Pakagupgopan ti Young Women

Panggep ti Bukod a Panagdur-as

Ti Bukod a Panagdur-as ket tulongannakanto a mangpapigsa iti pammatim ken pammaneknekmo ken ni Jesucristo bayat ti panagsursurom kadagiti pannursurona ken kanayon a panangyaplikarmo kadagitoy iti panagbiagmo. Daytoy ti mangtulongto kenka a mangpapigsa iti agpada nga agdama a pamiliam ken ti masakbayan a pamiliam. Daytoy ti mangtulongto kenka nga agsagana a mangaramid ken agtungpal kadagiti sagrado a katulagan ken umawat kadagiti ordinansa ti templo. Ken daytoyto ti mangisagana kenka nga agbalin a napudno, tumultulong a miembro ti Ti Simbaan ni Jesucristo dagiti Santo iti Ud-udina nga Aldaw.

Ti programa ti Bukod a Panagdur-as ket ar-aramatenna ti walo nga ik-ikkan pateg ti Young Women tapno makatulong kenka a mangawat a naan-anay no asinoka, no apay nga addaka ditoy daga, ken no ania ti nasken nga ar-aramidem kas maysa nga anak a babai ti Dios tapno makapagsaganaka para iti aldaw a papanmo iti templo tapno agaramid kadagiti sagrado a katulagan. Daytoy ti mangtulongto kenka nga agsagana para kadagiti masakbayan nga akemmo kas maysa a napudno a babai, asawa, ina, ken dadaulo iti pagarian ti Dios. Ti pannakiramanmo iti Bukod a Panagdur-as ket mangisuro kenka nga agaramid kadagiti panagkumit, mangipatungpal kadagitoy, ken mangireport iti panagdur-asmo iti maysa a naganak wenno lider. Dagiti pagtuladan nga ipasdekmo bayat ti panangitrabahom iti Bukod a Panagdur-as—kas iti panagkararag, panagadal iti nasantuan a kasuratan, panagserbi, ken panagsurat iti diurnal— ket agbalinto nga inaldaw a kaugaliam. Dagitoy nga ugali ti mangpapigsanto iti pammaneknekmo ken mangtulongto kenka nga agsursuro ken dumur-as iti unos ti panagbiagmo.

Dagiti Naidawat a Kasapulan

Tapno maileppas ti programa ti Bukod a Panagdur-as, kasapulamto ti:

Dumar-ay a kanayon iti miting ti sakramento (iti lugar a mabalin).
Agbiag kadagiti pagrukodan iti Para iti Pigsa dagiti Agtutubo.
Mangileppas kadagiti padas nga ik-ikkan pateg ken proyekto nga ik-ikkan pateg para iti tunggal maysa kadagiti walo nga ik-ikkan pateg.
Agsurat iti bukod a diurnal.
Dumar-ay iti seminary wenno makiraman iti kabukbukodan a panagadal (iti lugar a maang-angay daytoy).
Mangbasa a kanayon iti Libro ni Mormon.
Mangisurat iti pammaneknekmo maipapan iti Mangisalakan a ni Jesucristo.

Kalpasan ti panangileppasmo kadagitoy a naidawat a kasapulan, maikarikanton nga umawat iti Pammigbig iti Agtutubo a Kinababai (Young Womanhood Recognition) kalpasan ti pananginterbyu kenka ti bishop wenno branch presidentmo maipapan iti pannakaikarim.

Panangirugi

Mabalinmo nga irugi ti panangitrabahom iti programa ti Bukod a Panagdur-as iti edad a 12 wenno iti panawen ti panagbuniagmo no agtawenka iti nagbaetan ti 12 ken 18. Dagiti agtutubo a babbai a saan a miembro ti Ti Simbaan ni Jesucristo dagiti Santo iti Ud-udina nga Aldaw ket maawis met a makiraman.

Bayat ti panangirugim, awatemto ti maysa a kuentas a silaw [torch] nga addaan iti daytoy iti logo ti silaw [torch] ti Young Women. Ti panangusarmo iti daytoy a kuentas ket mangipakita iti panagkumitmo a mangitag-ay iti silawmo ken mangitakder iti kinapudno ken kinalinteg.

Awisem dagiti nagannak kenka tapno tulongandaka iti panagplano ken panangileppas iti programa ti Bukod a Panagdur-as. Ti panangibinglaymo kadagitoy a padas ket makapapigsa kenka iti relasionmo kadakuada. Mabalin ni nanangmo wenno ti sabali pay a pagulidanan a babai ti makipagtrabaho kenka iti Bukod a Panagdur-as, ket agpadakayo a makagun-od iti Pammigbig iti Agtutubo a Kinababai [Young Womanhood Recognition]. Mabalinmo nga ibagay dagitoy a padas ken proyekto a maibatay kadagiti bukodmo a kasasaad, paggugusto, ken kasapulam kalpasan ti pananganamong ti maysa a naganak, lider ti Young Women, wenno sabali pay a nataengan.

Ti Bukod a Panagdur-as ket mabalin a paset dagiti nasayaat a banag nga ar-aramidem iti pagtaengan, simbaan, pagadalan, seminary, ken iti komunidad. Usarem ti indeks ti topiko iti likud daytoy a libro tapno mangsapul kadagiti nalawag a topiko a kaay-ayom ken tapno masursurom no kasano ti pannakausarda a kas paset ti Bukod a Panagdur-as. Laglagipem nga ikkam ti bagim iti pammadayaw para iti amin a nasayaat a banag nga aramidem iti tunggal aldaw. “Babaen dagiti babassit ken gagangay a banag agbalindanto a dadakkel a banag” (Alma 37:6).

Dagiti Pangiwanwan

Leppasemto ti innem a padas (tallo ti kasapulan ken tallo ti elektib [aramidem no kayatmo]) ken maysa a proyekto nga agpaut iti sangapulo nga oras iti tunggal maysa iti umuna a pito nga ik-ikkan pateg ti Young Women. Para iti ik-ikkan pateg ti saguday, leppasemto ti uppat a naidawat a kasapulan a padas ken ti kasapulan a proyekto ti panagbasa iti Libro ni Mormon. Mabalinmo nga irugi iti ania man nga ik-ikkan pateg ket itrabahom iti ania man a panagsasaganad.

No naileppasmon ti maysa a padas nga ik-ikkan pateg wenno proyekto nga ik-ikkan pateg, ulitem nga adalen daytoy a kaduam ti maysa a naganak, lider, wenno sabali pay a nataengan. Papirmaam iti dayta a tao ti naileppas a padas iti librom a Bukod a Panagdur-as. Irekordmo ti panagdur-asmo iti Papel a Pagsuratan [Record Sheet] iti Bukod a Panagdur-as (kitaen iti panid 77).

Dagiti Padas nga Ik-ikkan Pateg

Nairekomenda nga ileppasmo dagiti naidawat a kasapulan a padas iti maysa nga ik-ikkan pateg sakbay a mapanka kadagiti padas nga elektib [aramidem no kayatmo] iti dayta nga ik-ikkan pateg.
Kadagiti elektib [aramidem no kayatmo] a padas nga ik-ikkan pateg, mabalinmo ti mangisurat agingga iti dua kadagiti bukodmo a padas iti tunggal ik-ikkan pateg wenno balbaliwam dagiti naited a padas tapno maiyannurot kadagiti bukodmo a pagesman, panggep a tun-oyen, wenno kasasaad. Paanamongam dagitoy iti maysa a naganak, lider, wenno sabali pay a nataengan sakbay a mangrugika.

Dagiti Proyekto nga Ik-ikkan Pateg

Leppasem dagiti naidawat a kasapulan a padas iti maysa nga ik-ikkan pateg sakbay ti panangirugi iti proyekto iti dayta nga ik-ikkan pateg, malaksid iti ik-ikkan pateg ti saguday. Mabalinmo a rugian ti panagbasa iti Libro ni Mormon iti ania man nga oras.
Paanamongam iti maysa a naganak, lider, wenno sabali pay a nataengan ti tunggal proyekto nga ik-ikkan pateg sakbay a mangrugika.
Mabalinmo nga awisen dagiti dadduma a tumulong kenka kadagiti proyektom nga ik-ikkan pateg ngem nasken nga agpaut ti tunggal proyekto iti saan a nababbaba ngem sangapulo nga oras ti bukodmo a panawen.

Panagaddang ken Pammigbig

Mabalinmo ti agtrabaho iti kabukbukodam nga addang, ngem nasken a kanayon nga itrabahom ti uray maysa laeng a padas wenno proyekto. Nairekomenda ti sumaganad:
- Leppasem ti uray maysa laeng a padas iti makabulan ken maysa a proyekto iti tunggal innem a bulan (dua a proyekto iti makatawen).
- Kanayon a dumar-ayka iti miting ti sakramento ken makiramanka iti seminary (iti lugar a maang-angay dagitoy].
- Makipagkitaka iti maysa a miembro ti bishopric iti uray maminsan laeng iti makatawen tapno ilawlawagmo ti balligim iti Bukod a Panagdur-as, dagiti panagkagumaanmo nga agbiag kadagiti pagrukodan iti Para iti Pigsa dagiti Agtutubo, ken ania man a dadduma pay a saludsod a mabalin nga adda kenka.
No naileppas aminen dagiti padas ken ti proyekto iti maysa nga ik-ikkan pateg, bigbigento ti lidermo ti naturposmo iti miting ti Young Women ket isagutannakanto iti maysa a tanda [emblem] a maikabil iti panid ti Panagtun-oy nga Ik-ikkan Pateg iti Bukod a Panagdur-as [Personal Progress Value Achievenment] iti daytoy a libro (kitaen iti panid 78) ken maysa a laso [ribbon] a maikabil kadagiti nasantuan a kasuratam.
Addaankanto iti gundaway a mangibinglay kadagiti naturposmo iti Bukod a Panagdur-as iti tinawen iti Young Women in Excellence [Agtutubo a Babbai iti Kinalaing].
Mabalin pay a mabigbig ti balligim iti Bukod a Panagdur-as inton awatem dagiti sertipikom iti Beehive, Mia Maid, ken Laurel bayat ti yaakarmo manipud iti klase a mapan iti sabali.

Panangileppas iti Bukod a Panagdur-as

No naileppasmon ti amin a padas nga ik-ikkan pateg ken proyekto ti Bukod a Panagdur-as, isuratmo ti pammaneknekmo maipapan iti Mangisalakan a ni Jesucristo iti panid 79. Subliam nga adalen ti benneg a “Pammigbig iti Agtutubo a Kinababai [Young Womanhood Recognition]” iti daytoy a libro a kaduam ti maysa a naganak, lider , wenno sabali pay a nataengan (panid 76). Kalpasanna magpaiskediul iti interbyu iti bishopmo tapno mapirmaanna ti rekomendasion iti panid 82 ken makipagurnos para iti pannakaited kenka ti sertipikom ti Pammigbig iti Agtutubo a Kinababai [Young Womanhood Recognition] ken ti medalionmo.
Nairekomenda nga itrabahom ti Bukod a Panagdur-as iti unos ti panawenmo iti Young Women, uray kalpasan a nagun-odmon ti Pammigbig iti Agtutubo a Kinababai [Young Womanhood Recognition]. Dagiti singasing iti no kasano nga itultuloy ti panagdur-as ket adda iti benneg nga “Ania ti Aramidek No Malpasko ti Bukod a Panagdur-as?” (panid 83). Subliam nga adalen daytoy a kaduam ti maysa a naganak, lider, wenno sabali pay a nataengan. Mabalin a piliem a gun-oden ti Honor Bee charm nga ikabil iti kuentasmo a kadua ti medalionmo, wenno mabalinmo nga irugi manen ti sibubukel a programa. Maallukoyka pay a mangtulong iti dadduma pay nga agtutubo a babbai iti Bukod a Panagdur-asda. Babaen ti panangitultuloymo iti panagdur-asmo, agtalinaedkanto iti dalan nga agturong iti templo ken padur-asemto dagiti kababalin a mangtulongto kenka iti unos ti panagbiagmo.