Agtutubo
Pannakaammo

Pannakaammo

Agadalkayo, uray pay ti panagadal ken pammati (DkK 88:118).

Itultuloyko ti agsapul kadagiti gundaway para iti panagsursuro ken panagdur-as.

Dagiti Naidawat a Kasapulan a Padas nga Ik-ikkan Pateg

Leppasem dagiti sumaganad a tallo a naidawat a kasapulan a padas nga ik-ikkan pateg. Papirmaam ken paikkam iti petsa iti naganak kenka wenno lidermo ti tunggal padas kalpasan a malpasmo.

  1. Sursuruem ti maipapan iti kinapateg ti pananggun-od iti pannakaammo babaen ti panangbasa iti Dagiti Proverbio 1:5; 4:7; 2 Nephi 28:30; ken Doktrina ken Katulagan 88:78–80, 118; 90:15; 130:18–19; 131:6. Panunotem no apay a kasapulam ti manggun-od iti pannakaammo ken pannakaawat maipapan iti no kasano a mayaplikar iti biagmo dagiti pagbatayan ti ebanghelio iti agdama ken masakbayan a pagtaengam ken pamiliam. Isuratmo iti diurnalmo no ania ti nasursurom maipapan iti pannakaammo, ket ilawlawagmo daytoy iti miembro ti pamilia wenno lider iti Young Women.

  2. Iti diurnalmo ilistam dagiti talento nga adda kenka ken dadduma pay a kayatmo a padur-asen. Basaem ti Mateo 25:14–30. Mangsursuroka iti maysa a baro a paglaingan wenno talento a mangtulongto kenka a mangasikaso iti bukodmo a masakbayan a pamilia wenno pagtaengan (kas pagarigan, panagtokar iti piano, panagkanta, panagbadyet, panangimaton iti oras, panagluto, panagdait, wenno panagaywan iti ubing). Ibinglaymo iti pamiliam, klasem, wenno lidermo iti Young Women no ania ti nasursurom.

  3. Yulom ti maikasangapulo-ket-tallo a Pagannurotan ti Pammati ket isaom daytoy iti maysa a naganak, lider, wenno sabali pay a nataengan. Kalpasanna pasiarem ti maysa a museo wenno eksibit wenno dumar-ayka iti maysa a pabuya a pakairamanan ti sala, musika, bitla, wenno drama. Iti panangusar iti daytoy a pagannurotan ti pammati kas maysa a pangiwanwan, amirisem no ania ti nakitam ken nangngegam. Iti diurnalmo isuratmo dagiti kapanunotam maipapan iti no kasano ti panangusarmo iti daytoy a pagannurotan ti pammati kas pangiwanwan para iti amin nga aramidem tapno ti Espiritu Santo ti agbalinto a kanayon a kaduam. Ibinglaymo dagidiay a kapanunotan iti maysa a naganak wenno lider.

Dagiti Mainayon a Padas nga Ik-ikkan Pateg

Leppasem dagiti tallo a mainayon a padas nga ik-ikkan pateg. Mabalinmo a pilien manipud kadagiti sumaganad a pagpilian wenno isuratmo agingga iti dua a bukodmo. Nasken nga anamongan ti naganak kenka wenno lidermo dagiti insuratmo a mismo sakbay a mangrugika. Papirmaam ken paikkam iti petsa iti naganak kenka wenno lidermo ti tunggal padas kalpasan a malpasmo.

  1. Pumilika iti maysa a pagbatayan ti ebanghelio a kayatmo a maawatan a nasaysayaat (kas pagarigan, pammati, panagbabawi, panangngaasi, dagiti agnanayon a pamilia, wenno dagiti katulagan iti panagbuniag). Basaem dagiti nasantuan a kasuratan ken dagiti balikas dagiti propeta iti ud-udina nga aldaw a mainaig iti pagbatayan. Mangisaganaka iti bitla nga agpaut iti lima a minuto maipapan iti topiko ket itedmo ti bitla iti miting ti sakramento, iti miting ti Young Women, iti pamiliam, wenno iti klaseyo. Isuratmo iti diurnalmo no kasano a mayaplikar daytoy a pagbatayan ti ebanghelio iti biagmo.

  2. Ammuem ti maipapan iti maysa a benneg ti trabaho wenno serbisio a pagesmam. Kasaritam ti maysa a tao nga agtartrabaho iti dayta a tay-ak ket ammuem no ania dagiti pagrebbengan iti trabaho dayta a tao, ania ti nagun-od a panagsanay wenno edukasion ti tao tapno maaramidna ti trabaho, ken no ania dagiti maitulong ti trabaho daytoy a tao iti kagimongan. Isuratmo dagiti naammuam iti diurnalmo.

  3. Yulom ti dua kadagiti paggugustom a himno manipud iti libro dagiti himno. Sursuruem ti umno a pagtuladan ti panagikumpas kadagiti himno (kitaen iti Hymns, 383–85) ket kalpasanna ikumpasmo dagitoy iti uray mamindua laeng a daras iti maysa a family home evening, iti maysa a miting ti Young Women wenno iti dadduma pay a miting ti Simbaan, wenno iti seminary. Basaem dagiti nasantuan a kasuratan a nailista iti baba ti tunggal himno.

  4. Iti kampo ti Young Women masursurom dagiti paglaingan iti umuna a tulong [first aid], kinatalged, kinadalus, ken panagtalinaed a sibibiag. Subliam nga adalen dagitoy a pannursuro iti Young Women Camp Manual ket ilistam iti diurnalmo no kasano a mayaplikarmo dagitoy iti pagtaenganyo tapno mapagtalinaed a natalged ti pamiliam. Mangaramidka iti maysa a listaan dagiti kangrunaan nga abasto a kasapulanto ti pamiliam iti panawen ti pasamak a di mapakpakadaan. Mangisuroka iti maysa nga adalen iti family home evening wenno ibinglaymo iti maysa a lidermo ti Young Women no ania ti nasursurom ken no ania dagiti mainayon a panglaingan a kayatmo a sursuruen tapno makapagsaganaka para kadagiti pasamak a di mapakpakadaan.

Dagiti Bukod a Padas nga Ik-ikkan Pateg

Proyekto nga Ik-ikkan Pateg

Kalpasan a naileppasmo dagiti innem a padas nga ik-ikkan pateg iti pannakaammo, mangpartuatka iti maysa a proyekto a mangtulongto kenka a mangsanay iti nasursurom. Nasken a napateg daytoy nga aramid a mangbubos iti uray sangapulo laeng nga oras a mangileppas. Sikakararag a dawatem ti pannarabay ti Espiritu Santo tapno pumili iti maysa a napateg a proyekto.

Paanamongam iti naganak kenka wenno lidermo ti proyekto sakbay a mangrugika. Mangisuratka iti ebalwasion kalpasan ti panangileppasmo. Adda iti baba dagiti sumagmamano a kapanunotan para iti maysa a proyekto nga ik-ikkan pateg.

  • Sursuruem no kasano ti agurnos, agdalus, ken mangpatalinaed a nadalimanek ti maysa a pagtaengan manipud ken ni nanangmo, lelangmo, wenno sabali pay a babai a raraemem. Kalpasanna yaplikarmo no ania ti nasursurom iti pagtaenganyo.

  • Agsaganaka para iti nangatngato nga edukasion ken pananggun-od kadagiti paglaingan a dawdawaten dagiti agpatrabaho babaen ti panangammo maipapan kadagiti dawdawaten a kasapulan tapno makastrek iti kolehio wenno pagadalan iti negosio, iskolarsip, matrikula, ken dadduma pay a paggastuan. Agaplayka para iti iseserrek no maitutop.

  • Basaem ti Doktrina ken Katulagan 89. Panunotem no ania ti mabalinmo nga aramiden tapno agbalin a nasalsalun-at ti bagim. Pasayaatem ti salun-atmo babaen ti panangparnuay ken panangipatungpalmo iti maysa a kadawyan a programa ti panangpapigsa ken panagsursuro nga agluto ken mangan iti taraon a paset ti nasalun-at a pannangan.

  • Sursuruem ti maipapan iti umno a panangistimar iti lupot, agraman ti no kasano ti aglaba, agplantsa, ken agaramid kadagiti simple a panagtarimaan ken panangbalbaliw. Yaplikarmo dagiti paglaingan a nasursurom babaen ti panangistimarmo iti lupotmo.

  • Katulongmo ni nanangmo, lelangmo, wenno sabali pay a babai iti ward wenno branchmo, sanayem a naimbag ti paglaingan iti panangimaton iti pagtaengan nga isursurona kenka.

Ti proyektok ket:

Ti planok a mangaramid iti proyektok ket:

Pannakaanamongna

Napattapatta a petsa ti pannakaileppas

Ti ebalwasionko iti proyekto ket (iramanmo no kasano ti panagriknam ken no kasano a dimmur-as ti pannakaawatmo iti pannakaammo):

Pirma ti naganak wenno lider

Petsa

Dagiti oras a nabubos