Wase 12

Talairawarawa: Bulataka Vakarawarawa na Kosipeli

“Na sala ni kosipeli sa dua na sala rawarawa. … Vakayalomalumalumutaki iko ka lako ena talairawarawa.”

Na Bula nei Gordon B. Hinckley

Ni sa voleka ni yabaki 14 o Gordon B. Hinckley, a sotava o koya e dua na ka ena Valecavu e Salt Lake ka a vakavuna vua me cakava e dua na navunavuci bibi. A railesuva emuri o koya:

“Au [rogoci] Peresitedi Heber J. Grant ni tukuna na veika a lako curuma ni se tagane lailai ena wiliki ni iVola i Momani. A tukuni Nifai o koya kei na veivakayarayarataki levu e sa cakava ki na nona bula. Ka qai, ena dua na domo taqiri voli ena dua na veivakadeitaki au na sega ni guilecava rawa, a cavuta o koya na veivosa cecere oya nei Nifai: ‘Au na lako ka kitaka na ka sa vakarota na Turaga, ka niu kila ni sa dau vakarautaka na Turaga na sala me ra rawata kina na luve ni tamata na ka kece sa vakarota vei ira ko Koya‘ (1 Ni. 3:7).

“A lako mai ki na lomaqu gone ena gauna oya e dua na navunavuci meu sa tovolea ni cakava na ka e sa vakarota na Turaga.”¹

A dau kauta voli ga o Gordon B. Hinckley na navunavuci oya e lomana. Ena veiyabaki emuri, ni sa Peresitedi ni Lotu, na nona ivakavuvuli a vakarogoi lesu ki na itukutuku a rogoca o koya ni se cauravou. Ni vosa tiko ki na dua na ilawalawa ni Yalododonu Edaidai ena dua na koniferedi ni iwasewase, a kaya o koya:

“Au sa vakatarogi mai vei ira e vuqa na dauvola [itukutuku]. Na dua na ka era kaya oya, ‘Na cava sa na nomu ikau ena gauna ni nomu veiliutaki?’ Au kaya ga yani, ‘Na ikau vataga au sa rogoca ni tokaruataki ena Lotu oqo mai vei ira na peresitedi ni Lotu kei na iapositolo ena kena imuri sara au rawa ni nanuma: Bulataka vakarawarawa na kosipeli, ka ra na ciqoma ena lomadra o ira kece na cakava vakakina e dua na veivakadeitaki ni dina ena ka e bulataka.’”²

Ena imatai ni nona koniferedi raraba vaka Peresitedi ni Lotu, a cauraka o Peresitedi Hinckley e dua na kaci mera tovolea vakaukauwa taucoko na tamata mera bulataka na kosipeli.

“Oqo, kemuni na taciqu kei na ganequ, sa yaco mai na gauna meda na tucake ka cere cake vakalailai, meda rai cake ka dedeka na noda vakasama me rabailevu cake kina na veika eda vulica ka kila me baleta na itavi ni Lotu i Jisu Karisito ni Yalododonu Edaidai ena kena vakarautaki na yabaki udolu. Oqo na gauna meda kaukauwa kina. Sa gauna meda toso ki liu ka kakua ni lokuyara, ni da sa kila vinaka tiko na ibalebale, na vakaiyanaqa, kei na bibi ni noda ilesilesi. Sa gauna ni caka dodonu ka veitalia ga na veika ena qai yaco e muri. Sa gauna meda na laurai kina ni da dina tiko ena ivakaro. Sa gauna meda na dolele yani kina ena yalovinaka kei na loloma vei ira era rarawa tu kei ira era lakosese voli ena butobuto kei na yaluma. Sa gauna ni veinanumi kei na yalovinaka, meda ivakarau vinaka ka dauveivakarokorokotaki ena noda bula veimaliwai. Ena duatale na kena vosa, meda vakataka vakalevu cake sara na Karisito.”³

A tomana me vakadreta o Peresitedi Hinckley na itukutuku oqo. Tini na yabaki emuri a tokaruataka o koya na veivosa oqo ena koniferedi raraba ka salamuria ni kaya, “Sa dodonu mo ni dui vakatulewataka vakataki kemuni se sa vakaevei na yawa ni vanua eda sa lakova mai ena kena kilai ka vakataucokotaki na veisureti ka a soli ena 10 na yabaki sa oti.”⁴

Vakasasa voli o Nifai — A vakauqeti Gordon B. Hinckley gone na ivakaraitaki ni talairawarawa nei Nifai.

iVakavuvuli nei Gordon B. Hinckley,

Eda sa tamata ni veiyalayalati, ka sa levu na itavi e salavata kei na veiyalayalati oya.

Eda sa tamata ni veiyalayalati, io oya sa dua na tikina bibi sara. Ni sa vakalesui mai na cakacaka oqo ka sa tuva na Turaga na inaki e so me baleta na veivakalesuimai oya, a kaya o Koya ni dua na inaki ni veivakalesuimai oya me na rawa ni tauyavutaki tale na Nona veiyalayalati tawamudu. Na veiyalayalati oya … a caka vei Eparama kei Jiova ena gauna a cakava kina o Jiova na qaqa e dua na yalayala levu ka bibi kivei Eparama. A kaya o Koya ni nona kawa ena vaka na nuku ni matasawa, ka ra na vakalougatataki taucoko na veimatanitu ena vukuna. A cakava o Koya na veiyalayalati oqo vata kei koya, ni na nodra Kalou o Koya ka ra na Nona tamata. … E sa mai tauyavutaki kina ena gauna oya e dua na veimaliwai ka sa tawamudu na vatukana ena nodra bula tawamudu na tamata taucoko ka na curuma. Wananavu na veika e umani kina: kevaka eda cakava na ka e dodonu mera cakava na luve ni Kalou, ena noda Kalou o Koya me vakalougatataki keda, me lomani keda, me dusimaki keda, me vukei keda.

Ia, ena itabagauna oqo, na veiyalayalati tawamudu oya e sa vakadreti vakabibi tale. O keda, vakaidina, eda a cakava na veiyalayalati oya ena gauna eda a papitaiso kina. Eda a yaco me tiki ni Nona matavuvale vakalou, me vakakina. Na luvena taucoko na Kalou sa ra Nona matavuvale, ia ena dua na sala matau ka totoka e sa tiko e dua na veimaliwai vakasakiti mai vua na Kalou kei ira na gone ena Nona veiyalayalati. Na gauna eda lako mai kina ki na Lotu, … sa yaco meda tiki ni tamata ni veiyalayalati; kei na gauna yadua eda vakayagataka kina na sakaramede, e sega walega ni da cakava me vakananumi kina na solibula ni Luve ni Kalou, ka a solia na Nona bula me baleti keda yadua, ia sa tiko na ikuri ni vu ni ka meda taura kivei keda na yaca i Jisu Karisito ka yalataki keda meda muria na Nona ivunau ka yalayala o Koya kivei keda ni na vakalougatataki keda ena Nona Yalo Tabu.

Eda sa tamata ni veiyalayalati, ka sa levu na itavi e salavata kei na veiyalayalati oya. E sega ni rawa ni da tamata wale toka ga. Sa dodonu meda cadra cake mai na isosoqoni ni tamata. Sa dodonu meda tucake vakabalavu vakalailai. Sa dodonu meda vinaka vakalailai, yalovinaka vakalailai, lomasoli cake vakalailai, veidokai cake vakalailai, veinanumi cake vakalailai, ka dodoliga cake vakalailai kivei ira tale e so.⁵

Eda sa tamata ka taura kivei keda e dua na veiyalayalati bibi ka dokai ena yaca ni Turaga o Jisu Karisito. Meda sa sasaga vakaukauwa vakalailai ni muria na ivunau, meda bula me vaka e sa kerei keda kina na Turaga meda bula.⁶

soqoni ni sakaramede — “Ena veigauna yadua eda vakayagataka kina na sakaramede, … eda taura kivei keda na yaca i Jisu Karisito ka yalataki keda meda muria na Nona ivunau.”

Sa namaki keda na Turaga meda bulataka na kosipeli ena kena iwalewale kecega.

Eda bula ena dua na gauna ni veisolisoli kei na veivakadonui. Ena ituvaki eda dau sotava e veisiga, eda kila na cava e donu, ia ena veitogoraki mai vei ira na noda iliuliu kei na domodra veilawakitaki e so ka na cikevi keda, eda sa soro. Eda veisolisoli. Eda veivakadonui. Eda soro, ka da sa maduataki keda. … Sa dodonu meda vakabulabulataka na igu meda muria na noda veidinadinati.⁷

Na sala ni kosipeli sa dua na sala rawarawa. E so na gagadre ena rairai rawarawa ka tawaveiganiti kivei iko. Kakua ni vakatikitikitaki ira. Vakayalomalumalumutaki iko ka lako ena talairawarawa. Au yalataka na vatuka e so ena muri mai ena wananavu ni raici ka veivakacegui ni sotavi.⁸

Na noqu vakamamasu levu oya meda tovolea taucoko vakaukauwa vakalailai meda bulataka rawa na ivakatabutubutu ni ka vakalou e tiko vei keda. Sa rawa ni da caka vinaka cake mai na kena eda sa cakava tiko. Sa rawa ni da vinaka cake mai na kena oqo. Kevaka eda taura e matada na ivakatakarakara ni veitaukeni vakalou, ni Bulavakatama ni Kalou kei na bula vakaveitacini ni tamata me ka vakaidina, sa na rawa meda kauwai cake vakalailai, yalovinaka cake vakalailai, dodoliga cake vakalailai meda laveti ka vukei ka tokoni ira na maliwai keda. Ena lailai na noda rawai meda cuva ki na veika sa matata tu ni sega ni tautauvata [kei] keda.⁹

Na lotu o sa mai lewena e sa vitu na siga ena dua na macawa, sega ni Sigatabu walega. … E sa gauna taucoko—ruasagavulu kava na aua dua na siga, vitu na siga dua na macawa, 365 na siga dua na yabaki.¹⁰

Sa namaka na Turaga ni da na maroroya vinaka na noda bula, ni da na bulataka na kosipeli ena iwalewale kecega.¹¹

Na Kalou ena sovaraka mai na veivakalougatataki kivei ira ka talairawarawa voli ki na Nona ivunau.

A tukuna na Turaga vei Ilaija me lako ka vunitaki koya mai na uciwai ko Kirici, me na gunu ekea ena uciwai, ka me na vakani mai vei ira na reveni. E tukuna na ivolanikalou e dua na itukutuku rawarawa ka totoka me baleti Ilaija: “A sa muria ko koya na vosa i Jiova” (1 Tu. 17:5

E sega tale na veiba. E sega tale na ulubale. E sega tale na veivakaduiduitaki. O Ilaija a “muria na vosa i Jiova.” A vakabulai o koya mai na veika vakadomobula a lutuki ira na veivakalialiai, ka dauveiba ka dauvakatataro.¹²

Na italanoa taucoko ena iVola i Momani e sa italanoa ka tukuni ira na tamata ka, ni ra buladodonu voli, ni ra sokalou vei Jisu Karisito, rawaka ena vanua ka ra vutuniyau vakalevu ena veivakalougatataki ni Turaga; ia ni ra sa ivalavala ca ka lako vakatani ka guilecava na nodra Kalou, era sa sotava na vakaloloma kei na ivalu kei na leqa. Na nomu taqomaki, nomu vakacegu, nomu sautu e sa koto ena talairawarawa ki na Nona ivunau na Qaqa.¹³

“Mo muria tiko ga na noqu vunau, ia ko na rawata kina na isala ni yalododonu.“ [V&V 25:15.] Oya na yalayala ni Turaga kivei Emma Hale Smith. E sa yalayala ni Turaga kivei kemuni yadua. Na bula marau e sa koto ena muri ni ivunau. Ki na dua na Yalododonu Edaidai … sa na yaco ga na vakaloloma ena voroki ni vunau oqori. Kivei ira yadua na muria, sa tiko na yalayala ni dua na isala … ni yalododonu kei na dina tawamudu.¹⁴

Na tiko sautu dina sa koto ena talairawarawa ki na ivakasala ni Kalou. E a kainaki makawa “ni sa cina na ivakaro; ka rarama talega na vunau.” (Vakai. 6:23.)

Na kosipeli e sega ni dua na ivakavuvuli ni vakalatilati, me vaka na nodra nanuma e vuqa. E sa dua na ituvatuva ni tiko sautu e vakaraitaki bulavakaivakarau ki na lomatarotaro kei na veidusimaki ki na itovo. E sa kamikamica na vuana ka da na vagalalataki ena kena isolisoli. …

“O koya mo dou qai tudei ena lalaga sa vakalalagataki keda kina na Karisito, ka mo dou kakua ni vakataotaki tale enai vua mo dou bobula kina.” (Kal. 5:1.)

“Ia sa sereki ko koya sa tu vua na Yalo ni Turaga.” (2 Kor. 3:17.)¹⁵

Na noda taqomaki sa koto ena veivutuni. Na noda kaukauwa sa lako mai na talairawarawa ki na ivunau ni Kalou. … Meda sa duri kaukauwa ni saqata na itovo ca, ena itikotiko kei na vanua tani. Meda sa bula kilikili ena veivakalougatataki mai lomalagi, ena vakadodonutaki ni noda bula e veiganiti kaya ka rai tiko Vua, na Tamada taucoko.¹⁶

Sa sega na ka meda rerevaka. Na Kalou sa veiliutaki. O Koya ena vakatulewa ena vinaka ni cakacaka oqo. Ena sovaraka mai na veivakalougatataki o Koya kivei ira ka talairawarawa voli ki na Nona ivunau. Sa vaka tu kina na Nona yalayala. Se na Nona rawata me maroroya na yalayala oya e sega ni dua vei keda e rawa ni vakatitiqataka.¹⁷

Era dusimaka na sala na iliuliu ni Lotu ka sureti ira na lewenilotu mera bulataka na kosipeli.

Sa tiko o ira ka kaya, “Na Lotu ena sega ni vakaroti au ena iwalewale ni noqu vakasamataka na ka oqo, oya, se dua tale, se na iwalewale meu bulataka kina na noqu bula.”

Sega, au sauma, na Lotu ena sega ni vakarota e dua ga na tamata ena iwalewale ni nona vakasama se cava me na cakava. Na Lotu ena dusimaka na sala ka sureta na lewenilotu kece mera bulataka na kosipeli ka rekitaka na veivakalougatataki e lako mai na kena bulataki. Na Lotu ena sega ni vakarota e dua ga na tamata, ia ena vakasala, ena cikeva, ena vakamasuta, ka na namaka na veidokai mai vei ira ka cibitaka ni ra lewena.

Niu a se gonevuli voli ena univeseti, au a tukuna vei tamaqu ena dua na gauna niu a vakila ni ra sa butusevata na Vakaitutu Raraba na nodra dodonu ena gauna era vakadonuya kina e so na ka. A turaga vinaka ka yalomatua sara o koya. A kaya o koya, “Na Peresitedi ni Lotu e sa vakadreti keda, kau sa tokoni koya me parofita, daurairai, ka dauvakatakila kau sa navuca meu muria na nona ivakasala.”

Au sa … veiqaravi oti ena matabose raraba ni Lotu oqo ena [vuqa] na yabaki. … Au via tukuna vei iko na noqu ivakadinadina ni dina ga au a tiko vakaidina ena udolu vata na soqoni ka a veivosakitaki kina na lawatu kei na parokaramu e so ni Lotu, au a sega ni tiko ena dua ka a sega ni qarai kina na veidusimaki ni Turaga se me a tiko e dua na gagadre kivua e dua ka tiko me vakadonuya se cakava e dua na ka ena rawa ni veivakamavoataki se veivakatotogani ki na dua tale.¹⁸

Au kaya ki na dua kei na tamata taucoko ni sega ni tiko vei keimami [ka tiko ena matabose raraba ni Lotu] na ituvatuva vakatamata. Sa tiko ga vei keimami na ituvatuva ni Turaga. Sa tiko ga o ira ka veidusi ni keitou solia e dua na itukutuku ni vakasala se ivakaro. Yalovinaka ni kila na neitou vakamamasu era sega ni vu mai na dua na gagadre kocokoco. Yalovinaka ni kila na neitou ivakaro era sega ni tawayaga se tawavakainaki. Yalovinaka ni kila ni vakatulewa e so me kacivaki ena veimataqali ituvaki era a sega ni rawati ke a sega na navunavuci, veivosaki, kei na masumasu. Yalovinaka ni kila ni sa neitou sasaga duadua ga oya me keitou vukei kemuni yadua ena nomuni leqa, nomuni sasaga dredre, nomuni matavuvale, nomuni bula. … Sa sega na gagadre me vakatavulici e duatani na ka mai na ka ena vakatavulica na Turaga. …

Sa noda na itavi ka a dusimaka o Isikeli: “Koi iko na luve ni tamata, kau sa lesi iko mo nodrai vakatawa na mataqali i Isireli: ia mo rogoca na vosa ni gusuqu, ka vakasalataki ira mai vei au,” (Isi. 3:17.)

E sega na noda gagadre kocokoco ena ka oqo, ia ena vakanuinui ga ni ra na bula marau na tacida kei na ganeda, ni na kune ena nodra itikotiko na vakacegu kei na veilomani, ni ra na vakalougatataki mai na kaukauwa nei Koya na Qaqa ena nodra veimataqali itavi ena buladodonu.¹⁹

E sa dau vakatakila tu ga na Kalou, ena nona sala, na lomana me baleti ira na nona tamata. Au vakadinadinataka vei kemuni ni ra na sega ni kerei keda na iliuliu ni lotu oqo meda cakava e dua na ka eda sega ni rawa ni qarava mai na veivuke ni Turaga. Eda na rairai vakila ni da sega ni veiraurau. Eda na rairai sega ni vinakata na ka e tukuni vei keda meda cakava se veidonui vata kei na noda nanuma. Ia ke da na tovolea ena vakabauta kei na masumasu kei na navunavuci, sa rawa ni da vakataucokotaka.

Au vakadinadinataka vei kemuni na nodra bulamarau na Yalododonu Edaidai, na bula vakacegu ni Yalododonu Edaidai, na toso ki liu ni Yalododonu Edaidai, na bula sautu ni Yalododonu Edaidai, kei na nodra vakabulai kei na bula vakalou tawamudu na tamata oqo e sa koto ga ena talairawarawa ki na ivakasala ni matabete ni Kalou.²⁰

Na veivakatulewa lalai sa rawa ni muataki ki na veivatuka lelevu.

Au sa rawa ni vakamacalataka e dua na ivakavuvuli … ka, ke muri, ena vakuria vakalevu sara na kena kilai ni na donu na noda vakatulewa, ka kena itinitini ena vakalevutaki sara vakaoti na noda rawaka kei na bula marau. Na ivakavuvuli levu oqo na maroroya na vakabauta. …

Au sega ni rawa ni tukuna vei iko vakamatailalai na iwalewale mo navuca kina na ka kecega. Ia au yalataka ni kevaka ko ni na cakava na nomuni vakatulewa me veiraurau ki na ivakatagedegede ni kosipeli kei na ivakavuvuli ni Lotu, ka ni na maroroya na vakabauta, ena vakavuana na nomuni bula ni vinaka levu ka na kila e levu me baleta na bula marau kei na veivakataucokotaki.²¹

Vuqa na yabaki sa oti au a cakacaka ena dua na sala ni sitimanivanua. … Oya na gauna era voleka ni vodo taucoko kina ena sitimanivanua kau pasidia na tamata taucoko. Dua na mataka au a ciqoma e dua na qiri mai vua na kequ isa e Newark, New Jersey. A kaya o koya, “Sa yaco mai na sitimanivanua naba ka, ia e sega tu na kena qiqi ni iyaya. Dua na vanua, sa ra vakayalia kina e 300 na pasidia na nodra iyaya, ka ra sa cudru vakalevu.”

Au a cakacaka kusarawa ni vakasaqara yani na vanua era rairai gole kina. Au kila rawa ni ra a vakavodoki vinaka ka vakarautaki vinaka e Oakland, California. E a tosoi mai ki na neitou sala ni qiqi e Salt Lake City [ka mani yaco sara e] St. Louis. E tiko ekea me qaravi mai na dua tale na sala ni qiqi ka na kauta ki Newark, New Jersey. Ia e dua na turaga yalowai dauveisautaki sala ni qiqi ena volau e St. Louis a tosoya e dua na tiki ni sitila ena tolu walega na idi [7.5 na senitimita], e dua na itoqa ni siwiji, qai dreta na liva me tawasea na qiqi. Keitou a dikeva ni dua na qiqi ni iyaya ka nei Newark, New Jersey, a tiko vakaidina mai New Orleans, Louisiana—1,500 na maile [2,400 na kilomita] mai na vanua e dodonu me yaco kina. Na tosoi walega ni tolu na idi ni siwiji ena volau e St. Louis mai na dua na tamata cakacaka vakawelewele a tekivuna na kena gole cala, kei na yawa ni vanua mai na kena iyacoyaco dina a vakalevutaki vakasauri. Oya na sala sa vaka tu kina na noda bula. Ni tu ga na kosi matata meda muria, eda sa dreti mai na so na vakasama cala ki na dua tale na mua. Na toso tani mai na noda iyacoyaco taumada ena rairai ka lailai dina, ia, ke tomani, sa yaco na toso lailai oya me dua na tawase levu ka da kunei keda ni da sa yawa kalia sara mai na vanua eda a nakinaki meda lakova. … Sa ikoya na ka lalai era toso tiko kina na veika bula e vakavuna na duidui levu ena noda bula.²²

Au a torova e dua na matamata levu ni teitei ena dua na siga. Au laveta cake na ivakatao ka dolava na matamata Na yavala ni kedra idi a lailai sara me rawa ni tawavakilai. Ia na yasana kadua ni matamata a cawiri ena dua na [veimama ni wirini] levu ka tinikaono na fiti na kena levu. Ni raici voli na nodra yavala ga na idi, eda na sega ni kinoca rawa na cakacaka vakaitamera a vakayacori me rawati kina na yavala lailai oya.

Sa vaka tu kina ena veivakatulewa ki na noda bula. E so na vakasama lailai, so na vosa lailai, so na cakacaka lailai sa rawa ni muataki ki na veivatuka lelevu.²³

dolava na matamata kaukamea — A vakatauvatana o Peresitedi Hinckley na noda vakatulewa e so ki na idi ena dua na matamata ni teitei.

Mai na bulataki ni kosipeli, eda vaqaqacotaka na Lotu ka vukea na cakacaka ni Kalou me tubu e vuravura taucoko.

Sa rawa ni o vaqaqacotaka cake [na Lotu] mai na itovo o bulataka voli. Laiva na kosipeli me nomu iselewau ka nomu isasabai. …

… Sa na vakasakiti dina na gauna mai muri ni sa tavoca na Qaqa na Nona cakacaka lagilagi, tarai voli vakadua taucoko o ira ka na vakadonuya ka bulataka na Nona kosipeli.²⁴

Au raica e dua na vunilagi totoka ena dua na vuravura tawamacala sara. Kevaka eda na taura matua na veika e yaga vei keda, kevaka eda na taracake na ka eda taukena, kevaka eda na talairawarawa kivua na Turaga, kevaka eda na bulataka ga na kosipeli, eda na vakalougatataki ena dua na sala vakasakiti ka totoka. Eda na raici tu vaka e dua na mata tamata sa taukena na Kalou ka sa kunea na idola ki na dua na bula marau taukeni.²⁵

Me saga na turaga kei na marama kei na gone me cakava vakavinaka cake na cakacaka ni Turaga ka vakaukauwa cake ka vakalevu cake mai na kena a vaka tu kina eliu. Sa ikoya na maqosa ni noda bula ka vakavuna na duidui. Sa ikoya na noda navunavuci meda bulataka na kosipeli i Jisu Karisito ka vakavuna na duidui. Oqo e sa dua na ka matata vakaikoya. Kevaka eda masu taucoko, sa na kaukauwa cake na Lotu. Ka sa vakakina ena ivakavuvuli taucoko ni kosipeli. Meda sa mai tiki ni sasaga ni toso ki liu levu oqo ka sa tubu tiko e vuravura taucoko. E sega ni rawa ni da tu vakadua, sa dodonu meda toso ki liu. E sa ka bibi sara meda cakava vakakina. Na noda veidinadinati ka tiko vakayadua ena vunilomada e sa kaukauwa vakaidina ni Lotu. Ni sega, sa lailai sara na ka e tiko vei keda; ni tiko, ka kece sa tiko vei keda.²⁶

Au sureti kemuni kece, ena vanua cavaga o ni lewe voli kina ni Lotu oqo, mo ni tucake ka toso ki liu ena nomuni lagasere voli ena vunilomamuni, bulataka voli na kosipeli, lomana voli na Turaga, ka taracake voli na matanitu. Eda na tu vakatagane vata ka maroroya na vakabauta, na Qaqa sa noda vu ni kaukauwa.²⁷

Vakatutu ni Vuli kei na Veivakavulici

Taro

Cava na vuna me vaka ni da tamata ni veiyalayalati ni Turaga, “sega ni rawa ni tamata wale tu ga kina”? Raica na iwasewase e 1. Na cava e so na sala e sa vakayarayarataka kina na nomu bula ena veisiga na veiyalayalati o sa cakava vata kei na Kalou?
A vakatavulica o Peresitedi Hinckley ni “sa dodonu meda vakabulabulataka na igu meda muria na noda veidinadinati” (iwasewase e 2). Eda dau veisolisolitaka vakacava ena so na gauna na noda veidinadinati? E rawa vakacava ni da vaqaqacotaki keda meda vorata na veitemaki?
Na ivakavuvuli cava soti ena vukei keda kina na italanoa a tukuna o Peresitedi Hinckley me baleti Ilaija? (Raica na iwasewase e 3) O na sausaumi vakacava kivua e dua ka vakila voli ni ra sa rui veitarovi na ivunau. O sa raica vakacava na kena kauta mai na bula sautu, tiko taqomaki, kei na vakacegu na talairawarawa ki na ivunau?
Raicalesu na ivakamacala nei Peresitedi Hinckley me baleta na iwalewale era dau soli vakasala kei na ivakaro kina na iliuliu ni Lotu (raica na iwasewase e 4). O sa bau vakalougatataki vakacava ena muri ni nodra ivakasala na iliuliu ni Lotu?
Na cava eda rawa ni vulica mai na italanoa nei Peresitedi Hinckley me baleta na qiqi ni iyaya yali? (Raica na iwasewase e 5.) Cava na vuna era vakalevutaka kina na duidui ena noda bula na vakatulewa se cakacaka lalai e so? Na cava beka e dua na vakatulewa lailai ka vakayacora e dua na duidui levu ena nomu bula? Eda na kila rawa cake vakacava na jaiva lalai ka rawa ni muataki keda tani mai na salatu ni Kalou?
E rawa vakacava ni vukei keda na bulataki ni kosipeli meda veiyaloni kei na veika tawamacala ni vuravura? (Raica na iwasewase e 6) E rawa vakacava ni vakarawarawataka na noda bula na bulataki ni kosipeli? Navuca na iwalewale o rawa ni vaqaqacotaka vakalevu cake kina na Lotu ka vukea na tubu ni cakacaka ni Kalou e vuravura taucoko.

iVolanikalou Veisemati

Nai Vakarua 4:39–40; Iperiu 5:8–9; V&V 64:33–34; 93:26–28; 98:22; Eparaama 3:24–26; Yavu ni Vakabauta 1:3

Veivuke ena Vuli

“Na wilika, vulica, ka tugana e sega ni tautauvata. Eda na wilika ka kunea beka e so na vakasama. Eda na vulica ka kunea na iwalewale kei na veisemati tiko ni ivolanikalou. Ia ni da tugana, eda sa sureta tiko na ivakatakila mai vua na Yalotabu. Vei au, na tugana, sa ikoya na kena vakasamataki kei na masu ni oti na noqu wilika ka vulica vakavuku sara na ivolanikalou” (Henry B. Eyring, “Veiqaravi ena Yalotabu,” Ensign se Liaona, Nove. 2010, 60).