Wase 19

Veiliutaki ni Matabete ena Lotu i Jisu Karisito

“E yadrava toka mai na Turaga na cakacaka oqo. Oqo na Nona Matanitu. O keda eda sega ni vaka na sipi sega na kena ivakatawa. O keda eda sega ni vaka e dua na mataivalu sega na kena iliuliu.”

Na Bula nei Gordon B. Hinckley

E nanuma lesu o Peresitedi Gordon B. Hinckley: Na imatai ni noqu itavi ena Lotu, na imatai ni itutu au taura, au daunivakasala vua na cauravou e vakatulewataka na neitou kuoramu ni dikoni. A kacivi au mai na noqu bisopi vinaka ka veivosaki vata kei au me baleta na ilesilesi oqo. Sa dua na ka na kena vakauqeti au. Au a lomaleqa ka kauwai. O au, ni na vakabauta se sega, e dua na gonetagane mamadua ka dau via toka ga vakataki au, kau vakabauta ni kaci ni veiqaravi oqo vakadaunivakasala ena kuoramu ni dikoni au a kauwaitaki sara vakalevu, ena vuku ni noqu yabaki kei na noqu kila, me vaka na noqu itavi ena gauna oqo ena vuku ni noqu yabaki kei na noqu kila.”¹

A tu vei Peresitedi Hinckley na mataqali vakanananu vata oya ena 1961, ena nona kacivi me veiqaravi vakalewe ni Kuoramu ni iApositolo Le Tinikarua. Ena imatai ni nona vosa vaka-iApositolo, a kaya kina:

“Au vakabauta niu vakila eso na bibi ni icolacola oqo meu vakadinadinataka na Turaga o Jisu Karisito ki na dua na vuravura ka lomalomaruataka tu nona ciqomi koya. ‘Loloma i Jisu au na dauqoroya tu.’ E vakayalomalumalumutaki au na dei ni yalona na Parofita ni Turaga ena vukuqu, kei na nodra ivakaraitaki ni loloma na taciqu iliuliu oqo. … Au masuta na kaukauwa; au masuta na veivuke; kau masuta na vakabauta kei na yalo meu talairawarawa.”²

Ena 1 ni Epereli, 1995, a vosa o Peresitedi Hinckley ena soqoni ni matabete ni koniferedi raraba ni ra se qai tokoni koya oti ena imatai ni gauna na lewe ni Lotu me nodra parofita ka Peresitedi. Ena 14 na yabaki sa oti, a veiqaravi o koya vakadaunivakasala vei iratou e tolu na Peresitedi ni Lotu. Sa dau vakadinadinataka vakalevu o koya na nodratou ilesilesi vakalou ka vakauqeti ira na Yalododonu Edaidai me ra muria na nodratou ivakasala. Oqo, ni sa mai tu ena itutu oya, e sega ni sa kataremoremo mai na nona dau vakararavi vua na Turaga me tekivu mai na gauna se dikoni kina se dua na iApositolo vou. Ia, sa yaco me kila vakalevu cake na nona gadreva na igu veitokoni ni Turaga. A kaya o koya:

Na nomuni laveliga ena soqoni bibi ena mataka oqo sa ivakaraitaki ni nomuni lomasoli kei na gagadre mo ni tokoni keitou, na nomuni itokani iliuliu ka dauveiqaravi, kei na nomuni yalodei, vakabauta, kei na masu. Sa titobu kina na noqu vakavinavinaka ena ivakaraitaki oya. Au vakavinavinaka vei kemuni, o kemuni yadua. Au vakadeitaka vei kemuni, me vaka ko ni sa kila tiko, ena ivakarau ni Turaga, e sega ni dau caka na vaqara itutu. Me vaka e kaya na Turaga vei ira na Nona tisaipeli, “Dou sa sega ni digitaki au, ia kau sa digitaki kemudou, ka lesi kemudou” (Joni 15:16). Na itutu oqo e sega ni da vaqara. Na dodonu ni kena digitaki e tu ga vua na Turaga. Sai koya e lewa na bula kei na mate. Na Nona na kaukauwa ni veivauci. Na Nona na kaukauwa me kauta tani tale. Na Nona na kaukauwa me maroroya. E tu kece ga e ligana.

“Au sega ni kila se cava na vuna, ena Nona ituvatuva cecere, me dua vakataki au e bau dua tu kina na nona tikina. Ia ni sa yaco mai vei au na itavi oqo, au sa vakatabuya tale na igu se na gauna se taledi se na bula cava ga e tu vei au ki na nona cakacaka na noqu iVakavuvuli ena nodra qaravi na taciqu kei na ganequ. Vakadua tale, au vakavinavinaka vei kemuni … ena nomuni vakaitavi nikua. Na icolacola ni noqu masu sai koya meu kilikili. Au nuitaka meu na nanumi ena nomuni masu.”³

Na Mataveiliutaki Taumada, 1995 O Peresitedi Gordon B. Hinckley *(lomadonu);* Peresitedi Thomas S. Monson, iMatai ni Daunivakasala *(imawi);* kei Peresitedi James E. Faust, iKarua ni Daunivakasala *(imatau).*

iVakavuvuli nei Gordon B. Hinckley,

E kacivi ira yadua na Peresitedi ni Lotu na Turaga ni oti na nona vakatovolei ira, vakasavasavataki ira, ka vanisitaki ira.

Au sa cakacaka oti kei ira na Peresitedi ni Lotu mai vei Peresitedi Heber J. Grant ka lako mai. … Au sa kilai ira na nodra daunivakasala kece na turaga oqo, kau sa kilai ira na Matabose ni Le Tinikarua ena veiyabaki ni nodra veiliutaki na Peresitedi oqo. O ira kece na turaga qo era tamata. E dui tu na nodra itovo vakatamata ka rairai so talega na nodra malumalumu vakatamata. Ia ena dela ni veika kece oqori, sa yaco oti ena nodra dui bula yadua na veivakatakilai qaqa ni veivakauqeti ni Kalou. O ira era sa Peresitedi era sa parofita ena ivakarau kadina taucoko sara. Au sa vakadinadinataka vakataki au na yalo ni ivakatakila ni yaco mai vei ira. O ira yadua na turaga oqo era lako mai ki na Mataveiliutaki ni oti e vicavata na yabaki ena nodra lewena tu mai na Matabose ni Le Tinikarua kei na veitutu tale eso. E vakasavasavataki ira ka vanisitaki ira yadua na Turaga, laiva me ra kila na yalolailai kei na druka, laiva me ra kila na tauvimate ka so na gauna na yaluma levu. Na veika kece oqo sa yaco me dua na iwalewale cecere ni veivakasavasavataki, ka yaco me vakaimawe tu ena nodra bula na revurevu ni iwalewale oqori.

Kemuni na noqu itokani lomani ena kosipeli, oqo na cakacaka ni Kalou. Oqo na nona Lotu ka nona Lotu talega na Luvena Daulomani ka toka kina na yacana. Ena sega ni laiva na Kalou me tu e uluna e dua na dau vakamatavulo. Ena kacivi ira na nona parofita o koya, ka na vakauqeti ira ka dusimaki ira.⁴

Eso era vakaraitaka na nodra kauwai ni dau Peresitedi tu ga ni Lotu e dua na kena turaga, kau kaya kina, “sa dua na veivakalougatataki levu!” … E sega ni gadrevi me tamata gone. Sa dau kitaka ka na tomana tikoga me ra lako e veiyasai vuravura na tamata gone ena cakacaka ni veiqaravi. Sai koya na bete levu vakatulewa, ka taura tu na idola kece sara ni matabete tabu ka domo ni ivakatakila mai vua na Kalou vei ira na nona tamata. …

Ena noqu vakasama e koto kina e dua na ka veivakadeitaki ena noda kila ni na … noda Parofita o koya sa vakaivakarautaki ka vakavulici, vakatovolei ka temaki, na nona yalodina ki na cakacaka kei na nona doka na inaki sa vaqaqacotaki mai na veiqaravi, sa matua na nona vakabauta, kei na nona voleka vua na Kalou sa vakabulabulataki tiko mai ena loma ni vica vata na yabaki.⁵

Au vosa … ka vakavinavinakataka ni dua na parofita me dusimaki keda ena itabagauna e muri oqo. Au kerea me da yalodina vua sa kaciva na Turaga ka lumuta. Au kerea me da tudei ena noda tokoni koya ka vakarorogo ki na nona ivakavuvuli. Au sa kaya oti … ni kevaka e dua na noda parofita, sa tu vei keda na ka kecega. Kevaka e sega na noda parofita, sa sega ni dua na ka e tu vei keda. E dua tiko na noda parofita. Sa tu mai na noda parofita mai na ivakatekivu ni Lotu oqo. Ena sega vakadua ni sega na noda parofita kevaka eda bula kilikili kaya tiko e dua na parofita.

E yadrava toka mai na Turaga na cakacaka oqo. Oqo na Nona Matanitu. O keda eda sega ni vaka na sipi sega na kena ivakatawa. O keda e sega ni vaka e dua na mataivalu ka sega na kena iliuliu.⁶

Ni sa mate e dua na Peresitedi ni Lotu, sa yaco me Peresitedi o koya na iApositolo dede duadua.

Na kena vagolei na lewa [vua e dua na Peresitedi vou ni Lotu], kau sa vakaitavi kina ena vica na gauna, e totoka na kena rawarawa. E ivakaraitaki ni ivakarau e dau cakacaka kina na Turaga. Ena ruku ni nona iwalewale sa digitaki kina e dua na tamata mai vua na parofita me lewe ni Matabose ni Le Tinikarua na iApositolo. A sega ni digitaka o koya oqo me nona sala vakacakacaka oqo. E kacivi o koya, me vakataki ira na iApositolo ena gauna nei Jisu, ka kaya vei iratou na Turaga, “Dou sa sega ni digitaki au, ia kau sa digitaki kemudou, ka lesi kemudou.” (Joni 15:16.) Sa toso na veiyabaki. Sa vakavulici ka vakaivakarautaki ko koya ena itavi ni nona itutu. Sa lakovi vuravura taucoko ena kena qaravi na nona ilesilesi vakaiapositolo. E dua na ilakolako balavu ni vakavakarau, sa yaco me kilai ira kina na Yalododonu ena veivanua era tu kina, ka ra yaco me kilai koya. Sa vakatovolea na Turaga na yalodra kei na kedra ituvaki. Ni yaco na veika e dodonu ga me yaco, sa lala eso na itutu ena matabose oya ka yaco na ilesilesi vou. Ena iwalewale oqo sa yaco me iApositolo dede duadua e dua. A toka galugalu vua, kei ira na nona itokani Veitacini iliuliu, ka a soli vei ira yadua ena nodra tabaki, na idola taucoko sara ni matabete. Ia na dodonu me vakayagataki na idola kece sara oqori e nona duadua ga na Peresitedi ni Lotu. Ni sa takali [na parofita], sa yaco me cakacaka na lewa oya vua na iApositolo dede duadua, o koya sa na kacivi, vakatikori, ka tabaki me parofita mai vei ira na nona itokani ena Matabose ni Le Tinikarua.

Ena sega na sasaga me caka na veidigidigi. Ena sega na vunau ni vaqara digidigi. Ena yaco ga na iwalewale rawarawa malua ni dua na ituvatuva vakalou ka vakarautaka na veiliutaki vakauqeti ka vakatovolei.

O au e dua na ivakadinadina bula, e dua na ivakadinadina bula vakataki au, ni iwalewale vakasakiti oqo. Au wasea vei kemuni na noqu ivakadinadina ni [digitaka na parofita] o koya na Turaga.⁷

Ni sa takali o Peresitedi [Howard W.] Hunter, sa bokoci na Mataveiliutaki Taumada. Keirau sa lesu tale kei Baraca Monson ki na neirau idabedabe ena Kuoramu ni Le Tinikarua, sa yaco oqori me dodonu ni vakatulewa ena Lotu.

… Era sa soqoni vata o ira kece na iApositolo tabaki era bula tiko ena lolo kei na masumasu ena rumu e cake ni valetabu. E keri keimami lagata vata e dua na serenilotu bibi ka masu vata. Keimami vakaivotavota ena sakaramede ni ivakayakavi ni Turaga, ka vakavouya na neimami veiyalayalati kei na neimami veiwekani vata kei Koya na neimami Dauveisereki vakalou ena ivakadinadina ivakatakarakara tabu oya.

Sa qai tauyavutaki tale na mataveiliutaki, ena kena muri e dua na ivakarau sa tauyavutaki tu vakavinaka mai na veitabagauna sa oti.

A sega ni dua na vunau ni vaqara digidigi, sega na veisisivi, sega na sagai ni itutu. E malumu, sautu, rawarawa, ka bibi. A vakayacori ena ivakarau a tura sara ga vakataki Koya na Turaga.⁸

Sa vakarautaka tu na Turaga na ivakavuvuli kei na ivakarau me baleta na kena liutaki na Nona Lotu kevaka sa sega ni rawa ni taucoko na nona veiqaravi na Peresitedi.

A cavuta na veimalanivosa oqo ena 1992 o Peresitedi Hinckley ni veiqaravi tiko vaka-iMatai ni Daunivakasala ena Mataveiliutaki Taumada: Na ulu ni Lotu na Turaga o Jisu Karisito. Oqo na Nona Lotu. Ia na uluna e vuravura na noda parofita. O ira na parofita sai ira na turaga era sa vakalougatataki ena dua na veikacivi vakalou. E dina ni vakalou na nodra veikacivi, era tamata ga. Era na rawa ni vesuki talega ena leqaleqa ni bula oqo.

Eda lomana ka rokova ka doka ka raica cake na parofita nikua, o Peresitedi Ezra Taft Benson. O koya e dua na iliuliu cecere ka levu nona taledi, e dua na turaga sa voqa yani na domona ena kena vakadinadinataki na cakacaka oqo ki vuravura raraba. E tu vua na idola kece sara ni matabete ena vuravura nikua. Ia sa yacova mai o koya e dua na yabaki ni bula sa sega kina ni rawa ni cakava e vuqa na ka a dau cakava rawa. Oqori ena sega ni vakalailaitaka nona veikacivi vakaparofita. Ia sa na vakaiyalayala beka kina na cakacaka vakayago.⁹

A cavuta na veimalanivosa oqo ena 1994 o Peresitedi Hinckley ni veiqaravi voli vaka-iMatai ni Daunivakasala ena Mataveiliutaki Taumada: Era lomatarotaro voli na tamata ena Lotu raraba ena nodra via kila na nona ituvaki ni bula na Peresitedi. Sa yabaki 95 ena gauna oqo o Peresitedi Benson. … Sa bikai vakalevu ena vuku ni yabaki ni bula kei na tauvimate ka sa sega kina ni rawa ni taucoko nona qarava na itavi bibi eso ni nona itutu tabu. Oqo e sega ni se qai yaco vakadua. Eso tale na Peresitedi ni Lotu era a tauvimate talega se sa sega ni rawa ni taucoko nodra veiqaravi ena iotioti ni veivula se yabaki ni nodra bula. E rawa ni na dau yaco tale ena veigauna e muri.

“Na ivakavuvuli kei na ivakarau sa biuta tu na Turaga me qaravi kina na Nona lotu e vakarautaka na veika e baleta na ituvaki cava ga. Sa ka bibi kina … me kakua kina na lomatarotaro se lomaleqa me baleta na qaravi ni Lotu kei na vakayacori ni isolisoli vakaparofita, oka kina na dodonu me vakauqeti vakayalo kei na ivakatakila me liutaki kina na cakacaka kei na parokaramu ni Lotu, na gauna ena tauvimate kina o Peresitedi se sega ni veiqaravi rawa vakataucoko.

“Na Mataveiliutaki Taumada kei na Matabose ni iApositolo Le Tinikarua, e ra sa kacivi ka tabaki mera taura na idola ni matabete, soli vei ira na lewa kei na ilesilesi mera qarava na Lotu, mera qarava na cakacaka tabu vakalotu, mera kaburaka na kena ivunau, ka tauyavutaka ka tutaka tiko na kena itovo.” Na turaga yadua e tabaki me iApositolo ka vakatikori me lewena na Kuoramu ni Le Tinikarua sa tokoni me parofita, daurairai, ka dauvakatakila. Me vakataki ira era sa liu vua, o Peresitedi Benson a iApositolo dede duadua tiko ena gauna a kacivi kina me Peresitedi ni Lotu. Erau tauri mai na Matabose ni Le Tinikarua na nona Daunivakasala. O koya gona, o ira kece na lewe ni Kuoramu ni Mataveiliutaki Taumada kei na Matabose ni Le Tinikarua era sa ciqoma oti na idola, dodonu, kei na lewa me baleta na itutu vakaiapositolo tabu.

Au na cavuvosa mai na Vunau kei na Veiyalayalati:

“Eratou na digitaki mai na Matabete vaka-Melikiseteki, e tolu na bete levu me ratou iliuliu levu, io era na digitaki iratou ko ira na lewe ni matabete, ka ratou lesi ki na itutu cecere ko ya, ia eratou na qai tokoni ena nodra veivakabauti, nodra yalodina kei na nodra masumasu na lewe ni lotu, raica eratou sa lewe ni kuoramu ni iLiuliu Levu ni Lotu” (V&V 107:22).

“Ni tauvimate o Peresitedi se sega ni rawa ni taucoko nona qarava na nona itavi kece ni ilesilesi, oi rau na nona Daunivakasala rau sa na Kuoramu ni Mataveiliutaki Taumada. Rau na vakayacora na cakacaka ni Mataveiliutaki ena veisiga yadua. Ena so tale na gauna, ni dua ga e rawa ni veiqaravi, e rawa ni veiqaravi ena lewa ni itutu ni Mataveiliutaki me vaka sa tuvai koto ena Vunau kei na Veiyalayalati, wase 102, tikina 10--11. …

… Erau sa na tomana tiko na Daunivakasala ena Mataveiliutaki Taumada na cakacaka e dau vakayacori ena itutu oqo. “… Ia ke dua na taro bibi baleta na lawatu, ivakarau, parokaramu, se vunau era na masulaka na Mataveiliutaki Taumada vata kei na Le Tinikarua.” Oi rau na kuoramu e rua oqo, na Kuoramu ni Mataveiliutaki Taumada kei na Kuoramu ni Le Tinikarua, ni ra sota vata, ni ra galala tu vakadua me ra vakaraitaka na lomadra, era na vakadeuca na veitaro bibi kece.

Ia meu cavuvosa tale mada mai na vosa ni Turaga: “Ia na lewa kece e tau mai na dua vei rau na kuoramu oqo, e dodonu me ra domovata kece na lewena; io me ra vakadonuya kece na lewe ni kuoramu yadua na lewa e tau mai kina, me rawa ni tautauvata kina na kaukauwa kei na mana ni nodra lewa” (V&V 107:27). …

… Me ra kila na tamata kecega ni o Jisu Karisito e tu ena ulu ni lotu oqo ka vakayacani ena Yacana tabu. E yadrava toka mai o koya. Esa tubera tiko o Koya. Ni tu ena liga imatau i Tamana, sa dusimaka tiko mai o Koya na cakacaka oqo. Sa nona dodonu, kaukauwa, ka nona digidigi me kaciva na tamata ena Nona sala ki na veitutu cecere bibi ka vagalalataki ira me vaka na Nona lewa ena Nona kacivi ira lesu ki vale. Sai koya e lewa na bula kei na mate. Au sega ni leqataka na ituvaki eda dui kunei keda kina. Au ciqoma na veituvaki oqori me ivakaraitaki ni Lomana. Au ciqoma vakakina na itavi, cakacaka vata kei ira na Taciqu iLiuliu, me caka na ka kece keimami rawata me toso ki liu na cakacaka savasava oqo ena yalo ni sorovaki ka, loloma, yalomalumalumu, itavi, kei na yalodina.¹⁰

O iratou na Tinikarua na iApositolo eratou ivakadinadina digitaki kei Karisito e vuravura raraba.

Ni ra sa tabaki oti ki na itutu vakaiapositolo ka … vakatikori me lewe ni Matabose ni Le Tinikarua, sa namaki vei ira na [iApositolo] me ra soli ira vakatabakidua ki na cakacaka ni veiqaravi. Era … vakaliuca ena nodra bula, me liu mai na veika kece tale, na itavi me ra tu ka ivakadinadina digitaki i Jisu Karisito ki vuravura taucoko. …

Me vakataki keda kece, era tamata ga. E dui tu na nodra qaqa kei na nodra malumalumu. Ia mai na gauna oya ka lako yani, ena vo taucoko ni nodra bula, ni ra sa yalodina tikoga, na nodra kauwai levu duadua sa dodonu me baleta na kena tosoi ki liu na cakacaka ni Kalou e vuravura. Sa dodonu me ra kauwai ena nodra tiko vinaka na Luvei Tamada, ruarua o ira era tiko ena loma ni Lotu kei ira ena taudaku ni Lotu. Me ra cakava na veika kece era rawata me ra vakacegui ira era sa tagi, me soli na kaukauwa vei ira na malumalumu, me ra vakayaloqaqataki na wamalai, me ra vakaitokanitaki na sega nodra itokani, me ra vukei na dravudravua, me ra vakalougatataki na tauvimate, me vakadinadinataki, sega mai na ka ga era vakabauta ia mai na nodra kila deivaki na Luve ni Kalou, nodra iTokani ka iVakavuvuli, na nona italai o ira. …

… Au vakadinadinataka na nodra veitacini, na nodra yalodina, nodra vakabauta, nodra gumatua, kei na nodra veiqaravi vakaiyanaqa ena kena tosoi na matanitu ni Kalou.¹¹

Na Kuoramu ni iApositolo Le Tinikarua, 1965. *Dabe mai na mawi kina imatau:* Ezra Taft Benson, Mark E. Petersen (ena idabedabe vakaligana), Joseph Fielding Smith (peresitedi ni kuoramu), kei LeGrand Richards. *Tucake mai na mawi kina imatau:* Gordon B. Hinckley, Delbert L. Stapley, Thomas S. Monson, Spencer W. Kimball, Harold B. Lee, Marion G. Romney, Richard L. Evans, kei Howard W. Hunter.

Era dau vaqara na Mataveiliutaki Taumada kei na Le Tinikarua na ivakatakila kei na yalovata ni se bera ni ra vakatauca e dua na lewa.

Ena sega ni dua na lewa e tau mai na Mataveiliutaki Taumada kei na Kuoramu ni Le Tinikarua kevaka era se bera ni duavata kece kina o ira na lewena. Na kena ivakarau ni vakasamataki na veika eso, ena duidui beka na vakasama. Me dau namaki qori. E duidui na ituvaki ni bula era dui cavutu mai kina. O ira na turaga oqo era dau vakasama ga ena dui vukudra. Ia ni se bera ni dau vakatauci na iotioti ni lewa, sa na dau yaco mai na duavata ena vakasama kei na domo.

Me na namaki oqo ni sa muri na vosa vakatakilai mai ni Turaga [raica V&V 107:27, 30–31]. …

[Ena gauna] au veiqaravi kina me vaka e dua na lewe ni Matabose ni Le Tinikarua kei [na gauna] au sa veiqaravi oti kina ena Mataveiliutaki Taumada, se bera vakadua ni dua na vakatulewa levu e tau me sega ni muri kina na ivakarau oqo. … Mai na iwalewale sara ga oqo ni nodra dui tukuna mai na lomadra na tamata sa dau tauvuloni ka uvuraki kina na vakasama kei na ivakavuvuli eso. Ia au se bera vakadua ni bau raica me dua na duidui levu se veimecaki yadua vei ira na Taciqu iLiuliu. Ia au sa raica ga e dua na ka totoka ka vakasakiti—nodra vakasotari vata mai, ena kaukauwa ni veidusimaki ni Yalo Tabu kei na mana ni ivakatakila, na duidui ni rai me yacova ni ra sa duavata kece ka vakadonuya vata. …

Au sega mada ni bau kila tale e dua na mataqali veiliutaki e rawa ni tukuni kina na veika oqo.¹²

E kacivi e dua na peresitedi ni iteki ena veivakauqeti me veiqaravi vakadauvakasala vei ira na bisopi kei na dua na iliuliu vei ira na tamata.

Na peresitedi ni iteki sai koya na vakaitutu e kacivi me tu ena kedra maliwa na bisopi ni veitabanalevu kei na Vakaitutu Raraba ni Lotu. Oqo e dua na ilesilesi bibi sara. Ena tuberi mai vei ira na Vakaitutu Raraba, ka qai mai tuberi ira na bisopi …

Na peresitedi ni iteki e veiqaravi vakadauvakasala vei ira na bisopi. O ira kece na bisopi era kila ni gauna me walia kina e dua na leqa dredre e dua ga sa dau tuvakarau me gole kina me wasea na nona icolacola ka vakasalataki.

Sa dau vakarautaka e dua na ikarua ni ivakarau ni veitaqomaki ena kena vakatulewataki o ira era kilikili me ra lako ki na vale ni Turaga. … Sa vakakina na peresitedi na ikarua ni iloilo me vakatulewataki kina na nodra bula kilikili o ira era lako yani me ra laki matataka na Lotu ena buturara ni kaulotu. O koya talega ena vakatarogi koya e via lako, ka qai tokona ga na veivakaturi ni sa vakadonuya na kilikili ni nona bula. Sa soli talega vua na veivakadonui me vakatikori ira era kacivi ki na kaulotu ka veivagalalataki ni sa oti na nodra veiqaravi.

E bibi duadua, ni sai koya na vakaitutu cecere duadua ni veivakadodonutaki ena iteki. … E colata voli na itavi bibi sara ni kena laurai me savasava ka sega ni vakacacani na ivunau e vakavuvulitaki ena iteki. Sa nona itavi me raica me kakua ni vakavuvulitaki e dua na ivunau lasu ka kakua ni vakayacori e dua na ivalavala sega ni dodonu. Kevaka e dua na Matabete i Melikisetiki e sega ni muria nona iyatu, se dua tale na tamata, ena dua na ituvaki, me na vakasalataki koya, kevaka e tomana tikoga na tamata oqori na nona ivalavala, sa nona itavi na peresitedi me cakava kina e dua na ka. Ena tabaka na kena samani na tamata oqori me rairai mai ena dua na matabose ni veivakadodonutaki, ena vakatauci kina na lewa se me tu vakawawa mada nona dodonu vakalewenilotu se me wasei se muduki tani mai na Lotu.

Oqo e dua na itavi dredre ka sega ni taleitaki, ia me na qarava na peresitedi ka kakua ni rerevaka se veitovaki. Na ka kece oqo me vakayacori ena veidusimaki ni Yalo me vaka sa virikotori ena ika 102 ni Wase ni Vunau kei na Veiyalayalati.

Ni sa oti oya me qai cakava na veika kece e rawata me cakacaka vata ka vakalesuya mai ena kena gauna o koya a vakadodonutaki.

Na veika kece oqo kei na vuqa tale era sa nona itavi. Qai muria, ni sa dodonu me ivakaraitaki vei ira na nona tamata na nona bula. …

… Baleta ni tu vei keda na veivakabauti vakaoqori vei ira na [peresitedi ni iteki], eda sa vakauqeti ira kina na lewenilotu ena noda veivanua me ra kakua ni vaqarai ira na Vakaitututu Raraba me baleta na ivakasala kei na veivakalougatataki ena vukudra. Era a kacivi na nodra peresitedi ni iteki ena veivakauqeti vata ga era a kacivi kina na Vakaitutu Raraba.¹³

O ira na bisopi era ivakatawa ni qelenisipi.

E rawa ni tubu ka vakalevutaki na iwiliwili ena [Lotu], ena vaka dina kina. Me na kau yani na kosipeli oqo ki na veimatanitu, veimataqali, duivosavosa, kei na tamata. Ena sega ni rawa ni yaco ena veisiga ni mataka me tu vakadua se sega na tatara yani, toso ki liu, tarai cake, ka vakalevutaki ko Saioni e vuravura taucoko. Ia ena veika kece oqo sa dodonu me na dau tikoga na isema veivolekati sara ni veiwekani vakalotu ni lewenilotu yadua kei na dua na bisopi se peresitedi ni tabana yalomatua dauveikauwaitaki. Sai ira oqo na ivakatawa ni sipi ka nodra itavi me ra vakatawai ira na tamata ena iwasewase lalai me kakua ni dua e guilecavi, raibaleti, se vakawaleni. Ko Jisu na ivakatawa dina ka a dau tatara vei ira era vakaleqai tu, dua ena dua na gauna, ka solia na veivakalougatataki vei ira yadua.¹⁴

O ira na bisopi ena Lotu … era ivakatawa dina sara e Isireli ena dua na kena vakasama. Na tamata yadua [ena Lotu] era na saumitaro vua e dua na bisopi se peresitedi ni tabana. E vakaitamera na icolacola era colata, kau sureta kina na lewe yadua ni Lotu me cakava na veika kece sara e rawa ni cakava me ra laveta na icolacola era colata tiko na noda bisopi kei na peresitedi ni tabana.

E dodonu me da masulaki ira. Era gadreva na veivuke ena nodra colata na nodra icolacola bibi. E rawa ni da veitokoni vakalevu cake ka vakararavi vakalailai vei ira. E rawa ni da vukei ira ena veisala kecega eda rawata. E rawa ni da vakavinavinakataki ira ena veika era cakava vei keda. Eda na vakaocai ira sara vakalevu ena dua ga na gauna lekaleka ena icolacola eda vakacolata vei ira.

… Na [bisopi] yadua e dua na tagane sa kacivi ena yalo ni parofisai kei na ivakatakila ka vakatikori ka tabaki ena veitabaki ni liga. O ira yadua e tu vei ira na idola ni mataveiliutaki ena nona tabanalevu. O ira yadua era bete levu, na bete levu vakatulewa ni nona tabanalevu. O ira yadua era colata tu na itavi vakaitamera ni veiliutaki. Era dui tu me vaka ni ra tamadra na nona tamata.

E sega ni dua e saumi ena vuku ni nona veiqaravi. E sega ni dua na bisopi ni tabanalevu e saumi mai na Lotu ena nona cakacaka vakabisopi.

Na veika e gadrevi me baleta e dua na bisopi nikua e vaka ena gauna i Paula, ka a volavola vei Timoci [raica 1 Timoci 3:2–6]. …

Ena nona ivola vei Taito, a vakuria o Paula ni “sa dodonu me tawacala na [bisopi], me vaka sa italatala ni Kalou; …

“Me taura matua na ivakavuvuli dina sa vakatavulici kina, me rawata ko koya me vakarota na ivakavuvuli sa vinaka, ka vunauci ira talega era sa vosa vakatani” (Taito 1:7, 9).

Na veimalanivosa oqori e vakamacalataka sara vakavinaka e dua na bisopi nikua ena Lotu i Jisu Karisito ni Yalododonu Edaidai.¹⁵

Au vakauqeti ira na tamata ena Lotu, se vanua cava ga o ni tu kina, ni o ni sotava na leqa, taumada mo ni tovolea mo ni walia vakataki kemuni. Vakasamataki ira, vulica na digidigi eso era tu, masulaka, ka rai vua na Turaga mo dusimaki. Kevaka o sega ni rawa ni walia vakataki iko, qai veitalanoa vata kei na nomu bisopi se peresitedi ni tabana. O koya na tamata ni Kalou, kacivi ena lewa ni matabete tabu me ivakatawa ni qelenisipi.¹⁶

Vakatutu ni Vuli kei na Veivakavulici

Taro

Na cava na vuna eda gadreva kina na parofita bula? Na cava e vakauqeti iko me baleta na nona “iwalewale ni veivakasavasavataki” na Turaga me baleta na nona vakarautaki ka kacivi e dua na Peresitedi ni Lotu? (Raica na iwasewase e 1.)
Na cava na nomu nanuma ena nomu railesuva na ivakamacala nei Peresitedi Hinckley ena ivakarau e kacivi kina e dua na Peresitedi ni Lotu vou? (Raica na iwasewase e 2.) Na cava na vuna e bibi kina me da kila ni digitaki na Peresitedi me vaka “e dua na ituvatuva vakalou ka vakarautaki kina na veiliutaki e vakauqeti ka vakatovolei”?
Na ivakavuvuli kei na iwalewale cava sa tauyavutaka na Turaga me liutaki kina na Lotu kevaka sa sega ni rawa ni taucoko nona qarava na itavi na Peresitedi? Raica na iwasewase e 3
Era dau vakaraitaka vakacava na iApositolo ni gauna oqo na nodra kauwai ena vukudra taucoko na luvena na Kalou, “o ira era tiko ena Lotu kei ira ena taudaku ni Lotu”? Raica na iwasewase e 4. E vakaraitaki vakacava ena vosa ni veikoniferedi era se qai oti wale toka na kauwai oqo? Sa yaga vakacava vei iko na nodra ivakavuvuli na parofita kei na iapositolo?
Vulica na ivakavuvuli nei Peresitedi Hinckley me baleta na ivakarau era dau duavata rawa kina na Mataveiliutaki Taumada kei na Kuoramu ni iApositolo Le Tinikarua ena dua na lewa (raica na iwasewase 5). Na cava e rawa ni da vulica mai na ivakarau era duavata rawa kina ena dua na lewa? E rawa vakacava ni da vakayagataka na ivakavuvuli oqo ena noda matavuvale kei na Lotu?
Ni o railesuva na iwasewase 6 kei na 7, na cava o vulica rawa me baleta na veikacivi ni peresitedi ni iteki kei na bisopi? Ena rawa vakacava ni da tokoni ira vakavinaka cake na noda iliuliu?

iVolanikalou Veisemati

Efeso 2:19–20; 4:11–14; V&V 1:38; 21:1–6; Eparaama 3:22–23; Yavu ni Vakabauta1:5–6

Veivuke ena Vuli

“Solia na nomu ivakadinadina ena veigauna e vakauqeti iko kina na Yalo Tabu, me kua ni qai yaco ga ni sa tini na lesoni. Mo dau vakarautaka talega na gauna vei ira na nomu lewenikalasi mera solia kina na nodra ivakadinadina” (Na Veituberi, Me iLutua Ni Noda Bula, [1999], 45).