Pakagupgopan para kadagiti Nagannak ken Lider

Panggep ti Bukod a Panagdur-as

Ti Bukod a Panagdur-as dagiti Agtutubo a Babbai ket maysa a programa ti panagtun-oy a naisangrat a mangtulong kadagiti agtutubo a babbai a:

Mangpapigsa kadagiti pammaneknekda maipapan ken ni Jesucristo.
Mangpapigsa iti agpada nga agdama ken masakbayan a pamiliada.
Makapagsagana nga agbalin a maikari nga agaramid ken agtungpal kadagiti sagrado a katulagan iti templo.
Makapagsagana para kadagiti masakbayan nga akem ken pagrebbenganda.

Agtrabaho dagiti agtutubo a babbai a kaduada dagiti nagannak kadakuada, dagiti liderda iti Young Women, ken dagiti dadduma pay a pagulidanan a babbai tapno mangituding ken mangipatungpal kadagiti panggep a tun-oyen a maibatay kadagiti walo nga ik-iikkan pateg ti Young Women. Makatulong ti Bukod a Panagdur-as kadagiti nagannak ken lider a mangpasayaat iti pannakilangenda kadagiti agtutubo a babbai bayat ti panagtitinnulongda nga agtrabaho.

Dagiti Pagrebbengan dagiti Nagannak ken Lider ti Young Women

Yam-ammo ti Programa

Makipagkita dagiti lider ti Young Women ti tunggal agtutubo a babai a sumrek iti programa ti Young Women ken dagiti nagannak kenkuana. Mabalin met a dumar-ay ti maysa a miembro ti panguluen ti klase ti agtutubo a babai. Ikkan dagiti lider ti agtutubo a babai iti maysa a libro ti Bukod a Panagdur-as diurnal ti Bukod a Panagdur-as, ken ti silaw (torch) a pendant ti Young Women. Ilawlawagda kenkuana ti programa ket allukoyenda dagiti nagannak a makipagtrabahoda iti anakda a babai iti panangpili ken panangileppas kadagiti padas ken ik-ikkan pateg ti Bukod a Panagdur-as. Nasken pay nga awisen dagiti lider dagiti nagannak iti amin a naisangsangayan nga okasion a pagpartisiparan ti anakda a babai.

Ipanamnama ti Umdas a Suporta

Kasapulan ti maysa nga agtutubo a babai ti suporta ken kanayon a panangparegta iti panangileppasna iti Bukod a Panagdur-as. Aggapu daytoy kadagiti nagannak, lider, dadduma pay a nataengan, ken dadduma pay nga in-inauna nga agtutubo a babbai a nakalpasen iti Bukod a Panagdur-as. No limitado ti suporta a maited iti agtutubo a babai iti pagtaengan tapno matulongan isuna iti panangileppasna iti Bukod a Panagdur-as, mabalin a maawis ti sabali pay a kabsat a babai tapno agserbi a kas mannursuro ken mangtulong kenkuana, nga addaan pammalakad dagiti dadaulo ti priesthood. Mabalin nga anamongan daytoy a nataengan a kabsat a babai dagiti padas ken proyekto nga ik-ikkan pateg ket pirmaanna ti libro ti Bukod a Panagdur-as ti agtutubo a babai no malpas dagitoy. Mabalin pay a maawis ti sabali pay nga agtutubo a babai a nakalpasen iti Bukod a Panagdur-as tapno mangted iti tulong ken pammaregta.

Isurat ken Bigbigen ti Panagdur-as

Mangted dagiti nagannak ken lider kadagiti kanayon a gundaway para kadagiti agtutubo a babbai tapno ireportda ti panagdur-asda. No agreport a kanayon ti maysa nga agtutubo a babai, kabaelanna nga ilawlawag dagiti aramidna ket ibinglayna no ania ti nasursurona ken no kasano a napapigsa ti pammaneknekna. Bigbigen dagiti nagannak ken lider dagiti naileppasna, ipatalgedda kenkuana ti pannakaawat ken panangyaplikarna kadagiti pagbatayan ti ebanghelio, ken idiayada ti pammaregta para iti agtultuloy a panagdur-as. Dagitoy nga interaksion ti mangtulongto kenkuana a mangpadur-as kadagiti naayat a pannakilangen.

Dagiti Pagrebbengan dagiti Dadaulo ti Priesthood

No malpas ti maysa nga agtutubo a babai ti sibubukel a programa ti Bukod a Panagdur-as, kauman ti bishop isuna, nga usaren dagiti pagrukodan iti Para iti Pigsa dagiti Agtutubo a kas pangiwanwan. Ammuenna ti panagatendarna iti miting ti sakramento, ti panagpartisiparna iti seminary, ken ti panagbasana iti Libro ni Mormon. Daytoy ket mabalin a maysa a paset ti tinawen wenno tunggal innem a bulan nga interbiu. Ikeddeng ti bishop ti pannakaikari ti agtutubo a babai tapno umawat iti Pammigbig iti Agtutubo a Kinababai [Young Womanhood Recognition] ket pirmaanna ti libro ti Bukod a Panagdur-as tapno bigbigenna ti panangileppasna kadagiti naidawat a kasapulan nga aramiden. Mabalinna a yawat kenkuana ti Pammigbig iti Agtutubo a Kinababai [Young Womanhood Recognition] iti miting ti sakramento wenno sabali pay a miting.

Mabalin pay a bigbigen ti balligi ti maysa nga agtutubo a babai iti Bukod a Panagdur-as bayat ti panangawatna kadagiti sertipiko ti Beehive, Mia Maid, ken Laurel bayat ti yaakarna manipud iti klase a mapan iti sabali a klase.

Mabalin nga usaren dagiti miembro ti bishopric dagiti interbiuda kadagiti agtutubo a babbai tapno bigbigen ken paregtaenda ti panagdur-as ti tunggal agtutubo a babai. Ti Tracking Sheet ti Bukod a Panagdur-as dagiti Agtutubo a Babbai para kadagiti Dadaulo, a pinagtalinaed ti panguluen ti Young Women, ket mabalin a makatulong iti panangasistir kadagiti miembro ti bishopric. Nasken a kanayon a saludsoden dagiti stake president dagiti bishop maipapan iti pagimbagan ken panagdur-as dagiti agtutubo a babbai iti wardda.

Dagiti Pangiwanwan

Dagiti panggep a tun-oyen ken dawdawaten a kasapulan ti programa ket nabalabalada iti sango daytoy a libro. Mabalin a makatulong kadagiti lider dagiti sumaganad a pangiwanwan.

Dagiti Padas nga Ik-ikkan Pateg

Mabalin nga itrabaho ti maysa nga agtutubo a babai dagiti ik-ikkan pateg iti ania man nga urnos.
Malaksid iti ik-ikkan pateg ti saguday, maallukoy dagiti agtutubo a babbai a mangileppas kadagiti naidawat a kasapulan a padas nga ik-ikkan pateg sakbay ti panangaramid iti proyekto para iti dayta nga ik-ikkan pateg.

Dagiti Proyekto nga Ik-ikkan Pateg

Ti proyekto nga ik-ikkan pateg ket naisangrat a mangtulong iti tunggal agtutubo a babai a mangyaplikar iti no ania ti nasursurona manipud kadagiti padas nga ik-ikkan pateg.
Nasken a mangbubos ti maysa nga agtutubo a babai iti kababaan a sangapulo nga oras para iti tunggal proyekto nga ik-ikkan pateg. Mabalin a saan a makuenta ti isu met la a sangapulo nga oras para iti nasursurok ngem maysa a proyekto nga ik-ikkan pateg.
Mabalin nga agtrabaho a sangkamaysa dagiti agtutubo a babbai kadagiti proyektoda. Nupay kasta, nasken a mangbubos ti maysa nga agtutubo a babai iti kababaan a sangapulo nga oras ti bukodna a panawen no us-usarenna dayta a proyekto tapno ipatungpalna ti bukodna a naidawat a kasapulan iti Bukod a Panagdur-as.
Addaan iti umuna a pananganamong dagiti nagannak wenno lider ti Young Women, dagiti nasayaat a banag nga ar-aramiden dagiti agtutubo a babbai iti pagtaengan, Simbaan, pagadalan, seminary, ken iti komunidad ket mabalin a mangipatungpal kadagiti naidawat a kasapulan ti Bukod a Panagdur-as.

Panangileppas iti Bukod a Panagdur-as

No malpas ti maysa nga agtutubo a babai dagiti naidawat a kasapulan iti Bukod a Panagdur-as sakbay ti ipapanawna iti Young Women, nasken a maawis isuna a tulonganna dagiti dadduma pay nga agtutubo a babbai a mangitrabtrabaho pay laeng iti Bukod a Panagdur-as. Nasken pay a maallukoy isuna a mangitrabaho a manggun-od iti maysa nga Honor Bee wenno irugina manen ti programa.
No saan pay a nalpas ti maysa nga agtutubo a babai ti amin a naidawat a kasapulan iti Bukod a Panagdur-as sakbay ti ipapanawna iti Young Women, nasken a maallukoy isuna a mangituloy iti panagtrabahona agingga iti panangawatna iti Pammigbig iti Agtutubo a Kinababai [Young Womanhood Recognition]. Mabalin a maawis dagiti inna, lider, ken dadduma pay a pagulidanan a babbai tapno mangtulong kenkuana iti panangipatungpalna iti daytoy.

Panangsurnad ken Panagaddang

Ti Pagsuratan a Papel [Record Sheet] ti Bukod a Panagdur-as, a masarakan iti panid 77 daytoy a libro, ket gupgopenna ti aramid ti tunggal agtutubo a babai iti Bukod a Panagdur-as.
Ti Tracking Sheet ti Bukod a Panagdur-as dagiti Agtutubo a Babbai para kadagiti Dadaulo ket sidadaan pay a magun-od kas nailasin a papel a mangtulong kadagiti lider iti panangsurnadda iti panagdur-as ti tunggal agtutubo a babai (36655 864). Mabalin a mausar a mangtulong kadagiti agpada a lider ti Young Women ken priesthood iti pannakipagtrabahoda ken panangbigbigda iti tunggal agtutubo a babai.
Mabalin nga agtrabaho dagiti agtutubo a babbai iti bukodda nga addang iti programa ti Bukod a Panagdur-as, nupay kasta, nairekomenda a leppasen ti tunggal agtutubo a babai ti uray maysa laeng a padas nga ik-ikkan pateg iti tunggal bulan ken maysa a proyekto nga ik-ikkan pateg iti tunggal innem a bulan (dua ti makatawen). No rugianna ti panagtrabaho no sumrek iti Young Women iti edad a 12 ket ituloyna iti daytoy naisingasing nga addang, maileppasnanto inton 16 ti tawenna. Maaddaanto isuna ngarud iti dua a tawen a mangitrabaho a manggun-od iti maysa nga Honor Bee wenno rugianna manen ti programa kas naisingasing iti panid 83.

Panangbigbig iti Panagdur-as ti Tunggal Maysa

No malpas ti maysa nga agtutubo a babai dagiti padas ken proyekto para iti tunggal ik-ikkan pateg, awatenna ti maysa a tanda [emblem] ken ti laso ti nasantuan a kasuratan a mainaig iti dayta nga ik-ikkan pateg. Ikabilna ti tanda [emblem] iti panid ti Panagtun-oy nga Ik-ikkan Pateg ti Bukod a Panagdur-as [Personal Progress Value Achievement] ti librona (panid 78). Usarenna ti laso a kas bookmark kadagiti nasantuan a kasuratanna. Mabalin a maigunggona daytoy a pammigbig iti panagdur-asrna iti miting ti Young Women.
Tinawen, iti Young Women iti Kinalaing [Young Women in Excellence], nasken a mabigbig dagiti agtutubo a babbai kadagiti naturpos wenno naileppasda.
Ti balligi ti maysa nga agtutubo a babai iti Bukod a Panagdur-as ket mabalin pay a mabigbig bayat ti panangawatna kadagiti sertipikona iti Beehive, Mia Maid, ken Laurel bayat ti yaakarna manipud iti klase a mapan iti sabali a klase. Maigunggona dagitoy a sertipiko (Beehive, 08563 864, Mia Maid, 08565 864, Laurel, 08564 864) babaen ti panangiturong ti bishop. Bigbigenda ti panagtignay ti agtutubo a babai manipud iti maysa a grupo ti edad [age-group] a mapan iti sabali.

Young Womanhood Recognition [Pammigbig iti Agtutubo a Kinababai]

No malpas ti maysa nga agtutubo a babai ti trabahona iti amin a walo nga ik-ikkan pateg ket ininterbiun isuna ti bishop, awatenna ti Pammigbig iti Agtutubo a Kinababai [Young Womanhood Recognition]. Naglaon daytoy a pammigbig iti maysa sertipiko (36651 864) ken maysa a medalion iti man balitok wenno pirak (balitok 08602; pirak, 08603). Mabalin nga ited ti maysa a miembro ti bishopric ti Pammigbig iti Agtutubo a Kinababai iti miting ti sakramento.
Kalpasan ti panangileppas iti Pammigbig iti Agtutubo a Kinababai, mabalin nga ituloy ti agtutubo a babai ti panagdur-as babaen ti panagitrabahona a manggun-od iti Honor Bee charm (balitok, 08562, pirak, 08578; kitaen ti panid 83). Mabalin a mainggugona daytoy a pammigbig ti panagdur-asna iti maysa a miting ti Young Women.
Mabalin a gun-oden dagiti gunggona ken sertipiko babaen ti distribution center ti Simbaan nga usaren dagiti pondo ti ward, nga awan ti bayadna kadagiti agtutubo a babbai wenno dagiti nagannakda.

Dagiti Naidawat a Kasapulan iti Bukod a Panagdur-as para kadagiti Lider

Maallukoy dagiti lider a mangitrabaho iti Bukod a Panagdur-as a kaduada dagiti agtutubo a babbai. Dagiti makiraman iti programa iti Bukod a Panagdur-as ket maawatanda mismo a nasaysayaat ti programa ket mangipakitada iti nasayaat a pagwadan a suroten dagiti agtutubo a babbai. Mabalinda nga itrabaho a gun-oden ti Pammigbig iti Agtutubo a Kinababai kalpasan a:

Makapagserbida iti dagup ti makatawen kas maysa a lider ti Young Women.
Maileppasda dagiti naidawat a kasapulan a padas nga ik-ikkan pateg iti tunggal maysa kadagiti walo nga ik-ikkan pateg.
Maileppasda ti tallo a proyekto nga ik-ikkan pateg, agraman ti proyekto para iti saguday.

Pannakiraman dagiti Inna

Maawis dagiti inna a makiraman a kadua dagiti agtutubo a babbai iti panagtrabahoda a manggun-od iti Pammigbig iti Agtutubo a Kinababai. Agtrabaho dagiti inna manipud iti bukodda a libro ti Bukod a Panagdur-as ket mabalinda ti agtrabaho a manggun-od iti pammigbig a kaduada ti anakda a babai. Nairekomenda a trabahuen a gun-oden ti maysa nga anak a babai ti pammigbigna sakbay wenno kaduana ti inana.

Mabalin a leppasen dagiti inna dagiti isu met la a dawdawaten a kasapulan a kas kadagiti annakda a babbai, agraman ti:

Dumar-ay a kanayon iti miting ti sakramento (iti lugar a mabalin).
Agbiag kadagiti pagrukodan iti Para iti Pigsa dagiti Agtutubo.
Leppasen dagiti padas nga ik-ikkan pateg ken ti proyekto nga ik-ikkan pateg para iti tunggal maysa kadagiti walo nga ik-ikkan pateg.
Agsurat iti diurnal.
Agbasa a kanayon ti Libro ni Mormon.
Isuratna ti pammaneknekna maipapan iti Mangisalakan a ni Jesucristo.

Mabalin a pumili dagiti inna kadagiti nadumaduma a pagpilian para kadagiti elektib a padas nga ik-ikkan pateg ken proyekto nga ik-ikkan pateg manipud kadagiti annakda a babbai. Dagiti padas ken proyekto ket mabalin a pirmaan ken petsaan dagiti annakda a babbai, ti asawada, ti maysa a lider ti Young Women, wenno sabali pay a nataengan. Penken ti bishop a naileppasen ti amin a naidawat a kasapulan. Ti pammigbig ken ti panaggatang kadagiti kasapulan a pammigbig ket nasken a maitunos kadagiti lider ti Young Women ken ti bishopric.

Dagiti Naidawat a Kasapulan iti Bukod a Panagdur-as para kadagiti Dadduma nga Agtarigagay a Mangitrabaho iti Programa

Dagiti dadduma pay a babbai nga agtarigagay a makiraman ken mangileppas iti Bukod a Panagdur-as ket mabalinda nga aramiden daytoy babaen ti panangileppasda kadagti isu met la a naidawat a kasapulan a kas kadagiti agtutubo a babbai ken babaen ti panangtulongda iti maysa nga agtutubo a babai iti paset ti Bukod a Panagdur-asna. (Kitaen dagiti naidawat a kasapulan para kadagiti inna iti panid 92.)

Panangikaysa iti Bukod a Panagdur-as kadagiti Adalen iti Domingo ken iti Mutual

Ti panagtrabaho a sangkamaysa iti padas iti Bukod a Panagdur-as a kas paset ti maysa nga adalen iti Domingo ket makaited kadagiti dadaulo ken agtutubo a babbai iti gundaway a paglilinnawagan dagiti pagbatayan a maisursuro ken ti panangyaplikarda iti panagbiag dagiti agtutubo a babbai. Dagiti Reperensia iti Bukod a Panagdur-as ket masarakan kadagiti curriculum material ti Young Women.

Mabalin pay a paset ti Mutual dagiti aktibidad iti Bukod a Panagdur-as. Kas pagarigan, mabalin a tumulong ti amin nga agtutubo a babbai iti proyekto nga ik-ikkan pateg ti maysa nga agtutubo a babai. Ti panagtrabaho a sangkamaysa iti maysa a proyekto ket makatulong a mangparegta kadagiti agtutubo a babbai tapno agtultuloy ti panagdur-asda. Dagiti kasta nga aktibidad ket nasken a maplano a sikakararag ken sipipili tapno masigurado nga agtalinaed a personal ti programa a Bukod a Panagdu-ar para iti tungggal agtutubo a babai.

Panangibagay kadagiti Kasapulan ti Indibidual ken Lokal

Mabalin a maaramid dagiti padas nga ik-ikkan pateg ken proyekto nga ik-ikkan pateg a mayannurot kadagiti bukod wenno lokal a kasasaad, paggugusto, ken kasapulan sakbay ti pananganamong dagiti nagannak ken lider. No agaramid kadagiti ania man a panagbalbaliw wenno eksepsion para iti maysa a tao, nasken nga ibilang dagiti lider ti epekto dagita a panagbalbaliw a mabalin nga adda kadagiti dadduma pay nga agtutubo a babbai. Kalpasan ti naannad a panangibilang dagiti nagannak ken lider mabalin a maaramid dagiti panangibagay tapno maited dagiti kasapulan dagiti agtutubo a babbai nga addaan iti pagkurangan wenno limitado nga adal, tapno maited dagiti kasapulan ti kultura wenno indibidual.

No agkameng ti maysa nga agtutubo a babai iti Simbaan wenno agbalin nga aktibo iti Young Women kalpasan ti panagtawenna iti 16, dagiti naidawat a kasapulanna para iti panangileppasna iti programa iti Bukod a Panagdur-as ket:

Dumar-ay a kanayon iti miting ti sakramento (iti lugar a mabalin).
Agbiag kadagiti pagrukodan iti Para iti Pigsa dagiti Agtutubo.
Leppasenna dagiti naidawat a kasapulan a padas nga ik-ikkan pateg iti tunggal walo nga ik-ikkan pateg. (Saan a nasken a leppasenna dagiti padas nga elektib [aramidem no kayatmo])
Leppasenna ti maysa a proyekto nga ik-ikkan pateg iti tunggal maysa kadagiti walo nga ik-ikkan pateg.
Dumar-ay iti seminary (iti lugar a mabalin)
Agbasa a kanayon iti Libro ni Mormon.
Isuratna ti pammaneknekna maipapan iti Mangisalakan a ni Jesucristo.

Mabalin pay a mayaplikar dagitoy a naidawat a kasapulan kadagiti agtutubo a babbai kadagiti sabali a kasasaad kas inkeddeng dagiti lokal a lider ti Young Women.