatikori sa oka o koya ki na dua na bubului kei na veiyalayalati mai vua kei na nona Kalou.¹⁴

Sega ni dua na tagane, se itabagone se italatala qase, e bulataka voli na ivakatagedegede ni matabete me na beca se vakalolovirataka na bula vakamarama, me na sega ni cakava na ivakarau ni vakarokoroko kivei ira na luvena yalewa na Kalou ka vinakata na Tamada mai lomalagi me caka vakakina vei ira.¹⁵

Meda sa turaga vakawati ka tama vinaka. Dua ga na turaga ka sa ivakarau kaukauwa voli ena nona itikotiko sa tawakilikili ena matabete. E sega ni rawa o koya me dua na iyaya ni cakacaka ena liga ni Turaga ni sega ni dau vakaraitaka na vakarokoroko kei na yalovinaka kei na loloma kivua na itokani ni nona digidigi. Vakakina, dua ga na turaga ka sa ivakaraitaki ca kivei ira na luvena, ka sega ni rawa ni qarauna na nona yalokatakata, se sa coko ena so na ivakarau tawadodonu se tawakilikili ena raica ni sa tawayaga na kaukauwa ni nona matabete.¹⁶

Na watimu o digitaka sa na nomu ivakatautauvata. … O koya e sega ni nomu tamata cakacaka, nomu iyau taukeni, se dua tale na ka e vakakina. Sa dua dina na vakayaco ka vakaloloma ka vakatuburarawa saraga na vakararawataki ni watida. Dua ga na turaga ena Lotu oqo ka vakararawataka na watina, ka beci koya, ka rukaki koya, ka lewai koya vakatawadodonu e sa tawakilikili me taura na matabete. Dina ga e sa na rairai vakatikori, sa na tasogo ko lomalagi, sa na rarawa na Yalo ni Turaga, ka sa na oti ekea na kaukauwa se na ilesilesi vakabete ni tamata ko ya. Dua ga na turaga ka vakayacora voli na ivakarau oqo sa tawakilikili me taura e dua na ivolatara ni valetabu. …

… Ke tiko e dua … ka sa cala ena itovo vakaoqo, au sa kerei iko mo veivutuni. Tekiduru ka kerea vua na Turaga me vosoti iko. Masuti Koya ena kaukauwa mo qarauna kina na yamemu kei na ligamu veivakacalai. Kere veivosoti vua na watimu kei ira na luvemu. …

Au sa yalodei ni gauna eda na duri tu kina ena mata ni itikotiko ni Kalou, ena lailai na kainaki ni levu ni iyau eda taukena ena bula se na ka veivakacerecerei e so eda rairai rawata. Ia ena tiko na taro veivaqaqai e so me baleta na noda veimaliwai vakamatavuvale. Au sa vakadeitaka ni o ira ga ka lako curuma na bula ena loloma kei na vakarokoroko kei na vakavinavinaka me baleti ira na nodra itokani kei na luvedra ena ciqoma mai vua na noda daunilewa tawamudu na vosa, “E vinaka, a tamata vinaka ka dina: … curu ki na marau ni nomu turaga” (Maci. 25:21.)¹⁷

Na kuoramu ni matabete sa rawa ni dua na iyaqa ni kaukauwa kivei ira na lewena.

Au sa yalodei ni sa nakita na Turaga me levu cake mai na dua na kalasi ni cioloji e dua na kuoramu ni matabete ena veimataka ni Sigatabu. Sa dina sara, na taraicake ni bula vakayalo kei na vaqaqacotaki ni ivakadinadina mai na vakatavulici matau ni kosipeli e sa dua dina na itavi bibi ni matabete. Ia oqo sa dua walega na tabana ni itavi ni kuoramu. Na kuoramu yadua sa dodonu me dua na mataveitacini cakacaka vata me baleta na lewena kecega kevaka me na vakilai na kena inaki. …

… Na kuoramu ni matabete e sa isoqosoqo ni Turaga me baleti ira na turaga ena Lotu, me vaka ga sa isoqosoqo ni Turaga na iSoqosoqo ni Veivukei me baleti ira na marama ena Lotu. Sa nodra dui itavi yadua, me vaka na kena inaki taumada, na nodra qaravi o ira na vakaleqai.

Ni sa tauyavutaki na iSoqosoqo ni Veivukei a kaya na Parofita o Josefa me baleti ira na marama ena iSoqosoqo: “Era na maqusa yani mera laki vakaceguya na tamata; era na laki vakania ka vakamarautaka e dua na yalo e tiko rarawa ka nuiqawaqawa voli; era na laki vakadula na tagi ni dua na gone sa tu luveniyali ka vakamarautaka na yalona e dua na yada” [Nodra iVakavuvuli na Peresitedi ni Lotu: Josefa Simici (2007), 521. Au nuitaka ni na kainaki na ka vataga oya kivei ira na turaga ena matabete.

Ena dua na siga vakasakiti … ni ra sa yaco na noda veikuoramu ni matabete me iyaqa ni igu vei ira kecega na tagane era lewena, ni sa rawa vei ira na tagane oqori me ra kaya vakadodonu, ‘o au na lewe ni dua na kuoramu ni matabete ni Lotu i Jisu Karisito ni Yalododonu Edaidai. Au sa tu vakarau meu vukei ira na taciqu ena veika kece era leqa kina, niu kila ni ra sa tu vakarau o ira me ra vukei au ena noqu. Ni da cakacaka vata, eda na tubu vakayalo vakaluvena tagane ni veiyalayalati na Kalou. Ni da cakacaka vata, eda na tucake, sega ni madua ka sega ni rere, vorata na cagi kece ga ni meca ena liwa mai, se ena veika vakailavo, bula vakawatamata, se vakayalo.”¹⁸

soqoni ni matabose ni tabanalevu — Era cakacaka vata na iliuliu kei na lewe ni Lotu—turaga kei na marama—mera “vakayacora na nodra cakacaka ena veidusimaki kei na veisolisoli ni matabete.”

Ena veitikotiko ka vakakina ena Lotu, era cakacaka vata na turaga kei na marama mera tosoya ki liu na matanitu ni Turaga.

Era taura na matabete na turaga, io. Ia sa noqu itokani na watiqu. Ena Lotu oqo e sega ni lako iliu na turaga mai vua na watina se ena dakui watina ia ena yasana. Rau sa dua-vata ena bula oqo ena dua na sasaga levu.¹⁹

Sa tiko na kaukauwa kei na igu levu vei ira na marama ena Lotu oqo. Sa tiko na veiliutaki kei na veidusimaki, na yalo ni tu vakataki koya, kei na yalovakacegu levu ni sa mai tiki tiko ni ka oqo, na matanitu ni Turaga, ka cakacaka vata voli kei ira na [tauri] matabete me tosoi ki liu.²⁰

Au vakavinavinakataka na Tamaqu Tawamudu ena vakalesui mai ni matabete tabu, me “ra vunau ko ira ena yaca ni Turaga na Kalou, na nodra iVakabula na kai vuravura” (V&V 1:20). Au sa raica na totoka kei na wananavu ni matabete oya ena liutaki ni lotu vakasakiti oqo. Au sa vakila na kena kaukauwa kivei au ena nodra vakalougatataki ka vakabulai na tauvimate. Au sa raica na yaloveidokai e sa vakayacora kivei ira na turaga yalomalumalumu ka sa kacivi ki na ilesilesi levu ka bibi e so. Au sa raica ni ra vosataka ena doudou kei na dodonu ni lewa mai lagi me vaka ga sa vosa curumi ira voli na domo ni Kalou.

Au vakavinavinakataka na Turaga ena ivakadinadina e sa solia vei au me baleta na taucoko ni kosipeli, na kena raba kei na kena balavu kei na kena titobu. E sa vakayacori me vakalougatataki ira na luve tagane kei na luve yalewa ni itabatamata taucoko ni veigauna—o ira na bula tiko kei ira na sa mate.²¹

Vakatutu ni Vuli kei na Veivakavulici

Taro

Railesuva na ivakavuvuli nei Peresitedi Hinckley ena iwasewase e 1 me baleta na vakalesui mai ni matabete. Na cava soti o sa sotava e sa vukei iko ni rawata e dua na ivakadinadina ni veidina oqo?
A vakatavulica o Peresitedi Hinckley, “Na matabete tabu e tiko kina na dodonu me vakatulewataka na veika ni matanitu ni Kalou e vuravura” (iwasewase e 2). E tutaki vakacava na dina oqo ena iteki kei na tabanalevu e so? ena veikuoramu? ena iSoqosoqo ni Veivukei? E vaqaqacotaka vakacava na nomu veiqaravi ena matanitu ni Kalou na dodonu ni lewa ni matabete?
Ena iwasewase e 3, railesuva na veivakalougatataki eda rawa ni ciqoma taucoko mai na matabete. Na sala cava soti o sa bau sotava kina na kaukauwa kei na veivakalougatataki ni matabete?
Na cava eda rawa ni vulica mai na ivakavuvuli nei Peresitedi Hinckley me baleta na duidui ni dodonu ni lewa ni matabete kei na kaukauwa ni matabete? (Raica na iwasewase e 4.) Na cava o nanuma sa kena ibalebale kina kivua e dua ka tauri matabete me “dina tu ki na vinaka duadua ni [nona] bula”? Cava na vuna mera “kakua ni bula duadua ga kina [vakataki] ira na tauri matabete”?
Ena iwasewase e 5, na cava e vakauqeti iko ena ivakamacala nei Peresitedi Hinckley me baleta na kuoramu ni matabete kei na iSoqoqsoqo ni Veivukei? Na cava eda rawa ni cakava ena noda tabanalevu se tabana me muri kina na nona ivakasala?
Cava na vuna sa dodonu mera cakacaka vata kina na turaga kei na marama vaka “dua-vata” me vakataucokotaki kina na cakacaka ni Turaga? (Raica na iwasewase e 6)

iVolanikalou Veisemati

Iperiu 5:1–4; 1 Nifai 14:12–14; Alama 13:1–9; V&V 84:33–44; 88:133; 112:30–32

Veivuke ena Vuli

“Dau taroga na taro e gadrevi kina vei ira na lewenikalasi me ra kunea mai na kena isau mai na ivolanikalou kei na nodra ivakavuvuli na parofita edaidai” (Veituberi Me iLutua Ni Noda Bula [1999], 70).