Agtutubo
Dagiti Nasayaat nga Aramid

Dagiti Nasayaat nga Aramid

Ngarud bay-anyo nga agraniag ti silawyo iti sango dagitoy a tao, tapno makitada ti nasayaat nga aramidyo ket dayawenda ti Amayo nga adda sadi langit (3 Nephi 12:16).

Tulongakto dagiti dadduma ket bangonekto ti pagarian babaen ti nalinteg a panagserbi.

Dagiti Naidawat a Padas nga Ik-ikkan Pateg

Leppasem ti sumaganad a tallo a naidawat a kasapulan a padas nga ik-ikkan pateg. Papirmaam ken paikkam iti petsa iti naganak kenka wenno lidermo ti tunggal padas kalpasan a malpasmo.

  1. Sursuruem no apay a kangrunaan a pagbatayan ti ebanghelio ti panagserbi. Basaem ti Mateo 5:13–16; 25:34–40; Taga-Galacia 6:9–10; Santiago 1:22–27; Mosiah 2:17; 4:26; ken 3 Nephi 13:1–4. Masansan a mangted dagiti dadduma iti serbisio a mabalin a dimo madmadlaw, kas iti panangisagana kadagiti taraon, panagbasa wenno panagdengngeg kadagiti in-inaudi nga ubbing, panangritokar kadagiti lupot, wenno panangtulong iti maysa a kabsat a lalaki wenno babai. Iti uneg ti dua a lawas isuratmo iti diurnalmo dagiti di madlaw nga aramid ti panagserbi nga ipatpatungpal dagiti miembro ti pamiliam ken dagiti dadduma. Bigbigem ti panagserbida iti sumagmamano a napateg a wagas.

  2. Ti panagserbi ket maysa a napateg unay a pagbatayan ti panagbiag ti pamilia. Tumulongka nga agplano kadagiti maluto a potahe ti pamiliam, mangalaka iti taraon, ket isaganam ti dadduma a taraon iti uneg ti dua a lawas. Bayat dayta a panawen tulongam ti pamiliam nga agtitipon iti oras dagiti pannangan. Ipakaammom iti klaseyo no ania ti nasursurom.

  3. Basaem ti Mosiah 18:7–10, ket iti diurnalmo ilistam ti tallo a wagas a pakaliwliwaam iti dadduma wenno pakatulongam kadakuada a mangibael kadagiti dadagsenda. Aramidem dagiti banag iti listaam, ket ibagam iti maysa a miembro ti pamilia wenno lider maipapan iti padas ken no kasano a nagbalbaliw ti ugalim ken pannakaawatmo.

Dagiti Mainayon a Padas nga Ik-ikkan Pateg

Leppasem dagiti tallo a mainayon a padas nga ik-ikkan pateg. Mabalinmo a pilien manipud kadagiti sumaganad a pagpilian wenno isuratmo agingga iti dua a bukodmo. Nasken nga anamongan ti naganak kenka wenno lidermo dagiti insuratmo a mismo sakbay a mangrugika. Papirmaam ken paikkam iti petsa iti naganak kenka wenno lidermo ti tunggal padas kalpasan a malpasmo.

  1. Mangisuroka iti maysa nga adalen maipapan iti panagserbi iti family home evening wenno iti sabali pay nga okasion. Agusarka kadagiti ladawan, musika, pagarigan, wenno demonstrasion iti adalem. Mabalin a kayatmo nga usaren ti pagbasaan a Teaching, No Greater Call a kas pagadawan.

  2. Basaem ti Doktrina ken Katulagan 58:26–28. Mangpanunotka kadagiti wagas a mabalin ti maysa nga agtutubo a babai, kasta met a kas maysa nga asawa ken ina, a mayaplikarna daytoy a nasantuan a kasuratan iti pamiliana. Mangparnuayka iti pagtuladan ti panagserbi iti biagmo babaen ti panangpili iti maysa a miembro ti pamilia a matulongam. Agserbika iti dayta a tao iti uray laeng makabulan. Isuratmo iti diurnalmo dagiti tignaymo ken riknam maipapan iti no kasano a simmayaat ti relasionmo iti dayta a tao.

  3. Mangbuboska iti uray tallo laeng nga oras iti panangted serbisio iti dadduma a saan a miembro ti pamiliam. Agkiddawka kadagiti singasing para iti serbisio iti presidente ti Relief Society iti ward wenno branchyo wenno iti maysa a dadaulo ti komunidadyo. Kas pagarigan, mabalinmo ti agaywan kadagiti ubbing kabayatan ti idadar-ay dagiti nagannak iti templo; agummong, agaramid, wenno agpaandarka kadagiti ay-ayam wenno abalbalay para iti nursery; umawatka iti maysa a naituding nga aramiden nga agdalus iti balay a pagmimitingan; wenno agbalinka a babaonen wenno ibasaam ti maysa a tao a di makaruar iti pagtaengan gapu iti sakit ken pagkuranganna wenno kadagiti dadduma pay nga agkasapulan. Isuratmo iti diurnalmo dagiti reaksion ti tao a nagserbiam ken dagiti mabalin a panggep a tun-oyen para kadagiti gundaway iti masakbayan a panagserbi.

  4. Babaen kadagiti nasayaat nga aramidmo, makitanto dagiti dadduma ti pagwadam ket mabalin a kayatda a maammuan ti ad-adu pay maipanggep iti ebanghelio. Ikararagam ti maaddaan iti padas kas maysa a misionario. Basaem ti Mateo 24:14; 28:19; ken Doktrina ken Katulagan 88:81. Awisem ti maysa a gayyem a saan a miembro ti Simbaan wenno maysa a saan unay nga aktibo a kumuyog kenka iti maysa a miting wenno aktibidad iti Simbaan. Yam-ammom ti gayyemmo kadagiti dadduma, ket siguraduem a mairaman isuna iti aktibidad. Iburaymo ti pammaneknekmo maipapan iti ebanghelio, ken awisem isuna nga umayto manen.

Dagiti Bukod a Padas nga Ik-ikkan Pateg

Proyekto nga Ik-ikkan Pateg

Kalpasan a naileppasmo dagiti innem a padas nga ik-ikkan pateg kadagiti nasayaat nga aramid, mangpartuatka iti maysa a proyekto a mangtulongto kenka a mangsanay iti nasursurom. Nasken a maysa daytoy a napateg nga aramid a mangbubos iti uray sangapulo laeng nga oras a mangileppas. Sikakararag a dawatem ti pannarabay ti Espiritu Santo tapno pumili iti maysa a napateg a proyekto.

Paanamongam iti naganak kenka wenno lidermo ti proyekto sakbay a mangrugika. Mangisuratka iti ebalwasion kalpasan ti panangileppasmo. Adda iti baba dagiti sumagmamano a kapanunotan para iti maysa a proyekto nga ik-ikkan pateg.

  • Tumulongka nga agplano ken makiraman iti maysa a proyekto nga agdalus wenno mangpapintas iti komunidadyo.

  • Agsaganaka nga agbalin a maysa nga agtagibalay babaen ti panangurnongmo kadagiti resipe, pannakitienda iti taraon, ken panangisagana iti taraon para iti pamiliam.

  • Makipagtrabahoka iti maysa a miembro ti pamilia tapno agummong iti nagnagan ti sumagmamano a pimmusayen a kakabagian a saan a miembro ti Simbaan. Ammuem dagiti petsa ti pannakayanak ken ipupusayda ket isaganam dagiti nagnaganda a maipan iti templo. Tumulongka nga agplano iti maysa a panagbiahe iti templo ken aramidem dagiti panagbuniag para kadagita a kabagian.

  • Agsaganaka nga agserbi kadagiti sabali babaen ti panangawat iti panagsanay para iti maysa a paglaingan nga usarem kadagiti saan a mapakpakadaan a pasamak, kas iti umuna a tulong [first aid], panangpasubli iti puot ti tao, wenno dagiti paglaingan iti panangispal iti biag.

  • Agserbika kadagiti dadduma. Agboluntarioka iti komunidad, agummongka kadagiti banag a mangipaay kadagiti kasapulan a makatao, mangbuboska iti napaut a panawen iti panangtulong a mangaywan iti ubing wenno baket wenno lakay, wenno mangisuroka iti pagadalan wenno iti komunidadyo.

Ti proyektok ket:

Ti planok a mangaramid iti proyektok ket:

Pannakaanamongna

Napattapatta a petsa ti pannakaileppas

Ti ebalwasionko iti proyekto ket (iramanmo no kasano ti panagriknam ken no kasano a dimmur-as ti pannakaawatmo kadagiti nasayaat nga aramid):

Pirma ti naganak wenno lider

Petsa

Dagiti oras a nabubos