iVakamacala Taumada

Eratou sa tauyavutaka na soqoni ni Nodra iVakavuvuli na Peresitedi ni Lotu na Mataveiliutaki Taumada kei na Kuoramu ni iApositolo Le Tinikarua me vukei iko mo toro voleka yani vua na Tamamu Vakalomalagi ka vakatitobutaka na nomu kila vakamatata na veika me baleta na kosipeli vakalesui mai i Jisu Karisito. Ni vakaikuritaka tiko na Lotu eso tale na ivola ki na isoqoni oqo, o sa na taracake tiko e dua na ivakasokumuni ni ivoladusidusi ni kosipeli ena nomu itikotiko. Era sa vakarautaki na ivoladusidusi oqo mera vakayagataki ena vuli yadudua ka me idusidusi ena Sigatabu. Era na rawa talega ni vukei iko ena nomu vakarautaka na lesoni ni lotu vakamatavuvale, vakarautaka na lesoni se vosa tale eso, ka sauma na vakatataro me baleta na ivunau ni Lotu.

Na ivola oqo e tu kina na ivakavuvuli nei Peresitedi Gordon B. Hinckley, ka a veiqaravi vaka-Peresitedi ni Lotu i Jisu Karisito ni Yalododonu Edaidai mai na ika 12 ni Maji, 1995, ki na 27 ni Janueri, 2008.

Vuli Yadudua

Masulaka na veivakauqeti ni Yalo Tabu ni ko vulica tiko na ivakavuvuli nei Peresitedi Gordon B. Hinckley. Na taro eso ena mua ni wase yadua ena vukei iko mo vakasamataka vagumatua, kila vakamatata, ka tutaka na ivakavuvuli nei Peresitedi Hinckley. Na vakasama eso oqo ena rawa talega ni veivuke:

• Vola na vakasama kei na nanuma eso e yaco mai vei iko mai vua na Yalo Tabu ni o vuli tiko.

• Lainitaka na ruku ni veimalanivosa o vinakata mo nanuma. Navuca mo cavuqaqataka na veimalanivosa oqo se toqai ira ena nomu ivolanikalou tikiva na tikina veisemati.

• Wilika vakavica e dua na wase se malanivosa me rawa kina ni o kila vakamatata vakatitobu cake.

• Tarogi iko ena so na taro vakaoqo, “E vakalevutaka vakacava na noqu kila vakamatata na ivakavuvuli ni kosipeli na ivakavuvuli nei Peresitedi Hinckley?” se “Na cava beka e vinakata na Turaga meu vulica mai na ivakavuvuli oqo? Na cava e vinakata o Koya vei au meu cakava?”

• Tarogi iko se na vukei iko vakacava ena nomu bolebole kei na kauwai eso na ivakavuvuli ena ivola oqo.

• Wasea na veika o vulica vei ira na lewe ni matavuvale kei na itokani.

Veivakavulici mai na iVola Oqo

Na idusidusi eso oqo ena vukei iko ni ko veivakavulici mai na ivola oqo, se ena itikotiko se valenilotu.

Vakavakarau mo Veivakavulici

Vakasaqara na veidusimaki ni Yalo Tabu ni ko sa vavakarau mo veivakavulici. Vulica na wase mo yalodei kina ni kila vakamatata na ivakavuvuli nei Peresitedi Hinckley, ka digitaka ena masumasu na ivakavuvuli o nanuma ni na veivuke vakalevu.

O na gadreva beka mo vakayaloqaqataki ira o vakavulica me ra vulica na wase ka raica vakavinaka na iwasewase ni “Vakatutu ni Vuli kei na Veivakavulici” ena mua ni iwase yadua.

Vakauqeta na Veivosaki me baleta na iVakavuvuli nei Peresitedi Hinckley

Ni ko sa veivakavulici mai na ivola oqo, sureta tale eso mera wasea na nodra vakasama, vakatataro, vakadinadina, ka veivakavulici vakaiira. Ni ra sa vakaitavi rawa, era sa na vakarau vakavinaka cake mera vuli ka ciqoma na nodra ivakatakila.

Vakatara me tomani na veiwasei vinaka ka kua ni sagai me vakayacori kece na veivakavulici. Liutaka na veivosaki mo vukei ira na vakaitavi me ra wilika na ivakavuvuli nei Peresitedi Hinckley ka kunea na sala me ra bulataka kina na ivakavuvuli oqori.

Na taro eso ena itinitini ni wase yadua sa ra ivurevure yaga ki na vakavure veivosaki. E rawa talega mo taroga e so na taro ko nanuma ni ganiti ira o vakavulici ira tiko. Eso tale na vakasama ni vakavure veivosaki era toka oqo e ra:

• Kerei ira na vakaitavi mera wasea na ka era sa vulica mai na nodra vakadikeva vakaiira na wase.

• Lesia na taro digitaki eso ena mua ni wase vei ira yadudua se vakailawalawa lalai. Kerei ira na vakaitavi mera vakaraica na ivakavuvuli e tiko ena wase e semati ki na taro. Qai sureti ira me ra wasea nodra vakasama kei na rai.

• Wilika vata eso na ivakavuvuli nei Peresitedi Hinckley ena wase. Kerei ira na vakaitavi mera wasea na ivakaraitaki eso mai na ivolanikalou ka vakakina mai na veika era sa sotakaya ka semati ki na veivakavuvuli oqori.

• Kerei ira na vakaitavi mera digitaka e dua na wasewase ka wilika lo toka. Sureti ira mera sokomuni vakailawalawa yarua se tolu na tamata ka ra a digitaka na wasewase vata ga ka veivosakitaka na veika era sa vulica.

Vakayaloqaqataka na kena Tutaki kei na Veiwasei

Ena vakaibalebale sara vakalevu na ivakavuvuli nei Peresitedi Hinckley ni ra sa tutaka na tamata vakayadua ka wasea vei ira tale eso. O na rairai vinakata mo vakayagataka e dua se sivia mai na veivakasama oqo:

• Tarogi ira na vakaitavi ena iwalewale e rawa ni ra tutaka kina na ivakavuvuli nei Peresitedi Hinckley ena nodra qaravitavi e vale, ena Lotu, kei na so tale na ituvaki.

• Sureti ira na vakaitavi me ra wasea na veika era sa sotava oti ena nodra muria na ivakasala nei Peresitedi Hinckley.

• Vakayaloqaqataki ira na vakaitavi mera wasea eso na ivakavuvuli nei Peresitedi Hinckley kivei ira na lewe ni matavuvale kei na veitokani.

Tinia na Veivosaki

Vakamacalataka vakalekaleka na lesoni se kerea e dua se rua tale me cakava. Vakadinadinataka na ivakavuvuli ni sa veivosakitaka, ka vakayaloqaqataki ira na vakaitavi me ra vakayagataka na veika era sa vulica. Ko na rairai vinakata mo sureta tale eso mera wasea na nodra ivakadinadina.

iVakamacala me baleta na iVurevure ni iYaya Eso

Na ivakavuvuli eso ena ivola oqo sa ra vosacavuti vakadodonu mai na vunau kei na itukutuku volai eso nei Peresitedi Gordon B Hinckley. Na vosacavuti eso mai na ivurevure ni tabaivola e se vakayagataka tikoga na ivakatakilakila ni cegu, na tuvaidonu ni matanivola ni dua na vosa, na matanivolalevu, kei na parakaravutaki ni ivurevure taumada vakavo ke sa ganiti me caka na veisau ni veivakadodonutaki se na kena taipataki me vakavinakataka na kena wiliki. Baleta ni ra okati tu vakamareqeti na vosacavuti ki na ivurevure ni tabaivola, o na rawa ni siqema na vosa duidui lalai eso ena ivola. Me ivakaraitaki, na isosomi vakavosa e vakaibalebaletaki kivua na Kalou era matanivolalalai ena so na vosacavuti ka matanivolalelevu ena so tale.

E dau vakayagataka vakavuqa o Peresitedi Hinckley na vosa tamata, tagane, kei na matatamata me vakaibalebaletaka ki na tamata taucoko, na tagane kei na yalewa. Dau vakayagataka wasoma talega o koya na vosa o koya, nona, kei na koya me vakaibalebaletaka ki na tagane kei na yalewa. Na veivosakitaki vaqo ni vosa e dau matau ena nona gauna ni bula.